الأعضاء الإشتراك و التسجيل

الملتقيات
ADs

تفاصيل رحلتي من الرياض الى واشنطن شي من الذكرياات

تفاصيل رحلتي من الرياض الى واشنطن شي من الذكرياات


NOTICE

تنبيه: هذا الموضوع قديم. تم طرحه قبل 2898 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية ابوسلامة
    ابوسلامة

    مبتعث مجتهد Senior Member

    ابوسلامة الولايات المتحدة الأمريكية

    ابوسلامة , ذكر. مبتعث مجتهد Senior Member. من السعودية , مبتعث فى الولايات المتحدة الأمريكية , تخصصى CS , بجامعة CSU
    • CSU
    • CS
    • ذكر
    • LA, California
    • السعودية
    • Jul 2009
    المزيدl

    January 9th, 2010, 08:39 AM

    بسم الله الرحمن الرحيم
    اكتب هذه المذكرات عن ماحصلي في خط سيري من الرياض الى واشنطن دي سي واخيرا الى بوستن في ولاية ماساتشوسيتس



    تحذير هذه الموضوع يحتوي على تفاصيل قد تكون ممله





    اليوم الثلاثاء التاريخ 9-نوفمبر-2009



    المكان : مدينة الرياض





    قبل الرحلة طبعا مثل اي واحد اكون محيوس وغير منظم للتو انتهيت من ترتيب شنطة السفر

    الساعه تشير بحدود 9 مساء بتوقيت الرياض .. اووو نسيت ناقصني اشتري شنطة صغيره للاوراق الرسمية واللاب توب طبعا الشنطة راح تكون معي داخل الطائرة وبروح اسحب مبلغ من البنك يمشيني في امريكا لين استقر في مدينتي !! (( كنت ناوي اخذ بطاقات السحب معي لامريكا ))


    شلغت سيارتي والى اقرب سوق من المنزل اشتريت شنطة صغيره وانا اشتري الشنطة تذكرت اني ماشريت عطر

    اشتريت احد العطور وخرجت مباشره من المحل ابحث عن صيدلية قريبه لشراء الجل المعقم (( وسوسه الخنازير ))

    اوقفت سيارتي امام صيدلية (( السقاف )) ولكن كانت الزحمه جدا شديده .. قلت انتهزها فرصة اخذ لفة على المكان لين تخف الزحمه شوي


    رجعت ولا الزحمه زادت عند الصيدلية .. حركت للبحث عن صيدلية اخرى لكن دون جدوى بالاخير اقتنعت خلاص برجع للبيت


    لكن قبل ما ارجع تذكرت شي مهم ومهم جداً .. ماسحبت فلوس من حسابي علشان تمشيني في امريكا اول ما اوصل

    مريت صرافة البنك الاهلي في حينا الكريم ونزلت من السيارة (( نزلت وهي مشغله ومافيها احد )

    دخلت بطاقة الصراف ادخل الرقم السري >> سحب نقدي >> المبلغ 4000 >>> هل تريد عملية اخرى >> لا


    ومن ثم خرجت بطاقتي العزيزة من جهاز الصراف .. ادخلت يدي في جيبي لخرج بوكي اتفاجاة ان البطاقة دخلت مره اخرى في المكينة ؟؟؟؟؟؟؟؟؟؟؟؟؟؟؟ !!!! وماطلعت الفلوس ؟؟








    يالله وش اسوي الحين وكيف اتصرف ؟


    جن جنوني لحظتها اصبحت كالمجنون بل غير مصدق مالذي حدث معي .. هل في احد عطاني عين ولا وش السالفه ؟ ... شاهدت احد رجال الامن داخل البنك طرقت عليه الزجاج من المكان المخصص للسحب


    جاني رجل الامن : هلا اخوي وش عندك

    انا : اخوي البطاقة سحبتها المكينة والمشكلة عندي سفر بكره امريكا الساعه 9 وش اسوي تكفى

    رجل الامن : والله ياخوي هذي بكره اذا فتح البنك الساعه 9 ونص تقدر تطلع بطاقة ثانيه

