محـتار وش أختـار ,, الأبتعاث او الجويه !!؟؟

الهندسة نعم جدا صعبة

أول شي لازم يكون عندك انقلش والرياضيات100%

راح تدرس تفاضل وتكامل 4 كورسات مكثفة غير كورسات الجبر اللي قبلها

راح تدرس فيزيا عامة وكيميا عامة ومواد أخرى على حسب تخصصك

لمن تدخل في مواد التخصص تبدا معك القوانين والاختبارات الصعبة و الريبورتات والبروجكتات والشغل كله انقلش

تعريف الهندسة= حل المشاكل أو حل المسائل

الهندسة ما تعني فرجار ومسطرة الا في تخصص الهندسة المعمارية اما باقي تخصصات الهندسة تعني قوانين رياضية ومشاكل تفكر بدامغك بعد ما تتخرج وبعد الخلفية الدرارسية اللي درستها في الرياضيات والفيزيا والكيميا و علم السكون والحركة وقوانين نيوتن والمكيكانيكا الحرارية و الصناعية انك تسوي شغلك

مثل مآفآدوك الاخوان وهم الاخ TGT وضح لك معلومات كثيره عن الهندسه

الهندسه دقيقه وتعد من التخصصات القوية مثل الطب يعني رغبتهآ في سوق العمل , كبير ,,
وماشاء الله عليك , تقديرك ممتاز , مثل مآجبت الممتاز , في الثانوية , اتمنى لك واتفآئل انك راح تقدر على الهندسة وتبيض الوجه مثل مآبيضته في الثآإنوية

بالتوفيق يآغالي ,
ومالك بعوآر الرآس ونظام العسكريه انت عارفه , وانت هم خابرك المهندس في ارامكو ولا سابك او اي شركة كبيره افضل من القطاع العسكري بمليون مره ومستقبل قوي ,
العسكريه راتب ضعيف , حقك موكامل , ان تبغآه كامل شغل واسطاتك , مافيه نظام تآمينآت قوي , ولااي حاجه غير الشركآت ,

تقبل رآإيي , ولك حرية الاختيار , وتآكد ان هذآ مستقبلك وفكر اكثر من مره قبل مآتآخذ القرار , وحدد التخصص الي انت تحبه , لان صعب تدرس في حاجة انت ماتقبلتهآ , وراح تصير جزء من حياتك مستقبلا ,,

اخوووي : google66

هههههههههههههههههههههه اما سواق مررره وحده ,, نووورت اخوووي


اخووو : TGT
اشكر على الأفاده والمعلومااات < وانا من قريت الروبرتاج والريوبرتات والمدري ايش حسيت انها من جد الصعبه ,, ماقصرت يالغااالي والله يجزاك خيرر


اخوووي : i'm genius
اشكررركـ على رفع المعنويه والكـلام اللي يبرررد التسبد والله يجزااااااكـ الف خيرررو ماقصرررت والله يكتب الخيررره
بس بالنسبه للعسكريه انا معك في الي قلته بس اعترض معك بسالفة الراتب < افضل رواتب الظبااط

واشكركم جميعاً على تفاعلكم
ماشاء الله ماامداني اكتب الموضوع الى 3 ردووود

الله يوفقــك يافهد ويكتب لك الخيـر وين ما كـان..

أنا احيي فيـك هالطموح والتفاؤل لكن الزمـن تغيـر يااخي


كيف تضمن والنتائج لسى ماطلعت؟


أخوي تخـرج هالسنـة بنسـبة 93 وقدرات 79وفوق هذا كلـه مااضمن أنه راح ينقـبل في تخصص حلو!!

الآن يتخرجون الآف الطلاب بنسبة 100%
واصبح المسـتقـبل مجهول للكثـير من الطلاب ومانقول الا حسبنا الله ونعم الوكيـل

لو كـان هناك تقيـيـم فعلـي وصحيح لقدرات الطلاب ماشاهدنا الطلاب يتزاحمون على بعض التخصصات بهذا الشكل الفضيـع،والادهى والامر أن الطالب المثابر قد لايجـد مكـانه الصحيـح.

وهذا بسبب طريقة وزارة التربية والتعليم المريـبة!! وبسبب إنتشار الغـش والتزويـر في المدارس وخـاصـةً المدارس الأهليــة!


