نوكسفل ومارتن وغلطة العمر

بسم الله الرحمن الرحيم

السلام عليكم ورحمة الله وبركاته

هذا الموضوع كتبه زميلي طالب المجد في ملتقى الطلاب السعوديين في امريكا وكندا

وأنا معاه رجلي على رجله

اتركم معاه


مساء الخير أو صباح الخير للجميع

في بداية الامر ارسلت وطلبت احد يفيدني عن معهد نوكسفل التابع لجامعة تنسي في مدينة نوكسفل ولا أحد رد علي لأني اكتشفت انها شبه خاليه من السعوديين

وفي الحقيقة انا رحت بنفسي وشفت الجامعة لاني كنت ناوي انتقل لها لانها الفرع الرئسي لجامعة تنسي لكن انصدمت من الواقع

المدينة جميلة وسياحية وكبيرة نوعا ما والجامعة لا بأس بها ولكن المشكله في معهد اللغه جدا جدا جدا سيئ من جميع النواحي المبنى صغير مثل الكوخ والمدرسين اثنين كويسين والباقين ماهم بالدرجة المطلوبه والمعهد نظامه غبي لا إختبارات ولا تدريب على التوفل ولا على الجيمات بس احضر واخر المستوى تاخذ شهادة ولا عندك احد

والله ياجماعة قابلت الطلاب السعوديين اللي يدرسون هناك قابلت ثلاثه منهم ومتكدرين جدا من المعهد ويقولون انهم 6 سعوديين و4 اماراتين وليبي وكم صيني على اسيويين والمعهد كله على بعضه 4 فصول في كوخ قديم يجيب الكئابه وسألت واحد منهم كيف المعهد ورد علي إنها غلطة عمر.

اما بالنسبه لمدينة مارتن فهي مدينه أشبه ماتكون بحي من الأحياء الصغيرة والسكان قليلون والمطار في مدينة منفس يبعد تقريبا حدود 3 ساعات والتاكسي يجيبك من هناك 341 دولار وعليه كم سنت ويمكن مايسامحك بالسنتات والمدينة مافيها تكاسي ولا باصات ولا قطارات والخدمات بسيطه جدا والتنقل فيها لازم بسيارة والشباب السعوديين الله يعطيهم العافيه بكثرة انا درست في المستوى الثاني معي 12 سعودي وواحد كوري ماتفهم وش يقول وتقريبا عدد السعوديين فيها حاليا اكثر من 100 طالب ولا جايين 50 طالب في الطريق و المدينه مثل ماقلت صغيرة جدا وسكنت في القروف كله سعودييييييييييييييييين والله كأنك في الرياض
اما بالنسبه للمعهد فهو لابأس به لولا كثرة الطلاب السعوديين والمدرسين فيهم واحد احسنهم اسمه ليتش والثاني توم لا بأس به ولن عجوز يعني لا بأس فيها أما الثانين فهم مثل عدمهم سام يستهبل وقاري ولسن نايب مدير المعهد وكل محاضرته سواليف ولا يشرح شي من المادة الا القليل يعني على هالوضع الفايده قليله جدا في هالمعد من هنا جات فكرة تغيير المعهد ورحت لنوكسفل وصار اللي قلت لكم وأنا الان في ناشفل ابي أشوف المعهد اللي فيها واكتب عنه للي ممكن يفكر يجي لها

في الحقيقه كتبت هذا الموضوع لاني شفت بعيني ولا أحد قالي ولا ودي احد من الطيبين شرواكم يتورط فيه والله على ما أقول شهيد.


على فكره لايقول أحد اني كاتب هذا الموضوع لاني ما أبغى احد يجي هناك ولا مثل هذا الكلام اكون نذل لو سويت كذا ولو سكت عن الحقيقه بعد اصير نذل واعوذ بالله من النذاله.

وأسف على الإطاله

أخووووووووووووكم طاااااااااااااااالب المجد

لا تنسونا من صالح دعائكم


وهذا كل اللي قال أخوي طالب المجد


ونتمنى الفايده للجميع

أخووووووووووووكم blbl

جزاك الله خير على التنبيه
وانا نفس كلامك بالضبط عن مارتن بس من تجربة اخوي نفس الكلام عن مارتن قريه كئيبه ممله
اخوي هج منها لكاليفورنيا يقول الغلاء معليش ولا الكأاااااابه

يا جماعة الخير انا جاي هناك

قولوا لي وش الحل ؟؟؟

والله إن مخي صار حوسه

ما أدري من أصدق الصراحه

ناس تمدح وناس تذم

ما عاد فيه خيار ثاني الفيزه طلعت خلاص على مارت إن شاء الله بعد شهر

الله يعين ويكتب إلي فيه خير وصالح

والله اني شلت هم

كل اليوم وانا افكر

الله يسر علينا وعليكم انشاء الله
وهذا من باب حب لاخيك ما تحب لنفسك ..
الله ييسر وييوفق

الي بيروح لمارتن لا تاخذ الجانب السلبي وتتحطم لاء
خذ الجانب الايجابي وهو ان عندك فكره من الان عنها وتحط ببالك اول ماتوصل تسعى بالنقل لمعهد ومدينه ثانيه
مثل دنيفر او اوهايو او بنسلفينيا او اوريقن وتقدر تقول للملحقيه ان مارتن معهدهم ضعيف وابي معهد قوي وذا من حقك الطلب