=> معانه مع الغربه بشكل آخر !! (( عرفت الناس عرفت الأصدقاء عرفت الحياه )) تفـظل

في الحقيقه عانيت معانه شديده في الغربه في حياتي كلها لم اتعرض لمعانه مثل معانتي في الغربه الي امتدت سنه ونصف قضيتها في امريكا تعلمت الكثير الكثير وخضت تجارب كثيره وتعرفت على ناس كثار من جنسيات مختلفه صارت لي مووواقف كثيره تعلمت منها الكثير
سوف اختصرها لكم في سطور سريعه لكن قبل لاتقرأ الموضوع صدقني الموضوع هذا سوف يختصر لك تجارب شخص اجتماعي جرىء دخل في كل المجتمعات وعاش مع جميع الجنسيات شخص عاش المعانه والآلم بكل ماتعنيه الكلمه وتعلم الحكم من تجارب كثريره ومواقف كثيره

1- لاتبوح بسرك لأحد مهما كان لإن اسرارك سوف تتحول الى سهام يستخدمها صديقك السابق وعدوك الحالي في معرفه نقاط ضعفك وقوتك !!!
تعرفت على ناس كثار في الغربه لو بعدهم فوووق 100 شخص لكن في الحقيقه ماصفى لي منهم ولا شخص وبعضهم صارت لي مشاكل معاهم وبدا يعايرني بعيوبي وبأسراري الي كنت اعطيه اياها في البدايه كأي علاقه يكون بينكم ود واحترام وبعدين تبان الحقيقه بعد فتره وكل شخص يعرف الثاني لذالك اصبر حتى تعرفه زين ويكون بينكم عيش وملح !!
2- لاتحكم على اي شخص بالمظهر الخارجي او بأخطاء شرعيه يرتكبها لإن كل انسان يخطىء والأهم من ذالك النيه اعز اصدقائي شخص سكير مكير لكن في الحقيقه رجل عن الف رجل (( لكن اسراري ماهي عنده )) وعلى النقيض بعض الشباب لايشرب ولا يدخن ولكن ماخلى احد من لسسانه لذالك اهم شيء النيه والأخلاق ولكل انسان عمله !!
3- معلوماتك وبطاقتك البنكيه لاتخلي اي شخص يطلع عليها ابداً ابداً ابداً وحتى لو كنت في مطعم مع صديق لاتعطي صديقك البطاقه وتقول له روح حاسب عني خصوصاً لاصار امريكي لإن الغدر يصير في ثانيه وحسرتك بتجلس معاك ايام !!
4- حاول دائماً تحفظ رقم صديق لك وتذكر الرقم زين لإن لاقدر صار مشكله او دخلت سجن بيخلونك تتصل على زميل لك عشان يكفلك او يجيب جوازك
5- اذا قابلت اي شخص لأول مره في حياتك سوا سعودي مصري امريكي هندي خلك ثقل ورزين ولاتكثر الضحك والسوالف وحتى لعاشر لقاء بينك وبينه خلثك ثقيل ومستمع اكثر من انك متكلم
6- اغلب الناس نفسي نفسي وكل شخص همه مصلحته في الأول والأخير ونادراً ماتحصل الرجل الصادق الوافي لذالك حااااول تخدم نفسك بنفسك ولاتنتظر من اي شخص مساعدتكـ سوا سعودي ولا اجنبي
7- السعوديين في الغربه والاجانب واحد لاتتذمر من السعوديين وتقول السعوديين وصخين وووالخ لإن الاجانب نفسهم بالظبط لكن الي يختلف ان الاجنبي بينك وبينه حاجز اللغه ولا كان عرفته من اول لقاء بينك وبينه وعطيته اكس !! لكن اذا تبي السعودي يحترمك والاجنبي يبووس الارض الي تمشي عليها خلك ثقيل ورزين مع السعودي وخلك ثقيل ورزين وامسك فلوسك مع الآجنبي (( لأن السعودي لو ضحكت وياه من باب انك وسيع صدر وراعي فله قال هذا سبيكه غبي !! والآجنبي نفس الشيء واضف لذالك اذا دفعت للإجنبي لو بدولار علك قال عنك غبي سبيكه تدفع فلوس على الفاضي وانت على بالك بتكسب وده واحترامه الا بتكسب انه قال عنك خبل ومجنون !!)))
8- الأمريكان لآتأمنهم حتى لو ضحكووا وستانست وياهم لإن في وقت الجد راح يسحبون عليك !! طحت تبي مستشفى !! صار لك موقف صعب يقوووولك باي باي هم حقين فله وناس في اللحظه هذي انت صديق لهم لكن في وقت الجد وقت الأزمات لاتدورهم
9- اغراضك وممتلكاتك الشخصيه الثمينه لاتسلفها اي شخص سوا سعودي او اجنبي الا اذا انت واثق فيه 100% لإنك وبكل بساطه راح تجلس تلاحقه 90 سنه عشان يرجعها لك !!!
10- لاتســـأل كثــير وتكرر الإسئله ولا تسأل اسأله سخيفه ولا تصــير نشبــــه ترا الناس ماتحب النوعيه هذي
11- لاتقووووول لأي شخص معاي كذا وكذا وكذا خصوصاً الأجانب لإنك بطريقه هذي تمهد لهم لسرقتك بعضهم مايملك قيمه وجبه غداء !!
12- لاتسكن مع اي شخص الا اذا انت تعرفه من قبل لإن مع الأيام راح تعرفه زين ويبان على حقيقته وتشوف الوصاخه واللعانه و تندم على العقد الي ربط بينك وبينه وتصير ماتقدر تطلع لإن العقد بسمك مجبور تجلس يفظل تسكن لحالك اقلها مافيه وجع راس وتقدر تنام متى مابغيت وتغسل صحونك متى مابغيت
13- احذر تسأل سؤال بريء لشخص ماتعرفه لإن من سؤالك تُحدد شخصيتك له !! ولاتقول لشخص ماعرف !! ماقدر انا غبي مدري كيف نجحت !!
ترا الشيء هذا يقلل من قيمتك عنده حتى لو ماظهر ذالك !!
14- في الكلاس في الفصل لاتجلس تضحك العالم على حساب نفسك !! ترا الكل بيضحك قدامك لكن من وراك بيقلون وش ذا الغبي !!
15- لاتبين لأي شخص انك مسكين !! مظلوم !! تعبان !! مهموم !! فاشل !! ساقط !! خلك قوي شجاع واااثق من نفسكـ قدام الكل
16- لاتبربر واجد ولاتتكلم كثير وخل الناس تتكلم اكثر من ماتتكلم انت الصمت شيء جميل ورائع والناس راح تحترمك على شيء هذا

