معاي قبول غير مشروط

السلام عليكم اختي الفرنسية

اول شي الله يوفقك في تكملة دراستك ... بس تى اللي اعرفه انه صار الالتحاق بالبعثة الان معقد يعني موب زي اول

ثاني شي لازم تمرين على وزارة التعليم العالي وتعطينهم خبر عن خروجك واللي اعرفه انهم يعطونك ورقة او شي مثله يثبت انك خرجتي بعد اخبارهم (عدم وجود هذي الورقة يعقد التحاقك بالبعثة اكثر واكثر) .. هذي الورقة كانت تعطي للطلاب زمان بس الان ما عندي خبر اذا كانوا الغوها

بخصوص الفيزا ... تقدرين تاخذين فيزا دراسية اذا كان معك قبول جامعة ومعهد لغة وايضا زوجك ياخذ فيزا مرافق (ما اعرف ايش يسمونها) وابنك بطبيعة الحال اذا اخذتي انتي فيزا فـ من حقوقه انه يجي معاكي اذا كان قاصر بـ صفتك امه

انا على وقتي كانت اجراءات الفيزا سهلة وكانت السفارة الفرنسية متعاونة جدا جدا مع الطلاب ... بس اللي افهمه من شكاوى الشباب هنا في الموقع ان القنصل الجديد عقد الموضوع شوي

من ناحية المرافق ... اذكر كان معنا بنت في السنة الاولى وعطوها هي (مثل كل باقي الطلاب) فيزا 3 شهور (لانه بعد 3 شهور لازم تقدمين على الاقامة) ولكن اذكر انهم اعطوا ابوها 22 يوم بس ورفضوا يجددون له !!! ... لكنه رجع للسعودية وقدم على فيزا سياحية لايطاليا واعطوه سنة كاملة (وانتي اكيد عارفه ان نظام الشنقل مريح من ذي الناحية) اما الان ما ادري عنهم للاسف

وبعدين اتوقع اكيد راح يصير وضعك افضل لانه زوجك بينهما هذيك كان ابوها وهي فوق الـ 18 سنة !!! لكن لا مانع من الاستفسار من السفارة بالرياض اول شي

بالتوفيق لك ولعائلتك الكريمة

يعطيك العافية اخوي مباري على المرور والاجابة الشافية..ويارب توفق الجميع..

اوكي انا طالعة على حسابي ومعاي قبول غير مشروط...لازم قبول معهد لغة؟؟ الجامعة ماعندها مشكلة ابدا معاها على طول مو لازم اقدم لها شهادة من معهد لغة.. ياريت احد يقدر يجاوبني على هالمعلومة..واذا لازم لغة ممكن اقدر اخذ شهر شهرين بالكثير ولا لازم مدة معينة؟؟

اهلا اختي فرنسية

والله بخصوص انه الزامي معهد ولا لأ ... انا موب متأكد بالضبط ... لان الجامعة اعطتك قبول غير مشروط وهذا يدل والله اعلم انك درستي بكالوريوس لغة فرنسية بالسعودية

لكن بس حبيت انبهك اختي بس على شي بسيط ... حتى لو انتي ماخذه بكالوريوس فرنسي بالسعودية فـ اتوقع ان شهر او شهرين لغة في فرنسا قليلة جدا ... ترى الشعب الفرنسي يتكلم بـ لغة سريعة جدا جدا ... يعني انتي الان تكتبين وتقرأين مزبوط لكن من ناحية الفهم (بالكلام) راح تواجهين صعوبات (اتوقع كذا)

حنا هنا في فرنسا ما بدينا نفهم نص ونص مع الفرنسيين الا بعد سنة كاملة تقريبا وحنا في وسط فرنسا ومع عائلات فرنسية !!! ... يعني على سنة بدينا ناخذو نعطي مع الشعب ...فـ اهم شي تحسين انك فاهمة مزبوط باللغة (يعني لو تحسين انك وصلتي مستوى 50% فـ كذا تمام التمام)

بالتوفيق

الف شكر اخوي باري على المتابعة والرد ..


