ضآعت من حياتي 5 سنوات بدون فائده !!!

السلام عليكم ورحمه الله وبركاته

ياخوان ابي رايكم وتعليقاتكم

ياخوان يشهد الله فوقي اني صادق بكل الي راح اكتبه ياخوان فيني ضيقه صدر مب طبيعيه صار لي 5 سنوات متخرج من الثنوي ولا افلح في شي دخلت جامعه الملك سعود وجامعه الإمام محمد بن سعود وطلعت منها ماكملت الدراسه فيها اخوياي الي بنفس عمري والي درست معاهم في جامعه الملك سعود وجامعه الإمام الحين بيتخرجون عيال عمي عيال خالتي الي اعرفهم وبنفس عمري معاهم بكالوريس او دبلوم وكلهم بنفس عمري ياخوان ماقدر عبر لكم الحرقه الي فيني ليششششش بس انا الي مامعاي شهاده ؟؟
كل الشباب الي بنفس عمري معاهم شهادات عمري الحين وصل 22 سنه وبرجع ادرس في امريكا بكالوريس ويبي لي 5 سنوات انشاء الله اقل شي عشان اجيب البكالوريس يعني راح يصير عمري انشاء الله 27 سنه !!!
اخ بس والله ياخوان متضايق حيل خصوصاً ان الوالده كل شوي تدخل علي تقولي شوف فلان تخرج من جامعه الملك سعود والحين معيد بنفس الجامعه وانت ماسويت شي للحين !! وابوي يقول ياوليدي لاتفشلني !!
تكفوون افيدوني وش اسوي انا ناوي اذا بدت دراستي بعد شهرين انشاء الله اشد حيلي واركز في الدراسه لكني متخوف من الدراسه بالجامعات الامريكيه مادري هل الجامعات الامريكيه متساهله مع الطلاب الاجانب ولا يعاملونا معاملت طلاب الامريكان ؟
انا ناوي بإذن الله احظر وعطيهم الواجبات واذاكر الليل والنهار لكني خايف من المستقبل خصوصاً اني فشلت في جامعتين في السعوديه والتدريس بالعربي فاكيف باللغه الإنجليزيه !!!
تكفون طمنوني عن الجامعات في امريكا كيف نظامهم لإن ابوي يقولي ياوليدي افتح لك محل هنا وترزق الله فيه ولاتروح تضيع وقتك على الفاضي انا عندي طموح واراده لكني مابي انصدم بالواقع مستعد اذاكر وحظر كل يوم ولا فوت ولا كلاس لكني ابي اعرف نظام الجامعات هناك في امريكا كيف يعاملون الطلاب متساهلين ولا لا !


همسه ..
ياخوان هل فيه طلاب مبتعثين للبكالوريس اعمارهم بنفس عمري 22 سنه انا تكلم عن الي توهم بادين لغه مو يدرسون بالجامعات !!!
اسف على عدم ترتيب الكلام ولاتلوموني من زود الحرقه الي فيني اتمنى اشوف ردود ونصائح عسى الله يفتح على كل شخص ساعدني وشكرا لكم

شد حيلك ولا تنظر لورى وماانت اول واحد تضيع عليه سنين , واحمد ربك انك ابتعثت

شووف اخووي انا بكلمك بالواقع مو بالعاطفهـ
انت قلتها انت فشلت بالعربي كيف بالانجليزي يبيلك سنهـ او اكثر عششان تخلص لغه بس
بعدين الجامعات اللي بأمريكا ما في شي اسمهـ تسساهل لا اجنبي ولا غيرهـ زيك زي اللي جنبك
انت جربت تدرس وما فلحت بالدراسهـ يا شووفلك وظيفهـ او افتح لك محل زي ما قالك الوالد لا تضيع جهد ومال على الفاضي
انت قلت راح ادرس ليل ونهار هذا كلامـ واحد متحمس اول فترهـ وبعدين اذا خف حماسك ما راح تكمل وترجع فإذا انت عارف نفسك مو حق دراسهـ لا تكمل ياخي
لو انك متوظف من اول ما تخرجت كان وضعك تمام الحين اما ضيعت 5 سنوات من حياتك على الفاضي فهذا غلطك ومحد يتحمله الا انت اولا واخيرا
اتمنى ما تفهم كلامي غلط واعتبرها نصيحها بغيت تاخذها خذها
السنهـ اللي بعد التخرج هي اللي تحدد مستقبلك ومصيرك بالحياهـ * بعد الله طبعا *
ووبس :)

في البداية لا تحرق نفسك الشهادات ليست هي نهايه كل أمر وليست غايه نتوقف عندها , كل شخص قد لا يحالفه التوفيق وقد يفشل ولكن الفشل ليس نهايه المطاف إنما الإستسلام للفشل هو الإنتحار للنفس والذات .

