الأعضاء الإشتراك و التسجيل

الملتقيات
ADs

نصائح مهمة للقادمين إلى أمريكا ..

نصائح مهمة للقادمين إلى أمريكا ..


NOTICE

تنبيه: هذا الموضوع قديم. تم طرحه قبل 2225 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية MAN9
    MAN9

    مبتعث مستجد Freshman Member

    MAN9 الولايات المتحدة الأمريكية

    MAN9 , ذكر. مبتعث مستجد Freshman Member. من السعودية , مبتعث فى الولايات المتحدة الأمريكية , تخصصى نظم معلومات إدارية , بجامعة سنترال فلوريدا
    • سنترال فلوريدا
    • نظم معلومات إدارية
    • ذكر
    • أورلاندو, فلوريدا
    • السعودية
    • Jun 2010
    المزيدl

    December 21st, 2011, 01:53 PM

    بسم الله
    هذي رسالة كتبتها لولد عمي لأنه جاي لأمريكا وبعدين شفت إنها ممكن تفيد ناس كثير فقمت وعدلت عليها تعديلات بسيطة ونزلتها في هالموضوع ..

    أولا من السعودية إيش تشيل معك ؟

    إنت بما إنه مسموح لك تشيل معك شنطتين فأنا أنصحك تأخذ شنطتين حتى لو تكون الأغراض اللي فيها مو كاملة .. وبرضو معك شنطة الهاند باق اللي تدخلها معك في الطيارة وحاول تحط فيها كل اللي تظن إنك تحتاج له .. أنصحك تأخذ معك تمر زي ما قلتلك قد ما تقدر وخاصة إنت رايح وقت البرد والمنطقة حقتكم باردة جدا وإنت في بداية الأمر ما راح يكون معك سيارة ويمكن تحتاج أكل والا شيء فهذا يغنيك بإذن الله .. خذ معك كمان برطمان والا اثنين جبنة سائلة مثلا إذا تحب الجبنة وطحينية مثلا وحاول تكثر من الطحينية إذا تحبها وكمان ممكن أندومي .. المقصد خذ الأكل الخفيف اللي تحبه إنت وحاول تكثر منه .. وإذا إنك بتطبخ جيب معك بهارات الطبخ اللي تحبها ..
    كذلك لا تنسى إن المكان برد وحاول تأخذ معك جاكيت أو اثنين وكذلك الجوانتيات حقت البرد والشراريب الثقيلة .. ولو تأخذ كمان زي الكيلون تحت الجينز وملابس داخلية بأكمام طويلة يكون أفضل بكثير .. لأن الجينز يزيد البرد عليك سبحان الله .. يبرد هو نفسه ويصير يلامس جلدك بارد .. لكن لمن تلبس تحته شيء يدفيك إن شاء الله ..
    أفياش الكهرباء لازم زي ما قلتلك تكون II ما تكون دائرية والكهرباء عندهم هنا 110 ما في 220 أبدا وعشان كذا الأشياء اللي تشتغل مباشرة على الكهرباء بدون شحن لا تأخذها معك مثل ماكينة الحلاقة اللي بدون شحن والاستشوار حق المدام وكذا يعني .. والأشياء اللي يحتاجلها بطاريات خذ لها بطاريات من السعودية قد ما تقدر لو تأخذ كرتون بطاريات كامل لأن البطاريات هنا مرة غالية .
    جيب أدوية معك قد ما تقدر .. يعني بنادول اكسترا ودواء حموضة مثلا وبروزولين قطرة الأنف والعين .. كمان جيب شامبو كبير يكون ومزيل عرق والكريمات اللي تحتاجها من كريمات الجسم أو كريمات الشعر وجيب فازلين وفيكس وطبعا فرشة أسنان ومعجون ولو كانت ثلاث أو أربع فراشي أسنان وزيها معاجين أحسن كمان .. عموما ممكن تروح للصيدلية وتقوله أبغى مجموعة أدوية أحتاجها في السفر وإن شاء الله إن الصيدلي يدلك على أفضل الأدوية واللي تحتاجها أكثر شيء ..
