طالب سعودي في الكويت وأريد الابتعاث لأمريكا (أرجو الدخول والمساعدة يا اخوان)

السلام عليكم ورحمة الله وبركاته

بسم الله الرحمن الرحيم , وبعد توكلنا على الله, نويت أدرس برا.

بداية, أنا طالب سعودي مقيم في الكويت ومواليد الكويت, الآن ادرس في جامعة الكويت تخصص آداب انجليزي بكالوريوس, لكن صراحة التخصص بعد 4 سنين دراسه لاحظت اني مو ماشي فيه والأمر من هالشي اني توني ألاحظ اني ما أحب الأدب !!! :\ :(
عموما , ان شاء الله خيرة من رب العالمين.
ومتأخر جدا وباقيلي كثير ومعدلي هابط والسبب واحد فقط لاغير: مو متحمس للتخصص وبالتالي مهمل جدا فيه.
المسألة مو مسألة غباء, لكن مسألة إهمال والسبب واضح جدا لانه يرجع إلى اني ماعندي الشغف تجاه التخصص ولكن بشكل عام أحب الانجليزي.


والآن حاب اني أبتعث إلى الخارج, انا شهادة الثانوية العامة اخذتها من الكويت تخصص أدبي.

عندي تساؤلات كثييرة وأتمنى من الله اني ألقى الأجوبة اللي أبحث عنها ووالله ما أبي غير احد يستحمل معاي ويعطيني كل شي حبة حبة, جدا جدا مُحبط وأبغى أدرس شي انا أحبه وفكرة أمريكا دخلت في بالي بما ان ماعندي فرصة أدرس في الكويت + الابتعاث بيساعدني كثير بما اني سعودي.

واللي حاب أسأله هو :
أنا مسجل في الملحقية الثقافية في الكويت وتمشيلي إعانة ولكن جدا أبدا ما تقارن في إعانة أمريكا لأن دولة خليجية , يمشيلي يمكن 800 ريال ! نفس الطالب في المملكة . يعني 65 دينار كويتي فقط.
عموما الفلوس ماهمتني لكن أنا اللي يهمني هل إذا بغيت ابتعث خارج الكويت في أمريكا ما اقدر لأني مسجل في ملحقيتي في الكويت؟
وهل شهادة الثانوية تٌعادل في السعودية ثم يقبلني الابتعاث أو أقدر أروح فيها بنفسها ولا كيف؟
أقدر آخذ أي تخصص غير المكتوب في موقع وزارة التعليم العالي؟ في بالي آخذ Art بما اني أحب التصوير واحب الفن بشكل عام, ولكن خياري الأول IT لأني صرفت نظر عن اداب انجليزي لانها يقولون صعبة برا + اني مو متحمس لها أساسا.
شهادتي اخذتها من تاريخ 2007 .. يقبلوني البعثة ولا انتهت ؟
وإذا عادلوها في السعودية, تاريخها يتغير ويصير كأني مطلع الشهادة ولا كيف؟

أنا قلت ابي استفيد من خبراتكم ومتأكد انكم ماراح تقصرون بإذن الله تعالى.
لذلك حطيت الموضوع ولأني ما أقدر اروح من الكويت إلى الرياض عشان أسألهم لأن الجواز منتهي ويبيله فترة طويلة على ما يتجدد .. أنا جدا جدا مشوش وعندي ألف سؤال وبحاول بقدر المستطاع اني أجمعهم في هالموضوع عل وعسى ألقى لها إجابات وان شاء الله موجودة في جعبتكم .

سمعت اني اذا ماقدرت ابتعث على طول, أقدر أروح على حسابي الشخصي وبعد فترة قصيرة يتم انضمامي للبعثه, هل هذا صحيح؟ وكم المدة اللي بتستغرق عشان انضم؟
وإذا انضميت تكون امتيازاتي بالضبط نفس المبتعث من البداية؟
من دفع تكاليف الجامعة, إلى المكافأة, إلى التأمينات وكل شي؟
وعلى هذي المدة ياريت تحددون لي سعر الجامعه إلى فرضنا اني أبغى ادخل جامعة Missouri تخصص IT .. راح أجلس كورس كامل مثلا إلى أن يتم غدخالي ضمن برنامج البعثة ؟
او شهر شهرين؟ وكم بيكلفني عل ما يتم قبولي؟
وهل شهادة الأدبي اللي عندي ممكن تخصصني في ال IT ؟ واذا الإجابة لا, أقدر أدخل أي تخصص آخر ثم احول إليه؟
وال IT يحتاج معرفة في الرياضيات والعلوم الأخرى بشكل كبير؟ ولا في مواد تدرس الرياضيات ببساطه؟


وقبل كل هالأسئلة, هل أنا كمواطن سعودي مقيم في بلد آخر, مخوّل اني أنضم لهالبعثة؟ :(
لاني جدا خايف اني ما اقدر لأن آمالي بتتحطم ونفسيتي بتتعب.

