الحمد لله وصلت لامريكا .. 23/2/2011 تقرير مصور و فيديو

بصراحة أكثر من رائع يا أخ آياد بس سؤال ياريت تشقر على شيكاغو انا مبتعثة وجاية لهم بالعيد وربي كلامك طمني الحمدالله ياربي تحقق مااتمنى أنا كل مسلم

تسلم والله استغفرالله وأتوب إليه

الله يعطيك العافية يا غالي ..

1 - بخصوص المعهد ممتاز و الحمد لله و بستفيد منه و هو معهد ELS << علشان اصحاب النظريات الغريبة في هذا المنتدى ، و الحمد لله كل مدرسيني ممتازين الا واحد معتوه !! . لكن للاسف ان المعهد تم اغلاقة للتكدس العجيب
2 - تكلفة المعيشة ( انا في سانتا مونيكا ) وهي اغلى من لوس انجلوس نفسها !! صدقني اني ما اصرف الا 400 دولار او 450 دولار لا و هذا عندي فاتورة جوال و مواصلات ( بالباص ) و اي شي ، لكن بدفع 1050 للعائلة ( السكن ) ، لكن بالنسبة للاكل فالغالب اني ما اكل من برا لاني بفطر بالبيت و العشاء بالبيت بيكون الساعة 6 الي 7 المساء فما له داعي اكل برا .
3 - تختلف الاسعار و اسعار المعاهد من مكان لمكان ، لكن علشان تاخذ الـ I-20 و تدخل امريكا اضن انك تدفع 150 دولار او انك ما تدفع شي !! .. لكن انصحك ادفع مبلغ اول شهر من السعودية ( سكن - تامين - كتب - دراسة ) و خلص امورك .

و نصيحتي لك .. و الله يشهد علي اني قلتها لاخوي شقيقي ، لا تدفع الا مبلغ شهر واحد فقط ، و بعد كذا ادفع للمعهد كل شهر بشهره علشان حتي لو حبيت تغير او صار اي شي لا سمح الله . مو معني اني انا عاجبني ELS بيعجبك !! ، و الاهم انك من يوم تشوف السعودي و يبدا يتكلم عن سوء المعهد اسحب عليه و اعرف انه فيه خلل بعقلة و انه يبغى يضرك بس . لانه لو هو شايف ان المعهد تعبان ليش ماغيرة هو ؟؟

هههههههه الله يسعدك .. كيف اشقر على شيكاغو ! ، والله يا اختي انا بحثي قبل السفر كان مقتصر تماما على منتطقتين الاولى لوس انجلوس ( بدون منازع طبعا لعشقى لهذه المنطقة ) و المنطقة الثانية هي اركانسيس ( و الحمد لله ان الله فكي منها لانها هم ) لكن انتي ممكن تروحي للمنطقة هذه و بعدها اذا بغيتي تغيري ممكن تغيري بأول شهر !! على راحتك .

شكرا لمرورك و دعواتك

موضوع مميزز جدااا

جزاك الله خير وشد على نفسك نبي الدرجات العاليه
الله يوفقكـ
ويرزقنا البعثه

اهلين اخوي اياد

اشكرك على تفاعلك الذي نفعنا كثيرا فالله يتولى مكافاتك و يجزيك كل خثيرا

قريت لك باحدد المواضيع هذا الرد
اما التجوال فوالله انه مهزلة فقط ، في 3 ايام فقط موبايلي طلعت علي فاتورة 850 وشوي !! فإستخدمية كم يوم ثم قفلية و روحي طلعي شريحة من t-mobile ،

الان انا شريحتي موبايلي واتصلت عليهم قالوا لي ان التجوال فقط على تي موبايل تستقبل الرسائل و المكالمات مجانا واللي يكلموك من السعوديه كانهم يكلمون جوال سعودي عادي, وقال اشبك على شبكة تي موبايل يدوي بحيث انه ما يشبك على شبكات ثانيه , اما انا اتصل راح يكلف , فانا راح اخذ شريحتي موبايلي فقط عشان استقبل المكالمات من اهلي و اصحابي , لكن راح اطلع شريحيه امريكيه اكيد , فـ غريبه انت جاك هذا المبلغ وبعدين انت ايش سويت عشان يجيك كل هذا المبلغ شكلك كنت تتصل منه ؟؟

