تحية طيبة للجميع
ورمضانكم باحلى ما يكون
لساتي راجع من مشاوري من السفارة ورح اسرد للجميع التفاصيل بكل ما شفته وبكل ما حسيته في وجلستي هناك
وبتمنى إني افيد الجميع
لآني كتبت اكثرمن موضوع في هذا المنتدى وبصراحة وبخط احمر ما لقيت ولا شخص ولا رد افادني بهالشيء , برغم إنو إسم المنتدى ( مبتعث ) اي خدمات كل المبتعثين ,,
مو هذي البداية إلي احب ادخل فيها معكم
في البداية
للي داخل الموضوع المفترض إنه يتبع الخطوات هذي لمن يكون عنده \
- القبول المشروط - سواء من المعهد او من الجامعة او الأثنين.
- صورة من موعدك من السفارة .
- I 20 التصريح بدخولك إلى امريكا + صورة منه .
- جواز ساري المفعول لمدة لا تقل عن 6 شهور .
- كشف حساب للشخص الي رح يدعمك او ممكن تكون إنت إلي داعم نفسك فيتطلب وجودك كشف حساب وضمان مالي من البنك
- رسوم الـ SEVISE I901Fee .
- رسوم الفيزا وتكون مدفوعة - شرط اكيد - في بنك سامبا .
- صورة من الـ Confirmation page وإلي تنرسل لك فورا ً بعد الإنتهاء من تعبة طلبك للفيزا ورح تنرسل على الإيميل إلي ارفقته بالبيانات .
- شهادات سابقة لك مثل لو كنت متخرج من الثانوية .
- تجيب شهادة كل من ( اول + ثاني + ثالث ) وشرط يكونوا مترجمين , طبعا ً لحسن الحظ الان كل الشهادات مترجمة من نفس الوزارة فمبروك عليكم إختصروا الطريق .
- وإحتياطا ً فقط , صورة لبطاقة العائلة وصورة من الجواز وصورة من بطاقة الاحوال .
هذه الاشياء إلي تاخذها معاك
بالنسبة للبس
مو مهم رحت بثوب ( زي رسمي ) او رحت ببدلة رسمية او رحت بجينز وتي شيرت , بس أهم شيء لا تروح بـ برمودة او شورت , احتياطا ً ولتفادي المشاكل ..
جوالك مو مسموح له يدخل داخل المكان نهائيا ً
مسموح لك تدخل باوراق فقط وبفلوس
موقع القنصلية رح يكون جنب جامعة الملك فهد للبترول والمعادن
بمجرد إنك تدخل شارع الجامعة تدور فوق تحت وتروح عند صاحب المظلة الزرقاء وتلف عنده ورح يسألك ويسلم عليك وليش جاي ؟
ترويه صورة من موعدك اوكي ؟
بيقول لك إمشي وروح صفط سيارتك تمشي شوية وبتروح عند شخص بيسألك نفس السؤال وبيقول لك وين تروح واي مصفط تاخذ بعد التصفيط تشيل اوراقك بس , بس اوراقك ,, إنسى إنه عندك جوال إنه مدري وش عندك ,, عندك بس اوراق اهم شيء الاوراق
وقبل لا تدخل شيك على كل شيء
جوازك I 20 .. وما سبق ذكره في الاعلى اوكي ؟
ملاحظة بسيطة
ترا إلي خايف \\ خايف لانه ما يدري وش رح يصير ومو عارف وين وشنو
اخوي او اختي ,, ترا الموضوع لاهو صعب ولاهو مصيبة ولاهو ولا حاجة
خلونا رايقين شوي
وإسمعوا لكم شيء يهدي اعصابكم
روقوا شوي
نزلتوا من السيارة توجوهوا إلى الطريق الممرا ورح تشوف لافتات توجهك طبعا ً
وإنت تمشي بتشوف سيكورتي وبيقول لك خذ من الصندوق إلى على يمينك كيس وإذا عندك حديد او اي شيء داخل ثيابك حطه داخل
