الأعضاء الإشتراك و التسجيل

الملتقيات
ADs

شرح من المطار الى المطار الفندق وواشنطن والملحقيه

شرح من المطار الى المطار الفندق وواشنطن والملحقيه


NOTICE

تنبيه: هذا الموضوع قديم. تم طرحه قبل 2318 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية أبونوآف
    أبونوآف

    مبتعث مجتهد Senior Member

    أبونوآف الولايات المتحدة الأمريكية

    أبونوآف , ذكر. مبتعث مجتهد Senior Member. من السعودية , مبتعث فى الولايات المتحدة الأمريكية , تخصصى محاسبة , بجامعة جامعة الملك سعود
    • جامعة الملك سعود
    • محاسبة
    • ذكر
    • الرياض, نجد
    • السعودية
    • Aug 2010
    المزيدl

    August 13th, 2011, 09:42 PM

    بناء على استفسار الاخت الحايره بكتب لكم عن الوقت اللي جلسته بواشنطن
    الحايره مبروك التاشيره الله يجعلها فاتحه خير عليك .

    مطار دالاس الدولي بواشنطن عند الوصول : المطار حلووووو وممتع اذا بغيتوا تسافرون منه بتستمتعون .
    طبعاً*بالمطار تفتيش روتيني اهم شي لحد يقفل شنطته بقفل ممنوع ثم
    انتبهوا للخط الاصفر عند الجوازات لحد يتعداه وممنوعه المكالمات بالمطار وبعد الجوازات تستلمون شنطكم من سير الشنط ثم تتجهون لمنطقة تفتيش الشنط لحد يجيب معه كيس رز لانهم يسالون اذا معكم كيس رز او لا ..
    وشوله تجيبون اكل اصلاً امريكا الاكل فيها رخيص خصوصا اللي بيشتري من سوبر ماركت (الوول مارت ) .
    تعامل المطار جداً جداً راقي .

    طبعا تعالوا على اي خطوط وباي وقت ولا عليكم لا من باص الملحقيه ولا من غيره
    كلام فاضي وبعدين اكتشفت ان الباص اللي يقصدونه الناس انه تابع للملحقيه هو اصلاً باص الشيراتون وتقدرون تركبون فيه لان هذي خدمه من الفندق مهوب من الملحقيه وياخذكم لفندق الشيراتون وهو قريب من المطار . مهوب لازم يصير المصري اللي تابع للملحقيه موجود ويستقبلكم*فيه باص فندق الشيراتون يجي لم مطار دالاس الدولي كل نصف ساعه وواضح الباص عليه شعار الشيراتون وملون وعليه رسومات شكله حلو ياخذكم مجاناً للفندق ويرجعكم المطار اذا بغيتو تسافرون .
    وفي اسوا الاحوال خوذوا تاكسي من المطار رخيص لان الفندق قريب يمكن ياخذ منكم 15 دولار وخلوه يشغل العداد لان مافيه شي اسمه ( كم انتا يودي انا فلوس ) شغل ربعنا هذا بالسعوديه بس . وعادي ترا اول ماتركبون مع اي تاكسي يزود العداد 3 دولار تقريبا هذي ضريبه ( تاكس TAX ) لحد يظن انه نصاب فيه ورقه مكتوبه على زجاج اي تاكسي تعلمكم الاسعار والنظام . اطلبوا منه يوديكم للشيراتون ريستون
    ( ريستون هذي المنطقه اللي فيها الفندق وبتلاحظون ان الباص مكتوب عليه شيراتون ريستون*

    طبعاً اي*طالب سعودي يجي لواشنطن بغرض الدراسه يحق له يسكن بفندق الشيراتون اللي موقعه الملحقيه معه عقد ودافعه 60٪ من قيمة ايجار الغرفه . فندق راقي ومريح وخدماته رهيبه
    يبعد عن الملحقيه 20 دقيقه بالسياره وراح تستمتعون بالمناظر الحلوه وانتم رايحين الملحقيه
    فقط المبلغ اللي تدفعونه 93 دولار لليوم و 30 دولار تامين يرجع لكم اذا ما استخدمتوا المويه اللي بالغرفه . الملحقية بمنطقة اسمها الفايرفاكس او بالاصح حي .