وبالنسبة لطيران الداخلي دلتا انا معاي 3 شنط وكل شنطه وزنها 23 كيلو , انا ما عندي مشكله ادفع فلوس , بس هل ممكن يقولون ما تطلع او لازم عدد معين ؟؟

وبالنسبة لفندق انا اشوف دايم ان الملحقيه تودي الطلاب على فندق comfort طيب انا حاجز على دبل تري , نفرض سواق الملحقيه قال ان دبل تري مافي اماكن مثل ما صار معاك وراح نوديكم comfort , عادي اقوله انا فندي بدبل ترى وهو راح يوديني ولا اخذ تاكسي ؟؟ وهل تنصح لو اقدر الغي حجزي واروح مع سواق الملحقيه على الفندق اللي بيختاره ؟؟ وضحلي الامور الله يخليك

والله يسعدك و يبارك فيك و يخليك لاهلك

شكرا لك على مساعدتي ائما فانت قدمت لي الكثير

لك تحياتي و تقديري

دمت برعاية لله

الله يسعدك .. شكرا لك ، لا تنساني من دعواتك .


نعم يا اخي هذا ما حصل معي بالظبط !! تخيل اني كنت استقبل المكالمات فقط ! شي انا كنت متوقع هذا الشي من زمان من موبايلي ، لكن ما توقعت انه بيوصل لهذا الحد ! ، لكن مو مشكلة و خليهم يخللوا الرقم ماعاد ابيه

انا بالنسبة لي نصحت اخوي و واحد من اصحابي رحلتة بإذن الله الاسبوع الجاي ، بإنهم اول ما يوصلوا للفندق و من ثاني يوم يروحوا لشركة t-mobile قريبة من الفندق ( دابل تري ) و هذا عنوانهم و انصح بشده انه يكون معك ايفون لانه بيسهل عليك كل شي بإذن الله :


انصح بالعرض الي قيمتة 50 دولار ( رسائل و اتصال لا محدود ، و 100 ميجا انترنت حقيقي ) ، و فيه الثاني قيمتة 70 دولار ( رسائل و اتصال لامحدود ، و 2 جيجا انترنت ) او تاخذ الباقة المفتوحة الي سعرها من 80 الين 90 دولار .. انا بالنسبة لي اكتفيت بالعرض ابو 50 لاني ماني محتاج نت كثير لانه نتهم غثيث ماعندهم 3G اعتقد انهم شغالين على الـ 2G او شي زي كذا .

ولكن انصحك تعمل حساب بالـ SKYPE هو ارخص وسيلة للتواصل مع اهلك .. بعض الاحيان اتواصل مع اهلي طول اليوم كاني جالس بينهم ، و اخر مرتين او 3 كنت متواصل مع 5 او 6 من اصدقائي .. 3 في السعودية و الباقي في امريكا << كان ناقص الشاهي

...........

بالنسبة للفنادق ، هو بالاصل بيوديك على فندق دابل تري لانه هو الفندق الي فيه قاعده الاجتماعات ، حتي لو كان مليان بيوديك عليه ، و بعدها يودوكم على فندق دابل تري . طبعا انت اول ما تدخل حاول بقدر المستطاع انك تاخذ غرفة في فندق دابل تري بدل ما توجع قلبك في فندق كمفورت ان ن ، و انصحك انك ما تحجز ابدا و خليك مع الناس

السلام عليكم
الله يعطيك الف عافيه اخ ايااد
حابه استفسر منك الاوراق اللي قدمتها للملحقيه لازم يكون فيها قبووول جامعه عشان يلحقووني لاني تعبت ادور ع قبوول جاامعه
كل مكتب يعطيني سعر خيالي اكتر من اللي قبلو
ف ياليت تقوولي وتطمني يكفي قبوول المعهد لللالحااق او ضروري قبول الجامعه ماااستر ان شاءالله

