سلام عليكم
شف وانا اخوك اللي يقول لك شهادة امريكا والا شهادة السعوديه الخ الخ هذا شي اصلاً ما يهمك لانك في حالة خلقه متساويه عندك ولاتنظر لها
فيه ردود كانت تحمل افكار حلوه وهي انك بدل ماتجرب الغاء بعثه جرب تاجيل حتى لو ماحصل تاجيل ارجع اجازه لو على حسابك التذكره
طبعا ودي انك تحدد هدفك قبل كل شي
واحد من الشباب توفى ابوه الله يرحمه وهو كان بامريكا رجع حظر العزاء وبرضو رجع لاامريكا وتوفى اخوه ورجع برضو حظر العزاء ورجع يكمل دراسته والحمدلله هو شخص كبير في المجتمع لانه كان ذو عزيمه وهدف واصرار وانه لو قطع دراسته بسبب الحزن بكره الحزن مابينفعه وحتى الغالين اللي فقدهم لو كانو عالحياة ماسمحوا له يسوي هالشي
وانت تعرف مابعد وفاة وفقدنا شخص غالي اب واخ شي يسمى ظرف لكن برضو احترم ظرفك
واحد ثاني بس في بريطانيا
اسولف انا وياه البارح يقول والله اني مره رجعت السعوديه بدون مااقول للملحقيه ولا للمعهد ويوم وصل السعوديه جلس ثلاث اسابيع
ولاوده يرجع لكن كان معه ولد خالته ويشجعه والحمدلله الحين كمل سنتين والنفسيه اوكي
انت اول شي تسويه ...
تحدد هدفك ... تستخير الله عز وجل مثل ماوصانا الرسول صلى الله عليه وسلم في كل امورنا .. تتوكل على الله ثم تطبق
امريكا , السعوديه , انت حدد لك هدفك وامش فيه , وحاول قد ماتقدر انك تحدد هدفك بعقلك موب بقلبك ولاعاطفتك وشاور ناس تشوفهم افضل واكبر منك
اممممم نصيحة اخو لاتشاور اصحابك لاتشاور اقاربك لاتشاور منهم في سنّك
لان بعضهم وان شاء الله انهم قليل يكون اما حاسدك او اناني يتمنى لنفسه الافضل او انه يحكم عالامور بعاطفة
كلنا نتمنى نجلس مع اهالينا جلساتنا مع امهاتنا ابوانا اخوانا خواتنا تسوى امريكا والدنيا كلها لكن نفكر من جهة ثانيه
امي ابوي تعبو علينا ربونا ليش ؟ يبون يشوفونا افضل الناس بين هالناس تعذبت الام بالولاده والابو بالتربية لين كبرنا وقالو يالله كبرتو وبتربية حسنه انطلقو للحياة
وجا الوقت اللي نتعب فيه عشان نسعدهم ونرفع روسهم ونقول لهم احصدو مازرعتو
تذكر لما كنت صغير وتبغى تشرب ببسي يرفضون اهلك ليه ! مع انك تحبه ؟ لكن يدرون انه لمصلحتك وان بكره بتقول اشوا ماشربت ببسي يعدم الكالسيوم عندي
لكن الحين انقلبت الموازين نفرض ان اهلك يقولون ارجع او مشتاقين لك! لانهم يحبونك لكن جا الوقت اللي تقول لا لانه لمصلحتك ومصلحتهم بكره اذا جيت بالشهاده قالو اهلك اشوا انه ماسمع لنا وجاب لنا الشهاده ونفعنا
انا مره سافرت ادرس لغة بعد ماتخرجت واذكر بعد خمس شهور اتصلت امي علي قالت كفاية ارجع ووقتها كنت مثلك والله بحجز على اقرب رحله وخلاص برجع
لكن في نفس المكالمه كلمني ابوي وقال امك مشتاقه وانا مشتاق وهذي طبيعة البني ادم لكن انت مسافر لهدف مشرّف انك تتعلم منت مسافر تلعب او تتمشى لازم تتحمل المتاعب عشان تحققه واعتبر نفسك باختبار ياتكمل المده اللي انت حاطها ببالك وترجع محقق هدفك ياترجع وخلاص كان مارسمت هدف ولاسافر يعني (زيرو) مهوب قدامنا قدام نفسك وبين نفسك
انت لسى ببداية عمرك وطلعت امريكا لتحقيق هدف لكنك ماتحملت الظروف صدقني هذي هي الحياة كل مرحلة فيها اصعب من الثانيه