أنا أشوف أنك تنتظر لترى نتـائج القبول في الجامعات والكليات السعوديـة ونتائج الإبتعاث وبعديـن تفاضل وتستخيـر



بالتوفيـق يارب
تـح ـيـاتي

السلام عليكم جميعا وعلى الأخ السائل ...
أولا: مشا شاالله عليك والله يوفقك دنيا وآخره.
ثانيا: من مجربين في أمريكا وأنا واحد منهم ترى الغربة صعبة مهما كانت . وترى ثلاثة أرباعهم من المبتعثين إنحدوا على البعثة والا لو لقوا فرصة في السعودية وظائف وجامعات والله ما يجون لأمريكا .
ثالثا: وهذه نصيحة شخصية مني لك إذا الجوية مضمونه أبد توكل على الله ولا تلتفت وراء أبدا . ودربك خضر أخوي لعدت أسباب :
أ.. أولا الجوية مستقبل رهيب وراتب ومكانة إجتماعية .
ب.. إنت راح تدرس إنجليزي مكثف في الكلية ,راح تحصل أمريكان يدرسوك وتدرس أنجليزي من الألف إلى الياء . يعني إنت ضامن اللغة ضامنها . يعني تحصل عليها بدون غربة وبهذلة وبعد عن الأهل .
ت.. إنت بعد ما تتخرج وراح تترقى في الرتب العسكرية وتثبت كفائتك راح يبتعثونك خارج المملكة عشان تكسب خبرة وممكن يرسلوك إلى أمريكا أو فرنسا . يعني إنت ضمنت وظيفة طيار وكسبت لغة وبعد فترة كسبت بعثة . يعني إنت ضربت 3 عصافير بحجر واحد . فهمت . ؟؟؟؟؟
ث.. إنت تقول أنت متردد وهذا دليل قاطع أنك إنت متخوف من شي ولا أنت ضامنه . فليش تورط نفسك في شي إنت منت ضامنه بينما هناك شيء آخر مضمون 100 في 100 ..
ج.. ترى إذا جيت يطلب منك دراسة لغة وبعد كذا إختبار توفل وبعد كذا إختبار جي آر اي .. وما أدري إذا بعض الجامعات تطلب أشياء ثانية ....
ح.. إنت إذا أبتعثت وجيت هنا ممكن راح تتطول وخصوصا فترة اللغة راح تاخذ وقت ودراسة الجامعة راح تاخذ وقت أطول بكثير . يعني اللغة ممكن تاخذ منك سنة ونص . ... لأن في بعض الجامعات هذا نظامها ... وبعد السنة والنص راح تدرس 4 سنوات وممكن لا قدر الله تتعثر ممكن يصيروا 5 . بينما الكلية بالكثير 3 سنوات وأنت معلق الرتبة ودربك خضر . فهمت .؟؟؟؟
أخيرا يا أخي والله أتمنى لك التوفيق وأحسبها من كل الجهات زي ما أنا وضحتلك وفهمتك ... وفي الأخير القرار قرارك .... وإذا تبي قراري ورأي والكلام اللي يجمد على الشارب خش الجوية وإنشاالله ما راح تندم . دربك خضر أخوي ...
أخوك عبدالرحمن .

العفو يالغالي , وكلنآإ بدرب الدرآسه سوآ ,,
كلامك مستحيل , آن العسكريه الضباط رواتبهم اقوى من الشركآت العالمية , مثل ارامكو وسابك وغيرهم في درجة الهندسه او التخصصات العالية , الي إن شاء الله راح تتخرج منهآ وتتوظف وراح تلقا الاستقرار بعكس العسكريه

العسكريه راتب ضعيف والي يكمله البدلات الخفيفه كالنقل او السكن بحكم ان ماراح تكون في المكان الي انت ساكن فيه مثل كنت بالخبر ومقر عملك مكان آخر , او شي من هالكلام ,
وان كنت في رتبه بعد التقاعد وش يصفا لك ,
بعكس لوكنت بشركة ونفرض ان ارامكو , وانت جايب بكالريوس بامتياز , راح تخدمك ارامكو اكثر من العسكريه
اولاً راتب عالي لانك مهندس , وبدل سكن + تآمين عائلي + بدل نقل , ترقيات حسب خدمتك وتكريم لتحفيز عطائك اكثر , بين فتره وفتره يخلونك تجدد خبرتك ومعلوماتك يدرسونك , يبتعثونك عشان تكمل شهادتك وترجع بشكل اقوى
كل هذه تحفزك , صحيح ان اشوي متعب لكن الحمدلله راح ترتاح , من تعب في البداية ارتاح في النهاية احسن من انك مرتاح في البدايه وتشد في النهاية ,

