بخصوص الشحن من السعوديه الى امريكا.. الله لايهينكم رحلتي بعد يومين
السلام عليكم
انا رحلتي بتاريخ 14 اوغسطس بإذن الله وعلى الخطوط القطريه
ومعي شنطه كبيره والثانيه صغيره المشكله بالشنطه الكبيره توني مسكرها وطلعت الى ارامكس علشان اوزنها واشوف كم وزنها لان القطريه قالوا حد الشنطه 23 كيلو فقط
وانا الشنطه الكبيره لحالها 37 كيلو !! ومادري ايش اسوي, حاب اسألكم حد جرب البريد السعودي وهل أمن ويوصل لو بخلي الاهل يشحنون لي بعض الاشياء لمن اوصل امريكا..؟
لان متخوف ومافيه قدامي الا البريد السعودي يعتبر ارخص
اتمنى الاراء لاني بحاجه ماسه.. وشكرا
رد: بخصوص الشحن من السعوديه الى امريكا.. الله لايهينكم رحلتي بعد يومين
ياحبيب اخوك لك خيارين او اقتراحين وطيع شوري اختار احدهم وابعد عن البريد ترا ما اخبل من البريد السعودي الا البريد الأمريكي .. بالاضافة ان السعر غالي مافيهم ثقة
الخيار الأول : انت لك شنطتين كبار كل شنطة 23 كلغ تشحن مع العفش ولك شنطة صغيرة تصل الى 9 كلغ تاخذها معك في الطائرة
بإمكانك تجيب شنطتين متساويات في الحجم وتخلي في كل شنطة 23 كلغ بالاضافة الى 9 كلغ في كبينة الطائرة يعني لك 54 كلغ بس تتوزع مثل الطريق اللي ذكرتها لك .
الخيار الثاني : وهذا انا مجربه والجأ له اذا ماضبط معك الخيار الأول
وهو انك تاخذ معك شنطة اضافية وتدفع مبلغ زيادة وانا جربته مع طيران اليونايتد ودفعت (100$) بس انت تأكد من الخطوط القطرية كم قيمة الشنطة الإضافية لكن ما اعتقد انه بيتعدى(100$) اي مايساوي (380 ريال) بينما لو شحنت عفش مستحيل ولامواخذة لوتحب السماء ماراح تدفع اقل من(250$)
وماتدري عن عفشك ومتى يجيك لأن لا البريد السعودي ولا الأمريكي ثقة .. البريد الأمريكي مضيع لي قبل شهر اوراق وفواتير رسمية .
رد: بخصوص الشحن من السعوديه الى امريكا.. الله لايهينكم رحلتي بعد يومين
الله يسهل امورك يا غالي.. كلام كليم
انا بيني وبينك اقتراحك الاول ممتاز بس المشكله فيه اني بعد ما اوصل هناك لوشنطن !! راح اتمرمط انا شخص واحد كيف اشيل شنطتين كبار! + شنطه صغيره لطيارة + شنطه لاب توب
وتبي تروح تشوف لك الفندق فتحس صعبه تجرهم معك
هذه كان خوفي منها ولا اقتراحك ممتاز.. واشكرك بصراحه على نصيحتك وتحذيرك بخصوص البريد السعودي والامريكي لان كنت متخوف بصراحه واذا كان كذا الله يعين لان حتى انا مشكك في البريد الامريكي
مرسل اوراق لاحد الجامعات في امريكا .. والى الان ماستلموها!
رد: بخصوص الشحن من السعوديه الى امريكا.. الله لايهينكم رحلتي بعد يومين
نفس السؤال الي كأن يدور ببآلي هآليومين ..
اتمنى نحصّل إجابه ..
رد: بخصوص الشحن من السعوديه الى امريكا.. الله لايهينكم رحلتي بعد يومين
اهلا اخوي ماتوقع فيه حلول اخرى... العضو كلام كليم ماقصر اعطانا الحلول.. ومافي اليد حيله الله يعين الا اذا في اختراع ثاني!
رد: بخصوص الشحن من السعوديه الى امريكا.. الله لايهينكم رحلتي بعد يومين
شف وانا اخوك انا مجرب القطرية
اقلعت من الرياض الى الدوحة ومنها الى واشنطن ومعي وزن زايد ماخذو على ولا ريال في الرياض او الدوحة , لكن المشكلة في الرحلة الداخلية خذوا مني 200 دولار على شنطتين كل شنطة 100
واي سوال انا حاضر
رد: بخصوص الشحن من السعوديه الى امريكا.. الله لايهينكم رحلتي بعد يومين
انا اللي بسويه ان شاء الله باخذ شنطة كبيره واخذ شنطة معاها اصغر فالحجم يعني احاول انو الشنطتين تكون 23
بس يا اخوان كيف اوزنها قبل ما اروح المطار ؟
رد: بخصوص الشحن من السعوديه الى امريكا.. الله لايهينكم رحلتي بعد يومين
اذا بتشحن اشحن بـــ DHL الحين تخفيض استغله اذا مرا محتاجها
وفدكس بعد ممكن تكلف 500 ريال وتوصيل للبيت
بس البريد ابعد عنه ماتوصلك الا بطلعة
الروح
رد: بخصوص الشحن من السعوديه الى امريكا.. الله لايهينكم رحلتي بعد يومين
إذا ناوي تشحن
شف لك اي احد يشتغل في ارامكو
تطلع عليك برخص التراب
عندهم خصم لحاملي بطاقات ارامكو حول ٨٠٪
اتكلم عن الـ DHL فقط .
رد: بخصوص الشحن من السعوديه الى امريكا.. الله لايهينكم رحلتي بعد يومين
اقتباس:
المشاركة الأصلية كتبت بواسطة مبتعث ج
انا اللي بسويه ان شاء الله باخذ شنطة كبيره واخذ شنطة معاها اصغر فالحجم يعني احاول انو الشنطتين تكون 23
بس يا اخوان كيف اوزنها قبل ما اروح المطار ؟
مر احد مكاتب فيدكس عندهم ميزان كبير تلقاه في المدخل وماراح يقصرون معك يوزون لك بلاش