وبالفعل تمشي وتعطيه اوراقك واي شيء عندك حديد حزام او جزمة حديد حاول إنك او حاولي إنك ما تروحي او تروح بها افضل لكم
اجراءات عادية بالمره
وعادي خلك طبيعي ,, مو لمن اقول خلك طبيعي تتصنع إنك طبيعي لا عادي
كانك تقرا كلامي
وش تسوي خلك عاادي مرررررررررره يعني مو الموضوع تحدي ولا لا
خلصت من السيكيورتي هذا ؟
اوكي توجه الى الامام شوية
ورح تشوف غرفة بتشوف نافذة وباب
توجه للنافذة واعطيهم ورقة موعدك كمان
ورح يسمحوا لك بالدخول
اجراءات تفتيشية عادية وامور سهلة
بعد الغرفة هدي لو كان عندك اي شيءنسيته في جيبك رح ياخذوه ويعطوك رقم حق لمن تخلص ترجع له
على العموم
خلصت من الغرفة هذي ؟
توجه الى مبنى القنصلية وطبعا ً تزين وتأمل في المناظر الموجودة قبل المبنى وتحس إنك مو بالسعودية ههه بس الشمس غصب تحسسك بهالشيء هههههههه
طبعا ً تفتح الباب وتسحبه لاني اليوم سحبته ولمن جلست انتظر ما شفت ولا واحد سحبه كلهم يدفوه
الباب ينسحب اوكي حبايبي ؟؟؟
تدخل
وفيه المسؤولة الموجودة في الصالة
طبعا ً إنت او إنتي تلقائيا ً بتشوف يمينك ترمس ماي , وجنبه ارقام
تاخذ رقمك يا طويل وطويلة العمر وتطالع الشاشة وتشوف كرسيك وتنتظر رقمك
طبعا ً فيه شبابيك
وفيه شخص ينادي بالارقام
( انا ما ادري وش سالفته دا بس هو ينادي بالارقام ويوم يوصل جنب 70 يقوم ويطلع
طبعا ً يناديك برقمك وتروح له جالس على اليسار في نهاية الصالة , يبي منك جوازك + الـ I20 و فاتورة سامبا ولو طلب شيء ثاني إعطيه وياه على طول بدون تردد اوكي ؟ )
طبعا ً حط في إحتياطك او حطي بأحتياطك بانه الشخص إلي يرتبك اغراضك مو موجود فلازم يا اخواني واخوات ترتبوا وضعكم إنتوا بنفسكم اوكي ؟
الان تنتظر إلى ان يجي رقمك
تتوجه إلى الشباك إلي فيه رقمك
طبعا ً ما رح يضربك المقابل لان بينك وبينك زجاج وغير كذا لا تخاف ,, انا كنت خايف إني ما اسمع لان سمعي خفيف ,, لمن رحت هناك ,, بالعكس سمعت حتى انفاسه !!
ما رح يطلب منك غير إنك تحط بصمات اصابعك اليسار وبعدها اليمين معلومات بسيطة
الخطوة الاولى رح يقول لك اربعة اصابعك اليسار بدون الابهام
وبعدها نفس الحركة مع اليمين
وبعدها الإبهامين مع بعض
ورح يسألك
اول مره تروح امريكا ؟
ليش رايح ؟
من داعمك ؟
هذا إلي سألني وياه
ممكن يسألك اسئلة ثانية ؟
اي ممكن
لاني ما ادري بصراحة عن طبيعة عملهم بس اعرف بأني لازم ما ارتبك ولا اخاف في ردي
رح يطلب منك كذا ورقة
جهزهم
لو سألك مثلي
جهز ورقة الضمان المالي
لو طلب مراحلك الدراسية هم لازم تجهزهم
بعدها رح يقول لك خذ هذي الورقة
وإنتظر رح نناديك
طبعا ً الصالة كانت زحمة يعني لو يقوم واحد الثاني يجلس ,,
فحاول تجلس في مكان او إنك تنتظر هذا شيء راجع لك
رح ينادو إسمك بكل وضوح
لو كان إسمك محمد
رح تسمع محمد
عمر
عمر
مدري مين
مدري مين
لا تخاف