بس من جد انا مره مره مره مصدومة ومحبطة انا امس مريت على التعليم العالي وقالو لي مافي التحاق الا لما تدرسين لغة وتدرسين ترم كامل وتجيبين اقل شي 3.3 من 4 بعدين نفكر نضمك.....كلام محبط جدا بصراحة ويقول لازم تخلصين 9 ساعات!!!! انا مدري الترم ندرس فيه بس 9 ساعات؟؟؟!!! انا مقبولة ماستر 1


من جدا مره احبطت واحتمال كبير مااروح لاني مااضمنهم هاللي كل يوم لهم كلام...



رجااااااااااااااااء اللي عنده خبر يطمن يفيدني...ينفع اروح او لا؟؟ وهل النظام يسمح ادرس لغة 3 شهور وبعدين جامعة؟؟ وكم يكلف دراسة اللغة 3 اشهر علما اني مقبولة في جامعة روان؟؟يعني اي معهد او معهد الجامعة كم يكلف؟؟

اهلا وسهلا اختي

اولا ... كويس انك عطيتيني خبر انك مقبولة في master1 ... لانه على حسب معلوماتي ان برنامج الماستر 1 لا يوازي شهادة الماجستير عندنا في السعودية ... اذا اخذتي شهادة الـ master2 فـ اعرفي ان خلصتي الماجستير !!! ... يعني اذا برنامجك ماستر 1 بس ... فـ تراك ما تدرسين ماجستير وانما شهادة بين البكالوريوس والماجستير مايرونها شي ربعنا اللي بالسعودية ... فـ انتبهي كثير على ذي الخطوة ... لانه حرام تجين تدرسين ماستر1 بس وترجعين وكأنك ماسويتي شي

بمناسبة انهم طلبوا نتم 3,3 من 4 فـ تراها صعبة على ما أظن ... في الطب عندنا دائما متوسط الدرجات نازل جدا جدا لان المناهج صعبة ... فـ مثلا الاول على دفعة الطب السنة الماضية في كليتي اخذ 14 من 20 يعني 70% وهو الاول !!!!! ... لكني ما اعرف شي عن التخصصات الثانية بس حبيت اعطيك فكرة بسيطة

وبخصوص اللغة ... اذكر ان معهد institut de torainne كان ياخذ 2000 يورو وشوي على 3 شهور (هذا العام الماضي) بس دائما وابدا انا انصح في معهد groupe de sup de co في مدينة la rochelle (لاروشيل) ... المعهد روعة والمدينة اروع ... فـ اذا فكرتي فيه فـ اقدر اعطيك رقم المشرفة على طلاب العالم العربي ... حرمه مغربية حبوبة مرة وتتكلم عربي كويس

بالتوفيق اختي ... ولا تنسين صلاة الاستخارة

الف شكر اخوي مباري على الاهتمام والرد

بالنسبة لماستر 2 انا باذن الله لازم اكمل 1 و2 لاني عارفة ان بالسعودية يعادل الماجستير ..

بالنسبة لقبولي بالجامعة انا جبت من جامعة روان وهي عندها معهد وفي المدينة معاهد ثانية مدري احد قد درس فيها ويعرف مستواها؟؟

بالنسبة لمدينة روشيل هل هي في مستوى روان؟من ناحية جمال المدينة؟؟التكاليف؟؟مستوى المعاهد؟؟سهولة السكن؟؟

اذا تكلفة 2000 يورو 3 شهور يعني تقريبا 10000 ريال ..مقدور عليها بس هل مستوى المعهد كويس؟؟انا احس ادرس في معهد نفس المدينة احسن عشان السكن مره وحدة واستقر قبل الدراسة في المدينة وتصير الجامعة قريبة اقدر اراجعها وامر عليها غير لما اكون في مدينة ثانية..؟؟ او لا؟؟


انا لما قريت بروفايل المعهد اللي بروشيل فهمت انه متخصص بلغة الادارة وانا تخصصي علوم انسانية؟؟مدري عندك فكرة عن المعهد انه متخصص بس في المصطلحات الادارية؟؟

