حكاية مقابلتى مع السفاره الامريكيه بالقاهره يوم 3/5/2011

السلام عليكم ورحمة الله وبركاته
انا حبيت احكى اللى حصل معايا لعل وعسى يكون فى اى استفاده لاى شخص هيقوم بعمل مقابله
انا كنت مقدم على فيزا دراسه من جامعه فرجينيا انترناشونال يونيفرستى واتصلت وحددت ميعاد بعد معاناه من انتظار ال i-20 لان المكتب اللى كنت معاه مكنش مركز فى شغله او معرفش كان ايه الله حصل ( ربنا يهديه ويرزقه) المهم
انا كانت مقابلتى الساعه 8 الصبح وصلت عند باب السفاره الساعه 6:40 صباحا واول ما قربت وقفونى طبعا وسألنى عن جواز السفر ده كان الجيش تأمين للمكان يعنى طلعت الجواز وقولتله فين قالى اقف مع الناس اللى هناك دى روحت وقفت كنا حوالى سبعه لقيت اتنين هما اللى f1 والباقى كله سياحه اللى هما الباقيين يعنى سألت بتفتح الساعه كا قالوا الساعه 7 وبالفعل الساعه 7 خرج موظف شاب قال يا جماعه اللى عنده مقابله يقف فى الصف على باب السفاره وقفنا صف قال كل واحد يخرج الكونفرميشن بيج وايصال رسوم السفاره (Cib ) وصوره 5*5 المهم بدا يمر واحد واحد علينا ويشوف الورق وبعمل علامه على ورقة البنك وبدأ يدخلنا واحد واحد
انا كنت رقم 14 وكل ده والعدد بيزيد المهم قالى اتفضل دخلت لقيت بنتين واقفين على جهاز تفتيش لو سمحت رج اى حاجه عمله معاك واقفل موبايلك وهات الموبايل واخدت الموبايل وادتنى رقن استلمه بيه وقالتلى مر ع الجهاز وعديت راح مطلع صوت قالتلى معاك محفظه قولتلها اه قالتلى خرجها واقلع حزام البنطلون وروحت معدى تانى وتمام قالتلى اتفضل خد حاجتك اخدت الحاجه ودخلت لقتنى دخلت ى قاعه انتظار بيقعدونا كل اربعه جنب بعض وبيبدأ الدخول لقاعه تانيه اربعه اربعه وجه دورى ودخلت وهنا ادونى رقم 14 ودخلت على مكتب تانى اخد منى الكونفرميش بيج والاى توينتى والسيفز ورسوم البنك والصوره ودبسلى الاوراق فى بعضها والاى توينتى فى الجواز وقالى اكتب على الكونفرميشن بيج اسمك ثنائى واسم الوالد والوالده واى بلد سافرتها قبل كده
وبالفعل دخلت لقتنى فى قاعة انتظار كبيره وبدأ الشبابيك بتاعت السفاره تشتغل وبدأ ينادى ع الارقام اول شباك دخلته اخد منى الاوراق الى طلبها الموظف الاول وقالى انتظر (الكونفرميشن بيج والصوره والاى توينتى والسيفز وجواز السفر وروسوم السفاره ) وانتظرت لقيت رقمى جه على شباك تانى روحت اخدت بصماتى وشويه ولقيت رقم 14 على شباك رقم 10 وكنت عارف انها المقابله وجاء وقت القلق
دخلت ع الشباك بنت زى القمر وحوالى 25 سنه بالكتير ولقيتها راحت قايلالى (على فكره المقابله كلها انجليزى )
القنصل ( صباح الخير )
العبد لله ( صباح الخير )
ولا كأنى موجود قعدت تبص ع الكمبيوتر ومن غير ما تبصلى بتقولى
القنصل ( ليه عايز تروح امريكا )
العبدلله( للدراسه )
القنصل (ليه امريكا )
العبد لله( لان فيها اقوى جامعات العالم )
القنصل( فيها الاف الجامعات ليه اخترت دى )
العبدلله (لانى عارف انها جامعه قويه جدا )
القنصل(عرفتها منين )
العبدلله (قريت عنها عن النت وسألت صاحب مكتب سفريات وقالى انها جامعه قويه )
القنصل (مكتب السفريات ميعرفش عن الجامعات )
العبدلله (هو مكتب سفريات خاص بسفر الطلاب للدراسه )
