ارفض وجود مشرف دراسي

كان عندي مشرف عسل الرسالة يرد عليها بعد دقيقة بالضبط في وقت الدوام !
غيروه وعطوني واحد مصري .. طبعاً مايرد ومايعرف كيف يشتغل ولا شي
قمت اشتكيته على مديرة الإقليم .. وكلمني يقول ليه تشتكي انا عملت لك إيه ؟ يعني ارد عليك وتقوم تشتكيني ؟
قلت تقولي انتظرني نهاية الدوام ارسلك ضمان وتسحب علي اسبوع ماعد ترد علي ؟ .. وتقولي مشكلتك مش عندي واكتشف انها عندك وتقول عملت ايه !
ياخي انا مااطلبك فوق طاقتك .. أنا اطالبك بمهام عملك .. إذا تقدر قولي اقدر اذا ماتقدر قول مااقدر وانا اشوف غيرك حنا ترى مغتربين والواحد مايرسلك عشانه فاضي .. مايراسلك الا لأنه فعلاً محتاج لهذي الخدمة
طبعا بعد فترة قال انا مانيب مشرفك المشرف تغير
تخيلوا اسبوع وانا احاول اعرف من هو مشرفي وماقدرت ... الجامعة تطالبني بالسداد ولا احضار ضمان فوراً وانا قاعد ادور مشرفي
طبعا ماخليت احد الا ارسلت له .. وبعد عدة شكاوي طويلة عريضة
جاتني رسالة من وحدة مافيها ولا حتى اي كلمة ولا سلام ولا كلام ولا شي بس صورة الضمان .. والعنوان كاتبينه غلط
واسم الجامعة غلط !
طيب عدليه .. والله معد ردت علي .. انا الي قاهرني انهم يحسسونك انهم يصرفون عليك من جيوبهم
تتصل يقولك ( لضمان جودة الخدمة سيتم تسجيل مكالمتك ) خدمــة مين والناس نايمين بس !
الرجال مايرد على تليفونه ولا ايميلاته .. وتبي تسجله عالفويس ميل يقولك البريد مليان ! طيب وش تبيني اسوي احجز واجيك واشنطن عشان اقولك لو سمحت ياغبي ليه ماترد لك اسبوعين!
والله الحق مو عليهم على مدراء الأقاليم لو انهم يخصصون من أوقاتهم ساعة بس في اليوم يراجعون المكالمات والايميلات كان الخدمة تحسنت ..
أتذكر يوم جيت افتح ملف دخلت لقسم المشرفين الأكادميين .. تقول كني داخل استراحة اربعة هنا يسولفون وثنين هنا يتمازحون !
ما أقول الا الله يعين ... والله صار يجيني الهم اذا بغيت شي من الملحقية ودي مااحتاج شي منهم ابد
بسألك الحين متى اقصى حد ترفع فيه كشف درجاتك بعد انتهاء امتحاناتك ؟

والله الملحقية كلها مادري وش فايدتها
انا جاي ادرس على حسابي وكل يوم مضيعين ملفي ويقلون ارسل ملفك من جديد الغريبه كل ما ادق عليهم واعطيم رقم بطاقة الاحوال يعطوني كامل معلوماتي لكن يقلون ارسل ملفك لانه ضايع طيب وش فايدة النظام وكيف يعرفون معلوماتي وملفي ضايع وغير كذا كل شوي مشرف مالي اربع شهور والحين لي اكثر من خمس مشرفين وبالاخير كل مشرف يقولي مو عندي اوراقك عند فلان انا اتوقع لو اراسل الوزارة احسن بكثير لان في الوزارة صادر قرار الحاقي والملحقيه الى الان تماطل مهب عطيني حقوقي ولهب راضين يبلغون المعهد بلحاقي عشان ماغير ادفع وغير كذا ابغى انقل من المعهد واحس اني ضايع مدري من المشرف الي بكلمه او منهو الي ارسله اوراقي وفوق كذا ابغى اسجل في الحكومه الالكتونيه يرفض الموقع انا مادري وش فايدة الملحقية ما احس انه عطوني فايدة وحدة من يوم ما جيت مغير كل شوي يقلولي ارسل اوراقك وانا راحت فلوسي على فدكس كل شوي مرسل الاوراق

نفس الشعور والله ... الشكوى لله .. المشرفين بحد ذاتهم يحتاج من يشرف عليهم
والا انا الاخرى كانت مشرفتي اش حلاتها امريكيه ماشيه مع مهمتها زي العسل .. و تستقيل ويجينا الهم هو تهزيء هو سب هو اهمال والشكاوي من كل صوب تجيها ... لكن ارجع واقول الشكوى لله رب العالمين ..

ايه و الله بصراحة ما لهم داعيي,,
و اللهِ أنا الله بلاني بأدفايزر من كثر ما هي عجوز ما تدري ويش تسوي شكيت ان معاها الزهايمر ,,
قبل لا انزل البلد كنت ابغي اخلص معاها اوراق النقل الى الجامعه و تكلمني على الجوال و بعد يومين اكلمها تقولي لا انا ما كلمتك ولا قلت لك و لا سويت لك ,, و لا تسألني شنو التخصص الي تبغيه اقولها " بايو كمستري " تقولي شنو يعني تخصصك اقولها يعني بالعربي " كيمياء حيوي " ,, و ترجع تسألني طيب ويش انتي بتتخصصي ,, ؟؟!!

الله كريم و ما نقول الا الله يعينا على ما بلانا من ناس مالهم داعي في الوجود

المشرفين مالهم فايده ، ولو الملحقيه الزفت تحول المعاملات الكترونيا ، كان حناا بخير

مجمع جاليات ، ولا واحد فيهم عارف الشغل .. وكل واحد يكلمك كأنه يكـد عليك ..

اما خيريه ذي حدث ولا حرج جالسه بالمكتب تحسب انها عبدالله بن عبدالعزيز على غفله!! ،، ومعها واحد تبن اسمه السويلم ماغير يفرفر بالاسياب ونسى شغلته الاساسيه !!

انا معك ارفض وجود مشرف دراسي ، ومادري متى نصير زي استراليا نظام الكتروني تاخذ حقك بدون ماتشخذ !!!

الله يزيل كل موظف مقصر بعمله بالملحقيه ياكرررررررريم

من يعرف حميدة خان باجماعه؟؟وكيف هي ؟

سلام عليكم

و اشكر الجميع على التقاعل

أحب أوضح أن ليس لي مأخذ على شخص المشرف الدراسي أو أخلاقه

لكن لأجد أي فائدة من الدور الذي يقوم به

إما أن يكون هو حلقة الوصل الوحيدة بيني و بين الملحقية أو لا يكون

فهو لم يقدم لي أي نصيحة أكاديمية, و لم ينوب عني في إنهاء معاملاتي بالملحقية

رددوا معي لا للمشرف الدراسي

لا موب صحيح نحن تقدر وجود المشرف لكن هي مسألة امانة ولابد على المشرف ان يتحملها لكن قليل من يتحملها

أتمنى من الجميع التحلي بالأدب وعدم القذف أو الإتهام
وأشكركم على طرح معاناتكم وأتمنى تكون بدون تجريح


عموما نفس وضعكم
كلمت المشرف وقال لي الضمان المالي بيكون عندك على نهاية الدوام

ومرت ثلاثة أسابيع ولا وصل الضمان الا بعد جهد وألف واسطة


وفي النهاية أرسل لي الضمانات المالية و غيروا لي المشرف
والله يستر من المشرف الجديد