جزء من المـــــخ مـفقــود!!!!!!

السلام عليكم ورحمة الله وبركاته
وبعد.












قرأت مقال كتب من احد الاعضاء يقول البعثات شهر 7
وحرك هذا المقال صماصيم البطين الايسر من قلبي وفصل سلك في دماغي
واصبحت بهذا اليوم (جزء من المخ مفقوووووود)
والله العظيم ياشباب تاريخ الضمان المالي عندي من شهر سبعه العام الماضي
وانا ادابك من مكان لي مكان ومن حائل للرياض والعكس ومخالفات سرعه ومخالفه استهزاء برجال الامن من كثر ما اتعدى نقطة تفتيش وانا افكر بالبعثه ومخالفه اعتقد اول واحد ياخذها بالسعوديه انا وهي (عدم استخدام انوار التلاقي) وصرفيات ومكاتب قبول ومراسلات وترجمه وشغال على النت باليوم 10 ساعات اذا كنت مشغول ذاك اليوم وتركت وضيفتي حسبي الله عليهم هذا من غير العامل النفسي بس ابشركم باقي فيني جزء من المخ ولله الحمد اللي هو انشالله يبي يصبرني الى شهر اربعه !!!!!!!!!!!!!!!!
انتظروني في شهر اربعه سوف اذهب الى هذه الوزارة واذا لم تصدر لي قرار اتمنى تزوروني بمستشفى النفسيه لاني بقطع ثيابي وشهاداتي وشوشتي:gr_896: عليهم واكيد بهذي تمشي امورك بسرعه على طول يحولوك للمستشفى بدون واسطه ابشركم بس الواسطه بالسرير ابي غرفه لحالي وتكفوون اللي حولي يشيل جوازي اهم عندي من الشهاده لايضيع !!
لاكن انشالله انشالله انشالله مايروووح تعبنا هدر قولوا اميـــــــــــــــــــــن.
هالحين كل واحد من الاصدقاء او الجماعه كل مايشوفوني طالع بوجيههم انا وخشتي
يقول افا والله احسبك مشيت حتى صرت هالحين اصلي بمسجد بعيد عن الحاره واركب سيارتي وادقه لطمه علشان مايسألوني عن بعثتي حتى كليتي رحت اصدق شهاداتي ومسكوا رؤؤسهم الدكاتره وواحد منهم يقول ماشالله متى الوصول على باله خلصت المعهد وجيت مايدري اني اقلب صوابري على لوحة المفاتيح اللي غيرتها سبع مرات من كثر مابكيت عليها وامتلت دمووع على قولت المصري (دايما دموع)!! وواحد من اخوياي مخزن اسمي بجواله القرار من كثر مااقوله عن القرار.
بس ياناس والله حتى دموعي خلصت ومليت من هالمرمطه (التخبط)
فيه احتمال 40% ارتكب جريمه باحد موظفي الوزارة احط حرة السنه والعطاله والمصاريف على راسه وش رايكم؟ انا حاليا بحائل ياليت اللي رايح للوزارة يتأكد من الخبر 100% ولا لا والله يسوي فيني خير
وله من عندي بشاره اذا كان الخبر غير صحيح !
اما اذا كان صحيح ابغاكم تأكدوون لي قبل اجي علشان آخذ عزم واجز طيران علشان مايروح العزم بالسياره .
ادري طولت عليكم بس ابي افضفض طفشت حتى اخواني طفشو مني من كثر ماقولهم البعثه والسفاره والوزارة حتى والله اخوي الصغير علشان اخذه معي للبقاله يقول يارب تروح بحثه (يعني بعثه)
اتمنى اني ماطولت عليكم ولا ازعجتكم
ولاكن اللي دراسته قبل شهر سبعه هو اللي حاس فيني ويعاني مثلي .
اتمنى منكم الدعاء وانشالله انشالله انشالله تتيسر اموركم كلكم ويصير الخبر اشاعه وابشركم بقراري وتبشروونني بقراراتكم

بسم الله الرحمن الرحيم
بسم الله عليك اخي أبو ريم
فعلاً كل الطلاب اللي موعدهم قبل شهر أربعة وبعد شهر أربعة في حالة قلق وترقب
لكن نخليها على الله وربنا ييسر الأمور
ومعاناتك الكثير مننا يشاركوك فيها حتى أنا ما صرت أخرج ولا أروح حتى البنك أخلص معاملاتي لحد يسألني فينك؟؟ اللي يشوف يقول متهربة من الديانة على قول ماما
صحيح إنت ضحيت كثير و الله يعين المرور والطيران والوزارة عليك
لكن إن شاء الله ربنا يعوض عليك بالخير والتوفيق وللجميع يارب
إنت وسع صدرك
والله يستر

الله يعطيك العافيه وجزاك الله كل خير
والله صدري صار مطار دولي لو ماني موسعه كان مانتظرت سنه
الله يستر من تاليتها

الله يعيننا وياك ابو ريم
شوف الشباب الي نفس حالتك كثير انت ذكرتني بواحد من ابها
يقول مليت من كثر السفر والمصاريف طياران وفنادق الخ...
بس الي يشوف مصايب غيرة تهون مصيبته
واتمنى لك التوفيق والله لا يضيع تعب مجتهد

ابو ريم


بصراحة من زمان ما ضحكت


الله يسر امورك ويعوضك عن كل الايام اللي عانيتها ويبشرك بالبعثة

تحية طيبة
ابو ريم
وينك
لا
لايكون رحت فيها
الحال من بعضهم اصبر يا خوك ترى الدنيا ما تسوى الواحد يطير عقله علشانها

بعدين خبر التاجيل مش صحيح لانه ما فيه مصدر واضح صرح بالامر لا وزير ولا فراش الوزير

الصبر زين ترى الموظفين اللي في الوزارة ما يستاهلون ضربة عقال ما بيدهم شي،

شوف حواليك ترا الاخوان كلهم مثلك ينتظرون على نار وصابرين فيهم ناس خلصوا كل شي ما باقي الا قرار الابتعاث وفي ناس ضاعوا في الطريق بين الوزارة والسفارة

الصبر زين
واذا ما راح تصبر
قولي متى راح تروح الوزارة وطخ لك كم واحد هناك حتى نروح معاك
هجمة وحدة وندك الوزارة على روس اللي فيها

او اصبر

نحن معك بدعائنا

you broken my heart

I wish the evry thing is will be ok

good luck abu reem

اشكر جميع من شارك في دعمي وامدادي بالروح المعنويه العاليه
وجزاكم الله خير
وبالنسبه للاخت نبض المشاعر اشكرها مع اني مافهمت شي بس انشالله راح ارد عليها بعد مااتخرج من المعهد انشالله :gr_876:
او ارجو الترجمه من احد الاعضاء
وشكراً

اقتباس:

---

المشاركة الأصلية كتبت بواسطة ابو ريم

اشكر جميع من شارك في دعمي وامدادي بالروح المعنويه العاليه
وجزاكم الله خير
وبالنسبه للاخت نبض المشاعر اشكرها مع اني مافهمت شي بس انشالله راح ارد عليها بعد مااتخرج من المعهد انشالله :gr_876:
او ارجو الترجمه من احد الاعضاء
وشكراً

---

انا راح اترجم لك مع اني ميح بالأنجلش يا عم بوريم :D

تقولك وسع صدرك يا بوريم وحظا سعيدا انشا اللة

وخلليك ريلاكس ولايهمك >>يعني مو بالظبط بس تقريبا معناة كذا