    انا : يالغالي والله عندي رحلة امريكا الساعه 9 ياليت تساعدني

    رجل الامن : والله ياخوي ما اقدر اسوي شي لا معي لا مفاتيح اقدر افتح المكينة ولا شي لذلك والله مابيدي شي


    طبعا كان فيه ناس ورى يبون يصرفون يحتروني اخلص

    خرجت من البنك وانا مطاطي الراس غير مصدق ماحدث لي

    لعنت ساعتها اليوم اللي عرفت فيه البنك الاهلي مع ان الغلط ماجاء منهم ؟؟ طيب وش دخلهم انا ما ادري



    قعدت الفلف ساعه وانا ابحث عن حل ؟

    المشكله كل الفلوس اللي معي حقت السفر مودعها في هالحساب !!

    بالاخيرة جتني فكرة انا قبل اسبوع مطلع من البنك الاهلي بطاقة ماستر كارد مسبقة الدفع والبطاقة معي الحين خلني اروح البيت ادق عليهم يحولون كامل الرصيد اللي بحسابي على بطاقة الاهلي مسبقة الدفع







    رجعت للبيت واتصل على البنك افادني الموظف المختص اني استطيع عمل ذلك من خلال الانترنت فقط

    فتحت جهازي ودخلت على يوزري لكن لم استطع تنفيذ العملية يطلبون كود تفعيل

    رجعت اتصلت على البنك رد مركز استقبال مكالمات البنك الاهلي بالرياض وقال لازم تروح لاي مكينة صراف وتدخل البطاقة وتطلب التفعيل

    لحول ولا قوة الا بالله طيب يا اخينا في الله بطاقتي سحبتها المكينة وش العمل

    قالي والله يا خوي ما اقدر افيدك مالك الا تنتظر الصباح وتراجع البنك مانقدر نفعله عن طريق التلفون


    يالغالي عندي رحلة دولية امريكا الصبح وانا محتاج اسحب كامل المبلغ حاليا لان البطاقة انسحبت في المكينة



    قالي والله ما اقدر افيدك

    افاااا صار وجهي كذا


    مع السلامة



    سكرت

    رجعت اتصلت مره ثانيه رد علي مركز استقبال المكالمات في جدة

    حكيتله السالفه كامله شوي وانا ابكي عنده المشكلة اذا ما انسحب الملبلغ لازم ااجل السفره واذا اجلت السفره راح تتاجل اشياء كثيره راح تتكنسل حجوزات ومبالغ سكن واشياء كثير واي توني جديد ل الاي توني بينتهي اذا ماسافرت اليوم



    المهم قالي انتظر شوي لحظة خليك معي حسيت وقتها بامل وقلت يااارب

    قالي يالغالي في حل ؟

    في حل تكفى على ايدك قولي وش الحل

    قال الحل انك تسحب المبلغ كاااش وتسافر فيه واذا وصلت هناك تودع المبلغ في البنك

    وان شاء الله يسحبونها لك بس انت ورهم التذاكر علشان هم مايخدمون الا المسافريين


    طيب يالغالي اسعفني كيف اسحب الحين والبنك مسكر ورحلتي الساعه 9 الصبح


    قال يالغالي في عندنا فرع في المطار يداومون 24 ساعه تحصلهم وان شاء الله انهم مداومين


    قلت طيب يالغالي وين احصل مكانهم ؟

    قالو والله في الرياض انا ما اعرف لكن في جدة موجودين .. الرياض ما ادري صراحه لحظة اتاكد من الشباب ..

    سمعته ينادي الشباب اللي عنده ياشباب في فرع للبنك الاهلي في مطار الرياض ؟

    رجع لي وقالي والله الشباب مايدرون اغلبهم من جدة لكن انت اتصل على 905 وشوف وش يقولون



    زين يالغالي ماقصرت والله الله يعطيك الف عافيه

    (( حسيت بشويه امل بعد ماكلمت الموظف ))



    الساعه الحين كانت تشير الى 1 ونص ليلا باقي على اقلاع رحلة الخطوط السعودية اقل من 8 ساعات