عموما, أرجو من اللي عنده خلفية في هالموضوع أو اللي مار بنفس التجربة يقولي أي شي بهالخصوص, محتاج أعرف كل شي "كل شي" عشان ارتب أموري قبل الكورس القادم اللي يبدا شهر 1 الظاهر ان يسمونه "Fall" في أمريكا .

والله يجزاكم خير سواء من جاوب واللي ماجاوب, ويوفقكم بدراستكم مهما كانت. وأنا متابعكم من يومين ثلاثة, وماشاء الله فيكم حب المساعدة وما قلتها عشان تساعدوني ولكن كلمة حق تقال.
ربما أتيت متأخر ولكن الحمدلله على كل حال, ودائما متفائل خير واستخرت قبل يومين بدون ترجيح مسالة الدراسة خارج أمريكا وفضلا من الله لاحظت اني مرتاح لهالمسألة أكثر من تكملة الجامعة في الكويت!
ومن ذلك الحين وأنا بدأت في بحثي عن الجامعات وأشياء كثييييرة ولكن أحس ان باقيلي 90% من الأشياء اللي ضايعه في مخي يبيلها إجابات .

شكرا لكم وآسف على الإطالة
واتمنى من اللي عنده إجابات ولو إجابة واحدة انه يتفضل ويقولها لأني جدا جدا محتااااج هالإجابات .

وأيضا شنو الامتحانات اللي لازم آخذها توفل أي ايليتس واذا لها مواعيد معينة؟
ومتى تسجيل الترم الشتوي اللي يبدا شهر 1 ؟ لأن ما ابيه يطوفني .

شكرا عالردود !!!!! : )

ههه بتحصل ردود .. بس صراحة اسئلتك غريبة على المنتدى ..
ممكن تدخل وتستفسر من نفس موقع التعليم العالي .. بس عشان ما يصير موضوع طويل (حطه على رؤس أقلام ) مختصر *
وان شاء الله راح تحصل مبتغاك
تحياتي

مافي رردود لأن مافي ناس كثير بوضعكـ
اسألتك يبغالها احد متخصص ليش ما ترووح الملحقيهـ وتجلس مع احد مسؤوول او موظف وتشرح وضعكـ
وهو يعلمكـ ايش تسوي :) ...!!!!!

الله يعطيك العافية اخوي عبدالعزيـز .

aboood_08
وشالمانع إذا سألت هنا مثلا؟
"من نشد ماخاب"
وهذا اسمه منتدى "مبتعث" وأنا صراحة أحب آخذ معلومات من ناس مجربة والناس اللي عندها خبرة وعايشة في هالمجال, وقلت يمكن أحصل إجابتي, كنت أقدر انتظر إلى يوم السبت الصبح عشان أدق على وزارة التعليم العالي السعودية من الكويت, بس قلت أجرب يمكن احد عنده علم أو مار بنفس التجربة.
عموما مشكورين وانا ان شاء الله اتصل على الوزارة, وعلى الله أحد يتفضالي ويساعدني بحكم اني داق من الكويت !!

الله يوفقك اخوي ان شاء الله

لكن انت موضوعك يبيله واحد خبره بالموضوع هذا.. وانا انصحك تكلم وزاره التعليم العالي بالتلفون افضل من انك تطق مشوار

يمكن يجيك احد هنا ويعطيك حل لكن يمكن مايكون حل صحيح ميه بالميه..

فالافضل لك كلم الوزاره لأن فيها معادله شهاده وكم شغله بسيطه

عبدالله را

مشكور وماقصرت والله يوفقك دنيا واخرة انت والاخوان اللي ردوا قبلك.
كلامك صحيح وانا ان شاء الله بكرا بتصل عليهم وبشوف إن شاء الله إن شاء الله ما يخيب ظني وينكسر املي.
ولكن الأمل بالله عمره ماينكسر ونأمل خير إن شاء الله.

أشكرك شكر جزيل, رد بسيط جدا, لكن ما ادري ليش ارتحت منه!
عسى الله يحفظك