مساء الخير ع الجميع
كيفكم ..؟
كالعادة راح أدخل ف الموضوع على طول
وهدفي منه هو تنبيه الكل لأشياء مهمة ...خاصة لمن تم رفضه أو اللي حاجز موعد بالسفارة وطالع على حسابه الخاص أو مرافق يبغى
ياخذ فيزة دراسية حتى ماتتعرض تأشيركم للرفض لاسمح الله
وأتمنى من المشرفين عدم نقل الموضوع لتعم الفائدة ع الجميع ..
طبعا أول شي عملته لمن حجزت موعد اخترت سفارة الرياض ..وكان موعدي السبت هذا بتاريخ 9 أبريل
المهم أنا ماراح أتكلم عن كل حاجة حصلت لإنه ماشاء الله في قسم متخصص والأخوان والأخوات حكوا قبلي عن المقابلة بالتفصيل
الممل
لكن راح أتكلم عن كذا نقطة حصلت وكانت جداً مهمة يعني ممكن تتسبب لاسمح الله في رفض التأشيرة زي ماحصل مع أخونا
"رماد إحساس"
أول موقف تعرّضنا له وهو عند اللبنانية اللي بتاخذ صفحة تأكيد الموعد ..طلبت انه كل جواز تنحط فيه هذه الصفحة ..قلنا لها مافي الا
وحدة ..قالت روحوا صورو وتعالوا:death:(موجود عندهم استديو تصوير بس بعيد شوي )
يعني بعد التعب كله والوقفة نضطر نروح نصور بس قلنا ان شاء الله خيرة
المهم طبعا دخلنا غرفة التفتيش بعد كذا خرجنا لقينا واحد ماسك رشاش لعبة وعيونه بس اللي تتحرك :sticktongue:
طبعا هذا الشي مايهمنا بس حبيت اقول للي خافوا منه ترى عادي مايخوف هههههههه
ثاني موقف تعرضنا له وهو عند الشباك الاول اللي بتاخذوا فيه بصماتكم ..وكانت وحدة هندية طيوبة وبتجنن ..سألت أخويا سؤال
هل انت سافرت من قبل ؟ قال لها ايوا البحرين
أنا هنا انصدمت :blink:..لإنه عبيت الابليكشن حقه وجاني هالسؤال وكتبت لا !
المهم جلست اتسابب معاه بصوت راخي ..وهو بكل برود يقول انتي ماسألتيني!
وهو سافر بالبطاقة عشان كذا جوازه فاضي وانا ناسية انه سافر لها لانه من زمان حصل هالشي
ويحاول يقنعني والهندية مبتسمة لنا ياحليلها مو فاهمة شي :moptop:
بعد ماخلصنا قلت في نفسي بكيفها تجي زي ماتجي
هما الخسرانين!
ثالث موقف وهو الأصعب
انتظار المقابلة وخوفنا من شباك 9 .. وفي اثناء الانتظار .. قال اخويا ماراح اروح لو طلع هو
وكل شوية عيننا عليه بس اللي لاحظته انه اللي واقف وبيقول الارقام انه مركز ع هذا الشباك+ بينط في الارقام وهذا الشي مرة
استغربته منه فما أعرف ليه عمل كذا
الخلاصة إنه حظنا كان عند شباك 9 ههههههههههههه
أول مارحنا لها كانت الأخلاق قافلة مرة + الحواجب على شكل 8 تحت الجذر :angry2:
سألت أخويا أسئلة اعتيادية الما وصلت عند كشف الحساب !
الأخت تضايقت وتكرنت وقالت ليه مافي المصدر ..طبعا أخويا جايب معاه شهادة بنكية وكشف حساب كمان
قال لها هذه فلوسي ..
قالت من وين
قال لها أنا موظف وجمعت ولي ... سنوات متوظف
طبعا الاخت ماعجبتها الاجابة ..قامت اخذت كشف الحساب واشرت بالقلم الاحمر على المبلغ ورمته ههههه قالت هذا من وين
المهم اخويا تلخبط وتنكب أبو جدو ..أما أنا قلت خلاص الحرمة حتقول امسكوا الباب ..بس للامانة ماكنت خايفة لاني كنت متوكلة ع الله
نرجع للموقف ..قال اخويا في آخر لحظة ..انا حقتي 60 ومن عند الولد 40 :happy_crying:
هنا الاخت قبلت بإجابته الحمدلله:thumbsup:
وصارت تسألني أسئلة برضو اعتيادية
قالت فيزتكم مقبولة مبروك
سألتها متى تجي التأشيرة
قالت انتي أسبوع ..وأخوك ممكن شهر ..عاد أخويا وقتها انفجع قالها الدراسة!
قالت له أعرف أعرف هههههههههههه:wha:
المهم قالت لي شكرا مع السلامة (يعني ضفي وجهك ) ههههههه
والحمدلله تأشيرتي انطبعت ثاني يوم واسلتمتها أمس ..بس الخوف من تأخير فيز مرافقيني
ولا أنسى أقول لكم إنه أول ماشفتها قلت (اللهم إني أسألك خيرها وخير ماجبلت عليه وأعوذ بك من شرها وشر ماجُبلت عليه)
وللعلم الآي توني الأصل والصورة رجعوه لنا !
تنويه:
اهم شي في الموضوع هو كشف الحساب ..وأول سؤال ممكن تنسألوا فيه ؟ من فييين لكم هذا المبلغ؟
فحاولوا تكون عندكم إجابة مقنعة لو كان المبلغ في حسابكم ومطلعين عليه شهادة أو اثباتات إنه في شخص حيتكفل فيكم ..
إن شاء الله بس استفدتو من الموضوع
دعواتكم لي
مودتي
