الغربة تعبتني وكلمة صعبة قليلة بحقها ,, ارائكم تهمني

انا بامريكا لي 5 شهور ونص ,,, من جيت للان وكل فترة والثانية تطلع لي مشكلة ولله الحمد على كل حال
واكبر مشكلة واجهتني مشكلة السكن غيرته مرتين وهذي المرة الثالثة اللي انتقل فيها لشقة جديدة
حصلت لي مشاكل مع روميتي الاجنبي بالسكن الثاني لدرجة انها وصلت للشرطة والله يستر ما يوصلها للمحكمة (للحين ما خلص الموضوع)
حرمت اسكن مع روميتات وكنت اظن اني لو سكنت لحالي برتاح بس شكلي غلطان
ماعندي اصدقاء ,,, وحاليا ساكن لحالي بشقة باجار غالي + اجار اول سكن لان العقد ماخلص وماحصلت من يكمله
احس اني تعبت بكل ما تحمله هالكلمة من معنى مع اني نزلت السعودية ثلاث اسابيع وتوني راجع امريكا مرة ثانية من اسبوع
كنت اصبر نفسي واقول هانت قريب اشوف الاهل بس الحين باقي مشواااااار على ما اشوفهم مرة ثانية
ياكثر المرات اللي فكرت فيها ارجع السعودية بشكل نهائي بس مستقبلي بينتهي كذا لان مالي فرصة هناك
فكرت اغير الدولة واروح كندا لان اخوي هناك والمفروض انه معي بامريكا لولا فيزته الامريكية ماطولت ,,, بس احسها مو بهالسهولة انهم يغيرون دولتي وغير كذا ملتزم بعقود بامريكا
الوقت طويل ,, ودايما تفكير بالاهل ,, وتفكير بالمشاكل اللي تصير ,, وغير كذا ما اقدر افتح كتاب
غربة + وحدة + قلق
اكتب والعبرة خانقتني بشكل غير طبيعي
الله لا يوريكم

الغربة:
-تسير حياتك بشكل طبيعي حتى تجرب "الغربة" -هنا فقط تجد المنعطف الذي تتغير فيه حياتك. تغترب مشاعرك, تغترب أحاسيسك, و حتى أطباعك القديمة تصبح غريبة!

-شعور مضطرب, لا يحسه الا المغترب: تكره الغربة أشد من كره يتيم لــ قاتل أبيه, و اذا عدت لبلدك, { اشتقت لتلك "الغربة"!}.

... -"الغربة" مدرسة استفاد منها الكثير, ولكن قلة هم الذين نجحوا!

-"الغربة" معركة فيها تكون او لا تكون, لا خيار ثالث !

-"الغربة" مربية من الطراز الاول, ولكن ليس لديها الا اسلوب تربوي واحد, الا و هو القسوة!

-حين تغترب , لا تحاول ان تفضفض لصاحبك كل مشاعر الشوق و الحنين التي تشعر بها, فـــ هو يعاني مثل ما تعاني انت / رفقا بالقلوب يا صاح!

-قد تفاجا بعد عودتكك الى موطنك, ان صورته قد تغيرت, وان بهاءه قد ذهب, فلا تعجب, ولا تظن انه هو الذي تغير, قد إقتاتت من قلبك الكثير, فلا تحزن...

-من لم يجرب " الغربة ", فسيرته الذاتية ناقصة.....

مما راق ليَ

اذكر الله ياخوي ومثلك واجد والغربه مهما حاولنا نزينها ماتزين بس الهدف هو الي يصبرنا كلنا نصبرك وحنا انفسنا نحتاج من يصبرنا
لاتفكر انك بغربه وانت تعبان تغاضى عن هالفكره وبعطيك فكرتي لما تتازم الامور معي واحس اني مشوشه
اول شي (ضاقت فلما استحكمت حلقاتها فرجت وكنت اظنها لاتفرج)صدقني تفرج وتنسى هالتعب مثل الجنه لما بتدخلها فتُسال هل تذكر انك كنت متعذبا بالدنيا فترد لا فنعيم الجنة انستك عناء الصبر للوصولاليها
يعني ررركززززز على الهدف وافرح انك اليوم وصلت لهنا وتماسك عشانه
نروح للخطه ولازم تكون فاضي ومامعك شي وقبل كل شي المتافئلون هم من يضعون لكل مشكلة حل والمتشائمون هم الذين يضعون لكل حل مشكله فكن دائما الاول

امسك ورقه وقلم واكتب كل مشكله متعبتك بورقه
امسك كل مشكله واعمل عليها حلقه بعدها طلع منها حلقات ثانيه لاسباب الحقيقه والاساسيه من الجذوور للمشكله
امسك الاسباب سبب سبب وطلع حلقات ثانيه للحلول الي تجي على بالك الي تقدر عليها والي ماتقدر وان كان ماعندك خبره استعين بالنت
بعدها ابتدي بتنفيذ الحلول مهما صعبت لاتستهين بقدراتك
واذا على السكن الادول ادفع حق كسر العقد وارتاح ولايعورك قلبك اهم شي ترتاااااح وتتفرغ لهدفك وتستمتع بحياتك
انت معك مشاكل من اول وتركتها الى ان استفحلت وزادت اعراضها وصرت ماتركز وماتشوف الامور بوضوح

