للناس الفاضيه اللي تبي تدردش .. بغير تخصصي وش الافضل .. هندسه او نظم معلومات ..

ياخي من زمان عنك،،
وش أخبارك؟
أذكرك يومي بالسعوديه...

هههههههه فاجئني ردك ,,

بخير الله يرضى عليك .. شخباارك ..؟

ذكرني من انت , الواحد يسنى والنسيان نعمه

اخوي والله حسب معرفتي نظم المعلومات تخصص ممتاز

وحسب ماسمعت ايضا الهندسة الميكانيكيه اقوى من الكهربائيه

ومابقدر احدد لك تخصص مناسب لأنه يعتمد على ميولك وخططك المستقبليه

ولكن اذا انك تبي هندسة ادخل هندسة شبكات او هندسة ميكانيكيه مجال العمل فيها كبير

بصراحة
أنت أخترت 3 تخصصات من بين عشرات وربما مئات
ليش حددت فقط نظم المعلومات من بين عشرات المجالات المتفرعة من الحاسب الالي ...؟؟؟؟
أعتقد أنه موصعبة عليك تحدد واحد فيهم طالما أنك حددت 3 تتناسب مع ظروفك ... خلاص أختر واحد فيهم وتوكل على الله.

شوف حبيبي أبكون صريح معك .. حسب ماتقول أنك موراعي تركيز ولامتفتح
مانصحك بالهندسة ....
أدري أني حطمتك ... بس هذا الواقع
الهندسة كلها رياضيات في رياضيات والرياضيات تبي تركيز وانتباه.
الميكانيكا لاانصح بها ابدا اعرف كثيرون تخرجو من الميكانيكا دبلومات وبكالوريس واخرتها وظائف في مجالات اخرى لاعلاقة لها بتخصصهم ... يعني تخصصك هذا شب فيه وخله يتبخر من راسك .. تبي تتاكد أسئل اسحق نيوتن وغاليليو وهم راح يفيدونك .. امزح

انا عن نفسي مختار هندسة الحاسب لانه إمتداد لتخصص الدبلوم اللي عندي ... وانا بصراحة احب تخصصي حتى النخاع واحب الرياضيات.

شوف اللي تحب وتهوى واختار ... ومن عندي راح تكون مثل اينشتاين او نيوتن

مثل ماقلت لك يااخواني ماعندي ميول .. وانا رجال كرهت التركيز لان احس من ثلاث سنوات متخرج من الثانويه ولا صرت اعرف حتى اضرب واقسسم ..

ومثل ماقال الاخ اللي فوقي وانا من قبل مانزل الموضوع كان اقرب شئ لي نظم المعلومات

يعطيكم العافيه جميعا

نفس الفكرة الي عندك عندي .. محتاررر بين هندسة ميكانيكة وصناعية .. وتخصصي القديم الي درست فيه سنة وحدة في السعودية الي هو نظم معلومات ادارية

لا لا ما تعرفني لأني لي 3 يوزرات وتبندت،
اهم شي انك بخير

انا تخصصي نظم معلومات
وانت زي نوعي مافيني حيل اركز ابد وطفشت من الماث حتى السمستر هذا يمكن اخد f في ماده ماث بس مو مشكله لانو الشعب كلو مخبص فيها واللي بينجح راح ينجح ب d

راح تتفاجئ انو التخصص مليان مواد بزنس، بصراحه انا ماتوقعت انو لهدرجه انا الان تقريبا اخذت مادتين تخصص والسمستر الجاي عندي 3 مواد تخصص ولا وحده احس انها متعلقه تماما بنظم الملعومات
والان بصراحه الحمدالله مبسوط بهذا التخصص وبديت اميل للتجاره والبزنس بشكل عام. غالبا مواد اللي لها علاقه اساسيه بنظم المعلومات اعتقد انها في اخر سنتين.

لو قدرت تتخصص في اداره نظم معلومات فهو تخصص افضل ويعطيك فرص وظيفيه اكثر. جامعتنا الغبيه غيرت اسم التخصص من MIS الا IS بس والمواد هي نفسها مواد MIS
يعني ندرس اداره نطم معلومات ولاهي محسوبه لنا الا نظم معلومات.

تخصصات البزنس او الاداره غالبا اسهل من الهندسه بس علا حسب انت اي نوع من الاشخاص اذا انت والله دافور رياضيات وماعندك مشكله روح هندسه، اما اذا انت تقدر تتحمل الكلام الكثير في الكلاسات
وعندك استعداد للبرزنتيشنز و تكتب غالبا تقرير واحد علا الاقل لاغلب مواد البزنس توكل علا الله وخش نظم معلومات ( كل شي يعتمد علا الدكتور، والله في ماده صعبه صعبه صعبه بس عندنا دكتور مخلهيا فله وسهله ولا يهتم للختبارات ،في ماده سهله سهله سهله والدكتور متطلب طول السمستر اوراق واباحاث وقلق وفوق هذا كلو اختبارات وبالقوه تعديها c)

ميزه نظم المعلومات والبزنس اي شي تدرسو في الكلاس لو تطلع بره الكلاس وتخش جوجل راح تلقى امثله كثيييييره جدا للشي اللي انت قاعد تدرسو في الكلاس وتتعمق فيه وتفهمو وفوق هذا كلو، كلها امثله حيه
لاشياء قاعده تسير في العالم من ناحيه الاقتصاد والادراه وغيرها.