    بالنسبة للاب توب حقك .. إذا كان الويندوز اللي عليه أصلي وإنت متأكد منه جيبه معك وحاول تحذف منه كل البرامج اللي تشك فيها مجرد شك إنها مو أصلية لأنه ممكن ولو إنه احتمال بسيط لكنه ممكن إنه تتفتش الكمبيوترات وإذا حصلوا فيها برنامج مسروق فالموضوع فيه سجن خمس سنوات لأنها عندهم سرقة وإذا تبغى رأيي خل كمبيوترك في السعودية واشتريلك واحد من هنا بحدود 1500 ريال أو ممكن أقل إذا كنت ما تحتاج الحروف العربية مطبوعة على لوحة المفاتيح وإذا كنت إلا تحتاجها فممكن تطلبها عن طريق الشركة الأم لكن ممكن تاخذ وقت شوي على بال ما توصلك .. وأنا في الحقيقة قالي واحد من الشباب إنه لقي هنا في بست باي كيبورد عربي بس لمن رحت لهم قالوا لي لازم تطلبه من الشركة نفسها .. وعادي لو إنك تأخذ معك لاب توب جديد من السعودية لأن اللاب توبات الجديدة دائما ما يكون معها ويندوز أصلي والبرامج اللي فيه كلها اصلية أو مجانية أو كدعاية تجي مع اللاب أو تجريبية .. وكلها ما فيها مشكلة إن شاء الله .. بالنسبة للآيفون حقك كمان شوف البرامج اللي مو أصليه فيه واحذفها ..
    ثانيا في الطيارة ولمن توصل المطار :
    http://www.mbt3th.us/vb/forum8/thread245146.html
    هذا نموذج للورقتين اللي يعطونك إياها في الطيارة وتعبي الفراغات اللي مترجمة فقط والثانية لاستخدامهم الحكومي .. خذلك نظرة عليها لأنها سهلة جدا وما يحتاج تطبعها كمان لأنه الناس هناك يساعدونك والمضيفين وكذا .. طبعا تعبيها وبعدين لمن توصل يأخذون منك ورقة ويدبسون جزء منها في الجواز حقك مقابل الفيزا عشان بعدين تصورها وترسلها للملحقية .. ولمن تخرج وتأخذ الشنط حقتك قبل البوابة الأخيرة وإنت خارج خلاص تلاقي زي التفتيش صغير كذا فقط يأخذون منك الورقة الثانية الزرقاء اللي يكون موجود فيها بعض الخيارات ومنها إنك تقول هل معك أكل أو لا وتكتب جميع الأكل اللي جايبه معك ..
    بعد ما تخلص منهم تخرج وتحصل زحمة ناس واستقبال وكذا راح تحصل المصري هذا اسمه محمد خلف الله ( الله يبارك فيه ) سواء هو يكلمك أو إنت تشوف الناس السعوديين مجتمعين عليه يعطيك الأوراق ويأخذك على الباص حق الفندق ( Shutle ) ويقولكم إيش تحتاجون وكذا .. وهذا رقمه للطواريء يعني 2027290341 .. غالبا قدامكم بالنسبة للفنادق خيارين واحد اسمه Double Tree والثاني اسمه Comfort Inn .. اللي أنا سكنت فيه وأنصحك فيه هو الأول وهو بـ 93 دولار لليلة الواحدة سواء سرير واحد أو سريرين والثاني بـ 70 دولار ..
    إنت إن شاء الله توصل الفندق قبل المغرب غالبا .. فارتاح شوي مثلا في غرفتك وحاول تنزل للاستقبال وتقولهم أبغى أروح السوق عشان تشوفلك عشاء إن بغيت أو إن كان معك في شنطتك وتكتفي باللي معك زين كمان .. وهم أصلا في الفندق عندهم مطعم وكذا لكن قولهم الأكل اللي تبغاه بدون خنزير without bacon والخنزير عندهم له أسماء مثل Bacon - Pig - Pork .. وبالعافية عليك .. ونام وارتاح والصباح رباح .. وزي ما قلتلك الخروج لازم يكون ثاني يوم قبل الساعة 12 الظهر والا يحسبون عليك يوم جديد .. وغالبا إن شاء الله بتخرج قبل الظهر إنت .. وخلي بالك في الفندق فطور للسعوديين مخصص قولهم الساعة كم الفطور What time is the breakfast tomorrow ? وحاول تقوم قبل الموعد تجهز نفسك وتأخذلك دش وتشوف شنطتك وترتب أمورك .. وكمان في غرفة فيها كمبيوترات مقابل غرفة الفطور تقدر تروح تصور أوراقك وتعمل سكان لها وكذا ..