    فيه سواقين مصاريه تشوفونهم كل يوم واقفين عند باب الفندق وواضه اشكالهم انهم عرب يودونكم بسياراتهم الخاصه لم الملحقيه ويرجعونكم . بس انتبهوا بقولكم على نقطه
    ( سعر المشوار للملحقيه مع التاكسي او سيارات اللينكون السودا اللي واقفه قدام الفندق من 30 الى 35 دولار ) المصري يقول لكم ابي 40
    بس حاولوا انكم تكاسرونه وروحوا معه لانه يعلمكم عن بعض الامور للي ما يعرف يتكلم انقلش وبعدين فيه حركه حلوه اللي بيروح للملحقيه يسويها اغلب السعوديين اللي جايين للفندق يبغون الملحقيه عشان كذا اللي يبي يروح عادي لا يستحي يخش بعين اي سعودي موجود بالبهو ويساله اذا يبي يروح الملحقيه عشان يكون السعر مقسوم بينكم انا كنت اروح مع شباب وكان الواحد منا يدفع 8 دولار بس بالروحه وبالرجعه يدفع 8 دولار .
    الملحقيه طبعاً تقفل السبت والاحد ودوامها برمضان من الساعه 11 الصباح لين العصر ويوقفون لصلاة الجمعه في حال كان احد منكم رايح لها يوم جمعه وبعد الصلاة يرجع دوامهم طبيعي والملحقيه فيها تفتيش زي المطار ويخلص دوامهم الساعه 4 العصر .
    اذكر مره تاخرت على العيال ما طلعت من الملحقيه وراحوا عني واضطريت اركب تاكسي ودفعت 38 دولار بس عشان ارجع للفندق . عشان كذا اتفقوا متى تطلعون من الملحقيه وخلوا تلفون المصري معكم عشان تتصلون عليه ويجيكم . او عادي اذا ماجاكم المصري اركبوا تاكسي كلكم وتقاسموا المبلغ مره يطلع رخيص .

    حتى المصري هذا ياخذكم ويمشيكم بواشنطن سعر الروحه 80 دولار والرجعه 80 دولار بس انتوا اطلعوا مجموعه عشان يكون المبلغ بينكم ويطلع رخيص على الشخص . اذكر طلعنا انا وعيال وجلسنا 3 ساعات دفع الواحد منا بس20 دولار وهذا يعتبر رخيص مره مره مقارنه بالتاكسي اللي ممكن يمشيك بواشنطن بسعر 200 دولار لانه يشغل العداد والمشوار بعيد .
    ايه وبغيت اقولكم ترا فيه سوبر ماركت مره قريبه من الفندق بالجهه الخلفيه وفيه مطاعم اذكر فيه تشيلز وفيه وجبات سريعه ومحطة بنزين و بنك والفندق بمنطقة حدايق وملعب قولف مره حلوه المنطقه حتى الفندق فيه صالة تمارين ومسبح تقدرون تسبحون فيه عادي اطلبوا غرف مطله على المسبح من حقكم عشان تستمتعون بالمنظر .. صدق انا ما استفدت من الملحقيه اي شي والمفروض اني مخلص شغلي بالسعوديه اونلاين ومتجه على ولايتي على طول بس والله اني ما تحسفت ابد اني زرت واشنطن وعرفت الملحقيه والسفاره و شفت فرجينيا لانها لاصقه بواشنطن
    مره مره ايام حلوه استمتعوا الديره امااان . وحلوووه وذكريات

    ايه بغيت اقولكم ان النظام اليدوي حق الملحقيه اول كان يسجل جوازاتكم بالسفاره بس الحين يوم صار الكتروني لازم الواحد يسجل نفسه بالسفاره السعوديه اونلاين عشان بس يبلغهم انه وصل امريكا ويعطيهم عنوانه وياخذ منهم الارقام المهمه عشان لو احتاج شي او فقد جوازه يتصل فيهم .

