حوار الحجاب أم النقاب في ولايات أمريكا؟أدخل وشارك/ـي معنا

بصراحة اهنيك على المبدأ الثابت والله يسهل امورك ويحفظ لك دينك
انا مبتعث ومعي زوجتي وسافرت لأكثر من ولاية وزوجتي لابسة عباية ملونه مع نقاب وماشفنا الا كل احترام وتقدير والشعب الأمريكي محترم جدا ويحترم الأديان الأخرى وللمعلومية انا رحت لمطار واشنطن ونيويورك ومجرد ماشافوا زوجتي منقبة طلبوا لي امراة
وبالتوفيق يارب

النقاب ثم النقاب ثم النقاب

ويكون رمادي غامق فقطططط

لا للألوان الفاتحة الملفتة للنظر

أسأل الله العظيم رب العرش العظيم أن يحفظ بناتنا وأبنائنا المبتعثين والمقيمين ياحي ياقيوم

أبعد عنا الفتن ما ظهر منها وما بطن

وأجمعنا في جنات الفردوس الأعلى ,, آمين

-----

يعني الحجاب أو النقاب قناعة

متى ما اقتنعت البنت ان هذا هو الخير لها راح تتمسك فيه وتسرد تحته جميييع إيجابيات العالم وتذم في غيره ..

رسالة لكل الفتيات ( تمعني جيداً في آراء الجنس الآخر إن كنتي تهتمين بنظرات وجهاتهم لك وتعلّمي ما يعجبهم ويحترمون صاحبته : الحجاب أم النقاب )

وشكرا

والله شي عجيب يالشباب
غطاء الوجه قد يكون فيه اختلاف بس الشرب و المهزله و البنات و الزنى مافيه عاقل يقولك فيه اختلاف أحكامها معروفه المفروض ينحط موضوع لتصرفات الشباب السعوديين الي تفشل مو على الغطا و النقاب
تلقالك كثير شباب يتكلمون في السعوديات الغير محجبات او الغير منقبات و اكثر منهم خراب مافيه
للأسف مجتمعنا الذكوري حرم كل شي للمراه و احل كل شي لنفسه من شرب و زنا و مصخره وقله أدب وللمعلوميه فقط البنت الغير منقبه احسن من كثير شباب
بعض الأمثله
شاب سعودي مسجون بسبب ارتكاب الرزيله مع فتاه لم تبلغ سن 18 و هذا الولد معانا في الجامعه
قصه ثانيه اخو يرجع كل سبت على الفجر سكران يضرب اخته الي اكبر منه بسبعة سنين و ليش بس لانه سكران
والمشكله للأسف في شبابنا مو في بناتنا
واحد متزوج كان مع شلة اولاد و مرت من قدامهم بنت سعوديه محجبه قام الكل يناظرها و يرمي كلام قام المتزوج يقولهم ياجماعه تراها سعوديه عيب عليكم قالو له هذا الحلو في الموضوع انها سعوديه
في مشاكل اكبر من غطا وجه ولا لا وللمعلوميه فقط الي على باله بيروح يبي يحاول يعطي فكره حلوه عن الاسلام أنسى وضعك خاصه اذا كان معك سعوديين تدرون ليش أنا اقولكم يجيك واحد يبغى يسلم عليك تقولين له معليش في ديننا مو مسموح مصافحة الرجل الاجنبي يقوم يسألك طيب الأولاد عادي يسلمون على بنات أجنبيات تقولين لا فيجي يقول طيب ليش السعوديين يسلمون و يسون كل شي مع البنات دينكم شديد و ضد المرأه.
تجيك وحده أقولك حنا رايحين نادي ليلي تعالي معنا تقولين لها ما اقدر غير مسموح في ديننا تجي تقولك عبدالله و محمد و عبدالرحمن رايحين معانا انتم ليش دينكم كذا
ولازم طبعا اول شي يقولونه السعوديين للأجانب إحنا في ديننا نقدر نتزوج اربعه من غير ذكر الأسباب فجاه كل الناس يلتمون عليك و يسألونك منجد وانتي عادي لسه مسلمه الاسلام مو عدل للمرأه و امثله كثير غير كذا
الزبده في مواضيع اهم من غطا الوجه

الأخت shjo0o ..