أنت أعلم الناس بمهاراتك وميولك , بإمكاتك تقرر هل لك ميول ومهارات وتقبل للإعمال الحرة والتجارية , أم تريد إثبات وجود والنهوض من جديد , فشلك هنا ليس مقياساً ولا دليلا بإنك ستفشل في أمريكا , ولكن احذر بإن يكون هدفك من دراستك هو هروبا من واقعك بل يجب أن يكون رغبه قويه في النهوض من جديد , وتأكد بإن كل طريق تسكله هو مليء بالمنغصات والصعوبات سواء التجارية أو الدراسية , تستطيع النهوض من جديد وإكتساب خبرة جيديه وتعلم أشياء مفيده في الدراسة في الغربة والإعتماد على النفس تستطيع النجاح إذا أردت ذلك وقد تتخرج بشهادة قوية ومعدل ممتاز وتعوض جزء مما فاتك , أعرف زملاء لي جلسوا 7 و8 سنوات حتى حصلوا على الدكتوراة لم يقولوا بإننا ضيعنا سنوات كثيره أو فات علينا الكثير كما قلت , قد تكبدوا الكثير من الخسائر والوقت ولكنهم نجحوا في النهاية وبعضهم قد قارب الأربعين ولكنهم وصلوا إلى مبتغاهم وأهدافهم وحققوا إرادتهم وما عجزوا عنه .
وفقك الله

أخوي أنت اللي بإمكـآنك تصنع نفسك ومستقبلك

لاتنتظر من أحد يوجهك ويخطط لك .. في الأخير ماراح يستفيد أو يخسر إلا أنت ..!

مافي شي سسهل كذا , ومـآفي شي صعب بالمذـآكره والمتـآبعه


موفق وششد حيلك

هلابك اخوي
انا بقدم ع الابتعاث وربك يكتب اللي فيه الخير
لكن حاب اقولك شي بخصوص الوضع اللي انت فيه !

لا تنضر رواك أبدا ولا تفكر بـ لي راح
واعرف انو مافي شي مستحيل ( والمستحيل لا شي )
وخليك واثق من نفسك واستخير ربك وصدقني صدقني راح يتسهل معاك كل شي
ومابعد الضيقه الا الفرج ( والليل مهما يطول لابد يطلع النهار )
وكم واحد بعمرك واكبر وهو لسا قاعد وكم واحد بعمرك واكبر وهوا لسى توه بيدرس
منتا اول واحد ولا اخر واحد .. خليك واثق من نفسك ..
وتوكل ع ربك سواء كان بدارسه داخل السعودية او في الخارج او حتى مشروع
ربي يوفقك ويوفق الجميع وتتسهل امورك كلها واي شي تبغاه اضن الشباب هنا محد راح يقصر معاك وانا اولهم

وبخصوص انو الدراسه برا بلغة الانجليزية لا تشيل همها تراها لغة سلسلة وسهله ومع الممارسه راح تكون من اسهل الاشياء عليك بـ اذن المولآ

