يقطع أبو الغربة , فضفضة + ( الصدمة الحضارية تعريفها ومراحلها)

الله ييسر اموركم وترجعون رافعين الراس..

لاتستلمون لهالمشاعر..

انا معاكم في الحنين ..واحيانا يكون فيه ضيقه وطفش..

بس لاتنسون هدفكم الأساسي..وان ربي معاكم

وعقبالنا ننقبل في البعثه

الله يسهلها على جميع الطلاب إن شاءلله
انا مرات احس فيها واحس بملل واقول يا حلوو الرياض
لكن إن شاءلله الله يهونها علينا و نرجع متخرجين ومعنا الشهادات وكل الطلاب إن شاءلله يارب

الحمد لله للمره الثانية أوصل للمرحلة الثالثة ...
هنا معلومة مهمه وهي انه كل مرة ترجع لامريكا راح تمر بنفس الاعراض خصوصا إذا بتروح لمكان جديد أو بترجع من اجازه طويله..
الشوق للأهل و الاكتئاب و ضيقة الصدر كلمات قليلة جدا عشان توصف اللي يمر فيه الواحد ..
الشي اللي يستحق انه ينقال - عشان ابعدكم عن الاحباط شوي - هو ان الجميع يمر بنفس الكلام و الجميع يتخلص منه ، يعني حالك حال الناس ..

أعجبني تنبيه الاخ الكنق انه كان يظن انه ماراح يمر بالصدمة ، الجميع راح يمر فيها مع انه ما كان يتوقع انه بيمر فيها ، عشان كذا استعدوا ..
أعتقد الشي اللي مهم تسويه عشان تخفف الصدمه هو موضوع الاستقرار ..
يعني حاول قد ما تقدر توفر الاشياء اللي أنت تحتاجها بدون مبالغه ، السكن المناسب ، السيارة لو تحتاج ، الأشياء اللي انت تحبها ..

فيه شي مهم و هو ان تعاملك مع بعض الاخوان السعوديين ممكن يزيد شعورك بالصدمة ، لانك تشوفه يتعامل معك و كأن كل شيء زين و انت بنظرك كل شي من سيئ لأسوأ ..
عشان كذا نصيحه حاول تتجنب هذولي أو على الأقل تتجاهلهم ...
فيه ناس مريضه تتلذذ لما تشوف حالتك النفسيه تعبانة و ممكن يزيد الامور سوء ، مرات بعمد و مرات بجهل .. رغم أنه لما جاء جديد ذاق الامرين من الصدمه الحضاريه .. عشان كذا تسمع بعض الاخوان بالمنتدى يحذر من السعوديين و يقول انه لما جاء ما قدر يتعلم اللغه لما قعد مع السعوديين .. في الواقع هو كان يمر بالصدمه اللي بعض السعوديين صعبها عليه بتصرفتهم ، عشان كذا ماقدر يتعلم اللغه ، بس لما بعد عن مصدر القلق عنده - هنا بعض السعوديين - قدر يعدي مرحله الصدمه و بدت نفسيته تتعدل و صار يتعلم اللغه بسهوله !!

من الامور اللي تخفف الصدمه هي انك تسوي الاشياء اللي انت تحبها و ما كان عندك وقت تسويها و أنت بالسعودية مثلا التصوير، أو الافلام أو تعلم شي جديد ... بالنسبة لي احب اطبخ بس ما كنت اطبخ الا بطلعات البر، اللحين أغلب وقتي يروح بالمطبخ .. برضو احب التصوير بس كمرتي القديمة بعتها و اللحين ادور على كميره جديده .. أخوي الكنج إذا اسعار الكميرات حليوه في فيلادلفيا بالله لاتنساني عطني خبر ههههه طبعا العرض للجميع ..

اللي ابي اوصل له ان الواحد يقعد مع نفسه شوي و يشوف ايش هي الاشياء اللي تضايقه و يعدلها .. مايعني ان فلان سوى كذا وارتاح ان وضعه ميثالي ممكن يناسبني شي غير اللي يناسبه .. و لا يعني ان شخص معين سعودي انه يخاف علي او راح يساعدني ..

لازم نخلي ببالنا شي ، عشان الناس تفهمنا لازم نحاول نفهمها .. حلو تعرف في مدينتك ايش الناس يحبون و ايش يكرهون .. مش لازم تسوي زيهم بس من باب العلم بالشيئ ..
مش مهم الميثاليه اهم شي الصدق .. افهم ايش الناس تفكر فيه صدقني في فترة قصيرة تلاقي نفسك تعودت عليهم .. و وصلت للمرحله الثالثة ..
اتمنى للجميع التوفيق

اول ما بوصل السعودية بأجلس شهر ما امشي الا 240 بالكابريس
والله يا اني تعبت نفسيا خصوصا يوم كلمت الاهل اول يوم العيد اااخ بس

الحمدلله انا ما مريت وان شاء الله ما راح امر بصدمات حضاريه

يمكن لأني من طفولتي ماعشت في مكان معين وحسيت بالانتماء فيه >> الله يخلي الوالد كل كم سنه ناقل

حتى اوراقي تعتبر نكته للدوائر الحكوميه كل وثيقه من ديره الرخصه من ديره وبطاقة الاحوال اصدارها من ديره وتجديدها بديره ثانيه

والجواز من ديره ثانيه والاستماره حقت السياره من ديره وشهاداتي كل وحده من ديره


او سبب ثاني ما يخليني احس بالصدمه اني قليل خاتمه ماعندي انتماء ههههههههههههههههههههههههااااي

على العموم مشكور اخووي كنق والله يعيننا وماقصرت يالغالي

المشكله اني بدرس اللغه في ولايه والجامعه في ولايه ثانيه

بالتوفيق للجميع

صحيح السفر قطعة من العذاب والغربه مراره بالقلب وهواجيس بالعقل-- بس تذكر ايها المبتعث ليس انت الاول الذي طلبت العلم - العلم من زمن الصحابة -كم من تغرب بالدنيا كم من عذب بسب العلم -اخي ابتعاثك سنه او سنتين او ثلاث او ربع او خمس تمر السنين مر السحاب -عزيز المبتعث تذكر المثل (ماضاع مال في علم)

الله يهونا عليك وعلى الكــــل~

بس والله تجربة تستحق انها تنعاش وشهادة تستاهل الواحد يتعب عشان يحصلها..~
مافي شي يجي من غير تعب ..

اهم شي العزيمه والاصرار وربي يوفقك الجميع ..~

الله يعين

خليتوني اشيل هم لأني انا وزوجي من النوع اللي مايتحمل شئ وبسرعه نتأثر

خايفة انه لمن تجي المرحلة الثانية يقولي يلا بطلنا ههههههههههههههه

والله مره نداله

ايش اسوي وقتها ؟؟؟

الكنق شكراً على المعلومات ،

بس أتمنى تذكر اسم المرجع الذي حصلت منه المعلومات ،
لكي تكون هناك شفافيه ، [ بيضاء ] ،

موضوع حلو جزاك الله خير والله يوفقك