    انتبهوا لحد يضيع جوازه والافضل يكون معكم شنط لان عيال كثيرين فقدوا بعض اوراقهم لانهم ينسونها بمكان عام ويتوهقون حتى الايتوني حق الدراسه ترا اهميته باهميه الجواز مره مره مهم انتبهوا .

    ايه وبغيت اقولكم عن منطقة قررريبه مره من الفندق ومنطقه مره خياليه وممتعه وفيها كل شي يخطر على بالكم اسمها ( ريسون تاون سنتر ) منطقة فيها مول وسينما ومطااااعم كثيره وحلوه وايس كريم ونوافير وناس وحياة مره رهيبه وممتعه وباص الفندق يوديكم لمها مجانا وياخذكم منها للفندق والباص يطلع لها كل نصف ساعه بس اذا بغيتوا ترجعون للفندق لازم تتصلون على الفندق وتقولون حنا بالريستون تاون سنتر نبي نرجع للفندق ويجيكم الباص والباص يمشي على الوقت يعني يجي الساعه ثمان او ثمان ونص او تسع او تسع ونص زي كذا . بس بعد الساعه عشر بالليل الباص ما يرجعكم بس يوديكم وينتهي دوامهم الساعه عشر انتم ارجعوا بتاكسي واذا كنتوا شباب عادي تقدرون ترجعون على رجلينكم بس خلوكم منتبهين وانتم رايحين وين موقع الفندق اذكر مره نسينا ان الباص ينتهي دوامه ورجعنا مشي يمكن 10 دقايق لانه قريب مره وامااان او اللي يبي يرجع بالتاكسي باي وقت ب 10$ دولار . اذا شغل العداد طبعاً .

    وانتبهوا بغيت اقولكم فيه قهوه ستار بكس بالغرفه مجانيه استخدموها واذا خلصت اطلبوا غيرها من خدمة الغرف ( طريقة استخدام آلة القهوه كالتالي : حطوا مويه على قد الكاس الموجود ثم كبوه داخل الاله بمكانه المخصص ثم افتحوا النوع اللي تبونه من القهوه وداخل الكيس فيه كيس ثاني شفاف هذا حطوه داخل الاله بالمكان المخصص له بعدين سكروا الاله وشغلوها وحطوا الكاس مره ثانيه تحت الاله عشان يبدا يصب القهوه فيه لين يمتلي الكاس طبعا لان الاله تصب على قد ما تحطون فيها من مويه . اما الشاي فحطوا مويه لحالها وسكروا عليه الاله وحطوا الكاس تحت الاله وخلوا المويه الحار يصب بالكاس ثم افتحوا اللبتون واستمتعوا بالشاي وياليت محد يسحب على الصيام لان الوقت رمضان ) واللي بغيت اقوله اللي ينسى طريقة استخدام الاله يجرب لين يفهمها بس لا يسرف ويلعب بالنعمه .


    تااابعووو
  2. ايه صح بغيت اقولكم ويغسلون ملابسكم ويخصمون قيمة غسيلها من التامين اللي دفعتوه بس انتم اطلبوا كيس و حطوا ملابسكم فيه وسلموها للرسبشن ويعطيكم ورقه تاشرون على نوع الملابس الموجوده بالكيس وكل نوع مبين قدامه كم سعر الغسيل واللي ما يعرف انقلش يفتح ترجمة قوقل ويترجم لحد يضيق صدره كل الامور ممتعه واي مشكله تصير لك راح تكون ذكريات استمتعوا بالسفر .

