مساعدة معآملتي في الوزارة تُرفض للمّرة الثّانية<<< ويآليل يآعين متى أبتعث ؟!

اوووه ماشاء الله عليك انتا معايا على نفس الخط يارجل حتى نفس النسبة 78
والله بموضوعك دا مافي غير حل واحد خطاب صاروخ اسكود الى عبدالله الرومي من الامير سلمان
الله يطولنا عمره ولو نسبتك 20 ما راح يقدر يتكلم صدقني مادام تقدر تدخل له ارجع ثاني وقول له انهم رفضو روووووح قوله ياطويل العمر انت اشرت لي على الورقة ورحت للوزارة وقالو لي مرفووووض ان شاء الله الامير سلمان يشيل الرومي ويخليه فراش
انا كنت ابي اسوي مثلك بس الان خلاص فراااامل مادام الشغلة كذا
الان راح اشوف اذا الوالد يعرف احد بالوزارة ممكن تمشي
والله شكلها في النهاية راح اخد امر اركاب و اتوكل دا اخر حل
بس في حل اخر انت خذ امر اركاب واذا والدك عنده واسطة حلوة في الوزارة
اطلع ادرس بس اسبوعين او ثلاثة ويجيك الالحاق طبعا بس خلي والدك يمشي لك اوراقك اذا ارسلوها للوزارة
واذا على المبلغ اللي اعرفه اذا تبي تتطلع 3 شهور 40 الف كااااافية
انا صاحبي راح لندن يعني اغلى بلد ومعاه 15 الف طبعا الشباب ماقصرو معاه قعدوه شافو له سكن مرة رخيص وجابو له معهد الملحقية صارو يسئلوه منوين جبت المعهد الرخيص دا بـ800 مدري الشهر او المستوى وقعد 3 اسابيع وحول على حساب الحكومة
بالله ياخوي اذا جاك الحاق بالبعثة قول خلينا نمشي
(( مع الخيل يا شقرا )) اتمنى انياكون افدتك

أخوي البعثة تحق لأى مواطن سعودي طموح ويبي يدرس..
يعني بالله أبسئلك؟ ألحين إنت طموح مثلا وتبي توصل لشي لكن قدر الله وصارت لك ظروف وماقدرت تحقق الشروط ؟ وش تسوي خلاص تتخلى عن هدفك! لا حاول ياخي وروح قدم وشوف منا ولامنا ووهذا انا اللى قاعد أسويه أعتقد إني ماسويت شي غلط.

لا والله لاني مبسوط ولاشي اللهم إني أعرف أشخاص هناك في الوزارة فقط

إيه يمكن..

هلا والله ماجد..
أما صاروخ سكود مرة وحدة أخاف افجّر بعدين
يآخي الرومي يوم دخلت عليه تدرى وش يقولي؟ يقول إحنا مانرفض أى معاملة كل المعاملات موافق عليها بس إنزل تحت للإخوان ويعلموك ليش رفضت ,,وزي ماقلت نزلت عندهم وكل واحد يقولي تصريفة ماني داري مين الصادق..<<<هي سياسات عرفت
وبعدها طلعت
والله شوف أخوي هي حظ ترا أحياناً..وإذا معك فلوس رووح وش تنتظر إطلع على حسابك وخذ أمر إركاب وتوكل على الله وروح إدرس..
والوالدخل يخلص لك أوراقك من هنا..
والله الوالد عسكري بس أنا شخصياً أعرف ناس هناك بالوزارة بس المشكلة لاحت مثلاً منو بيظبطني وأنا برا
أقولك مطفّر تقولي 40 ألف
الله يسهّل أمرك وأمري وأمر المسلمين

رغم اني ما اعرفك شخصيا الا اني والله حزين عليك
وخسارة للمنتدى عضو نشيط
المهم رزقك بتاخذه وان شاء بعثه الواسطه ما تعرف نظام وانت احسن من
غيرك يروح سياحه سنه ويرجع

حديث قدسي

يا ابن ادم : لا تخافن من ذي سلطان ما دام سلطاني وسلطاني لا ينفذ ابدا
يا ابن ادم: لا تخشى من ضيق الرزق و خزائني ملآنة وخزائني لا تنفذ ابدا
يا ابن ادم : لا تطلب غيري وانا لك فان طلبتني وجدتني , وان فتني فتك وفائك الخير كله
يا ابن ادم : خلقتك للعبادة فلا تلعب وقسمت لك رزقك فلا تتعب , فان انت رضيت بما قسمته لك ارحت قلبك وبدنك وكنت عندي محمودا وان لم ترض بما قسمته لك فوعزتي وجلالي لاسلطن عليك الدنيا تركض فيها ركض الوحوش في البرية ثم لا يكون لك منها الا ما قسمته لك وكنت عندي مذموما
يا ابن ادم : خلقت السموات السبع والاراضين السبع ولم اعي َ بخلقهن ايعيني رغيف عيش اسوقه لك بلا تعب .
يا ابن ادم : انني لم انس من عصاني فكيف من اطاعني وانا رب رحيم وعلى كل شيء قدير
يا ابن ادم : لا تسالني رزق غد كما لم اطالبك بعمل غد
يا ابن ادم : انا لك محب فبحقي عليك كن لي محبا