    ثالثا بالنسبة للملحقية :
    إسأل محمد خلف الله في هالموضوع وقوله متى يجي الباص يأخذنا من الفندق للملحقية وهل أصلا بيجي والا ما راح يجي ؟ فإذا كان بيجي خير وبركة وإذا كان مو جاي وإنت ملزم إلا تروح لهم فانزل للاستقبال وقولهم أبغى تاكسي I need a taxi .. ولمن يجيلك التاكسي بس اعطيه العنوان هذا 8500 Hilltop Rd • Fairfax, Virginia, 22031 .. وهو يوديك مباشرة لهم إن شاء الله لكن ممكن تتكلف مثلا 30 إلى 40 دولار وطبعا عندهم التكاسي بالعداد .. خلص أمورك من الملحقية ودربك على المطار .. شوف التذكرة حقتك على أي خطوط وروح للخطوط يقصون لك البوردنق ويعطونك رقم البوابة Gate والله ييسر لك على دنفر ..

    رابعا سكنك مع الحرمة :
    إن شاء الله راح يستقبلك مروان مثل ما قلتلي إنت .. ولمن تجلس معه إنت في السعودية قوله أبغاك تروح معي للحرمة وتشوف شروطها وبكم الشهر وطبعا إنت تعرف الشيء اللي يناسبك وكذا ولا توقع العقد معها إلا لمن تعرف جميع شروطها وحاول إنك تشوف أكثر من خيار بالنسبة للسكن لا تستعجل فيه أبدا وخصوصا إنه بعيد هذا حبتين عن المعهد حقك .. لكن برضو حط في بالك إنه فيه ميزة إنه الحرمة تتكلم معك فهذا يعتبر كلاس سبيكننق مجاني وممكن يساعدك كثير وكذلك فيه ميزة إنه فيه مواصلات للمعهد يعني إن شاء الله ما تحتاج لمنة أحد عليك .. والله ييسر لك ابن الحلال اللي هناك ويكون معك سمح ورجل وكذلك الحرمة تكون طيبة ومتعاونة ..
    حاول تأخذ عنوان السكن حقك أول ما تستقر وتعرف إنه هذا سكنك الدائم .. لأنك راح تحتاجه في أمور كثيرة وأضرب لك مثال توضيحي عشان تفهم كيف العنوان ..
    أنا مثلا ساكن في العنوان التالي :
    12350 E Colonial Dr
    Orlando Fl, 32826
    الرقم الأول اللي هو 12350 هو عبارة عن رقم البيت واللي هم دائما يبتدأون فيه كتابة عناوينهم ..
    E Colonial Dr هو إسم الشارع اللي عليه البيت .. وعندهم حتى لو كان الشارع فرعي من فرعي من فرعي من رئيسي يكون له إسم .. ولو كان طول الشارع مائتين متر فقط .
    طبعا Orlando هي المدينة و Fl هو رمز الولاية ..
    الرقم الأخير 32826 هو رمز المنطقة Zip Code وهو تحتاجه كثير لتحديد الأشياء اللي حواليك وتحتاجه كثير كمان في أشياء ثانية .. يعني مثلا بتبحث عن محل أو شركة أو مركز أو مطعم أو اي شيء في الحياة اكتب اللي تبغاه في قوقل الخرائط واكتب رمز المنطقة وهو يطلع لك أقرب شيء لك .. وهذا رابط قوقل الخرائط
    Google Maps