اليوم نتعب بكره يجينا شي يتعبنا اكثر ويصير التعب اللي راح ولاشي فحاول تتحمل ترجع تاخذ لك جرعة نشاط من السعوديه ثم ترجع امريكا تكمل
انا والله مهوب كل همي امريكا او بريطانيا او اي دولة انك تخسر التعليم احنا الحمدلله عندنا برضو تعليم كويس صحيح انه مايوصل
مرحلة التعليم بامريكا بس مانظلم تعليمنا خصوصا طلعو من عندنا عباقره يشهد لهم الزمان وكانت بدايتهم البكالوريس من جامعاتنا
لكن انا خايف انك من بعد صعوبة امريكا ودراستها واجرائتها تجي لسهولة السعوديه خايف عليك من هالنقطه بس
واحد من الشباب ثلاث سنين هندسة معماريه بجامعة الملك سعود حول ادارة اعمال
يعني من هندسه لاادارة من صعب جدا الى سهل
معدله اول ترم حليو ثاني ترم مش بطال ثالث ترم نزل اللي بعده نزل تخيل من جيد جدا تخرج من ادارة اعمال بتقدير مقبول
تدري ليه ؟ لان بالهندسة يبذل مجهود قوي وبشكل يومي وجا لاادارة اعمال صار يبذل ربع مجهوده بس وليلة اختبار يعني مهوب يومي شهري !
فانت اذا استخرت ولازلت مصمم انك ترجع اقول لك الله يوفقك وترى لك فرص بالسعوديه وانت الحمدلله معك انجليزي يعني امورك حلوه
لكن يبي لك تشد حيلك وماتستسهل الجامعات هنا حتى لو كانت الجامعه تعينك انك تستسهلها عشان تتخرج بمعدل زين وتقدر تكمل اذا ودك تكمل او تتوظف
لكن دامك بديت في مشروع بكالوريس امريكا واجتزت الاساس وهو اللغة كمل هدفك وارجع سو لك مشروع ثاني هنا
تدري حلو انك ترجع وتنحل ظروفك ان شاء الله لكن الاحلى والاطعم والالذ لما ترجع بشهادتك مكتوبه بحبر الالم الم الغربه
مابعد التخرج ان شاء الله
انا متخرج من السعوديه وصديقي من امريكا ومقدمين على سوق العمل
سوق العمل يبي شهادة بمعدل زين + لغة + خبرة حتى شهادتك الدراسيه يقولون لك كانها صادره من الخارج جب لنا معادلتها من الوزاره ههههههه يعني امريكا والسعوديه واحد في اغلب الشركات هذاك اول امريكا وامريكا الحين سوق العمل يبي شهاده من اي محل ومعها خبره كم سنه عالاقل سنه
ترى ماخلاني ارد على موضوعك الا شي واحد وانا اقرا موضوعك ذكرت روحتي لبريطانيا على حسابي والقلق اللي سويته عشان الحق بالبعثه والناس اللي كلمتهم من يسوى ومايسوى وشكل الامل وهو ينكسر في كل يوم وفي كل مكالمه من الرياض ان والله فلان رد يقول بريطانيا صعبه وفلان مايرد والخ وشكلي الحين مراكضي عالبعثه لاامريكا والتصريفات اللي اواجها
وبالنسبة للاخوان اللي يقولوون مالنا دخل نجاوب او نسكت حنا مسلمين وديننا يقول حب لااخيك ماتحب لنفسك
حتى لو كنا مانعرف اجراءات الالغاء مانمنعه من نصيحة وتجربه ممكن تخليه يعيد حساباته
و بعض الردود كانت تنصح يمكن كانت اندفاعيه لكنها من قلب ناصح لك وانت تعرف لكل شخص اسلوبه لكن خلك مثل النحله تجي عالزهره وتبعد عن شوكها وتاخذ رحيقها
اسف على اني تدخلت في شي مايعنيني لكن ان ماجاز لك كلامي ولقافتي اعتبر ردي مخفي يمكن غيرك يحتاج هالحكي
الله يوفقك ويسمح امرك ويسهل دربك ويكتب لك مافيه الخير يارب العالمين
.ع. September 9th, 2010, 07:39 AM
الله يخلي لنا ابا الخيل الملحق الثقافي وفعلا الرجل المناسب في المكان المناسب ...
وعيدكم مبارك وكل سنه وانتم طيبين