ولا تجلس تشتت فكرك لان مسألة إنه ينادي إسمك مو شرط تكون بالترتيب !! لآني انا رحت وخلصت خلاص ساعتين بس
ممكن إنت تاخذ اقل او اكثر
طبعا ً شبابك رقم 2 و 3 هذولا شباب امريكان حبوبين ورح يعاملوك بكل إحترام والمطلوب منك ومنكِ يا اعزائي بأنكم تحترموهم وهذا دليل على حسن تعاونكم معاهم
ما رح يطالعوا فيكم مثل التحقيق ولا رح يشربوا دخان ولا رح يسجلوا مكالمتك فلا تتوقع الموضوع مسألة تخوف
وراسكم حبايبي الي يمشي بالقوانين الموجودة رح تتسهل له اموره
الاسئلة إلي جتني انا
من المقابل في الشباك الثاني
كيفك مؤيد ؟
قلت له تمام
ليش بتروح امريكا ؟
ادرس لغة
اي معهد ؟
LSI في مدينة بوسطن في ولاية ماستيشوتيس
وين كنت خلال الخمس سنوات الماضية؟
سوريا والبحرين والكويت وقطر
ليش رحت سوريا ؟
كان عندي بطولة دراجات وحققت فيها مركز حلو
هنا هو إبتسم في وجهي وقال لي واو إنت تلعب دراجات ؟
قلت له اي
قال لي فيزتك بتخلص خلال 7 ايام !!!
انا إنصدمت !!!!!
المسألة مو صعبة يا اخوان ويا اخوات
هذا وبعدها لازم يكون عندك ملغ مالي وحط في إحتياطك يكون عندك على الاقل 150 ريال
بالنسبة لظهران والدمام والخبر والقطيف والاجام وصفوى انا شفته ياخذ 65
لغير هالاماكن اتوقع ياخذ منك 125 .
موظف فيدكس فلبيني , رح يسألك
خلصت المقابلة ؟
عندهم الجواز ؟
بيطلب منك ورقة الـ Confirmation page رح يسجل معلوماتك فيها
بيطلب رقم جوالك ورقم تلفون بيتكم
ورح يسألك تحب نوصله لبيتكم او تجي تاخذه من اقرب مكتب لك ؟
هذي خياراتكم حبايبي .. اتمنى لكم التوفيق
واتمنى إنه ما تتصعب عليكم الأمور
ملاحظات شفتها انا اليوم
وبتمنى إنه الاشخاص الثانين ما يطيحوا فيها حق لا تتأخر فيزتهم او لا يتوهقوا او لا ينشك فيهم
للشباب
عدم لبس الحديد مثل الحزام او الجزمة عزكم الله او النظارات الكبيرة وعارفين يا راي بي صح ؟
للبنات
انا اسف ولكني اليوم حسيت بأنه البنات إنحرجوا بسبب النقابل والحجاب مطلوب منكم يا اخوات إنكم تكشفوا وجيهكم لمن تقابلوا على فكرة ,, فالله يوفقكم شوفوا لكم حل يجنبكم من أنكم تتأخروا او تتعرضوا لآحراج
يعني شفت كذا بنت هناك بحجاب ,, امورهم ماشية غير عن النقاب ,, انا اسف بس هذا إلي شفته
اتمنى إني ما احرجكم وانا اسف بس هذا الي حصل
ما اتوقع فيه شيء اقدر اضيفه
غير اني اكرر
الخوف والارتباك ضروري يجيكم ,, بس خلوه كانه شعور طبيعي كانكم ولا شيء ترا الي بيقابلكم حاله من حالكم
إعتبروه شيء حلو وبينكم إحترام ,, إحترموه رح يخلص كل شيء لكم بسهولة
اهم شيء تكونوا موجودين قبل الموعد بنصف ساعة حق تجهز اموركم ,, لا تنسوا اي ملف ممكن يفيدكم
اتمنى التوفيق للجميع وعن جد انا مبسوط لآني بس 7 ايام ,, ممكن تكونوا كلكم مثلي او تكونوا احسن مني ,,
برغم إني مريت بظروف كنت لو ما مشيتها رح تضيع مقابلتي ,,
متمني لكم التوفيق حبايبي ,,
اخوكم
مؤيد .. !!