    وتحصل فيه على اليسار Get direction .. تدخل عليها وتحصل فراغين A و B .. في الفراغ الأول تحط عنوان بيتك وفي الثاني تحط عنوان المكان اللي تبغى تروح له وتختار من الخيارات اللي فوق سواء سيارة أو باص او مشي أو سيكل وهو يطلع لك الطريق بين العنوانين بالضبط ووقت تقريبي للوصول ..
    المقصود بهذه الطريقة دائما وهذي الصيغة تكون العنوانين .. الرقم الأول البيت ثم الشارع وهذي في سطر والسطر الثاني يكون فيه المدينة ثم رمز الولاية وفاصلة ثم رمز المنطقة .
    إنت حاول طبعا تخزن عنوان بيتك مباشرة في جوالك وكذلك تشوف عنوان معهدك وتخزنه في جوالك كمان احتياطا ..
    خامسا بالنسبة لجوالك والشريحة والاتصال :
    حاول أول ما توصل وتستقر في دنفر .. تروح لشركة إسمها T-Mobile وبرأيي هي افضل شركة اتصالات موجودة عندهم .. روحلهم وقولهم أبغى شريحة بباقة مسبقة دفع prepaid plan وهم عندهم باقة بـ 15 دولار الشهر وهذي اللي أنا عليها وتعطيك 150 دقيقة طوال الشهر ورسائل بعدد غير محدود سواء محلية هنا في أمريكا أو حتى دولية إذا تبغى ترسل للسعودية لكنها بغير نت .. وإذا تبغى الباقة اللي بالنت اختار الباقة اللي قيمتها 50 دولار بالشهر وهي بعدد دقائق مفتوح وكذلك رسائل مفتوحة وكذلك نت مفتوح .. وهذي كمان ممتازة .. عموما هذا الرابط يوضح جميع الباقات المسبقة الدفع وإنت اختار اللي يعجبك ..
    Prepaid Cell Plans | No Contract Cell Phone Plans | T-Mobile
    أنا أرجح لك وبشدة إنك تجيب معك من السعودية جوالك الآيفون وكذلك مهم جدا تجيب معك جوال عادي نوكيا مثلا ثاني .. يصير واحد تحط فيه الشريحة السعودية والثاني الأمريكية .. بالنسبة للشريحة السعودية مثلا الاتصالات السعودية إذا كانت مفوترة فالاستقبال مفتوح ومجاني على شبكة AT&T طبعا تخلي اختيار الشبكة يدوي وتختار هالشبكة .. وإذا كان معك شريحة سواء فالاستقبال بـ 55 هللة للدقيقة .. وبالنسبة لموبايلي كمان مجانا استقبالهم على شبكة T-Mobile لكن ما أعرف كيف وضع الشرايح مسبقة الدفع حقتهم .. ممكن تتصل على خدمة العملاء في موبايلي وتستفسر منهم.. أهم شيء شيل معك شريحة سعودية واعمل لها تجوال قبل تطلع من السعودية .. ضروري ضروري ..
    إن شاء الله وضع الاتصالات عموما سهل جدا وخاصة إنه بإمكانك الاتصال بالكمبيوتر عن طريق النت سواء بالسكايب أو بالماسنجر أو حتى عن طريق الآيفون بالتانقو أو أي برنامج اتصال ثاني ..
    سادسا : أرجح لك قبل ما تجي تروح تطلع من المرور رخصة دولية اللي كلمتك عليها أول وهي ما أظنها فيها مشكلة وتطلعها بكل سهولة إن شاء الله وإن شاء الله هالرخصة غالبا تعطيك من ثلاثة إلى ستة شهور تسوق بها عادي حسب قانون الولاية وإذا إنك بتجي برخصتك السعودية العادية فأول شهر غالبا يسمح لك برخصة القيادة السعودية فاستأجر سيارة بـ 600 أو بـ 700 دولار الشهر تعز فيها نفسك بإذن الله وتقدر تخرج وتروح وتستكشف وتشتري أغراضك من السوبر ماركت وتروح تشوف مصالحك كلها .. إذا أحببت .. وطبعا أول ما توصل قولهم أبغى كتيب المرور عشان اعرف القوانين وحاول لو كل يومين ثلاثة تحفظ من قوانينهم صفحة .. يصير يخلص شهر أو شهرين على أكثر تقدير وإنت معك رخصة وأول ما تطلع الرخصة فلوسك في جيبك وشوفلك Dealer عن طريق أي أحد معك من الشباب السعوديين في المعهد وهم إن شاء الله ما يقصرون ويدلونك على أفضل ديلر ..
