خوف + قلق = الله يوفق كل من يفيدني ويسهل أمره

السلام عليكم ورحمة الله وبركاتــه ..

الله يوفقكم جميعا ويسهل امر كل مسلم وويحقق الي في باله ..

انا الحمدلله جاني قبول معهد وقبول جامعه وجتني الفيزا ..ودراستي في شهر سته ميلادي ..

لكن عندي مشكله الوقت قصير و انا ابي أمر اركاب ماادري وش الطريقة ..

من ناحية العطيه الله يوفقه الي يساعد الناس مو موجود على مافهمت حاليا لمدة اسبوعين برى المملكه .. ..

وانا لازم اجيب حجز اما امر اركاب او على حسابي الاسبوع ذا وفهمت انه جميع الخطوط حاليا فل وتذكرة اقل تذكره 2500 ..

...تكفون ساعدوني وش الحل عشان اقدر اجيب امر اركاب ..

الله يسهل امر كل من يساعدني ..ودي احقق هالامنيه الي من يوم وانا بالمتوسط اتمناها وجلست لمدة سنه من اقناع اهلي والحمدلله هم الان معي و يشجعوني بس خايفين جدا .. يعني راس المال حاليا لي الي هو ببيع سيارتي بس ..

انا حيطت لكل شيء احتماالات ..يعني امر الاركاب يساعد بالانضام وانا مامعي غير من 30الى 40 ألف ..من جميع الجوانب حاولت اجيبها ..

تتوقعون ان شاء الله تتسهل اموري لين انضم ..

وابي رايكم هل اقدر اطلع امر اركاب بدون مقابلة العطيه ..وكيف الاربعاء فيه دوام بوزارة التعلم العالي ..وممك انوه اي موظف يقدر ظروفي انه يعطيني امر اركاب او لا ..



شاكر لكم الله يجزاكم الف خير ..

جاري أنتظار المساعده منكم الله يعطيكم العافيه ..

السلام عليكم
الموضوع ترى سهل أنا تقريبا كنت زي حالتك شوف حاول تعجل في أمر الإركاب ترى يصدر ممكن بيوم وبعد ما تحصل على أمر الإركاب مكتب الطيار يجبلك حجز على أي خطوط بإذن الله تلاقي

الامر الاركاب صعب هالايام
حتى لو قابلت العطيه راح يقولك ابشر ... بعدين يحولها على وكالة شؤون البعثات بحي الغدير ... يعني احلى تصريفه
دوام العطيه السبت الاحد والاثنين تروح لهم من الساعه 7 الى 8 ... تتاخر عن 8 بدقيقه بس ما راح يدخلونك .... خذ كل اوراقك

30 الى 40 الف ... بالعافيه تكفيك 5 شهور ... وطبعا برضو تعتمد على ولايتك ومدينتك

اخوي انت سويت الكثير ومابقى على قولتهم الا الطفايس

اتفق معك ان أمر الأركاب مهم لكنه تراه صعب وصعب جدا لكن ماعلى الله شي صعب

لكن ودي انصحك لاتنتظر أمر الأركاب وتجعله يوقفك عن مشوارك ... توكل على الله واشتري تذاكر وسافر وبإذن الله تنضم بعد فترة بسيطة

الله يوفقك

الله يوفقك ويستر عليك سافر على حسابك ولاتخسر البعثة نصيحه لوجه الله وان شاء الله امر الانضمام سهل بإذن لكل حادث حديث خل الوالدة تدعيلك وتوكل على الله واكثر من الدعاء والاستغفار وعسى الله ييسر امرك ونا خوك

جزاكم الله الف خير ..

والله يوفقكم يارب ..ويوفقني ويوفق كل مسلم ..

نصايحكم على راسي والله ..


ان شاء الله ربي بيسهلها علي وعلى كل مسلم مضطر يارب ويوفقنا ويحقق امنياتنا ..

دعواتكم الله يخليكم ..

دعوات الليل حلوه
وبالتوفيق

الله يعينك اخوي انا لي اسبوعين اروح واقابلهم في الوزارة امر اركاب صعب جدا هالايام لاكن مافية شى يصعب على الله
وانا نصحتي تسافر على حسابك وعلى الخطوط البريطانية تراها ارخص وانت اسئل والانضمام يسهل ربك بعد ماتروح هناك
والعطية اذا قابلتة بيقولك خير انشاء الله ويحولك لفرع الوزارة في الغدير وهي تصريفة

وانا اخوك اسمع مني (اعقلها وتوكل ) لاتخلي 2500 ريال تضيع مستقبلك
واذا على انة معك بين ال30 الى 40 الف انا اشوف انك تجدول نفسك فيها صح عشان ماتتوهق وانا بعطيك خطة ممكن انها تساعدك

1- اختر خطوط رخيصة ولا تبحث عن الرفاهية
2- حجزك يكون ذهاب بدون عودة ( بسم الله عليك لاتفهمني غلط ) اللي اقصده لاتشيل هم العودة ابد
3-اختر سكن يكون ملائم لك ويكون على قد فلوسك
4- ابتعد كل البعد عن الاشياءء اللي فيها صرف زايد (مطاعم + سينما+ مولات +ملاهي ) انساها كلها
5- احرص انك تاخذ لك من البقالة اشياء تسد جوعك ( اندومي ) وش فيه الاندومي يالبيه ولاياخذ وقت


اتوقع لو تسوي الشغلات هذي ممكن ان اللي معك يمشيك الين تحول على حساب الحكومة والله يوفقك ويكتب لك التوفيق ويستر علين وعليك اهم شي لاتخلي موضوع الاركاب يخرب حلمك اتقفنا

تقبل مروري عزيزي