بعد الوصول لأمريكا منظر مقزز جداً + بعض النصائح

السلام عليكم ورحمة الله وبركاته


بفضل الله وبحمده تم الوصول لأمريكا بعد سفر دام لأكثر من يومين تقريباً وبشكل موجز عما حدث

بالنسبة لإجراءات العفش فهي طبيعية كل مسافر له الحق بشحن حقيبتين منفصلتين كل حقيبة لاتتعدى 23 كيلو بالاضافة لحقيبة يدوية يصطحبها للطائرة لايتعدى وزنها 8 كيلو هذا الإجراء موجود على الرحلات الدولية والرحلات الداخلية في أمريكا .
حاول يكون معك في الشنطة اليدوية أوراقك اللازمة مثل ( I20 - قبول الجامعة - عنوان الملحقية - كتاب تقرأه - قلم - جميع المعلومات التي تحتاجها )
في الطائرة وقبل الهبوط بنص ساعة يبدأون بتوزيع استمارات يجب تعبئتها للدخول للأراضي الأمريكية وممكن الطاقم يساعدك وإذا لم يحدث بمجرد هبوطك ستجد كاونتر فيه أخت سودانية موظفة تعمل هناك ستساعدكم على التعبئة وتعطيكم بعض النصائح
يعني الموضوع فعلاً بسسيط ..

المنظر المقزز الذي قصدته
وهو تشاهده في الطائرة من البنات السعوديات أو الخليجيات بعد إقلاع الطائرة يبدأ بعضهن في " التحرمص " وكأن الوحدة مقروصة تتلفت يمين ويسار بعضهن يتوجهن لدورات المياه والبعض الآخر لاتمانع بفعل هذا الأمر المقزز وهي في مقعدها أمام الملأ
تسحب العباءة ثم تغير ملابسها وتخلع حجابها ..
أنا لاأقصد أن العباءة يجب أن تبقى أو أنه يجب أن تبقي غطاء وجهها .. لا
أنا قصدي حجاب الرأس الذي يخلعونه ويرمونه وبعدين تجلس تفلفل شعرها .. شوي ويطلع منه حشرات
والبعض من الفرحة تنقز للحمام معها شنطتها وتروح تصبغ وجهها بمكياج كنها رايحة لعرس وترجع كنها عروسة باربي خدودها حمرا وعيونها خضرا وقسم بالله شكلها يضحك
وش هذا كل هذي فرحة يعني ولا ايش ؟
ياخبلة المكياج ماينحط بالطريقة هذي أصلا فما بالك عاد بالنهار وفي وقت عملي !!
كلامي هذا ماهو موجه لطريقة اللبس .. فغطاء الوجه فيه خلاف فقهي والمذاهب الصحيحة بعضها لايلزم المرأة بتغطية وجهها وكلنا نعلم أن المذاهب الأربعة كلها صحيحة وهناك من شبه الشرع بالغرفة فيها أربعة أبواب ( حنبلي - شافعي - مالكي - حنفي ) جميع الأبواب تنفذك لنفس الغرفة
ولكن كلامي هنا عن رمي غطاء الرأس وليس غطاء الوجه لأنه مهما اختلفنا في تغطية الوجه فهو فقهياً ليس ملزم والله أعلم
طيب ياسيدة .. يابنت
إذا ماكان هناك أي احترام لدينك فمعناه إنه مافيه احترام لنفسك !
سبب تقززي من هذا المنظر هي مشاهدة وجوه ركاب الطائرة وهذي حصلت مرتين بما أنني رحت من الرياض لقطر ومن قطر لواشنطن وفي كلا الرحلتين شفنا نماذج من هذي العينات الغبية
لو تشوفون مناظر الركاب من بقية الجنسيات لهذه النماذج
بعضهم نظرات شفقة .. استهزاء .. استغراب
تدرين وش يقولون ؟
يقولون يعني كل هذا كبت ؟
معناتها إنها غير مقتنعة بأن دينها صحيح !
وإن الدين يفرض عليها أشياء غصب عنها !
وإن المرأة مضطهدة
وإن غطاء الرأس هذا مغصوبة عليه
مااقول إلا قبح الله عملكم
وقبح الله مرافقيكم الي يدربون روسهم وراكم
وقبح الله كل ريال تخسره الدولة عليكم ... والنتيجة تشويه سمعة ديننا بهذي الطريقة

على الأقل إذا نويتي بشي زي كذا سويه بعيد عن أعين الناس قبل ماتركبين الطيارة
ترى محد بيضربك في المطار إذا سويتيه !
ولا حد بيضربك من يومك في جدة أو الرياض
ولا عيون الرجال الي أمريكا غير عيون الرجال الي في السعودية ؟


