طلاب شيكاغو، ريفر فورست خذو لكم طله هنا

السلام عليكم

أولاً أشكر الأعضاء الكرام على ما نلمسه منهم من فزعات ومساعدات قيمة الله يجزاهم عليها كل خير

ثانياً الله يعافيكم ويسلمكم احنا ماشين شيكاغو بعد أسبوع انشالله، وأكيد تعرفون الأسبوع الأخير و مافيه من زحمة شغل وتجهيزات للسفر، وهنا يجي كم سؤال لاهنتو:

* هل الملحقية في واشنطن بوصولنا تستقبلنا وتسكننا على حسابها لمدة يومين؟ ولا السكن على حسابنا ولازم نحجز عليه من هنا؟

* وش الأشياء اللي ناخذها من هنا أرخص والأشياء اللي ناخذها من هناك أرخص (وخاصة اللابتوب والملابس)؟

* يقولون ملابسنا الشتوية (لو بناخذها من هنا) ما تسوي شي مع برد هناك (شيكاغو وضواحيها وجميع الولايات وخاصة الباردة منها) فهل هذا الكلام صحيح؟

* اللغة عندنا في معهد ELS في ريفر فورست، وش سالفة هالمنطقة؟ هل هي تعتبر من شيكاغو ولا بره. وهل في مناطق مناسبة للسكن من ناحية السعر ومن ناحية عوايل وتكون قريبة من المعهد المذكور؟

* يقولون احجز سكن على النت قبل ما تجي، وش الفنادق اللي تنصحون فيها (سعر مناسب وملائمة للعوايل) في المنطقة المذكورة وحبذا لو تكون بعد قريبة من المعهد المذكووور سابقاً؟

أدري ثقلت عليكم بس يقولون أهل شيكاغو يفزعون لبعض، ولا يهون الباقين وكلكم فيكم الخير والبركة

الله يوفقكم جميعاً ، ويسهل أموركم، ويزيدكم أجر ويعافيكم

تحيــــــاتي

اقتباس:

---

* هل الملحقية في واشنطن بوصولنا تستقبلنا وتسكننا على حسابها لمدة يومين؟ ولا السكن على حسابنا ولازم نحجز عليه من هنا؟

---

ترسل للمحلقية بموعد رحلتك مع بعض الأوراق من خلال موقع الملحقية ( ادخل الموقع و روح جهة الفورمات و راح تحصل فورم " وصول الطلاب الجدد " ) . الملحقية راح تستقبلك و تحجز لك في فندق لك أنت تدفع .

اقتباس:

---

* وش الأشياء اللي ناخذها من هنا أرخص والأشياء اللي ناخذها من هناك أرخص (وخاصة اللابتوب والملابس)؟

---

خذ الشيء اللي يعيشك شهر على ما بال ما تتأقلم مع الجو هناك ، أقصد من ناحية الملابس و الفلوس ( لا تحمل كاش كثير ، خل معك بطاقة الصرف) ، من ناحية الملابس خذ لك قطعتين من كل شيء و إذا وصلت هناك تقدر تشتري ملابس ثانية بعد ما عرفت طبيعة المنطقة .


هذا اللي قدرت أساعدك فيه و بالتوفيق ..

الأخ Cold Fear مشكور طال عمرك والله يجزاك خير

بس وش المقصود ببطاقة الصرف، هل هي بطاقة الصراف حق بنوك السعودية تمشي هناك ولا قصدك الفيزا والماستر كارد، ولا أي نوع بالضبط

الله ييسر لك أمورك ويوفقك، وياريت باقي الأعضاء الكرام يفيدونا

بطاقة صراف بنك من السعودية تمشي هناك ، على ما بال ما تفتح حساب هناك في أمريكا .

يعني قصدك أودع المبلغ في البنك هنا وأسحب من هناك؟ وإذا سويت هالطريقة مايصير في خصم عند السحب؟ يعني كأنه قالو لي يخصمون فرق العملة أو شي زي كذا.

معليش أزعجتك بالأسئلة، والله يجزاك خير الجزاء

وياريت بعد الأعضاء يكرمونا بالرد على باقي الأسئلة

لا عادي أخوي ، إحنا نعين و نعاون :) ..

بالنسبة لسؤالك ، أنا قصدت تكون بطاقة الصراف المصدرة من بنك في السعودية ، لو تشوف خلف البطاقة حتلاقي كذا شبكة " الشبكة السعودية - ميسترو - الخ.. " طبعاً تودع فيها فلوس من السعودية و لمن توصل لأمريكا بالسلامة و حابب تصرف من ماكينة الصرافة لازم تشوف هل الصرافة تدعم الشبكة ولا لا ؟ إذا ايه راح تجيك الفلوس بالدولار ، و إذا لا لازم تدور على صرافة ثانية .

بالنسبة لفارق العملة ما أقدر أفيدك بشيء ، لكن قد ياخذون عليك عمولة رمزية على السحب ، بس أفضل من حمل كاش كثير قد يتعرض للسرقة لا سمح الله ، أو حمل شيكات سياحية تاخذ وقت في تحويلها إلى نقد .

طبعاً نصيحتي لك هي في التعجيل بفتح حساب في أمريكا خلال أول أسبوع من الوصول و إرسال شيك ملغي للملحقية حتى تنزل لك المكافئة في أسرع وقت . البطاقة السعودية ممكن تستفيد منها لو حابب أحد يرسل لك دعم خارجي بحيث يودع بسرعة في الحساب السعودي و أنت تسحب من أمريكا ( ما أدري عن عيوب هالطريقة ) .

if you can get a VISA card from Saudi Arabia that would be better

مشكورين يا أخوان على مساعدتكم القيمة والله يسهل أموركم

الأخ أبورعودي إذا ما عليك تكليف ليش الفيزا أفضل، خصوصاً إن الفيزا عليها رسوم مثل ماأنت عارف

يعطيكم العافية ويجزاكم خير