المشاركة الأصلية كتبت بواسطة lom-190
الله يعطيك العافية اخوي مهند
وان شلء الله اسبوع وتجي فيزتك باذن الله ..........حتى لو كان عمك معطي ظمان لواحد ثاني المهم يظمنون احد يتكفل بمصاريفك وهو المسئول (عمك) الله يطول اعماركم ويبارك فيكم
سوالي الله يبارك فيك :
هل يطلبون جوازاتك السابقة ويدققون فيها ؟ او سفراتك السابقة لاني بروح مع المدام
وش الاوراق المطلوبة للسفارة بالضبط تكفى يالمهند
وان شاء الله اسبوع ونباركلك الفيزة
تحياتي
شوف يا أستاذي ،،، الي قابلني سألني سؤال صريح جدا ً بأسلوب واقعي ، وهو وش كنت تسوي الخمس سنوات الماضية ،، لذلك الي عليك انك تعرف بالضبط موقعك خلال الخمس سنوات الماضية ، متى تخرجت وايش درست وايش عملت بالوظيفة وكذا ،،
وبقول لك الخطوات بالتفصيل الممل ،،
أول شئ يا أستاذي تحجز موعد ، وتروح قبل الموعد بنص ساعه ، اذا رحت بأكثر من نص ساعه بتضيع وقتك لان البوابه ماراح يدخلونك الا على موعدك ،، عند الدخول توريهم الصفحة الاولى من الابلكيشن مع صورة الموعد ، وصورة ايصال سامبا مع جوازك الجديد ويدخلونك ، وتحط جوالك عند الكاونتر ويغلفونه لك وتسلمه لآنسه عند التفتيش ،، وتروح بعدها للبصمات ، شباك البصمات بيسألك عن سبب سفرتك ،،، وبيشوف جوازك وايصال سامبا والصفحة الاولى من الابلكيشن بالاضافة الى الـ I-20 الاصلي ،، بعدها بياخذ بصماتك وبيرسلك للمقابلة ،، بتنتظر حوالي 40 دقيقة إلى ساعه حتى يجي دورك ، ضروري تجلس في كل فترات الانتظار ،،، لاني لاحظت انهم ما يبون اي وقوف بالممرات
تروح للمقابلة وهينا راح تختلف الطلبات ، لكن لازم تكون مجهز بالآتي :
1 - صورة من الموعد
2 - الـ I 20 الاصلي مع صورة ، وصورة من نموذج DS
3 - صورة شخصية 5 × 5 في حال ما قبلوا الصورة الموجودة في الابلكيشن
4 - صورة من شهاداتك الجامعية والثانوية ، وشهادة بنكية أصلية ، وصورة من قبول الجامعه ، وتعريف من عملك بالراتب وبداية الخدمة ،،
5 - صورة من الجواز احيانا يطلبونها
6 - كشف حساب لآخر ثلاث شهور مرات يطلبونه
7 - جوازاتك القديمة ،، واذا سبق وسافرت لايران او افغانستان او سوريا او اليمن ، احتمالات ذهابك لأمريكا راح تكون قليلة ،،،
8 - ايصال سداد رسوم الهجره 200 دولار ، Civs
راح يسألونك اسئلة رئيسية تقريبا ً أغلب الشباب انسألوها ،،
1 - هل راح تقدم على المنحة الدراسة ( برنامج الابتعاث )
2 - اذا كان الضمان المالي من شخص قريب مثل عمك او خالك راح يسألونك ليش مو والدك
3 - ليش اخترت أمريكا
4 - متى تخرجت من الثانوية أو الجامعه ، لازم تذكر التاريخ كويس
5 - وش التخصص الي ودك تدرسه ، طبعا ما يمنع توريه كشف درجاتك أو شهادتك الأخيرة الي حصلت عليها ، لان فيه مرات رفضوا شباب بس درجاتهم المتدنيه ،
بعدها بيجيك رفض ، وانت امام خيارين ، اما رفض قاطع ويختمون على جوازك ، لكن ما عندي خبر عن الكيفية ، هل الختم مباشر او يوصلك بالبريد ، أو يطلبون منك تسلم جوازك لمكتب فيدكس ، والله واعلم عاد بالنتيجة لكن فيه امكانية انهم يطلبون منك اعادة المقابلة أو انك تقدم بعد سنة أو ست شهور ، بس على الاغلب اذا سلمت الجواز لمكتب فيدكس تكون الفيزا مقبوله وتوصلك خلال اسبوع او اسبوعين على مكتب فيدكس الي تحدده
ضروري تكون معاك 65 ريال جاهزه تسلمها لمكتب فيدكس لانهم بيعلونك ما عندهم صرف ،،،، وبيخلونك نتنظر لحد ما يجي صرف ،،
مكتب فيدكس راح يستلم المبلغ ويطلب منك تعبي اسمك ورقم جوالك ومدينتك وتوقع على الابلكيشن ، وتاخذ صورة منه وتختار الفرع الاقرب لك الي تبيهم يرسلون له الجواز ،،،، وبعدها تتكل على الله وتنتظر ،، والخطوات السابقة أخذت مني تقريبا ً 3 ساعات ،،
لكن أهم شئ لا تغلط وتروح بدري ،، كثيرين كانوا جايين بدري اليوم والنتيجة وقفوا بالشمس لحد ما جات مواعيدهم ،،،، اهم شئ وقت موعدك تكون متواجد أمام السفارة ،،، والسفارة الامريكية ما لها مواقف ،، لذلك انتبه تضيع مثلي ،، وقف بالسفارات الي جنبها وروح على رجولك ، انا اليوم وقفت بمواقف سفارة تركيا ،،،
واي استفسارات اخرى انا حاضر ، واذا نسيت شئ سامحنا تراني كتبت على عجل
بس دامه اخذها .. اكيد انك مقبول دام اوراقك كاملة .. يمكن نسى يقولك ان الفيزا مقبوله ..