ضايق ومهموووم .. ارجوووكم ساعدوني والله مالي غنى عنكم ..

السلام عليكم



توني راجع من المكتب ووالله العظيم ضايق خلقي يالله اشوف الطريق من القلق والهم اللي فيني

مايعلمه الا رب العالمين ..

ثلاثة شهور من الملاحقة ورا الجامعات

مع ان معدلي في البكالوريوس 3،35

يعني موب سيئ بهالدرجة !!

:(


بعد ماقدمت على جامعة قونزاقا

وقعدت اوراقي عندهم شهر ونص

يجيك الرد بكل بروود لازم يكون معاك جيمات !!

مع انهم قالو لي بالبداية موب لازم جيمات

لكن يوم وصلت اوراقي لهم قالو لازم عندك جيمات ..

>>>> طبعا جيمات قبل التقديم

انا ماعندي مانع اني اختبر جيمات بعد مااخلص اللغة لكن الجامعه تقول لازم قبل التقديم ودراسة اللغة !!

سحبت عليهم وطبعا دفعت مبلغ الأبلكيشن والإرسالية وطارت في الهوى !! :(


وشفت جامعة ثانية

اسمها WEBSTER UNIVERSITY

في سانت لويس

قدمت عليهم اوراقي على اساس اني ابغى قبول تسويق ماجستير ..

طبعا قبل ماقدمت اوراقي اتصلت فيهم استفسر يعطون قبول مشروط

قالو ايوه نعطي قبول

ادفع الأبلكيشن وارسل اوراقك

دفعت الأبلكيشن وارسلت اوراقي

واليوم بعد مرور 30 يوم على ارسال اوراقي

دقيت على المكتب عشان يستفسر من الجامعة

ويجيك الرد بكل برووود من الموظفه حقت الجامعة

تقول ايوه وصلت اوراقك بس ترا حنا مانعطي قبول مشروط يعني طلبك مرفوض !!!


وانا والله العظيم قفلت الدنيا بوجهي

دفعت الى الآن حدود 4500 ريال

مابين رسوم ابلكيشن وارساليات

ومابين رسوم مكتب واتصالات


حاليا يوجد لدي قبول معهد

والآي توني وصل لي من جامعة قونزاقا وبقدم اوراقي على السفاره


المطلوب

ابغى قبول جامعة ماجستير بأي مدينة بأي مكان بأي جامعة

اهم شي تخصص تسويق

ابغى اسرع قبول


تخصصي البكالوريوس

دعاية واعلان

التخصص المراد إكمالة بالماجستير

تسويق


ارجوووكم ساعدوني ابغى اسرع قبول بأي جامعة


ماهي الجامعات اللي ممكن تعطيني قبول على معدلي

والأهم من ذلك يكون القبول سريع




وشكرا

سلامتك والله من الضيقه
حاسه فيك وربي :(
والله يعوضك المال بس صحتك اهم منها
وتذكر ايام الاسهم راحت علينا مئات الألوف ونسينا هههه
المهم اعرف واحد تعاملت معاه زميلتي ابن حلااااال كان بأمريكا ويعرف يتعامل مع الجامعات بسرعه ماأخذ وقت في قبولها
اذا تبغى رقمه قول لي اوك!!
وفلها وربك يحلها ولاتكدر خاطرك على دنيا تاركها