    هذا رابط موضوع لي في منتدى مبتعث أحكي فيه قصتي مع المرور وكيف تحولت للمحكمة وإيش صار معي ..
    تجربتي مع المحكمة المرورية بأورلاندو
    سابعا : في سوبر ماركت كبير إسمه Walmart يغنيك بإذن الله عن كل شيء .. سواء أكل وشرب أو ملابس أو الكترونيات أو صيدلية أو جوالات أو نظارات أو .. أو حتى غيارات الزيت والكفرات ومعدات الصيد والبناء وكل كل كل أي شيء موجود فيه .. وهو أرخص شيء في الحياة .. شوف أقرب فرع لكم فين وروح خذلك فيه ساعة أو ساعتين تسوق فيه وشوف اللي تحتاجه من خبز تست مثلا عشان السندويشات وجبن أو برقر او عصاير تخليها لك في الثلاجة وحلويات وشبسات وكذا يعني .. وهذا موقعهم
    Walmartstores.com
    في محل إسمه ROSS حق ملابس .. هذا يعتبر مجمع للماركات المخفضة .. يعني ملابس حلوة ورخيصة مرة وماركات كبيرة ومعروفة .. شوف اقرب محل لك وخذلك فيه فرة .. وهذا موقعهم
    .:: ROSS ::.
    في كمان محل اسمه Bestbuy هذا لأي شيء اليكتروني .. اي شيء اليكتروني يعني أي شيء اليكتروني .. وعندهم عروض حلوة وهو اللي اقولك روح له عشان تشوفلك لاب توب وتقولهم أبغى كيبورد عربي .. وهذا موقعهم
    Best Buy - Computers, Video Games, TVs, Cameras, Appliances, Phones
    من أشهر المطاعم وأفضلها بالنسبة لي وكذلك هو رخيص جدا ، مطعم إسمه chipotle وعندهم وجبة إسمها Chicken Bowl مرة ممتازة وتختار إنت إيش تحط فيها .. طبعا رز ودجاج وممكن تضيف عليها الأشياء اللي تحب من اللي تشوفها قدامك .. وهذا موقعهم
    Chipotle Mexican Grill: Gourmet Burritos and Tacos ..
    في مطعم ثاني إسمه Olive Garden وعندهم وجبة إسمها Backed Basta Romana لذيذة جدا وهو مطعم إيطالي ويعتبر فخم وهذا موقعهم
    Olive Garden Italian Restaurant
    وطبعا في ماكدونالدز اللي يعتبر أرخص شيء في الحياة وفي برقر كنج وفي مطعم برضو حق برقر اسمه Checkers تشكرز وكلها تعتبر رخيصة وحليوة وقريبة من مطاعمنا اللي في السعودية .. حاول إنت تسأل الشباب برضو عن المطاعم الخاصة بمدينتكم ويكون وضعها حليوة وكذلك إذا كان في مطاعم عربية في المنطقة وغالبا يكون موجود مطعم عربي ويكون كمان عبارة عن بقالة عربية تلاقي فيه الاشياء والبضائع السعودية ..
    أنا حطيت الروابط حقت المحلات عشان لمن تدخل على أي محل راح تحصل على الموقع حقهم فراغ صغير زي البحث يكتب لك فيه مثلا
    Find a store أو enter zip code
    فتحط رمز المنطقة حقتك زي ما قلتلك وتبحث ويطلعلك أقرب محل لك .. تأخذ العنوان وتروح على قوقل خرائط وتأخذ الوصف منه أو إنك بعدين إن شاء الله تشتري GPS أو إنك تحطه في تطبيق الخرائط عندك في الآيفون وتروح له مباشرة بدون ما تحتاج أحد .
    إن شاء الله ما نسيت شيء مهم وإذا عندك أي استفسار ممكن تسألني إياه بردك على هذا الإيميل .. وودي لو إنك تكتب مجموعة جمل وأسئلة إنت تفكر إنه ممكن تحتاجها وأنا إن شاء الله اترجمها وأرسلها لك ..
    هذا موقع مبتعث :
    http://www.mbt3th.us/vb/forum.php
    وهذا موقع سعوديون في أمريكا :
    ط³ط¹ظˆط¯ظٹظˆظ† ظپظٹ ط£ظ…ط±ظٹظƒط§