^ هذآ الكلام راح تشوفه بعد كم سنة لمآ تتخرج إن شاء الله ,, والكلام من الوالد الله يطول بعمره ,
يقولي يتوظفون شباب عندنآ , باقسام قريبه مهندسين خريجين السنوات الي فاتت ورواتبهم ماتوصل من رواتبنا , في بعضهم يستلم 50 الف وفي بعضهم 60 الف , كل واحد وحسبب تخصصه , وهذآ دليل ان تعب في شهادته

اما العسكريه , مافيها نقطة من الكلام الي قلته بحق الشركآت , ولاتنسى موبس ارامكو وسابك او كم شركة سعودية كبيرة عندنآ قطاع الاتصالات يتقدم ويتقدم في التقنية , شركة STC ,, انا اتوقع لها , مستقبل كبير بعد كم سنة شوف الفرق الي تخطته خلال كم سنة ..

كل هذآ يميز القطاع الخاص عن الحكومي ,, وآنت براحتك ,, في كلا الحالتين انت تخدم البلد ,, ترفع من خدماتها
لكن يفرق ان خذت هندسة طياران او حاجه كذآ من برآإ وجيت تشتغل في القطاع العسكري ,
راح تكون كبير على مرحلات , راح يشوفون تقييمك وبتوصل مرتبه كبيره ,

اخوي : صـوت المطـر
ماشاء الله مبروووووووووكـ تخرج اخووكـ ونسبته بالعكس مررره حلوه وان شاء الله يدخل الي يبيه
لاكن بالنسبه للقبوول صحيح محد يدري عن القبول والنتائج لاكن الجويه بإذن الله بالواسطه لو معك شهادة تقديره مقبول راح تنقبل
والأبتعااث نفس الحكااايه بإذن الله القبوول موجود
وباالنسبة لجامعة الملك سعود انا سمعت ان امر ملكي بقبول جميع الطالب الي نسبته فوق الـ75% << يعني كل الطالب مقبولين
واساساً ماافكر ادخلها

الله يعين الجميع ويوفق ,,

بصراحة لو أنا مكانك!!! إذا جات الجويه ,, قسم بالله ما أفكر بالإبتعاث ابداً

استقرار ... مافيه غربه ووجع راس ... وتوفل ,, و و و و و

الجويه : مكانه اجتماعيه .. مقاتل في سبيل الله ... راتب ممتاز ... مكانه اجتماعيه ... دورات خارجيه ... والله ما أدري وش أقول وش أخلي

رأيي: رح للجويه ولا تفكر في الابتعاث

تحياتي

اخوووي : متخصص تااريخ

والله كلامك مظبوووط ميه في الميه لاكن البعثه بعد العسكريه شبه مستحيله وبالنسبه لدراسة اللغه صح انا معك راح اخذها في الكليه
ركن مو مثل ماتاخذها من اهل اللغه << يقرا ردك وينزل للرد الي بعدك ينلحس بالكلام ويقووول مين الصح بينهم
نووورت اخوووي وماقصرت



اخووي : i'm genius
نورت من جديد
طبعاً اكييييييييييد رواتب الظباط مستحيل توصل لمثل رواتب المهندسين في سابك وارامكوا
وكلام والله عين العقل وانا اعرف واحد من اقاربي مهندس في الاتصلات وعمره مايتجاوز 35 وماشاء الله يستلم فووق الـ50 الف وكل شهر مسافر انتداب وماشاء الله مبسووط ومرتااااح
والله اذا فكرة بالهندس اقوول من يبي الدح ما قال اح < لاكن الخووف موجود ومثل ماقال اخوي متخصص تاريخ الدراسة في امريكا غير مضمونه انك تنجح ..؟!!!!!!!!