امس انا حضرت ملتقى الجامعات الامريكية في جدة الي عامل مكتب IDP
وكانو يعطوننا الابليكيشن مجانية طبعا وعلى اساس اننا ثاني يوم تروح للمكتب نستكمل الاجراءات ....تقدر تطبع الابليكيشن من موقع الجامعه الي تبغى وتخصص تسويق موجود عندهم ومعترف فيه
تقريبا 20 جامعه
انت ليه ماتروح للفرع الي اقرب لك سواء بالرياض او بجدة وقبلها شيك على الجامعات الي كانت بالمعرض وترى كلها كانت جامعات ليست قوية ماعدا واحده او اثنين علشان كذا كانت جاية تعمل دعاية لها هنا وكل الاجراءات مجانية راح لهم زوجي اليوم يكمل اجراءاتي بس راح متاخر قالوله تعال بكرة
دوامهم من 8 الصباح الى 4 العصر
لاتزعل نفسك وهذي محاولة مجانية
وعموما ياسيدي انت طالع على حسابك صح ؟ يعني تقدر تسافر بقبول اللغة وتبحث هناك بنفسك وترى التواصل مع الجامعات مرة مهم وانا حصلت على قبول مشورط في تخصصي الي ابغاه وكانت جامعتي اول مرة تعطي قبول مشروط في هذا التخصص المهم اتواصل معاهم وترى مكتب الادميشن دايم يقولك الاجراءات الاساسية بس بعدين هما يعطون استثناءات

اذكر ربك وانا اخوك

فلوس بدالها فلوس

لو اقدر افيدك بشي كان ماترددت والله
, ربي يوفقك ويعينك ان شاء الله

بالتوفيق للجميع يارب

أنا طالع على قبول لغة
وإذا وصلت بالسلامة امريكا دبر قبول ماجستير

هذا أنا اللي مسويه ولا تشيل هم
واستعن بالله أولا و أخيرا

الله يجزاكم خير

اختي جنوبية ماقصرتي والله ..

انا المكتب خلاص اندفعت الفلوس وراحت : (

لكن اللي يهمني اسماء جامعات تعطي قبول بأسرع وقت

والباقي راح اشوفه بنفسي ..


شكرا لك على كلامك الطيب ..

! Abu saud !

mdaldosari

يعطيكم العافية جميعا


اختي rosah الله يعطيك العافيه والله ماقصرتي

طيب سؤال

الملتقى هذا فين وايش قصته ؟؟

انا بالرياض

هل يوجد فرع منه بالرياض ؟؟

ابغى قبول بإي مكان مايهم

المهم قبول الجامعه

ولو رحت بدون قبول جامعه ماراح تقدر تبتعث بدون القبول المشروط

لو كان معاي معهد فقط

فماراح يضموني

ولهذا السبب ابغى اي قبول جامعه الحين

لأنو راح ادرس معهد سنه وبعد السنه اقدر اغير الجامعه مايهم لو الجامعه صارت ضعيفه

مدام اني مسجل تخصص تسويق

فأقدر اروح للجامعه اللي ابغاها بالتسويق بعدين ان شاء الله

ياليت لو تعطيني معلومات عن هذا الملتقى ،،

لو هو في جده بس ححجز بالطياره الليلة ان شاء الله ..

ولو حصل انو بالرياض يكون احسن واحسن ..

ولا تكدر خاطرك يالذيب ابعطيك جامعة تقول وينك عننا من زمان,مرررررررة متساهلين ومعهدهم قوي وأغلب التخصصات مافيها جيمات بس ماادري تخصصك فيه جيمات ولا لاcentral michign universty وابشرك بعد مافيها توفل ولو لقيت مكتوب فموقعها طالبين توفل تراهم خراطين بس بيسوون فيها.وأي خدمة عيوني لك.

يعطيك العافيه اخوي عاشق الغربه

الجامعه للأسف مافيها ماجستير تسويق

فيها فقط بكالوريوس :(

المشكلة تكمن في معدّلك عزيزي العمري. متوسط الحد الأدنى للمعدل المطلوب للجامعات الامريكية هو من 3.55 - 3.75 . ثاني شيء القبول المشروط للتخصصات الادارية (مالية - تسويق - تأمين - محاسبة - إدارة - ..) ليس بالامر الهين لان الجامعة ستكون مطالبة بمراجعة ملفك ناقصا الـTOEFL و GMAT ولهذا ترفض الكثير من كليات البيزنس فكرة القبول المشروط. ممكن أحاولك في قبول مشروط لتخصص تسويق دولي إذا أحببت. والقبول غير مضمون (نظراً لتدني المعدل) ولكن الجامعة تعطي قبول مشروط في التخصص.