من ظلمنا في مكرمة ملك القلوب -عسى الله يحفظه-

May 3rd, 2011, 08:00 AM

السلام عليكم ورحمة الله وبركاته
وصلت الحمدلله واشنطن قبل عدة ايام وذهبت الملحقية وكلمت المالية مدير قسم الرواتب اوحاجة زي كذا عن مكرمة الملك عبدالله بن عبدالعزيز لشعب المملكة الوفي وقال لي ماتستحقونها لانه الصرف يبدأ من تاريخ دخول بلد الابتعاث فالله يعوضنا عنها رغم اني ما انكر انه في قلبي غصة من الموضوع لانه لو تذكرون كانوا يقولون مبتعثي المرحلة السادسة لازم يصدرون قرارا الابتعاث قبل نهاية شهر 4 ميلادي فالمفروض اللي تعدى هذا التاريخ هو اللي راحت عليه لكن لقوا ثغرة تاريخ الصرف من تاريخ الدخول رغم انه كلنا مبتعثين مرحلة واحدة والتاخير اللي صار في انه نبدا ندرس هم ومكاتبهم اللي جابت لنا القبول انا طلعت قرار الابتعاث قبل تاريخ المكرمة لكن تاريخ الدخول كان بعد 20 ابريل لكن حسبي الله ونعم الوكيل على اللي ظلمنا ان كنا مظلومين
ويمكن البعض يستغرب مني او من كثير من الناس اللي جاءوا بعد المكرمة ويقولون ليه حسودين او حقودين
لكن لا والله الحكاية ومافيها انه لو -واعوذ بالله من كلمة لو-جاتني كانت حتجيني تقريبا 9674 دولار (راتبين أساسيين الهدية من خادم الحرمين 1495+1495=2990 زائدا راتب المبتعث الأساسي= 4837.77 للشخص) لانه انا وزجتي مبتعثين والشي الثاني في ناس اجبروا يقدمون استقالاتهم فراحت عليهم في رواتبهم الاساسية وراحت عليهم حتى من البعثة وهذا مو ظلم كبير والشئ الثاني كلنا انقبلنا مع بعض في المرحلة السادسة -وينطبق علينا ماينطبق عليهم من مدة الدراسة ونظام الابتعاث وكل شروط الابتعاث والتزاماتها والمفروض نظاما نتساوى في كل الامور خاصة المالية منها- وما أحد أخرنا او عطلنا غير القبولات اللي جاءت متاخرة منهم وجاءت بتواريخ دراسة متأخرة جدا انا شخصيا تعطلت لعدة أشهر رغم ان امورى كلها كانت جاهزة من قبل 9 شهور او اكثر وجريت خلف قبولي بنفسي وتعبت فيه مراسلات اخذ ورد وريحة وجية كأني انا جبته مو مكتبهم ولو استنيتهم للاسف يمكن للان ماسافرت ويمكن الحق مع المرحلة السابعة ولا حتى الثامنة لكن ارجع واقول الحمدلله على كل حال وانا لله وانا اليه راجعون وترى كثير من الناس حقيقة بحاجة شديدة خاصة اللي معاهم عوائل -الله يعينهم يلقونها من مصاريف سكن ولامصاريف حضانات ولا من انشغال عن الدراسة ولا مصاريف الاطفال الكثيرة طبعا الله يحفظهم جميعا لكن مكافاتهم بسيطة ماتتعدى 272 دولار للطفل بالشهر رغم انه معدل سعر الحضانة 180 دولار بالاسبوع وليس بالشهر-وبدون اي سبب ينحرمون منها فقط لانهم جاءتهم قبولات متاخرة وكانت اصلا منهم ومن مكتبهم اللي متفقين معاه مهي اهمال منهم او تاخير في اجراءات او تاجيل بعثة كل الحكاية ومافيها قبول متاخر من المكتب أوالملحقية وحرمان من مكرمة ملكية من الملحقية المفروض تكون شاملة لجميع المبتعثين بما فيهم المنظمين الرسميين للمرحلة السادسة وخاصة لمن أصدر قرار الابتعاث قبل تاريخ المكرمة لكن الحمدلله على كل حال
فانا اللي اقوله ان كنا مظلومين فالله ينصرنا وعسى الله ان يرد المظالم وان ماكنا مظلومين فالله يعوضنا باللي احسن منها وانا حقيقة ما ألوم احد لكن احس فيه تفرقة او خطأ كبير وقع وظلم لعدد كبير من المبتعثين فاتمنى صوتي وصوت اللي حدث لهم نفس نفس الموقف يوصل للمسئولين ويتم مراجعة الموضوع وان وصلوا لنتيجة اننا مانستحقها يبينون لنا سبب منطقي وماعاد نطالب فيها واتمنى اللي عنده طريقة يساعد فيها لوصول الموضوع للشخص المسئوول يتفضل بها وله بها ان شاء الله اجر عند الله لانه صدقوني والله لو سمع بها احد المسئولين ما حيرضى عن الظلم اللي وقع وانا لسه عندي امل كبير بالله ثم بالمسئولين المباشرين انهم يصححوا وضعنا لانهم مسئولين عننا امام الله ثم الملك -أطال الله في عمره-وما في احد يرضى على نفسه بشئ حرمه الله عز وجل على نفسه ,عن أبي ذر الغفاري رضي الله عنه عن النبي - صلى الله عليه وسلم - فيما يرويه عن ربه عز وجل أنه قال : ( يا عبادي إني حرمت الظلم على نفسي وجعلته بينكم محرما فلا تظالموا.......الى اخر الحديث الشريف.
وفي الختام ,
اشكر الله واحمده على نعمه كلها واسأل الله أن يحفظ لنا ملكنا وقائد مسيرتنا
وأتقدم بالشكر والتقدير لخادم الحرمين الشريفين الملك عبد الله بن عبد العزيز ملك المملكة العربية السعودية لما قام به من دعم هذا الوطن المعطاء من خيرات ومسيرة والنماء والعطاء المتواصل وأن يديم عليه الصحة والعافية ومحبة الشعب السعودي الاصيل ..
وأن يجعل برنامج الابتعاث -هذا البرنامج الضخم- في ميزان حسناته واعنه يا الله علي قيادة بلادنا للخير والفلاح والعزه والنصر
وأن يجزي الله الخير لكل القائمين على البرنامج من الوزارة والملحقيات ولكل من يعمل في خدمة سفراء وطن الخير وطني المملكة العربية السعودية
وبالتوفيق للجميع

• نشر عبر تويتر
• نشر عبر فيسبوك
• نشر عبر جوجل