تقرير تقرير موعدي بالقنصلية الأمريكية العامة بالظهران

May 22nd, 2011, 11:03 AM

بسم الله الرحمن الرحيم

حرر في يوم الاحد تاريخ :5/22/2011


مثل ماهو واضح من العنوان راح اعطيكم تقرير عن مقابلتي بالقنصلية الامريكية بالظهران

نبدأ بالتفاصيل :

في البداية راح يواجهنا تفتيش شخصي عبارة عن جندي معه عصا خاصه بأكتشاف الاجسام المعدنية وراح يسأل كم سؤال

س1/ هل تحمل اي أجهزة تليفون

ج1/ في حالة انه معك جوال راح يطلب منك انك تحطة بالسيارة ولكن اذا ماكانت معك سيارة راح يطلب منك انك تطفي الجهاز ويعطيك ورقه تكتب عليها اسمك ورقم الجوال

س2/ هل معك اقراص مدمجه ( cd)

ج2/ اذا كان معك الله يكون بعونك لازم تتخلص منه لأنة مو مسموح بدخول الاقراص المدمجة ولاحد يسألني لية


بعد كذا يطلب منك انك تحط اوراقك على جنب وتفضي جيوبك من اي شي ويطلب منك انك توقف وتفتح يدينك لتفتيش وبعد مايفتشك راح يقولك تفضل قدام وبعد مانطلع قدام راح يجينا باب وجنب الباب نافذه فيها موظفة من الجالية السودانية راح تطلب منكم تأكيد الــDS160 والجواز للتأكد من الموعد وبعدها راح تقول للموظف انه يفتح لك الباب وبعدها راح تدخل ويخلونك تمر من جهاز كشف المعادن زي اللي بالمطارات وبعد كذا راح يطلبون منك انك تدخل ..

بعد ماتدخل راح تزول رهبة الموضوع كله لأنة منظر القنصلية من داخل يفتح النفس (لدرجة ان الورد حقهم له ريحة تشمها من بعد ) <<< شطحة
الحاصل راح تدخل غرفه هاذي الغرفه راح تكون مركز العمليات كلها وراح تعرفون وش راح يصير

دخلنا الغرفه وقابلتنا موظفه ثانية سودانية ووزعت علينا ارقام لتنظيم العملية وبعدها راح تجلس على الكراسي راح تشوف قدامك 4 نوافذ وفيه مكتب على يدك اليسار
في البداية المكتب اللي على اليسار راح ينادي على الارقام مهمة هذا الموظف انه يشيك على الجواز والـI20 (الاصلي ) ونموذج التأكيد
ورسوم تسديد الفيزا ( سامبا ) بعد مايشيك عليها راح يحط الجواز والاوراق الثانية بترتيب معين ويحط عليها مغاط
ويطلب منك انك تجلس الين ينادون رقمك

الحين راح اشرح لكم مهمة الدرايش الاربعه
1,2.3.4
1و4 : مهمة الاشخاص انهم يسألونك كم مرة رحت لأمريكا وليش رايح وبعد كذا راح يطلب انك تبصم على جهاز وبعد كذا راح يقولك اجلس الين ينادي اسمك
ملاحظة : بعد ماتخلص من الشباك الاول لاتجلس فاهي لأنه راح يكون النداء بالأسم يعني الرقم ماله اي داعي الحين

2و3: هذولاء هم اللي عندهم السنع والدبرة يعني هم الكل بالكل راح يناديك واحد منهم وراح يسالك عدة اسالة انت اساسا مجاوبها بالنموذج مثال من وين متخرج ومن بيدفع لك ويطلب منك انه يشوف الضمان المالي ويسالك وش بتدرس هناك بعد مايخلص من الاسئله راح يقولك تفضل انتهت المقابلة وتفضل رح ادفع رسوم الفيدكس وراح يجيك الجواز والفيزا بوسطة بعد اسبوعين
وتروح للفيدكس ..


الفيدكس : هي الشركة التوصيل الوحيدة للجواز يعني مالك الاهم طبعا تكلفه التوصيل تختلف من من مدينة لمدينة لكن بالنسبة (للظهران والخبر والدمام ) ياخذون منهم 65 ريال سعودي فقط لاغير يعني اضرب حسابك على المبلغ هذا واذا بتاخذ مبلغ زياده ترا انصحك بالكفتيريا اللي عندهم عليهم قهوة شنيعه
راح يسالك الموظف اذا تبي الجواز يجي للبيت او انت تستلمة وبعد كذا انت تختار والموظف راح ياخذ منك ورقه التأكيد وراح يكتب لك كل شي انت ماعليك الا انك توقع وتعطية رقم الجوال وراح يقولك كيف تتابع الطلبيه ( الجواز ) عن طريق النت وبعد ماتسدد راح يكون هذا اخر شي تسوية وتطلع برى القنصلية وانت فاك الكشرة ومبسووط وتنتظر الاسبوعين تمر على احر من الجمر هذا تقريبا كل اللي صار معي


ــــــــــــــــــــــــــــــــــــــــــــــــــ ـــ

اسفسارات لأصحاب الخبر واللي استلمو الفيزا فقط لاغير ( تكفون بس اللي استلمو الفيزا )

سـ/ انا سلمت الجواز لهم وقال لي بعد اسبوعين تستلم الجواز لكن الغريب واللي مخوفني وهابلني انه ماطلب مني صور فهل يكتفون بالصورة اللي قدمت عليها بالطلب ؟؟

ياليت محد يتجاهل سؤالي عشان اتطمن بليز طمنوني والف شكر ولكم من تحية

• نشر عبر تويتر
• نشر عبر فيسبوك
• نشر عبر جوجل