شوف برنامج الجامعه لنظم المعلومات وشوف المواد اللي في التخصص واقرا الشرح حق المواد وراح يكون عندك فكره احسن عن انت اش راح تدرس بالضبظ

لاحد يزعل من تخصصات الهندسه ترا ما اقصد اقلل منها بس انتو يا شباب ماشالله عليكم تفهمو المعادلات والارقام وانا مخي ينفجر منها هههههههههههه

بالتوفيق

هلا فيك حبيبي كريستي ياولد ناشفيل السابق < عساك عرفتني لي 12454454545458 يوزر لووول .. نخش بموضوعك الخنفشاري
أنا الآن عندي كم منتدى وحاط فيهم نفس موضوعك هذا خلصت فترة اللغة وأفكر بالتخصص ماني عارف احسني مشتت وضايع

يوم إني ولد صغنون كنت دافور جداً خصوصا بالرياضيات
ولي احلام كبيرة لكن يوم جيت الثانوي مدري وش صارلي الظاهر المراهقة، المهم قدر الله وماشاء فعل وجينا أمريكا

أنا ميولي طبّي .. أنت شوف ميولك هوايتك حبك لأي تخصص شوف فر بقوقل وابحث عن التخصصات واذا تحسك ارتحت لتخصصات معينة
اقرى فكرة عنها موادها وشوف الخطة وتخيل نفسك بالكلاس ( عيش الجو ) وماسك كتب التخصص هاه كيف تحس بميول تحبها تستمتع بقراءتها ولا لا زي كذا

بما إن ميولي طبّي فالطب صعب جداً بامريكا ومرة مرة شلتها من بالي وفيه بديل لها الي هو التغذيـــة ..
اعشق قراءة كتب التغذية وكذا والفيتامينات والى اخره بشكل عام عن الصحة احبها

خلال البحث وكذا للأسف تخصص التغذية مهمش بالسعودية وماله مستقبل ورواتبه ضعيفة
عشان كذا الواحد دامه عايش بدولة عربيّة وسعودية تحديداً قاتلة المواهب والأفكار
يمشي ع القاعدة هذي : تدرس شي تحبه = ماله مستقبل .. تدرس شي ماتحبه = له مستقبل

صرت أفكر الحين بالتخصصات هذي : إدارة ماليّة - نظم معلومات إداريّة - هندسة نظم صناعية - الهندسة الميكانيكية - المحاسبة

بما انك طالب ادارة ماليّة حسب بحثي وقراءاتي بتجارب طلاب وتعريفات ورواتب ومنصب وظايف وكذا شفت إن الادارة المالية أكثر رواتب من النظم
ومطلوبة اكثر من النظم ومستقبلها برضو احسن من النظم ..

هندسة النظم الصناعية تخصص حلو وجميل ويجمع بين الهندسة وعلوم الادارة ومطلوب بصراحة افكر فيه

الهندسة الميكانيكية اسهل من الكهربائية .. وانتبه من الكهربائية لا تتورط وتدخلها يقولون انها اصعب من الطب وصعبة ويبغالها واحد يذاكر اول باول ويركز وحق ماث

الميكانيكية برضو صعبة وغير كذا بصراحة يعني وبدون زعل يا اخوانا المهندسين
الهندسة كرف × كرف وصعبة جداً واخرتها تتوظف براتب وقدره !!! يعني خويك الاداري الي ماتعب بدراسته اعلى من راتبك ؟
وللآن مافي سلم رواتب لللمهندسين بالسعودية واذا توظف حكومي راتبه 6500 !!!!!

تفكير اكثر الاباء والامهات انهم يبون اولادهم يخشون هندسة غصب عشان يجي جنب اسمه Eng !!!
مشكلتنا اهتمامنا الاول المظاهر للاسف ..
وهذي المظاهر ماراح تفيدنا لا بمستقبلنا ولا بطيخ

انا بديت احط اكس كبير ع التخصصات الهندسية بفروعها رغم ان ابوي يبغاني اخش كهربائية بس رحم امرئ عرف قدر نفسه اظن لا خشيته ماراح انجح
والسبب اني ما احبها او اميل لها
وخالي ( متوظف بارامكو ) يقول لأمي ولدك يدرس ادارة بامريكا ؟؟ كان يدرسها هنا لو درس هندسة افضل ..

انا مايهمني كلام احد اهم ماعلي مستقبلي بكرة اتزوج ويجوني عيال والحياة كل مالها ماتغلى لازم نفكر صح ونرسم مستقبلنا وكم يكون الراتب والى اخرهي

حسب البحث خرجت بـ التخصصات الاكثر طلبا بالمجال الوظيفي هي المحاسبة اولا ثانيا التخصصات الصحية بعضها وليس كلها زي علاج طبيعي وتمريض واشعة والى اخرهي

اممممممم انصحك يا مان تقعد على الادارة الماليـّـة ... ولي رجعه لك أكيد