الله يوفقك ويحقق هدفك
ان شاء الله بعثة واذا ما جات عندك مليون خيار ثاني
والله يوفقك وين ما يكون رزقك

انت تدري لو انك بدل هالحوسة كلها رحت على حسابك كان الحين منضم ومفتك من الواسطات
والمرمطة..
ولا على الاقل لو جيت قبل المكرمة بكم يوم كان انتهى موضوعك
اخوي يوم درى عن المكرمة خلص اموره كلها وجاب قبول معهد وطلع فيزا وكلها صارت باقل من ثلاث اسابيع ماشاءالله ووصل بنفس اليوم اللي قالوا فيه عن المكرمة كان يوم اربعاء وانضم بعدها باسبوع ..
ماشاءالله تبارك الرحمن

الموضوع يبيله اجتهاد منك واصرار على تحقيق طموحك وعدم التفريط بالوقت اللي يروح عليك وانت جالس تطامر من مكان لمكان تترجى ناس عشان تضمك كنها تصرف عليك من جيبها ..

الله يرزقك بس ..

الله يجزاك خير ..ياحبيبي والله مدرى وش أقولك على مبادرتك الطيبة هذه ..والله إنك أفدتني كثير
شكراً أخوي ماقصرت..والله لايحرمنا من ردودك الطيبة

يارجال 9 شهور ماتسوي شي ..
لو اقولك قصتي راح تكافح عشان البعثه ..

انا انسان تخرجت من الثانوي لي اربع سنوات
السنه الاولى كنت ابي اخش هندسه لكن رفضوني وعقدوني الجامعه واضطريت اني ادرس بقسم الزراعه ,,
نفسيتي زفت وكنت من تخرجت من الثانوي وانا اقدم على برنامج الملك عبدالله الله يحفظه ..
قدمت ثلاث مرات ومافيه فايده ..
قلت اطلع على حسابي .. لكن الحاله الماديه سيئه ..
حطيت البعثه قدام عيوني ورحت قدمت على شركة الكهرباء
درست سنتين وتوظفت براتب 6000 الحمد لله ..
جمعت راتبي مدة سنه وطلعت على حسابي .. المبلغ كان يكفيني فترة 8 شهور
المهم وصلت امريكا بتاريخ 23 فبراير ( وقت قرار الملك )
جلست اسبوعين وانضميت بدون واسطه ولله الحمد ..

اللهم لك الحمد على كل شي ,,

الزبده في الموضوع اني اقولك اتعب اتعب .. ربك راح يريحك ويسهلك امورك ..
الحمد لله والشكر على كل شي ..

حلوة قصتك ويعجبني إصرارك لتحقيق الهدف ..
والله ياخوك كل واحد راح ياأخذ نصيبه من الدنيا هذه ولاكن لابد ..من الكد والتعب ..مافي شي يجيك لين عندك <<وان جا الين عندك صدقني ماراح تحس بطعمه
والله حظك حلو مرة يعني في اسبوعين ماشاء الله إنضميت عيني عليك باردة....
صحيح لابد من التعب والمكدة وانا والله بعد مشكلتي إعتمدت على الوسطات وأستغفر الله ربي ماوفقني ..
لاكن الله يكتب لك ولي الخير وللمسلمين ....

ماشاء الله حلو
الله يوفقك ....

>>> بتبكي
والله يا اخ ذكرتني بنفسي السنه اللي طافت قدمت وانقبلت بس فاتني التدقيق
ماتتخيل لو اقولك شقد تعبت عشان يقبلوني من جديد
واسطات مانفع ولا برقيات ولا الامير سلمان كتب لنا ورقه كتب فيها مدري نسيت بس كانت تصريفه
حتى بقولك انتبه يمكن تلاقى احد يقولك بضبطك بس بمقابل مادي اتررررركه لا تصدق
المهم جلست احاول لحد ما بدت المرحلة السادسة وقدمت من جديد ونقبلت
والحين مع عسفة تجسير وووووو ..الخ
المهم حاول بس مالك الا انك تطلع على حسابك ثم تلتحق
اما غير كذلك فمالك الا صارخ اسكود مثل ماقال احد الاعضاء