^^^^^^^

والله يا اختي اكذب عليك لو قلت لك انه فيه التحاق بدون قبول جامعي .. الالتحاق هو غالبا يكون بهذه الطريقتين :

1 - يكتمل ملفك ( قبول جامعي + معهد .. معترف فيهم طبعا و غير متكدسة ) ثم يتم عرض ملفك علي اللجنة المتخصصة ثم يتم الحاقك .
2 - اذا جا امر ملكي فبإذن الله بيشملك و يشمل غيرك حتي لو كنتي بدون قبول جامعي .

لكن ..
لا تشيلي هم فبإذن الله اتوقع قريب بتكون فيه مكرمة ملكية نظرا لان شهر فبراير كانت فيه مكرمة و شهر ابريل ( اضن ) انه كانت فيه مكرمة .. فاتوقع قريب بإذن الله بتكون فيه مكرمة

ارجوك ... ولا توجد لي علاقة بالادارة العلية بالملحقية او بـحاشية الملك .. انما هو توقع فقط لا اكثر << يرحم امك قول فيه زيادة رواتب بعد

القبول ..
جيبي اي قبول لاي جامعه حتي لو كانت الجامعه هي عبارة عن محل بيع ملابس و في الصبح جامعه !! الهدف انك تلتحقي ثم قدامك فترة طويلة تدوري فيها الجامعه علي راحتك .. و المرة هذه بعد الالتحاق بيكون عندك ضمان مالي من الملحقية

اخيرا ...

الالتحاق اسرع مما تتصوري لمرحلة الماجستير و الدكتوراه حتي لو كانت بالطرق الرسمية ، لان البكلريوس ملا امريكا !! << لهم التحاق لك مو بسرعة اهل الدراسات العليا *( بس لابد تكون اوراقك مكتملة اذا بالطرق الرسمية )
انا شخصيا الله سبحانه اراد اني التحق بأمر ملكي ، و التحقت و انا ماعندي قبول جامعي ، بعد بكم يوم استلمت القبول و اعطيتة للمشرفة

الله ينور دربك يالغالي ..
نصائحك ما نستغني عنها يا غالي، ويقولك أسأل مجرب ..
أنت ذكرت أني أخلص أموري وأدفع مبلغ أول شهر من السعودية، الاشياء اللي ذكرتها سكن وتأمين وكتب ودراسه أدفعها للمعهد وهو يتكفل فيها؟ وبحدود كم الأسعار راح تكون هذه الدفعه؟ ( أكيد في إختلاف بالأسعار لكن حابب أسألك عن تجربتك)

وعلى فكره أنا أهنيك أنك ما تتأثر بالكلام اللي يجيك بسرعه، بالعكس تترك لنفسك الحكم.

تحياتي لك عزيزي إياد.

تختلف من منطقة لمنطقة و علي حسب الضرائب و العموامل الاخرى ، بالنسبة لمعهدي بسانتا مونيكا اضن انه كان مكتوب في الـ i-20 حول ١١ الف ريال .
لكن فيه معاهد قيمتها بالشهر ٦٠٠ دولار لكن للاسف ماعندي خلفية ابدا عن تدريسها او او او .

قيمة السكن طبعا معهدي بيسحب مني كل شهر ٢٥٠ + ٨٠٠ = ١٠٥٠ تبع العائلة << هذا سبب افلاسي و ياريت الملحقية ترفع تقرير بحالتنا الصعبة ( مستحيل انهم ما يعرفوا بحالتنا ) و الحمد لله .. ما اعتقد انه فيه فرق بين امريكا و كندا ، كلها بيحكمها اوباما و هي اصلا جزء من امريكا ( الله يبارك لهم ) ليش هم بيستلموا ٢٨٠٠ تقريبا و احنا ١٨٠٠ ؟ .

بالنسبة للجزء الاخير .. سامحني مافهمته ( بخصوص التاثير بالكلام ) اتمنى توضحة

شكرا لك