تحذير بخصوص الوزن الزائد ونصيحة للعائلات

February 20th, 2010, 05:03 PM

ثلاث نقاط حبيت انبه عليها الاخوان علها تفيدهم في رحلتهم

أولاً :
وصلنا واشنطن. واستقبلنا سواق الملحقية

ورحنا للفندق

سلمنا سواق الملحقية النماذج. وقال عبوها الان. واخذها منا, رجع ثاني يوم العصر وسلمنا اوراقنا: التامين الصحي+الضمان المالي+تعريف الراتب

ومافيه اي حاجة لروحتنا للملحقية, ثاني يوم رحنا الملحقية, اللي كان عنده اوراق ناقصة واللي مبعثين من زمان وعندهم مشكلة جايين عشانها هم اللي استفادوا. اما احنا جالسين على الكراسي بدون فائدة, ولا محاضرة ولا بطيخ, وان كان فيه محاضرة فهي محاضرة وحدة

المختصر اتجه على ولايتك ولا تبهذل نفسك. وارسل اوراقك من هناك بالفيدكس. اول ما تصل واشنطن خذ النماذج من سواق الملحقية. عبيها وارسلها بالفيدكس من ولايتك

امر مهم اخر

ثانياً :

الوزن الزائد

لو الوزن الزائد شي بسيط اعرف انهم بيدفعونك 125$ عن كل حقيبة وزنها زائد. مهما كان الوزن. ما يفرق كيلو ولا عشرة, وهالمبلغ كبير جداً وحرام صراحة, يعني موب يحاسبونك على الكيلو الزائد, لازم ما تتجاوز الحقائب 23 كيلو (50 باوند)
وعشان ترتاح وتاخذ عفشك كامل اقول لك وش تسوي

احجز من الرياض الى واشنطن. وبعدها باربع خمس ساعات الى ولايتك. في هالحالة لو معك 100 شنطنة وزنهن زايد مارح ياخذون منك شي. يعتبرونها كونكتن فلايت وانها رحلة دولية, وتمر حقائبك بدون تعقيد

ثالثاً وهو الأهم :

الخطوط السعودية تقدم خدمة حلوة وهي تحديد المقعد مسبقاً

اذا عندك اطفال اتصل على رقمهم قولهم انا عندي حجز وابي احدد المقعد, واطلب المقعد 30 عند الشباك. اطلب المقعد اللي خلف الفاصل مباشرة.
بتكون قدامكم مساحة كبيييرة تقدر تحط فيها شنطة متوسطة وتخليها مفتوحة على طول وفيها اغراض اطفالك طوال الرحلة, وتكونون بسعة وراحة, وتقدر ترقد في هالمساحة او تجلس انت او المدام او الاطفال يجلسون بالارض. واذا عندك رضيع بيجيبون لك سرير له يثبتونه بالفاصل
اللي جنبنا شوام معهم شنطة كبيرة حاطها هناك. وكل اغراض طفله ملابسه بالشنطة, الصراحة كانوا مرتبين نفسهم وارتاحو.

انا حجزت على واشنطن اخترت المقعد الامامي قبل شهر. شباك. وبعدين كنسلت الحجز. وتكاسلت في الحجز الجديد ما اتصلت على الخطوط الا قبل اسبوعين من الرحلة. قال لي مقاعد الشباك الامامية كلها مسحوبة. ويالله حصلت مقعد امامي بالوسط. احرص انك تتصل عليهم بدري بدل ما تحشر نفسك وزوجتك وعيالك بالمقاعد الثانية.
طبعاً المقاعد اللي عند مخارج الطواريء ما تصلح للعائلات ابد ابد.

كتبت الموضوع على عجالة, المهم ان تصل الفائدة.

هذا الشي اللي ببالي وحبيت انبه عليه والله يوفقكم ويسهل لكم رحلتكم

• نشر عبر تويتر
• نشر عبر فيسبوك
• نشر عبر جوجل