بعد الوصول لأمريكا ولله الحمد وأثناء سفري لمدينتي :
- كان عند مدخل المطار موظفي عفش ( وهم غير الي يقطعون لك البوردينق ) يوزنون الشناط عرض علي أحدهم إذا كان عندي وزن زائد إني اعطيه خمسين دولار ويضبطني .. بس نصيحة لاتعرض على أحد شي زي كذا ممكن يطلع نزيه ويسبب لك مشكلة خلك نظامي من يومك في السعودية وضبط أوزان عفشك
- إذا حد سألك في مطار واشنطن عند لحظة وصولك عن الأكل قل الحق ولا تكذب .. أنا تعرضت لتعطيل إجراءاتي وطلبوا مني التوجه للكونتر رقم واحد بسبب مشكلة في البيانات لاأعلم ماهي وذهبت وتم توجيه اسئلة لي .. المهم خلك صريح ولاتخاف من شي ... محد بيقطع راسك .
- الموظفة السودانية قالت لي لاتكتب إن معاك أكل ( لأنه كان معي تمر وقهوة وهيل وبهارات ) في الاستمارة لأنهم ممكن ياخذونها منك وبالفعل ماكتبت .. لكن يوم سألني الشرطي قلت نعم معي أكل وقال ماهو قلت تمر وسألني اذا كان مغلف ومكتوب عليه تاريخ قلت نعم .. قال خلاص
- في الملحقية حاول إنك تتأكد من أوراقك قبل خروجك .. إن ملفك قد فتح وأعطوك ضمانك وتأمينك الصحي لك ولعائلتك كاملة وضمان المالي للمرافق .. لأنه فعلاً حصل لي خطأ ومااكتشفته إلا يوم وصلت للفندق واضطريت أأجل سفري للمدينة الي أنا رايح لها وأرجع لهم اليوم الثاني وآخذ التأمين الصحي ..يعني باختصار لاتطلع إلا وكل أوراقك كاملة وقريتها مو تلملم أوراقك زي ماسويت وتضرب الباب
- عند وصولك للمدينة التي ستدرس فيها حدد الأحياء المناسبة للسكن .. تكون قريبة من الدراسة والخدمات والأمان
وحاول تستأجر لك سيارة بدل مرمطة التكاسي وإبدا في عملية البحث عن شقة للسكن في تلك المناطق
- إيجار السيارة يطلبون منك فيزا كارد باسمك ورخصة قيادة ( عادي رخصتك السعودية تمشي ) وجوازك بعض الأحيان أنا رحت لشركة بدجت ورفضوا يأجروني وذلك لأن الفيزا كارد الي معي والي عطاني إياها البنك ماكان مكتوب عليها اسمي كان مكتوب عليها ( مؤقت ) لحين اصدار البطاقة الرسمية .. المهم رحت لمكتب محلي وكان أكثر مرونة وأجرني سيارة .
- التزم بقوانين المرور بحذافيرها .. شفت لوحة ( قف ) الي كنت تشوفها بالسعودية وتشطفها ؟ .. هنا قف يعني فعلاً قف حتى لو مافيه حد وقف لثواني وبعدين امش .. باختصار شف شلون يسوون الأمريكان في السواقة وسو زيهم .. فعلاً نظام قيادة صارم عندهم مو حنا أنواع الفوضوية وخسائر الأراوح
- في خلال بحثك عن شقة حاول إن الشقة تكون مزودة بالأشياء الأساسية على الأقل مثل ( الثلاجة - غسالة ملابس وصحون - مجفف - فرن مطبخ - موكيت ) الباقي بيكون عليك أسهل
وفيه مجمعاات سكنية تكون غالية شوي لكن تكون مؤثثة بالكامل من إلى بس فيها مشكلة إنهم يعملون العقود بالنفر يعني كل شخص بيسكون يسوون له عقد إذا كنتوا اثنين لازم يعطونكم شقة من غرفتين كل عرفة بعقد .. وانتبه اذا عطوك شقة من ثلاث غرف ترى مو معناها إن الغرفة الثالثة بتكون فاضية .. لا بتكون جاهزة لإحضار شخص يسكن معكم بعدين لذلك اشترط شقة لكم لحالكم بس .. هذا الكلام بس للمجمعات السكنية بس المؤثثة بالكامل .. مو كلها طبعاً
- عند استئجارك حاول قبل كتابة العقد تجريب كل شيء في الشقة قبل السكن حتى يصلحونه لك ولا يغرمونك إياه لاحقاً
- الدور العلوي يكون أفضل بما أن الشقق والمباني أغلبها من خشب يعني لو تدب النملة فوقك راح تسبب لك إزعاج
- عند محاولة التأثيث غالباً غرف النوم تكون غالية جداً ممكن تكلفك أكثر من 1500 دولار لكن الحل بيكون في حاجتين
إما تذهب لمراكز بيع الأثاث المستخدم وتلقط رزقك من هناك
أو تروح لمحلات مثل walmart وتلقى عندهم أسرة حديدية بمبلغ لايتعدى 200 دولار ومراتب اسفنجية عملية ورخيصة وبفرق هائل عن الأسعار في محلات الأثاث الجديدة
نفس الكلام ينطبق على غرفة الجلوس ستجدون لديهم أثاث رخيص وعملي وسهل التركيب
- يقول الله عز وجل {هو الذي جعل لكم الأرض ذلولا فامشوا في مناكبها وكلوا من رزقه واليه النشور} , امش على قد ماتقدر في المنطقة الي انت فيها ... انسى الكسل الي في السعودية الي لو تبي بريال خبز تروح تشغل موترك وتروح تجيبه الوضع هنا مختلف وصدقني المشي له فوائد كبيرة سبحان الله كل مايتسكر باب في وجهك وتنسد بمجرد مشيك وتأملك ينفتح باب بشكل عجيب سواء بالتعرف على أشخاص أو محلات أو غيره ... لذلك امش فالماشي في الأرض كمالكها .. ولكن بالطبع احذر المشي في الأوقات المتأخرة يعني من بعد 6 مساء حاول تفادي الخروج بقدر المستطاع .. لا أقول إن هذا خطير ولكن أأمن لك
- بمجرد سكنك حاول التعرف على مكان مسجد المدينة .. ستجد هناك جماعة المسجد بما فيهم الإمام وسيكون دائماً متعاون معك اسئله عن كل شيء تريده .. أين تذهب .. قائمة بأسماء مطاعم الحلال مثلاً كيفية القوانين وأي استشارة تختص بمدينتك .. ستنذهل بقدر المعلومات الي ممكن أن يفيدك بها إن شاء الله
- شراء سيارة بسيط هناك يلزمك فقط رخصة قيادة وجواز سفر ولكن كن على حذر ولاتشتري شيء حتى تجربه وإذا نويت على الأقل اذهب به لفحصه لدى الميكانيكي للتأكد من سلامته .
- لاتتساهل في مسألة الأكل .. فالبعض يأكل من ماكدونالد وغيره حتى لو طلب أشياء نباتية .. فما زال الخبز مصدر شك في زيوته التي بعضهم يستعمل زيوت حيوانية فيه !
لذلك أفضل حل هو معرفة بقالات الحلال واحضار تموينك من المأكولات بشكل دوري بالاضافة للخضار والفواكة
- اذهب لمعهدك أو جامعتك واذهب لمرشدك أو مركز الطلاب .. أو مهما كانت تسميته واسئله عن كل شيء تريده سواء دراسياً أو سكنياً ولاتتردد سيكونون متعاونين معك لأبعد حل وسيعطونك أماكن للسكن مقترحة وأرقام تليفونات ونصائح .. هذا ليس تفضلاً منهم ولكنها من مهامهم التي يقدمونها لطلابهم الجدد .. بس مو معناها تتأمر عليهم
- الأدب .. والابتسامة ستلاحظ تطبيق الناس هناك للحديث ( ابتسامتك في وجه أخيك صدقة ) سبحان الله ماكذب من قال اسلام بدون مسلمين .. حاول أن تبتسم وأن تتبع أي عبارة تقولها بكلمة please من باب التهذيب
- جهاز GPS مفيد جداً وبصراحة تو ماعرفت قيمته خصوصاً يوم شفت حتى أهل التكاسي يستخدمونه فهو يدلك ويغنيك عن السؤال في كل مكان فقط قم بادخال العنوان وهو سيقوم بتوجيهك بدقة فائقة .. قيمته ليست غالية جداً تتراوح بين 80 دولار وأنت طالع .

