رد: كم المبلغ الي اخذه معي الى امريكا / ضروري
السلام عليكم ورحمة الله وبركاته ..
بالنسبه لوضعك .. راح اعطيك نصيحة اخوية علها تنفعك ..
لاتاخذ معك كاش اكثر من الف دولار .. والباقي خليه بالحساب السعودي ..
الالف دولار هذي راح تساعدك في خط سير رحلتك لحتى توصل وتاخذ فندق ..
الفنادق تختلف باسعارها .. وتتراوح الليلة بالفنادق للغرفة الواحدة من 60$ الى 320$ < حسب درجة الفندق !
اما عن السيارات .. فـأقل سياره راح تكلفك تقريبا 5000 دولار .. (ويكون لا باس فيها تمشي وضعك) ..
بالنسبه للسكن .. فالسكن يتراوح اسعاره من 600 الى 1200 دولار .. علما أن فيه سيكوريتي ديبوزت وعادة يكون مابين 250 و 500 دولار ..!
الاثاث .. يختلف على حسب المكان اللي تاخذ منه الاثاث .. فتقدر مثلا 1500 دولار تأثث بيتك بأثاث كويس . (كنبات + سرير + مفرش سرير + لمبات + طاولات + اغراض مطبخ ) ...
الا اذا انت بتاخذ شي فخم وعليه الكلام .. وقتها راح تدفع اكثر ..
الاجهزة المنزلية .. ممكن تكلفك شوي .. مثل التلفزيون يختلف سعره اقل سعر بـ 400 دولار و اعلى سعر بحدود الـ 3000 دولار ! ..
وعندك المايكرويف .. مايكلف اغلى واحد بتلاقيه بحدود الـ 300 دولار .!
الاشتراكات الشهريه .. (تلفزيون + نت + تلفون + كهرباء + ماء)
التلفزيون + النت .. عادة ماتكلف شي ... يعني بحدود الـ 60 دولار راح تجيبلك اشتراك كيبل + نت ..
اما التلفون .. فتختلف الشركات .. لكن لو تبي تشتري مثلا ايفون .. راح تدفع 300 دولار للجهاز + مايقارب الـ 100 دولار للباقة الاتصالات + 500 دولار سيكوريتي ديبوزت ..
الكهرباء ... ياخذون منك بس دايركت ديبوزت 500 دولار .. وبعدها يحاسبونك على صرفيتك الشهريه ..
(احيانا الكهرباء والماء تكون محسوبه من ضمن ايجار الشقه ) ..
اغراض الجامعه (كتب + دفاتر واقلام .. الخ ).. الكتب اسعارها من 60 الى 500 دولار للكتاب الواحد (على حسب الكتاب اللي بتشتريه ) .. ولكن معدل الكتب يكون بحدود 150 دولار للكتاب الواحد .!
اما الدفاتر والاقلام والشنطه واغراض الدراسه .. فماراح تكلفك اكثر من مية دولار .!
يعني نقدر نقول لو كنت بتسوي كل هذا في اول شهر .. راح تكون صرفيتك مايقارب الـ 45 الف ريال كحد اقصى ..
أما لو أجلت بعض الاشياء الغير ضرورية .. مثل السيارة والتلفزيون وبعض الشغلات بالاثاث .. راح تكفيك الـ 30 الف وتزود ..!
فأنت حاول تقتصد .. لاتضرب ضربتك من اول شهر وأنت توك جديد بالمنطقه ووضعك غير مستقر ..
خليك لين تستقر بالمنطقه والسكن .. ولما تتعرف على اجواء المنطقه وتتعرف على الناس .. اذا كنت مرتاح نفسيا في مكانك وخلاص حبيت تكمل .. توكل على الله وكمل باقي العفش .. وخلاص يكون مكانك ثابت .!
فلا تستعجل ترا العجله ماهيب زينه وانا اخوك ..
هذا والله اعلم ..,
اخوك محمد
رد: كم المبلغ الي اخذه معي الى امريكا / ضروري
بالنسبة للكتب أنصحك تبحث في المستخدم أرخص لك وبعضها أخو الجديد
رد: كم المبلغ الي اخذه معي الى امريكا / ضروري
الله يجزاكم خير
والله اني اخذت الدراهم كلها في ظرف
واخذت الظرف في جيبي وحطيت مع المدام الف دولار
وتوكلت على الله
والحمد لله صار كل شي تمام
تحياتي
رد: كم المبلغ الي اخذه معي الى امريكا / ضروري
طيب وش رايكم بالفيزا مب أفضل من آخذها كاش .؟
رد: كم المبلغ الي اخذه معي الى امريكا / ضروري
السلام عليكم
اريد ان اعرف كم تكلفه الدراسه للغه لمده سته اشهر
اريدها شامله الدراسه والسكن والمعيشه
رد: كم المبلغ الي اخذه معي الى امريكا / ضروري
اقتباس:
المشاركة الأصلية كتبت بواسطة صيدلاني666
طيب وش رايكم بالفيزا مب أفضل من آخذها كاش .؟
هلا وغلا
ما ادري وش الافضل ولكن الي سويته انا
اخذت المبلغ معي وبفتح حساب ان شاء الله اليوم
واودع المبلغ في الحساب
تحياتي
رد: كم المبلغ الي اخذه معي الى امريكا / ضروري
اقتباس:
المشاركة الأصلية كتبت بواسطة abu-kady
السلام عليكم
اريد ان اعرف كم تكلفه الدراسه للغه لمده سته اشهر
اريدها شامله الدراسه والسكن والمعيشه
هلا والله اخوي
انا ما اقدر افيدك
ولكن انصحك تكتب موضوع بهالخصوص
والاخوان راح يفيدوك
تحياتي