القنصل (اوك)
القنصل (معاك شهاده جامعيه )
العبدلله (نعم ورحت مديها الشهاده المؤقته بتاعت البكالوريوس)
راحت باصه واستغربت وقامت واقفه وقالتلى ثوانى وقامت وقفت مع واحده جوه شويه ورجعت
القنصل ( هى ليه مؤقته )
العبدلله (غباء الدنيا ركبنى وارتبكت جدا من انها راحت تسأل ومش مركز فى حاجه )
القنصل (مصممه هى ليه مؤقته )
العبدلله(انا مش فاهم تقصدى ايه ممكن تقوليها عربى )
القنصل (انت رايح تدرس ولازم تكون كويس فى الانجليزى )
العبدلله(ريحت دماغى وروحت مديها شهادة الدرجات بتاعت الاربع سنين فى الجامعه ) تأكيد يعنى
القنصل (اخدتها وقعدت تبص وتتنح للختم )
القنصل (معاك شهادة بنكيه )
العبدلله (نعم واديتها شهادة بنكيه باسم والدى (ب 200 الف وكسور )
القنصل (بتاعت مين )
العبدلله (والدى )
القنصل (بيشتغل ايه )
العبدلله ( عنده شركة وروحت مطلع ميزانيه عام 2010 مختومه من محاسب قانونى وختم الشركه والسجل التجارى والبطاقه الضريبيه )
القنصل (بعد تفحض سريع للورق انت بتشتغل )
العبدلله ( ايوه بشتغل فى شركة والدى وروحت مقدم افادة عمل انى بشتغل مدير تنفيذى ومرتبى 3000 جنيه وعمولات كمان بتوصل ل 4000 جنيه )
القنصل (انت ليه عايز تغير من بكالورويس خدمه اجتماعيه لماجستير ادارة اعمال )
العبدلله (لانى والدى محتاجنى انى اكون فى المستقبل مدير للشرك ومحتاجنى اساعده فى ادارتها )
القنصل ( قعدت تكتب ع الكمبيوتر وقعدت تشوف الورق من الاول وفجاه
لقيتها راحت قاطعه ورقة الدى اتش ال من الجواز وقالتى سورى انا مش هقدر اديك الفيزا لانك معندكش خلفيه عن ادارة الاعمال
اتمنى انك تعود للمقابله لما يبقى عندك خلفيه فى ادارة الاعمال وتكون احسن فى اللغه الانجليزيه
العبدلله (ما انا اول ما اوصل هيعملولى اختبار لغه ولو مكنش كويس هاخد كورس قبل الدراسه )
القنصل(ودن من طين وودن من عجين )
العبدلله وقف متنح وراحت مديانى الجواز وورقه جابتها من رف عندها عليه مليو ورقن من دى وروحت قايلها شكرا
وطلعت وببص فى الورقه لقيت الرفض بسبب عدم وجود روابط عوده قويه اتجننت منين خلفيه ومنين انجليزى ومنين روابط عوده
اتصلت بالجامعه قالولى هى عملت معاك ليه كده احنا قبلنا انك تدرس عندنا واحنا عارفين انك بكالوريوس خدمه اجتماعيه وبعدين فى الاى توينتى رقه بتقول انك هتاخد كورس قبل بداية الدراسه وقالولى ادخل تانى وقدم الورقه دى وقولهم ان ده خطاب من الجامعه بيدل انى هاخد كورسات فى الاول قبل الدخول فى مستوى الماجستير
انا حبيت احكى ده عشان اوضح شوية حاجات بس
المقابله اسهل ما يكون بس مش عايزه توتر وقلق والله اسهل ما يكون
المقابله بتتسهل اكتر على حسب شخصية القنصل
قبل ك حاجه الموضوع مش موضوع اوراق وبس الموضوع اولا واخيرا توفيق من عندالله
انا مش عارف والله اعمل ايه يا جماعه اقدم تانى ولا هترفض عشان اترفضت قبل كده ومنين هى تقولى الرفض عشان الخلفيه واللغه والورقه عشان روابط العوده هى اورقه انا لقيتها كتير تقريبا بتوزعها زى المنشورات على اى حد بيترفض وخلاص
معلش لو صدعتكم وياريت اللى عنده راى يقولهولى واللى محتاج اى حاجه يعرفها انا موجود
السلام عليكم ورحمة الله وبركاته