    بالفندق ماراح تحسون انكم غريبين كله سعوديين وللبنات كله سعوديات وعيال وبزارين السعوديه يلعبون بكل مكان والموظفين بالفندق عارفين انكم طلاب وان مامعكم لغة يتعاملون معكم بلطف بس انتم عطوهم الجواز الاخضر وهم يضبطون وضعكم لان كل المبتعثين مارين عليهم وتراهم ما ياخذون الجواز زي الفنادق الثانيه لانهم يدرون انكم تحتاجون الجواز بالملحقية واللوبي حق الفندق ( البهو ) صاير هو الملتقى حق الطلاب فيه ركن مبيعات وفيه نت مجاني وكمبيوترات مجانيه وغرفة للسكانر بالدور الاول وفيه بعد غرفة ثانيه بالدور السادس بس اذكر قبل ما اطلع خرب السكانر حقها بس الرسبشن يسويلكم سكان لاوراقكم مجانا فيه واحد بالرسبشن شكله كنه تايواني رهيب وفيه بنات على الرسبشن رهيبات وخدومات .

    وانتبهوا بعد ترا نظام الفنادق يفتحون كل يوم الصبح الغرفه حتى لو كنت موجود فيها لان البنات اللي ينظفون الغرفه معهم بطاقات تفتح كل الغرف لذلك انتبهوا لاغراضكم واللي مايبي تنظيف فيه ورقه معلقه على الباب من الداخل لونها اخضر حطوها على الباب من برا ولا يفتحون الغرفه واحتياطاً اذا صرتوا داخل الغرفه فيه قفل تقدرون تقفلونها وانتم اطلبوا تنظيف الغرفه باي وقت تبونه .

    ولحد يشغل باله باوقات الصلوات لان الرسبشن بيعطونكم ورقه مكتوبه بالعربي فيها جدول الصلوات برمضان .

    اذا جيتوا تسلمون غرفتكم اخر يوم تقدرون تنزلون شنطكم وتحطونها بغرفة الامانات عند الفندق ويعطيكم ورقه تثبت انكم حطيتوا شنط بغرفة الامانات والظاهر عندهم صندوق امانات للي خايف على جوازه او معه مبالغ وتطلعون تخلصون شغلاتكم كان عندكم شغلات وترجعون تستلمون شنطكم وتطلبون الباص يوديكم المطار مجاناً وتسافرون بحفظ الله .
    لحد يضيق صدره الرحله حلووووه والسفر حلووو وواشنطن احلى واستمتعوا بالمناظر لانها ايام ماراح تنسونها .

    ايه ترا فيه مطارين بواشنطن واحد اسمه مطار دالاس الدولي والثاني مدري وش اسمه بس يبعد عن الفندق تقريباً ساعه بالسياره وسعر المشوار لمه 100$ دولار
    لذلك نصيحه اي شخص بيحجز طيران يآخذ رحلات تطلع من مطار دالاس احسن واقرب عشان لو تاخر على الرحله يكون المطار قريب يمديه يروح لانه مرررره قريب لم الفندق يمكن خمس دقايق بالباص ومجاناً تأكدوا من اي مطار بتسافرون .
    وترا فيه مكتب الطيار للسفر داخل الملحقيه بالدور الاول اسألوا عنه للي ما بعد حجز ويبي يحجز بس ترا اسعارهم غاليه وتذاكرهم اذا شريتها وجيت تغيرها تدفع غرامه 150$ دولار تقريباً . للي يعرف يحجز من النت ارخص
    فيه شركات طيران كثيره اشهرها طيران اليونايتد وطيران اميريكان ايرلاينز وفيه بعد يو اس وفيه جت بلو بس بشكل عام الطيران الداخلي عندهم مهوب ذاك الزود بس طيارينهم فنانين بالقياده . ولحد ينتظر وجبات بالطياره لان ما فيه شيء اسمه وجبات كل شيء انت تطلبه وتدفع قيمته انا اتكلم عن الدرجه الاقتصاديه اللي نسميها بالسعوديه الدرجه السياحيه او درجه الضيافه .