اذا سويت الي فوووق راح تشوووف العالم كلها تحترمك وتحسب لك الف حساب
هذا ماعندي على السريع وعذروني على عدم ترتيب الموضوع واتمنى تشاركوني الموضوع وتعطونا نصائح وخبراتكم في الغربه
واتمنى منكم دعوه صادقه لي بأن الله يوفقني بأموري وتخرج تحياتي لكم

يعطيك الف عاافية

بس برضوا الناس باقي فيهم خير

اكيد لازم الواحد يكون حذر بس ما توصل لدرجة الوسوسة

الله يوفقك اخوي ويوفق الجميع

الفطنه و الفراسه من صفات المسلم .

و دعك مما يريبك الى ما لا يريبك .

و صدقت في كل حرف من كلماتك .

لو جربت ترافق المجموعه الي تداوم على الصلاه في المسجد راحد تدعي لي و تدعي لهم طول عمرك .

من ضيع الصلاه فهو لما دونها اضيع .

ما ارفع نفسي ولا اقول اني مداوم على الصلاه في المسجد ولكن هذا ما اشاهده .

اغلب كلامك صحيح اخوي الغربه تغير الناس

الله يهدي الجميع

كلامك صحيح مية بالمية
سبحان الله في الغربة ما احد يخليك في حالك
يضرونك اكثلر مما ينفعونك
الله يكفينا شر من فيه شره
ولاحول ولاقوة الا بالله العلي العظيم

أحلى نصيحة رقم 1 و 5 .. موفق

جميل جدا

بعض الامور هذي حصلت لي وبعضها لا

يعني مثلا صاحبي سعودي عشت معاه 6 شهور تقريبا عيش وملح واخرتها يسحب علي في السكن ويورطني بسبب غباأي وثقتي فيه

شباب ضحكون في وجهك و اول ماتمشي يسبون، شباب يجي يطلبك تساعده في ورقه ولا اسساي لماده معينه وبعد مياخذ اللي يبغاه قابلني لو رد عليك
ايييييييه عد واغلط من المواقف

بس اللي وصلت له في النهايه الشعب اللي يحبون البارات والشراب كلهم لاترجي منهم خير الا من رحم ربي
اللي تقابله في المسجد هذا حاول تتعرف عليه اكثر
ابعد عن الشبهات وعن اي شي له علاقه بالنادي السعودي من ناحيه المناصب و الرءاسه، والشبهات اقصد فيها حاجات كثير منها السعوديات حتى لو بنيه خير ومساعده ، ياشيخ حتى لو انو شفتها لابسه داخليه وقاعده في مسبح الجامعه لا تتدخل لانو بكره ينحط اللوم عليك في شي مالك فيه
الحمدالله مسارلي لكن شفت قدام عيني

وسلام

انا ارى صحه في كلامك ..!
ولكن اخالفك الرأي بمسألة الغربة !
بمعنى ... ان هالامور كلها موجوده في كل مكان سواء امريكا او السعوديه او اي دوله ثانيه .!
طالما انت عايش بين ناس .. فراح تشوف فيهم الصالح والطالح ..!
فلا تستوي يمناك مع يسراك !

اذا انت ماعرفت هالاشياء الا بالغربه .. فاعرف انك كنت منعزل تماما عن العالم بحياتك .!
ومعرفتك الان بهذه الامور .. ماهي الا بداية طريقك في إنشاء الصحبه الصالحة ..!


كثرة مخالطة الناس ومعاشرتهم توصل الشخص الى مرحلة الإكتفاء الذاتي لفهم العقول البشرية .!
عندها تكتمل نظرتك بالناس ويسهل عليك التعرف عليهم بسرعه ..!

فالخبرات لا تأتي الا بعد تجارب عديدة لمدة طويلة .. !

ولكن نصيحة .. لا تجعل نفسك لين ولا قاسي .. ولا تثقل مره ولا تفلها مره ..!
خلك مرن مع الناس .. واعط لك ذي حق حقه .!

اقول بختصار

توكل على الله واعتمد على نفسك

كلامك سليم اخوي

وهالنصايح الي انت قلتها ما قلتها الا عن واقع تجربة وهذا اجمل ما فيها

وهذي هي فائدة الابتعاث والغربة