حبايبي استفسار خفيف لطيف بخصوص معادلة الشهاده wes . يالبيه لو تدخلون

السلام عليكم

شلونكم حبايبي المبتعثين والمقيمين

اول شي عسى ربي يوفقنا ويوفقكم لكل خير ويسهل امورنا واموركم ..


حبايبي انا حالياَ بأمريكا وابي اسأل عن معادلة الشهاده عن طريق شركه wes

سمعت انه لازم تكون الشهادات في ظرف مختوم من الجامعه ومدري وشو ...

وانا ماحولي جامعه ولا حووولي ديييره ..


السؤال اللي يتطارح معه نفسه : هل استطيع معادلة الشهاده وانا هناء ؟ ماهي الطريقه ؟ وهل احد قد سواها ؟؟


ياليت اهل الخبره والتجربه يفيدوني ..


جزاء الله كل من يفيدني خير وعسى الله يوفقه بدراسته وينجح كل سنه :fireman:

اخي العزيز:
خذ العلم من اخوك الفقير الى الله فهد بن عابد ولد يوسف بن احمد الهواري هههههههههه لا تصدق من بعد ولد بس متأثر بمسلسل شيخ العرب همام.

الخلاصه انا قدمت اوراقي على الشركه اللي ذكرتها wes هم اجبروني ارسل لهم اوراقي الاصل من السعوديه ومختمه لا واللي يرسلها كليتك او جامعتك في السعوديه نظامهم شوي تعقيد ولكن على مين اليك الحلول:

1- اكيد معاك اوراق طبق الاصل بالعربي ومترجمه ومختمه صح " لاتقول لا ثم ابطل اعلمك الحلول" <<<<جاي متحمس فاهم الشغله ههههه
2-اذا معاك اكتب معروض وش حليله تطلب من الملحقيه وبالتحديد الاستاذ رده العتيبي يختم لك الاوراق طبق الاصل ويرسلها من عنده على الشركه على طول . انتبه خل معاك نسخ لاترسل كل اوراقك ثم يضيعوها لك ارسل بس صورة الشهاده وكشف الدرجات بالعربي وايضا مترجمه. عشان احبك وايد هذا ايميل الاستاذ رده rotaibi(@)sacm.com بدون اقواس
3-انت الله لايهينك خش موقعهم وعبي استماراتهم وادفعوا الفلوس <<<<<<<على فكره تبي سلف ههههههه كاني اسمعك تقول لا طيب انا ابي <<دعابه

4- وهي اهم خطوه قبل المعروض وترسل اوراقكك راسل الشركه وقلهم انا مامعي يااولاد الحلال اوراق في ملف ومختوم لكن ابرسلها على الملحقيه وهم يختموها ويحطوها في ظرف فوشي لو تبون بس اهم شي انتم موافقين وان شاء الله يقولو اوكيه مافيه مشكل

هذا بخصوص الشركه هاذي.
...............................

الحل الثاني والجميل وانا سويته مرتين وراح اسوي المره الثالثه قريب جدا ألا وهو:

في شركه ثانيه موقعها Josef Silny & Associates | Home هذا نفس النظام ويمكن ارخص شوي بعد هاذي كل زملاي سوو فيها وانا جربتهم للامانه . انت شوف ادخل موقعهم واطبع الاستماره واختار نوع المعادله اللي تبيه وسدد وصور جوزازك وبطاقتك البنكيه وجه وقفا كف ذا مو صوره ههههههه ماعلينا وكل هذا الاوراق حطها في ملف لحالها وشهايدك حطها في ملف ثاني عندك ويفضل يكون من السعوديه الملف بمعني عليه كتابه عربي وانت قفله بيدك وحطه مع جوة الملف الاول وارسله والقلب داعي لك. الطريقه هاذي سواها 3 اشخاص ومشت ياحبيبي ياحبيبي الشوالي على غفله
اذا لا سمح الله قالو لا سوي نفس الطريقه اللي فوق حقت المعروض والملحقيه تختمها انا سويتها معاهم وزبطت.

يارب اني افدتك , اي خدمه تحت الطلب. واسف على خفة الدم الزايده بس انا عارف انت شايل هم المعادله لكن الله يوفقكك ويشيل همك وتنجح كل سنه هههه على فكره حلوه دعوتك تنجح كل سنه وينك من اول يمكن دعوتك تسلك معانا انت وفر الدعوه وقول تنجح كل سنين فترة بعثتك والي انتهت بعثته قله يطلب تمديد وادعي ليه هههههه اقول شكلي مصختها باي

فقط الدعاء الخالص للوالدين ولي.

فـهـــــد

انتبو من جوزيف سلني ,, صدع راسي وبكيت من القهر يوم تعاملت معهم خدمه سيئئئئئئئئئه وموظفين اسواء واغلاط في المعادله حسبي الله ونعم الوكيل كويس اني انتبهت وراجعت المعادله قبل ارسلها للجامعه الله لايوفقهم من شركه انتبهو واذا قد سويتو عندهم راجعو الكشف الاصلي حقكم والمعادله حقتهم لانها بتكون مو صح وفيه اخطاء اذا ما فيه نقص بالساعات حسبي الله عليهم قهروني وضيعو وقتي وفلوسي

خل واحد من زملائك أو أصدقاءك اللي في السعودية يروح لجامعتك ويطلب منهم سجل أكاديمي في ظرف الجامعة الرسمي ومختوم عند اللسان.. الشغلة بسيطة ماأخذت مني ساعتين..

في ورقة طلب تطبعها من موقع ويس فيها معلومات لابد أن تكتب من مرشدك الأكاديمي أو عميد كليتك أو أي شخص مسؤول ومن ثم تختم أيضاً

طيب ياجماعة هل يعادلون السجل بمواد الرسوب وإلا يحذفونها ويحسبون لي المعدل من جديد ؟

تكفون ردوا علي لأن أموري محيوسه ..

اقتباس:

---

المشاركة الأصلية كتبت بواسطة Pacta and Law

طيب ياجماعة هل يعادلون السجل بمواد الرسوب وإلا يحذفونها ويحسبون لي المعدل من جديد ؟

تكفون ردوا علي لأن أموري محيوسه ..

---

يحذفوا مواد الرسوب ويحسبوا المعدل بدونها وبالتالي طبيعي يرتفع المعدل