    خلوا معكم كاش وصرف يعني 10 $ دولار و 20 $ دولار ودولارات مفكوكه وسنتات .. خلوا الرسبشن يفك لكم مية دولار صرف لانكم تحتاجون بالتكاسي وغيرها . او السوبر ماركت اشتروا منه عشان يعطيكم صرف .

    3 ايام بواشنطن مع السكن بالشيراتون واكل المطاعم تكلف تقريباً كلها بس 500 دولار .
    انا اتكلم عن المعقول يعني لحد يتعشى بمطعم ب 100 دولار ويقول ابو نواف نصاب واشنطن غاليه !!


    تابعووووو
    7 "
  3. وبعدين بغيت اقول للبنات اللي ما تبغى تطلع برا الفندق وتبغى عشاء فيه عند الرسبشن ارقام مطاعم غير المطعم اللي داخل الفندق . اذكر مره طلبت مع عيال دومينوز بيتزا وحلوووه وقيمة الوحده بحدود 18$ دولار . الحجم الوسط
    بس طبعاً حنا طلبنا 3 بيتزا عشان كنا 4 اشخاص
    وقلنا لهم خلوها جبن وخضار عشان نضمن مايكون فيها خنزير
    بس سعودي سولفت معه بالبهو لقيته ماكل بيتزا ببروني خنزير هو وعياله وشبعانين منها بعد خخخخخخخ قلت له بالعافيه اجل جربت الخنزير . بس المسكين ما كان يدري انها خنزير يحسبها لحم بقر زي اللي بالسعوديه .

    ولحد يتعب مخه ويجلس يقارن الدولار بالريال نهائياً خلاص انت بامريكا اذا الدولار زي الريال يعني عادي مويه بدولار لاتقول يوووه دولار يعني 4 ريال يعني المويه غاليه !! لا عيشوا زي ما هم عايشين بالدولار .
    فيه مطعم راااايق واسعاره معقوله بالريستون تاون سنتر اظن اسمه cusi او شي زي كذا ولون شعاره عنابي . ماهو وجبات سريعه ويبيع فطور وكراوسان وقهوه وغداء وعشاء
    بس رخيص يعني بيتزا تكفي شخص واحد ب 6 دولار وكم سنت ومشروب مع اعادة التعبئه ب دولار وكم سنت يعني زي كذا بس تشبببع وانتبهوا انا طلبت بيتزا خضار عشان مايحطون لي اي خنزين ولاتنسون التب لانه عيب احد ياكل بمطعم ولا يدفع تب ( التب هو البخشيش ) وبالعاده التب يكون 10 ٪ من مجموع الطلب . يعني لو احد طلب وجبه ب 10 دولار واكلها بالمطعم يدفع دولار تب ولو طلب وجبه ب 20 دولار يدفع دولارين تب وما يدفعها مباشره لا يحطها على الطاوله ويقوم اذا كان الدفع للمطعم قبل الاكل اما اذا كان الدفع بعد الاكل يحطها مع الفاتوره اذا جاء يقوم من الطاوله اما اذا ما معكم كاش وكان الدفع بالبطاقه اكتبوا على الفاتوره ان التب 3 دولار او دولارين على حسب طلبكم عشان هم يخصمون التب من بطاقتكم مباشره ولحد يقول هذولا ياخذون بخشيش عيني عينك لا ترا رواتب اللي يشتغلون بالمطعم قليله عشان كذا هم يخدمونكم بسعة صدر عشان التب اللي يحصلون عليه وعشان هم كذا اخلاق وفرندلي وشعب حبوب وبتلاحظون هذا الشي اذا دخلتوا محلات غير المطاعم اما اذا كان طلبكم من مطعم وجبات سريعه زي نظام ماكدونالدز لا تدفعون تب ولا شي لانكم انتم اللي تخدمون انفسكم وتنظفون الطاوله .