    هذا موقع الملحقية :
    الملحقية الثقافية السعودية
    هذي أرقام الطوارئ من الملحقية المفروض إنك تخزن منها رقمين على أقل تقدير :
    إتصالات الطوارئ
    هذا موضوع مفيد جدا في منتدى مبتعث ياليت تأخذ عليه نظرة وفكرة :
    خبرات الأعضاء في التوفير المادي أثناء البعثه ( موضوع متجدد بمشاركه الجميع )
    أخيرا .. خذ جولة على هالمواقع .. راح تعطيك فكرة مرة حلوة وممكن تبين لك شيء انا نسيت أكتبه لك أو إني ما أعرفه أو أي شيء ثاني .. يعني طالما باقي لك حدود الاسبوعين .. حدد يومين ثلاثة مثلا تفر فيها موقع مبتعث ويوم لموقع السعوديون في أمريكا .. ويوم لموقع الملحقية وكذا يعني .. صدقني راح تستفيد بإذن الله ...
    اخوكم منصور .. ودعواتك
  2. شباب انا موعد رحلتي على امريكا 28/ديسمبر/2011 و الدراسة تبدأفي 9/ يناير /2012 في michigan state university
    يعني 12 يوم بين وصولي لامريكا وبين موعد الدراسة
    وش تنصحوني 12 يوم كثيرة حاولت اجل موعد السفر ما قدرت
    وباقي ما عندي سكن ولا اعرف احد بالمدينة نصائحكم ياهل الخبرة
    7 "
  3. المشاركة الأصلية كتبت بواسطة hsh
    شباب انا موعد رحلتي على امريكا 28/ديسمبر/2011 و الدراسة تبدأفي 9/ يناير /2012 في michigan state university
    يعني 12 يوم بين وصولي لامريكا وبين موعد الدراسة
    وش تنصحوني 12 يوم كثيرة حاولت اجل موعد السفر ما قدرت
    وباقي ما عندي سكن ولا اعرف احد بالمدينة نصائحكم ياهل الخبرة
    أخوي hsh .. أنصحك أول شيء يكون سفرك من واشنطن إلى ميتشغن ثاني يوم من وصولك .. يعني حاول ما يكون سفرك متواصل لأني أخاف تتعب ولمن توصل ميتشغن توصل متأخر فتضطر إلى أشياء ما تكون مقتنع فيها تماما .. يعني توصل ثاني يوم الصباح وتبدأ تدور براحتك على سكن يعجبك ..
    الشيء الثاني حاول لمن توصل المطار في ميتشغن تستأجر سيارة من المطار مباشرة ويكون في السيارة GPS عشان تحط فيه عنوان الجامعة حقتك وتروح تدور حوالينها في السكانات .. إذا ما كان معك آيفون أو جوال فيه تطبيق الخرائط ..
    هذا الموقع إن شاء الله يفيدك بخصوص السكانات .. حط عنوان الجامعة حقتك وهو يطلع لك الفنادق القريبة والسعر ويعطيك خيارات كثيرة إنت تختار منها .. Hotel Reservations
    ادخل كمان على رابط قوقل الخرائط فوق وحط عنوان الجامعة حقتك واكتب Apartements near to وتطلع لك السكانات القريبة من الجامعة إن شاء الله ويصير تدخل عليها وتشوف بنفسك وتختار .. لكن أنصحك ما تحجز .. بس خذ العنوان وروح لهم بعدين والله يكتب لك اللي فيه الخير ..

    والشيء الأهم .. إنك تدخل على موقع سعوديون في أمريكا على الرابط اللي حاطه أنا في الموضوع وحاول تتواصل مع إدارة المنتدى .. هم عندهم مندوبين في كل مدينة في أمريكا .. فراح يعطونك إن شاء الله رقم أي أحد هناك يصير تتصل عليه وترتب معه يستقبلك من المطار ويشوفلك سكن ويرتب أمورك إن شاء الله ..

    إذا كان عندك أي استفسار .. أنا تحت أمرك .. ونصيحة جانبية .. إنت رايح لمكان مرررررره بارد وفي عز فصل الشتاء .. فاعمل حسابك زين في الملابس .
    الله يوفقك ويكتب لك الخير وييسر أمرك .
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.