المشاركة الأصلية كتبت بواسطة majed170
المعذرة على التأخير ,, الفترة اللي راحت ما أدري هل فيه مشكلة في المنتدى أو المشكلة عندي أنا ,, لأني كنت احاول ادخل على المواضيع اللي انا مشترك فيها ولا الاقيها ,, واليوم بالصدفة لقيتها كلها ,,
عموما يا أختي لو تسألين أكثر من شخص عن المعاهد بطلعين بإجابات مختلفة ,, لأن اللغة تعتمد على الشخص نفسه ,, وهي تجارب شخصية ,, ممكن اثنين يدرسون في نفس المعهد عند نفس الاساتذة وواحد تضبط لغته والثاني ما استفاد شي ,, وأنا باقول لك على تجربتي دامك سألتيني عن وول ستريت ,,
أنا درست مرحلة البكالوريوس في السعودية كلها باللغة الانجليزية ,, ومن ضمنها سنة لغة في نفس الكلية ,, وجربت معاهد دايركت انجلش اللي تتبع لنيوهورايزن ودرست في وول ستريت ,, وبعدها درست فترة في معهد els في امريكا ,, وبعد هذا كله اقول لك ان افضل مكان تعلمت فيه لغة انجليزية هو وول ستريت بلا منازع ,, مع اني قريت لناس هنا في المنتدى ما عجبهم ,,
طبعا اغلب المعاهد تعتمد طريقة اكاديمية ,, ومعهد وول ستريت يعتمد طريقة غيرهم كلهم وما شفتها الا عنده هو ,, المعهد ما فيه كلاسات او محاضرات ,, ولا فيه تركيز على القواعد ,, طريقته تعتمد على فلسفة ثانية ,, وهي فلسفة تعلم الطفل ,, يعني الطفل يسمع ويسمع ويسمع ويسمع ويسمع وبعدين يتكلم ويتكلم وبعدين يتعلم القواعد ,, ودامك مركزة على المحادثات فأنا اقول لك ما فيه معهد يعلمها لك مثل وول ستريت ,,
الشي الثاني وهو الأهم هو أنك لازم تعرفين ان اللغة ماهي علم نتعلمه ,, اللغة مهارة نكتسبها ,, فلازم تخلقين لك جو كله انجليزي في انجليزي ,, لازم تروحين المعهد وتاخذين الدرس وتحلين الواجبات وتراجعين ,, بعد كذا لازم في البيت تقرين كتب او جرايد او مجلات انجليزية في اي موضوع يعجبك لمدة لا تقل عن ساعتين ,, جزء من القراءة تكون صامته وتحاولين تترجمين الكلمات وتفهمينها وتحفظينها وتتأملين في تراكيب الجمل ,, وجزء من القراءة يكون بصوت عالي كأنك تسولفين مع ناس قدامك ومو لازم تفهمين الكلام ,, الهدف من القراءة بصوت عالي هو ان لسانك يتمرن على النطق وتتخلصين من التعتعة أو التأتأة في الكلام ,, وبعد هذا لازم تتابعين برامج أو أفلام تكون باللغة الانجليزية ويكون فيها شريط الترجمة برضه بالانجليزي ,, بحيث انك تسمعين الكلام وتقرأينه في نفس الوقت بنفس اللغة ,, واجلس عيدي المشهد ان شاء الله عشرين مرة ,, ورددي الكلام ورا الممثلين برضه عشرين مرة بنفس النبرة والانفعالات ,, صدقيني ما يمر شهرين ثلاثة الا وأنتي تحسين بفرق كبييييييييييييييييييير جدا ان شاء الله ,, اما حكاية انك تدرسين في معهد وتحلين الواجبات وبس فهذي لو تطبقينها اربع سنوات برضه بتكون لغتك ضعيفة ,,
اتمنى إني أفدتك وبإذن الله تتيسر لك الامور