    وخلوا نظامكم امريكي عادي لحد يستحي كلكم مسافرين وكلكم طلاب واهاليكم يصرفون عليكم لحد يسوي فيها انا الولد الكاش والبنت تسوي فيها انا بنت الهاي قدام السعوديات هناك لانكم بتحتاجون الدولارات اللي معكم وبيجيكم يوم تدورون السنت الواحد عشان كذا نظام هالمره خلها علي يا رجال علي ووالله ماتدفع هذا ما ينفع الا بالسعوديه اما هنا الهياط ما يمشيك الا كم يوم وبتطفر .

    كل العيال اللي شفتهم هناك كلهم يدفعون عن انفسهم ويشترون وجباتهم بانفسهم ولا احد قال خلها علي وخلها عليك الا اذا كان المبلغ بسيط جداً وكان اللي معك شخص قريب لك او صديق .

    ايه بغيت اقول شيء بخصوص الملحقيه ترا بعد النظام الالكتروني صارت الملحقيه توفر كمبيوترات للطلاب عشان اي احد يجي يعطونه ورقه مكتوب عليها رابط النظام ويقولون مالنا شغل فيك تبي تسجل هذي الاجهزه عندك وهذا الرابط وهذا السكانر وخلص امورك بنفسك واذا واجهت اي مشكله اسالنا اما غير كذا ما لك عندنا شيء . عشان كذا نصيحه اللي ماله بالملحقيه مشكله معينه وبس ناوي يروح عشان يسجل يخلص اموره اونلاين عن طريق موقع الملحقيه ويفتح رابط الخدمات الالكترونه ويفتك من الغثى والطيران والخساير الا اذا يقول انا رايح واشنطن اتمشى واسجل اقوله واشنطن تستاهل من يزورها لانها بتكون ذكريات حلوه له .


    تابعووووو
    7 "
  4. وانتبهوا لازم تروحون بدري للملحقيه عشان هناك طوابير على الكمبيوترات ولحد ينسى ان الابلكيشن حق الملحقيه الاونلاين يجلس فقط عشر دقايق اذا ما خلصت شغلك يتقفل عليك ويقبل تسجيلك حتى لو كان ناقص عشان كذا اللي بيسجل لا يوسع الصدر يسوي سكان قبل يفتح الرابط ويخلي اوراقه جاهزه وبعدين يفتح الرابط ويعبي بياناته بخمس دقايق اقصى شي وخمس دقايق حقت رفع الاوراق على الموقع وكل شيء يبين تحت الابلكيشن اذا فتحتوا الرابط وش المطلوب وغيره وخلوا اوراقكم اذا بغيتوا تسوون سكانر لها كل ورقه حجمها تحت ال 500 كيلو بايب عشان الموقع يقبلها واسالوا زين عن هالنقطه بالملحقيه وخوذوا ارقام وايميلات الملحقيه من موقعهم وخلوها معكم في حال احتجتوا تسالونهم عن شيء ولحد ينسى ياخذ معه فلاش ميموري لانها مهمه من السعوديه وكمبيوتر عربي عشان لو صارت الملحقيه زحمه تقدرون ترجعون الفندق وتخلصون اوراقكم فيه .

    وتقدرون تطلبون من باص الشيراتون يوديكم لمكتب فيدكس اللي بالريستون تاون سنتر وتسوون من هناك سكانر بخمسة دولار لعشر اوراق ويحطها لكم بالفلاش بس لاتنسون تصغرون حجم الكيلو بايت حق الصوره او سكانر من الفندق زي ما قلت لكم قبل واللي يبي يطلع شريحه امريكيه يروح لم ( تي موبيل ) بالريستون تاون سنتر وياخذ منهم بطاقه حقت شهر شحن قريبه من نظام سوا بس شحن تدفعون خمسين دولار تقريباً كل شهر مهوب بطايق لا شريحه وتطلبون من الشركه تفتحها كل شهر بنفس المبلغ ومكالمات ورسايل مفتوحه بامريكا ولحد ياخذ كونتراكت ( كونتراكت يعني عقد ) بعدين ماتعجبكم الشركه وتتوهقون خلوا نظامكم شهري وبعدين بغيت اقولكم عن شيء ترا كل ولايه ولها ارقام تصلح فيها عشان كذا انتم علموهم اي ولايه رايحين عشان يطلعون لكم ارقام تشتغل فيها وتي موبيل زي الاتصالات السعوديه عندنا هي اللي مستحوذه تقريباً على الشبكات .