أنا بطرح لك تجربتي في الحياة الدراسية... تخرجت من الثانوية ودخلت جامعة البترول وقعدت فيها سنه ونص.. ولكن الله ماكتب لي نصيب فيها .. مع أن مستواي كان متوسط بس ظروف المدرسين _ يجي لك مدرس مايدري وين الشرح _ وأنا كنت جديد ع الجامعه .. وبعدين درست في كلية المجتمع سمتر واحد وبعدين طلعت منها .. يعني المجموع سنتين,,, وبعدين قررت أسجل ببرنامج الابتعاث.. وتخيل من الصيف اللي طاف _ تقريبا 8 أشهر , الآن شهر 5 عام 2011 _ ومكتب تجسير ومماطلته ,, لكن الحمد لله أنا مو متحسف على الـ 3 سنين اللي طافوا الحمد لله أولا: درست بالجامعه أللي كنت أبيها يعني لو ماجربتها جان أبقى متحسف عليها طول عمري , ثانيا : أستفدت لغة يعني ان شا الله ماراح أقعد بالمعهد على طول بدخل جامعه, ثالثا: استفدت خبرة في الحياة الاجتماعية والحياة الجامعيه,, يعني أنا ما أتخيل نفسي وتوني متخرج من الثانوي أطلع غربه ,,,,,, وانا الحين طالع أمريكا بعد أسبوعين .. والله يسهل عليك
بس نصيحه : خذ قرارك من اللحظه هذي ولا تظيع وقتك أكثر .. واذا قررت تطلع على برنامج الابتعاث ...أحرص أنك تجيب قبولك بنفسك .. من أول ماتقدم أوراقك ولا تعتمد أبدا على مكتب تجسير ,,, لأنه قد يأخرك سنه زياده

عمري 26 سنه وبدرس بكالريوس ..

انسى كل شي .. انسى اللي راح كله ...

ابدأ حياه جديده .. قوي عزيمتك وتوكل على الله .. وشد حيلك

ما في شي يستاهل

توك صغير .. وقول الحمدلله على كل حال .. وربي بيعوضك .. نصيحه مني

اذا بتروح وهالسلبيات براسك ما اظن بتكمل .. لانك بتتوتر وبتأثر على تحصيلك

خلاص انسى

ان شاء الله عمرك 30 سنه مو عيب .. وما في شي اسمه فشلت

الفاشل اللي ما يحاول واللي ما يتلاحق نفسه

توكل على ربك .. وحفّز نفسك كل يوم .. واقرا شوي عن التحفيز وعن الدكتور خالد المنيف .

كلامك سلبي ما رح يودي ولا يجيب

ولا تتأثر من اي كلمه سلبيه او ماضي سلبي

من داخلك ابدأ ببناء نفسك اولا وباذن الله بتنجح بكل حياتك

الشهاده والدراسه الاغلبيه بينجح فيها بجهد او بغيره

الاهم كيف تخرج من حالتك وكيف تتعامل مع الظروف ومع الماضي والتخلص من اي شي يشوه حياتك

ربي يوفقك وييسر امورك .. ولو تبي الصدق ترا انا العن منك بس ما اقول فشلت بالعكس الحمدلله انها ظروف وتعلمت منها .

قــــف امامي وقفـه جاااااااااااااااااادهـ واترك كل شي يتعلق بالدراسه والشهادات
هل انت تواضب على صلاتك وخصوصا الفجر<<<< توني جاي من الصلاهـ هع
تراني قريب من حالك بس انسى كل شي فات لو حفرت عن الدراسات اللي تركتها كان بتقول انت اثول <<< معقدني ابوي في هالكلمه
المهم حالتك طبيعيه انا زملائي الموقرين اللي توظف واللي يدرس الله يوفقهم عادي خل الوضع فرري
سبحان الله انت ابدآ من الان وغير حياتك من اليوم وطالع الصلاه لاتفرط فيها ,, قراءة القران الكريم لو ربع ساعه في اليوم بس
عليك بالاستغفار عود لسانك على الاستغفار ...
اذا نفذت الاشياء هاذي اللي تتمناهـ والله بتجد نفسك انت بوسطه .
وخل في بالك ان هاذا اختبار لله لك بيشوفك انت تصبر ولا تحطم نفسك صبرآ جميل والله المستعان ورزقك جايك جايك
ودي اعبر اكثر عشان المعلومه توصلك لكن كذا اخاف تمل وتقرأ نص وتخلي نص <<< مثلي بس ماعاد اسويها اللحين !!
تقبل مروري وفالك ان شاء الله الشهادات العليا

اخوووووي الله يوفقك ان شاءالله ولا تقلق بالموضع هذا ترى والله في ناس اعرفهم اعمارهم فوق الثلاثين وبكالريوس انت خذ ابتعاث وتوكل على الله بس اانتبه على دراستك وركز فيها وتاكد ان مايفيدك اي شي غير مستقبلك وشد على نفسك تغلب على عواطفك وامسك كتب عدل وبيني وبينك انا ابي اتخرج بكالريوس ان شاءالله نفس عمرك :(