يبدو لي أن الأمور اختلطت عليك شوي..
في البداية الموضوع يتكلم عن النقاب والحجاب, وإحنا نعرف إنه فيه قضايا ما نقدر نحصيها بهالرد أهم من هذا الموضوع بداية من قول: لا إله إلا الله .. وحتى إماطة الأذى عن الطريق , لكن الموضوع هذا مخصص لمناقشة قضية معينة .. هذا أولا,
وثانيا: أنا أوافقك الرأي في أن كثير من الشباب - الله يهديهم, ويفتح على قلوبهم - لديهم ممارسات خاطئة, ويندى لها الجبين, بل حتى صار الواحد يخجل من اللي قاعد يصير, ولكن ما نقدر إلا على ترديد : ( إنك لا تهدي من أحببت ولكن الله يهدي من يشاء ) الآية .
وهالممارسات اللي أنتي ذكرتيها ليس خطأً فقط , بل منتنة , وأتمنى لو الملحقية تشد حيلها في متابعة هالأشكال , وتنبش هالمراهقين وترجعهم للسعودية ,,, الحاصل : أنا أوفقك الرأي فيهم ..
ولكن , ما ألاحظه في كلامك هو : أنك لا تفرقين بين المسلم والإسلام, أو - على الأقل - ناسية هالشيء , وهو أن ممارسات بعض المسلمين الخاطئة لاتمثل الإسلام بشيء , فهي تمثل أصحابها , فإذا راح (عبدالله ومحمد و عبدالرحمن ) للنادي الليلي , وسلموا - بإيديهم - على بنات , فهذا شيء يرجع لهم ولا يرجع للدين , وكل واحد بيلقى يوم القيامة ما عمل ( من عمل صالحاً فلنفسه ومن أساء فعليها ) , وإذا أحد قال لك : ليش الإسلام ضد المرأة , ولا كان عندك حجة , تعالي اطرحيها بالمنتدى , وإن شاء الله أنا أو أي واحد من الأعضاء الطيبين - سواء كان رجلا أو امرأة ( عشان ما نكون ضد المرأة ) - نقدر نذكرك , أو نفيدك , أو نوضح لك الأشياء اللي يمكن تكون غايبة عن بالك , أو حتى ما تعرفينها , وإحنا كلنا نتعلم من بعض ..
لكن المهم إننا نكون ما ضعفاء في شخصياتنا , ونخشى من كلام الآخرين ( ولن ترضى عنك اليهود ولا النصارى حتى تتبع ملتهم ) , وتذكري ::: كم من الأجر الذي ستحصلين عليه بإذن الله إذا احتسبتي صبرك على دينك , و كنتي هادئة وناقشتي الآخرين , وأقنعتيهم بأن هذا الإسلام هو دين السماحة وعدم الظلم , سواء للرجل أو المرأة ..
ولنتذكر .. قد نكون سببا في إسلام الآخرين , ليس بالقوة , ولكن بالأخلاق ,,

ما احب افتي ..

بس كيف نقاب في بلاد الغرب ؟؟

ياليت الشباب اللي جالسين ينصحون ويحثون على النقاب جزاهم الله خير يكون اهل تقوى وصلاح ولايقربون المحرمات الصريحه لانهم ماشاالله مركزين في موضوع النقاب بقوه من الموضوع يخص البنات وهم اللي المفروض يتناقشون فيه ويطرحون تجاربهم لبعض لان هم راعيات التجربه
واتمنى فتح موضوع للشباب بعنوان (كيف تحمي نفسك من المغريات والفتن في ولايات امريكا وتنصحو بعض وتذكرو تجاربكم

اي والله صادقه مادري ايش الاهتمام العظيم من الاولاد على العموم انا اشوف ان البنت تمشي بحجاب بدون حجاب هذا بينها وبين ربها المفروظ حنا الاولاد ماندخل بالاشياء ذي ونبطل لقافه واذا مسكت معاكم اسلام ودين ياليت كل واحد الحين يربي لحيه قبل لايطلع من المطارولايقرب المحرمات وياليت كمان يلغي البعثه ويخش جامعة ام القرى تخصص علوم شريعه وياليت كمان يعتكف في المسجد اصرف له من جامعة ام القرى ....هههههه من جد تخلف

ياخي استحو على وجيهكم .. بالله هذي ناس مبتعثة و راح تكون منفتحه الفكر ؟

ركزو على دراستكم بس ، وبلا نقاب وبلا قلة حياء ، وش الوسوسة هذي ، والله لو اني متزوج آعطي حريتي لزوجتي ، لو تمشي بدون حجاب حتى ، بكيفها ...


انا ماشي بعد ٩ ايام وصدقوني راح اتضايق لو شفت بنت سعودية لابسة عباية ونقاب وغطوة ومن الخرابيط هذي ...

للحين تنظرون للرجل انه وحش !

ماشاء الله اخير في رد متفتح وعقلاني ....

الله يشفيكم يامن تطالبون بكشف الوجه هالحين صار التمسك بالعادات والقيم الاسلاميـه بنضركم تخلف ؟!!

انا مادري وش محرق رزك انت ويااه تبي زوجتك تكشف خله تكشف ان يغيت خلها عاريـه بعـد بس ماتفرض رايك على الغير وتحتقر من يغطي وجهها
وتتمسك بتعاليم ديننا الحنيف