هذا مالدي وأحببت مشاركتكم أياه وذلك لفضل االموقع علي بعد الله في إمدادي بالمعلومات اللازمة لتسهيل أموري


ولاتنسونا من خالص دعائكم

بااااااااارك الله فيك
وجعل الله خط قلمك في ميزان حسناتك
الصرااااااااااحة انت دكتوووور
( والحمد لله على السلامة )

ماششاء الله عليك كفيت ووفيت

استمتعت وانا اقراا حقيقه

يعطيك العافيه اخوي والله يستر على بناتنا

الله يوفقك ويسهل عليك والجميع :)

يعطيك الف عافية

الله يعطيك العافيه

والله يوفقك ويسرامورك

الله يعطيك الف عافية ويهدي بنات المسلمين ...شكرا على نصائحك القيمة..
تحياتي...

حمدلله على سلامة الوصول,,,
وقتا ممتعا

الحمدلله على السلامه .. الله يعطيك العافيه على نصائحك وكلامك .. لاتنسى اذكار الصباح والمساء .. بتحفضك من كل مكروه ..

بالتوفيق ..

مشكور وماقصرت ياغالي
كلامك كله درر

احلى كلام يوم تقول مغير يتحرمصن
وشعرهن في حشرات
ويددربون روسهم خهههههههههههههههههههههههههه
الله يعطيك العافية وماقصرت على المعلومات