    للي خايف من الطياره او عنده فوبيا من ركوب الطيارات اول شيء يتوكل على الله
    ثانياً الطيارات آمن وسيلة سفر بالعالم وبعدين كل مطارات العالم زحمه من الطيارات والمسافرين يعني طيارتكم ماهي بس لحالها اللي بتطير والطيار اللي يسوق ماهي اول مره يسوق
    طار مئآآآت المرات قبل كذا وبعدين فيه شيء اسمه امان وفيه شيء اسمه ملاحه وصيانه ومتابعه وبالنسبه للي يكبرون موضوع المطبات الهوائيه ترا والله امتع شيء المطبات الهوائيه
    تهتز اهتزاز بسيط بس ثم يقول خلاص فكو الاحزمه !! طيب بس خلاص هذي المطبات اللي اشغلونا الناس عندها .
    واللي يبي يهون الموضوع على نفسه يشوف المضيفين اللي هذي وظيفتهم كل يوم يطيرون رحله لو الطيران فيه خطر كان الطيار ماصار طيار والمظيف ما توظف هالوظيفه .
    صار بيت شعر ذا مهيب نصيحه خخخخ
    المهم الله يحفظكم استمتعوا والطياره بارده خلو معكم لحاف والمحظوظ اللي يجلس جنب الشباك لانه بيشوف المحيط وبيشوف اوروبا من فوق والغيوم شييييء حلووو .

    اخيراً خلوا الارقام المهمه معكم واي سواق عربي تقابلونه خوذوا رقمه عشان اذا احتجتوه باي مكان يقدر يجي ياخذكم . ورقم الفندق عشان تطلبون الباص اذا بغيتوه .

    الله يوفقكم ويسعدكم ويسهل اموركم ويوصلكم بالسلامه ويردكم بالسلامه لاهاليكم ولوطنكم بشهاداتكم واحلامكم يارب .

    دعواتكم لي بالنظمام وبالتوفيق وهذا جزء بسيط من رد الجميل لهذا المنتدى الرائع اللي استفدت من تجارب غيري كثير .

    شكراً يا ملكنا عبدالله يا خادم الحرمين الشريفين على هذي البعثات وعلى تحقيق احلامنا وطموحاتنا
    شكراً للملحقيه الثقافيه السعودية بأمريكا على التسهيلات والمساعدات اللي قدمتوها لنا
    شكراً أمريكا على استضافتنا .
    شكراً منتدى مبتعث على اتاحة الفرصة لنا وعلى خدمتنا
    شكراً لكل شخص فادني بهذا المنتدى
    شكراً لاي شخص يقرا الموضوع ويارب تستفيدون منه وتدعون لي وتسامحوني اذا كان فيه قصور .

    أبو نواف
    7 "
  5. الباص تلاقيه اول ما تطلع للشارع تنتظر شوي ويجيك او يمكن تلاقيه واقف ويركب ناس لانه تابع للشيراتون مهوب للطلاب بس ويجي كل نصف ساعه للمطار اذا ماتبي تنتظر خذ لك تاكسي وقله ابي الشيراتون ريستون ( الشيراتون اللي بمنطقة ريستون )
    او بتلاقي طلاب سعوديين كثييير مجتمعين اركب معهم او المصري حق الملحقيه لاتخاف الامور سهله مررره وممتعه .
    بالتوفيق لك
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.