تجربتي قنصلية جدة 17 مايو

السلااااااااام عليكم

من زمان ما كتبت في المنتدى خخخخخخخخخخ

المهم كيفكم طيبين

طبعا انا لي سنتين وانا في المنتدى وافحط واتابع واشوف حقين المرحلة الخامسة مشيو وحقين المرحلة السادسة وانا متكي هنا للاسف لاني موظف حكومي ولاااااازم يعقدوك الين مايوافقو على بعثتك خخخخخخخخ مشو حالكم
المهم انو الحمدلله اتسهلت وجا اليوم اللي انتظرو من زمان وهو الموعد

المهم زبطت اوراقي والشغل كلو واتزبطنا يوم الثلاثاء الماضي ودعست على القنصلية

اول ماوصلت كنت مضيع ما ادري من فين اخش خخخخخخخ وصرت اسال حقين امن المنشات الين دلوني تدخل من قدام المسجد
انا موعدي كان 9
وصراحة على 8 وتلت بدات اشوف ناس بتدخل قلت افا بدانا شغل اللف والدوران فقلت ياواد الحق لا تنزحم الدنيا
وبالفعل نزلت 8 ونص ورحت ودخلت طبعا البوابة اللي برة وشفت ورايا عالم دخلت قلت كويس اني لحقت
اللي موعدهم 9 الظاهر كلهم جيين من 8 ونص خخخخخخ سواقة علينا خخخخخ

المهم ياليل
طبعا ما ادري اللي راحو ,بعد ماتمشو كدى من برا جنب البلوكات يجيكم بابين على اليسار اللي جوة في التفتيش
طبعا اخوكم في الله جي داعس وما انتبه انو في لوحة انو المفروض نوقف قبل البابين الين يجي السوداني يشيك على الاسماء خخخخخخخخخخخخخ
والمشكلة اني رحت واقول يالله اي باب افتح واختار الباب اللي على اليسار واجي منبرش وابغا افتح الباب وموراضي ينفتح قلت اخص ياواد شد بقوة خخخخخخخخخخخخ قسم كنت حاروح وطي
الا واحد ولد ورايا كان واقف محل السرى قلي ياسيد ارجع مدري ايه السيكورتي يقلك ارجع واطل لقيت الناس كلها واقفة ورا كدى سرى انا الوحيد اللي عند الباب قلت احا ياليل رحنا منجا المهم وارجع ورى ويجي السوداني
واتكيلو بالضحكة البريئة اللي ابو انا ترى مو قصدي خخخخخخخخخخخخخخخخ
قالي اقوليييك شنو اسمك قلتلو طاهر كتلوج خخخخخخخخخخخ
اقول لاحد يصدق طاهر كتلوج دا مغني قديييييييم في جدة
المهم
دخلت التفتيش كان واحد واحد يدخل
المهم اتفتشت واتزبطنا وكل حاجة واخدو الجوال والمفاتيح
المهم دخلت جوا
وللاسف لقيت عالممممممم ياليل على صغر الصالة مليانة خخخخخخخخ قلت شكلو نوم هنا
بس قبل ما ادخل الصالة التانية الهندي وقفني يقلي اشوف ساعتك قلتلو سلامات خخخخخخخ ما ادري وريتو هيا وقلي عندك ميموري كارد قلتلو برضو سلامااااااات الاخ شغال في الحداد خخخخخخ بس
المهم دخلت واخدت رقم وتكيت نعست عبل ما جا رقمي
المهم جا رقمي ورحت عند اللبناني اللي في اليسار اخر شي طلب مني ورقة تاكيد الابلكيشن الدي اس وايصال سامبا والجواز بسسسسسسسسسس
وصراحة انا معايا الف ورقة قلتلو دحين بس هادي اللي تبغاها قلي ايوة قلت افا
فكل شوية اطل فيه وهو يزبط اقلو
طيب اقلك تحتاج ورقة تاكيد دفع رسوم السيفس يقلي لا
طب اقلك ورقة تاكيد الموعد تحتاجها شي لاسمح الله قلي لا
قلت لاحول ولاقوة الا بالله مافي غير اصور من كل ورقة سبعين نسخة خخخخخخخ
المهم قلي بصم ما تبصم بصمنا
بعدين ترجع تقعد تاني
في تلاتة يسوو المقابلة واحد امريكي اشقراني ووحدة امريكية شكلها طيبة وواحد هندي مفقع ما ادري كيف حاطينو
عاد انت وحظك اللي يناديك تروح وانت تضحك خخخخخخخخخ
المهم استنيت حوالي ساعة كمان
واقول يارب استر
واشوف الناس اللي يروحو عندي الهندي يطولو وكل شوية يناديهم وجايب العيد وماياخد جوازات كل واحد قلت واليل
الا فجاة ينادو اسمي
واطلع الحمدلله عند البنت الامريكية قلت احلى
واروح واخدلكم السماعة ونبدا نطقطق بالانجليزي قالتلي كيفك ياليل قلتلها تماااام ياستي
قالتلي ها كيف ماكيف اجل ناوي تجي عندنا قلتلها ايوة كيف
قالتلي على اي ولاية قلتلها بنسلفانيا
طب اش جي تسوي قلتلها بادرس اكيد
ا ش بتدرس
قلتلها حادرس ماستر انشالله
قالتلي طيب انت البكالوريوس حقك تخرجك وما ادري ايه وقبل ماتكمل كلامها اديها صورة الوثيقة حقت البكالوريوس من الشباك ضحكت قالتلي اوه كويس كنت حاقلك تديني هيا خخخخخخخ
المهم واديتها طبعا خطاب تعريف من العمل وخطاب الضمان المالي
وقالتلي فين سافرت قلتلها بورتريكو والهونولولو والكلام دا خخخخخخخخخخخخخ
قالتلي قد رحت امريكا قلتلها يس بس مع اهلي
المهم طلت كدى وقالتلي كلو شكلو تمام واخدت الجواز وقتها قلت الحمدلله وادتني ورقة فيديكس
حتى ادتني ورقة تاكيد الطلب استغربت رجعتلي هيا واخدت الجواز بس
ورحت سددت فيديكس 65 ريال وصلى الله وسلم
في نقاط
اول شي عند البوابة ما سالني عن ورقة تاكيد الموعد بالاسم دخلني
بعدين انا في الابلكيشن ماحطيت عنوان سكن ولا شي كتبت غير متاح لانو في ناس في المنتدى تفتي تقلك روح جيب فيزا واحجز فندق سلامااااااااااات ولا فندق ولا شي
اكتب غير متاح وحط عنوان معهدك وبس
لما توصل امريكا بالسلامة وتلاقي سكن تروح معهدك وتطلب انو يحدثو بياناتك في نظام السيفس وخلاص انت يصير سجلت سكنك رسمي
المهم
ما ادري والله ا ش اقلكم
قالتلي فيزا بتصدر انشالله خلال اسبوعين ما ادري عاد حبيت اسالكم اللي قالولهم اسبوعين هل احد صدرت فيزتو قبل او كيف
والحمدلله على كل شي
وصلى الله وسلم على سيدنا محمد
وادعولنا