    اتصلت على 905 خذيت رقم فرع الاهلي بالمطار اتصلت عليهم محد يرد

    ارجع ادق محد يرد


    اتصلت على خالي اقوله السالفه .. قال البنك الاهلي اللي في المطار الظاهر قفلوه مافي الا الراجحي على حسب ضني فمالك الا تروح الحين المطار وتشوف بنفسك

    طبعا عطاني تزبيد يحبها قلبك قالي ليش ماسحبتها من قبل بوقت كافي المهم زبدلي على التلفون


    قلت زين مالي الا اروح المطار الحين واشوف البنك الاهلي

    طبعا درت امي بالسالفه وقالت خيره يابن الحلال اجلها الشهر الجاي ولا اللي بعده وش مطيرك خلاص اقعد !!


    قلت لا والله معليش تعبت كثير ..

    اتصلت على ولد خالتي هلا كيفك بسرعه مرني الحين عندي مشكلة كبيره تحتاج اني اروح للمطار وابيك تكون معي
    قال قدام

    انتظرته شوي وجاني للبيت خذيت التذاكر وعلى طوول على المطااااااااااار وحنا نمشي في طريق المطار الساعه صارت 2 وربع الليل والشوارع فاااضيه لان بكره دوامات واغلب الشعب نايم






    وانواع الهواجيس في الطريق تخيل احصل فرع الاهلي مقفل والله بتجنن .. ولد خالتي يرد علي اذكر الله يابن الحلال ان شاء الله الفرع فاااتح

    شوي ارد عليه طيب تخيل الفرع فاتح بس السستم عندهم خربان هنا قمة القهر !!!!!!!!!!!!

    وولد خالتي يابن الحلال اذكر ربك ان شاء الله خير



    وصلنا المطار تقريبا 3 والحمدلله وحنا مارين بنروح المواقف شفنا فرع البنك الاهلي فاتح ... وقفنا السيارة ورقينا فوق وانا قلبي صار يضرب مليووون دقه في الدقيقه



    دخلت عليهم قلت انا ابي اسحب كامل رصيدي الان


    عطاني الورقة وقال عبيها عبيتها طلب اثباتي عطيته اثباتي شوي طلع ابو الشباب الفلوس انا يوم شفت الفلوس ارتحت : تشوف ابتسامتي شاقه وجهي شق .. التفت على ولد خالي وسويتله هذي الحركه



    بعدين قلت للموظف بالله ياليت تحولها دولار قال ابشر

    حولها دولار خذيت الفلوس وحطيتها في جيبي ))))))))

    ومشينا للسيارة ورجعنا البيت الساعه 4 الا ربع



    مكتوب عندي في التذاكره لازم اكون في المطار الساعه 4 الفجر والحين خالي الكبير وصل للبيت علشان هو اللي بيوديني للمطار خالي نفسه اللي زبدلي على التلفون






    طبعا ولد خالتي اللي ودني للمطار نزلني وراح بيتهم


    انا ما امداني ارتب وضعي قبل السفر كان ودي الحق اتسبح بس خالي كان قاعد تحت في السيارة ويضرب بووري طااااااااااااااااط والناس نايمين


    على طول دش سريع ولبست خذيت شناطي سلمت على اهلي وجري قالي ياخوي وينك انت محرصني اجيك قبل 4 وتسحب علي قلت معليش ما امداني ياشيخ توني جاي من المطار




    المهم رحنا للمطار


    وفي طريق المطار كل مانقرب من المطار دقات قلبي تزيد مع اني كنت ابي اسافر امريكا وما ابي الرحله تتاجل لكن في هذيك اللحضة بالفعل انسدت نفسي وصرت خااايف ماودي اطلع من الرياض ودي اكنسل الرحلة

    قلت هالشعور اللي احس فيه لخالي وقالي لا يابن الحلال الوضع طبيعي لا تخاف .. الامور سهالات الحين بتقابل شباب سعوديين تكون معهم وامورك تماام تراك مو لحالك في الطياره










    اوقفنا السيارة في مواقف المطار ودخلنا للمطار

    اول مادخلنا شفنا مصلى حطينا الشناط على جمب وشنطتي اللي فيها جوازي وفلوسي حطيتها قدامي في المصلى



    الحمدلله صلاينا الفجر جماعه في المطار

    واحنا نصلي نسمع نداء فتح التسجيل لرحلة الرياض واشنطن ...