والله متفهم وضعك
وكل واحد مرت عليه فترة تألم فيها وحس بالغربة ولا مرت علييه ضروف قاسية. بس تعدي الظروف ونجلس نتذكر ذيك الايام الصعبه كيف كانت وكيف صقلت شخصياتنا. صدقني لو تسئل اي واحد بالمنتدى ذا اكيد بتلاقي انه مر بتجربه صعبه وانا اول واحد.
اصبر وان شاء الله بتنفرج.
مابعد العسر الا اليسر ان شاء الله
الله يوفقك يارب

والله اني حاس فيك ياخوي ... انا مالي شهر هنا وحاس بهم الغربه والتعب
الله يكون بعونك ويفتحها عليك و ييسر لك امرك

قرآن +ركعتين +وتوكل على الله
وان شاء الله فرج قريب
المشاكل هي جعلتك تشتاق الى بلدك والى اهلك
حلها وحده وحده وان شاء الله تتيسر

طيب ايش سبب المشاكل اللي صارت بينك وبين الروميت؟
الله يعينك يارب ترى الغربة ماتخلو من المشاكل والدنيا كلها مو بس الغربة..
الدنيا صعبة لازم نحاول نواجه مشاكلنا ونصبر اهم شي التوكل على الله وعدم نسيانه..
الله يعينك ويوفقك

أقدر شعورك كثيرا , دع الغربه تصنع داخلك قوة وليس ضعف , فكر بينك وبين نفسك ماهي الأوقات التي يكثر فيها شعورك بالغربه

حاول أن تشغلها بما هو أقرب لنفسك تجنب كثرة التفكير , حاول أن تشتت الأفكار السيئه وأستحظر دائما الأفكار الرائعه التي

تشعرك بالقوه , مثل : تخيل يوم تخرجك , تخيل يوم زواجك , تخيل أنك حصلت على منصب رائع , حتى أصغر الإشياء , أصنع

لفنسك هوايه مارسها وتداوم عليها وحاول أن تكون فنيه(خصوصا أنك شخص مرهف الحس ,كما لمست) لتشعرك بشعور أبداعي وشعور بالتطور والنجاح , مثل :

القراءه , الكتابه , الرسم , التصوير , ............................ إلخ .
.
نظم وقتك جيدا , ثم رتب برامجك وداوم عليها ستجد نفسك ليس لديك وقت للتفكير كثيرا , ( أنصحك بكتاب د. غازي القصيبي , حياة في الإداره ) .

وأخيرا وأولا : أكثر من قراءة القراءن (خصوصا في هذه اللحظات اللتي تشعر بها بالضعف ) سيغسل كل مافي داخلك بأذن الله .


الله يختارلك مافيه خير لك

الاعضاء كفوا ووفوا ....

ياخوووي الغربه صحيح انها شينه بس عندك بعض الاقتراحات مني لك لعلها تقلل من هم الغربه اللي تعاني منه حاول انك تروح للولايه او المدينه اللي تكون تعرف فيها واحد او اثنين سواءا اقارب او اصدقاء حاول تلتقي بهم كل اسبوع او كل اسبوعين يكون بينكم (فضفضه) وركززززز عليها هذي اللي بتنسيك همومك ولاتحاول تخليها بقلبك حاول انك كل فتره تتخلص منها وتفرغها وابحث عن المستمع الجيد ادري عندك حنين للوطن والاهل والاصدقا و الخ الخ ....

وطبعا يا صقيقي لاتنسى الله في قوله تعالى (وان مع العسر يسرا) وقال تعالى (وبشر الصابرين) وركعتين تخصصها من اخر الليل تغنييييك عن الكثير


ولاتنسى انك رايح وبترفع ررررررررررررراس اهلك وعايلتك بالشهاده اللي بتجيبها فهذا اشوف انه من المحفزااات القويه

وااخر شي ابقوله تذكر يا صقيقي انك بامريكا مو بـ الخرطوم تقول احس بالغربه ... يعني امريكا بلد تسوي فيها كل حاجه مافيه هناك عيب او استحي او وش يقولون الناس .. حاول انك تمارس هواياتك اطلع تمشى صااحب ناس اللعب ناقز افرح اضحك انبسط وسو كل اللي كنت ناوي تسويه بالوطن .. وصدقني الصحبه الحلوه هناك بتنسيك حنين الوطن ....

والله الغربه بالسعوديه موب هينا

يا عمي المعاهد مليانه اجانب شبك لك اي واحد ورح وتعال معه

لا تخلي لك وقت فاضي علشان ما تقول الغربه صعبه

رمت مع واحد كفو ولا سعودي منك وفييييك

بقولك شي

المدرس دايم يقولها لي اذا تبي تنسي الغربه

( make friends )

ويعيدها علينا بالحصه من ١٠ الي ١٥ مره

ومزعج اهلنا

والله ما حسيت بالراحه ونسيت هم الغربه الا بعد ما صار لي اخويا