الله يوفقنا جميعا ويحفظنا واحنا في بلاد الغربة..ادعو لي ربي يسهل امري

العفو يا اختي

بخصوص معهد روان فـ ماعرف وش معهدك بس اذكر ان الملحقية في اول سنة ابتعثوا طلاب لـ معهد في روان (اظنه معهد الجامعة نفسها) وكان سيء سيء سيء سيء ... حتى من سوءه ان الملحقية وقفت ابتعاث الطلاب عليه من طريقها

اذكر ان الطلاب بعد دراستهم فيه 8 شهور كانوا تقريبا في مستوى طلاب المدن الثانية بعد 3 - 4 شهور بس !!!! فـ انتبهي كثير منه

من ناحية مدينة لاروشيل فـ مشكلتي اني ماقد زرت مدينة روان لكن المدينة مرررررة حلوة وسياحية جدا (على الساحل الغربي وكثير يجون الانجليز زيارات ابو 4 - 5 ايام لانه تذكرتها الى لندن اقل من 100 يورو) فـ المدينة حلوة وسياحية لابو اسبوع بس لان مشكلتها انها موب كبيرة ... واللي لاحظته ... كل مارحتي للجنوب الغربي لـ فرنسا ... تزداد طيبة الناس وتقل العنصرية وهذا الشي لاحظته في لاروشيل وبوردو (اهل لاروشيل اطيب) ... على فكرة ترى مدينة روان شمال فرنسا ... وكل مارحتي شمال يزود البرد وتزود جفاسة الناس بالتعامل (تقدرين تقولين بدو فرنسا )

من ناحية معهد لاروشيل فـ هو اصلا معهد تدريس الادارة والبزنس ويعتبرون تدريس اللغة برنامج ثانوي في المعهد ... لكني انا انصحك انك تتصلين عليهم وتستفسرين اذا كان المدرس فيليب اوجيه راح يدرسك فـ توكلي على الله لانه مدرس خطيييييييييير لابعد الحدود تأكدي لانه بين يدرس بالاصل في لاروشيل وكم شهر بـ السنة يروح لـ رويان (موب روان)

انا عن نفسي جربت 3 معاهد :
groupe de sup de co في لاروشيل ... وهذا انصح فيه جدا ... مدينة حلوة
BLS في مدينة بوردو ... وهذا ما انصح فيه ابد (سيء) ... مدينة كئيبة نوعا ما بس كبيرة والديار الصغيرة اللي حوله كويسه
institut de torainne في مدينة تور ... معهد جيد الى جيدجدا (برأيي) ... مدينة صغيرة وكئيبة جدا (يوم اقول الفين وشوي تراي ما اعرف كم هي الشوي ذي يمكن تصير 500 او 600 تراي مدري كم والله)

ما زلت اكرر ... لاتنسين صلاة الاستخارة ... تجربتي في مكان انها ناجحة ما تعني 100% نجاحك في نفس المكان والعكس ... فـ اطلبي الخيرة من ربك عشان ترتاحين وتوقنين ان اللي قدامك هو الخير حتى لو ما اعجبك

بالتوفيق

بونسوواااااررر لاحلى منتدى واحلى مبتعثين..

كيفكم جميعا؟؟ الله يسهل اموركم جميعا ...

الحمدلله انا تقريبا اموري تسهلت ..وجالسة الحين اختار معهد اللغة..

انا ابي بصراحة مدينة بشرق فرنسا..ولا ابي مدينة فيها شواطئ..حاطه ببالي معهد بيزانسون بس مالقيت معلومات عنه كفاية..هل ممكن احد يفيدني؟؟

انا دراستي علوم اللغة وسمعت انه معهد بيزانسون يدرس فيه غالبا الطلبة اللي تخصصهم تسويق هل صحيح؟؟

كيف مدينة بيزانسون؟؟ اسعار السكن والمعيشة ؟؟ هل هي في مستوى مدينة روان في غرب فرنسا؟؟