    خلصنا من الصلاة وخذينا الشناط ورحنا عند عسكري حصلناه واقف قلناله وين تسجيل رحلة الرياض واشنطن قالنا عند هالكونتر وقعدنا ماسكين سرا حدود الربع ساعه يوم جاء دورنا طلع هذا مو كونتر الرياض واشنطن ... المهم دلنا على كونتر ثاني


    رحنا للكونتر الثاني قالولنا ارجع هناك في نماذج لازم تعبيها


    رحنا لزي المكتب وعطانا نموذج نعبيه في الاسم والعنوان في امريكا وطلب الاي توني والتذاكر


    بعد ماخلصنا قال الحين روحو امسكو سرا عند هالكونتر !!



    المهم جانا الدور بعد تقريبا نص ساعه واقفين في السرا دخلنا الشناط في الميزان الحمدلله الشنطتين اللي كانت معي كان مجموعهم تقريبا 50 كيلو كانت معي شنطة كبيره وثانيه اصغر شوي طبعا والشنطه اللي بدخلها معي بالطياره ما وزنوها


    ماخذو مني زياده عفش مع اني كنت اقول لخالي الله يستر شكلهم بيدفعوني لان شناطي شكلها كبير والاغراض فيها كثيره وثقيله


    الحمدلله اخذو الشناط والحين ارتحت

    طبعا رحنا للجوازات لختم الخروج من السعودية والانتظار عند بوابة الطائرة

    وقبل ما ادخل سلمت على خالي لانه خلاص مايقدر يجي معي داخل ودعالي بالتوفيق ومشى


    وانا رحت اختم خروج من السعودية طبعا تدخل على جهاز الكشف وتعطي العسكري جوازك ويطقطق في الكمبيوتر بعدين يختم الجوزات


    طبعا هنا في موقف محرج جدا صارلي ... طبعا قبل ما امر من جهاز التفتيش طلبو مني انزل الحزام

    نزلت الحزام يوم طلعت من الجهاز مسكت الحزام بيدي وخذيت الجواز وتقدمت شوي وابي اربط الحزم ماعرفت


    ياولد يمين يسار مره ماعرفت مدري المهم قعدت اقلب فيه والعساكر يناظروني يقولون وش عنده ذا لا يكون فيه بلا ولا شي


    المهم بعد جهد جهيد عرفت وانربط الحزام بسلام !!!





    المهم مريت كافتيريا وخذيت مويه ابل ريقي لان ريقي نشف صراحه وانا مابعد وصلت امريكا

    سعر المويه 5 ريال





    المهم قعدت انتظر في مقاعد الجلوس امام البوابه رقم 13 ونشوف الطياره اللي بتودينا ملبقه عند البوابه

    طبعا الحين صارت الساعه تقريبا 7 ونص





    بعد ساعه من الانتظار او اكثر شوي اعلنو فتح البوابه وبدو الناس يدخلون للطياره طبعا انا مادخلت اول شي انتظرت اخر شي بعدين دخلت






    المافاجاة ان الطياره فل انا كنت اتوقع مافي احد بالطياره يعني الواحد ياخذ راحته ينام شوي يتمدد لان اول شي موسم دراسة واختبارات وداومات ومافي اي عطله او شي علشان تعطي احتمال ان الطياره بتتعبى !!

    اول صدمه لي كانت الطياره مليانه







    الى هنا اتوقف
    وارح ارجع اواصل السرد في هذا الموضوع باذن الله عن احداث داخل الطائرة والوصول الى واشنطن واحداث الملحقية والفندق والبيتزا واتجاه القلبه

    وماذا حدث لي في الليله الاولى

  2. هههههههههههه صراحه ابداع
    وبعدين تستاهل على البطاقة يوم انسحبت انا بنك الاهلي ذا عداوه بيني وبينه انت على الاقل مره وحده انا انسحبت علي البطاقة وانا على خط الرياض وابي اعبي بنزين وطفران .
    اتمنى لك التوفيق وننتظرك
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.