استفسار هل الـ50 الف ريال كافية لدراسة لغة ؟

٥٠ ألف لمدة ٤ أشهر كافية .
أكثر من كذا ، تبدأ ازمة شوية.

أنا على حسابي لمدة شهرين الى الآن وصرفت مايقارب ٣٥ ألف ريال ، وقدام ٤٠ ألف للسمستر الجاي بعد .
معهدي يكلف ٣٧٠٠$ لمدة (١١ أسبوع ) تقريباً - ٣ أشهر. + تأمين ورسوم مختلفة طلع علي بحول الـ ٤٥٠٠$
أنا انصحك وبشدة انك تاخذ التوفل من السعودية، وتجي هنا، وتلتحق مباشرة، لان الوزارة تقريبا الآن ماتلحق الطلاب في مرحلة اللغة ( الا مايستثنى )


وهي تعتمد بشكل كبير على المدينة والولاية ، وصرفيتك ونوع سكنك : )
يعني حنا كسعوديين ماينسابنا نسكن في وسط حواري، واغلب الشباب والبنات يسكنون في مجمعات سكنية وهي بالغالب أسعارها اعلى بـ ٣٠- ٨٠٪ من أسعار الغرف في البيوت العادية، واذا تبي توفر او شي تقدر تسكن مع امريكان في بيوتهم.

بالتوفيق

حبيبي انا في ولاية اوريغون مدينة يوجين وتعتبر اسعارها دون المتوسط ولا فيه تاكس
انا حاليا ادرس لغة ونظام المعهد وهو تابع للجامعه اربع اترام (كوارتر) كل ترم ٩ اسابيع وفيه اجازه من ٣ اسابيع الى ٥ اسابيع
تكلفة الترم + التامين (اجباري) = ٣٤٠٠ دولار تقريبا
السكن يبدا ٥٠٠ الى ٨٠٠ دولار في الشهر مع عائله او شقة لحالك يعني المتوسط ٦٥٠ دولار يعني ٦٥٠ في ٣ شهور (الترم ٩ اسابيع ولاجازه ٣ اسابيع ) = ١٩٥٠ دولار تقريبا
ابشرك الموصلات العامة (الباصات) مجانا للطلاب
في الشهر من ٦٠ الى ١٢٠ دولار في الشهر خلنا ناخذ الوسط ٨٠ دولار في ٣ شهور =٢٤٠ دولار تقريبا
عندك مصاريف اخرى مثل كهربا ونت وغاز قل ١٠٠ دولار في الشهر في ٣ شهور = ٣٠٠ دولار (اذا عند عائله ماتدفع غير الاجار)
مصروفك اكل وكفي وغيره يبدا من ٢٠ دولار في اليوم يعني مو اقل من ٦٠٠ دولار في الشهر في ٣ شهور = ١٨٠٠ دولار تقريبا
عندك مصاريفك قبل ماتوصل
١.قبول وفيزا قبول معهد وحامعه يبيلك ٤٠٠ دولار
٢.الفيزه ٢٠٠ دولار سيفيس ١٢ دولار موعد ١٤٤ دولار تدفعها في بنك سامبا والفيديكس حول ٢٠ دولار يعني كلها حوالي ٤٠٠ دولار
٣. التذكره ذهاب فقط من ١٠٠٠ الى ٢٠٠٠٠ دولار خلنا وسط = ١٥٠٠ دولار تقريبا
مصاريفك اول ماتوصل مهب اقل من ١٠٠٠ دولار تامين وفندق يوم او يومين الخ .....
يعني مصاريفك الى ماتسكن تقريبا ٣٢٠٠ دولار
ومصاريفك في الثلاث شهور على الحسبه الي قبل شوي ٧٧٠٠ دولار تقريبا
والثلاث شهور الثانيه زياها ٧٧٠٠ تقريبا
والي بعدها ٧٧٠٠ دولار تقريبا
يعني اذا تبي تجلس ٩ شهور بكل شي يبيلك ٢٦٣٠٠ دولار تقريبا ٩٨٦٢٥ ريال احتمال تزود واحتمال تقل انت وصرفك وكل شي حطله لك بالتفصيل زود ونقص الي تحس انت مو محتاجه بس نصيحه خذ معك احتياط ماتدري وش تصير الدنيا وبالتوفيق ان شاء الله
واي سوال امر ارسلي على الخاص ولاسعار ترى تختلق من مدينه لمدينه هذي الي انا فيه والله اعلم عن الباقي

شف اخوي الشباب ما قصروا بيض الله وجيههم انا في تكساس المعهد في ثلاث شهور ونص ٥٠٠٠ دولار والسكن في منطقه حلوه ٦٠٠ دولار للشهر والباص يوديك ويجيبك مجاني عشانك طالب ومصروفك الشهري يعتمد عليك وايضا اذا انت مدخن او لا او اذا انت تشيش او لا لان الشيشه ٢٠ دولار . أشوفها تكفي خمس شهور من وجهة نظري لكن حول تدرس لغه بالسعوديه أحسن وبعدين تعال عشان اذا كنت متقدم باللغه بتمشي بسرعه مهوب مبتدئ مثلي وصاير زي البغل هههههههههه ادعوا لي تكفون

هذي اسعار مدينه اتلانتا

جامعه ميرسير ٢١٦١ دولار لمده ٧ اسابيع شامله تامين طبي ( يعني ما يحتاج تدفع شى لا جاك برد ولا صداع او او الله لا يقوله )
السكن مع عايله يتراوح ما بين ٦٠٠ الى ٨٠٠ دولار ( شامله وجبتين فطور وعشا ) لمده شهر طبعا

هذي اسعار اغلب المدن طبعا نفس كذا باستنثاء بعض المدن الغاليه لا جيت للشوبنق ولا لمقاضي الشخصيه

احسبها انت بالريال كم تطلع وشف مع اني ما اظن ٥٠ الف تكفي
لا حسبت المبلغ زد عليه ما يقارب ١٠،٠٠٠ لحالات الطوارئ وعشان ما تواجه ازمه ماليه وانت مغترب ^^

بتوفيييق

اخوي يعطيك الف عافية .. ماشاء الله عليك
كفيت ووفيت ما قصرت
الله يوفقك