المشاركة الأصلية كتبت بواسطة عبدالرحمن دحيم
اخوي عبدالله بما انك متحمس مره للفكره خلني اوسعها لك شوي اكتب لك مفصل .
مثل ما ذكروا الاخوان تختلف قوانين الولايات عن بعض و انا في تكساس و من قوانينها يحق لك حمل السلاح في شنطتك في الشارع .
اماكن الصيد : اما يكون مزرعه مخصصه للشي هذا و يحط لك طير او حيوان و ترمي عليه ومافيه اي متعه , او انك تتفق مع راعي مزرعه انك تصيد فيها و بناء على رخصه الصيد يكون صديك طير واحد مثلا بطه او وزه او حمامه و اذا صدت بطه ثانيه او اي نوع تدفع للولايه ما بين 150 الى 300 دولار حسب النوع . و اذا كان غزلان يكون المبلغ اعلى بكثير . لا تتوقع ان السالفه مثل عندنا في السعوديه امتلك السلاح و اطلع البر و ترمي قد ما تبغى و تصيد الي ترجع .
ما فيه شي اسمه تاخذ سلاح و تدور لك ارض فاضيه او غابه او بارك و تستعمل السلاح فيها ولو تسويها ممكن تدخل في مشاكل ما يعلمها الا ربك .
ان شاء الله اذا شريت شوزن او اي سلاح هاويه وش تستفيد منه ؟ او كيف تستخدمه ؟
اما انك تعرف صاحب مزرعه او فيه معلن يقولك عندي مساحه ممكن تستخدم فيها الشوزن بمبلغ معين , او انك تروح لميدان الرمايه و تستخدمها هناك الين تشبع و كل شي بحقه ما فيه شي ببلاش . مرات توصل 200 دولار في اليوم الواحد.
من تجربتي في الرمايه في امريكا : افتح قوقل او قوقل ماب و ابحث عن shooting range قريب منك الي هو ميدان الرمايه وتروح لهم تستاجر منهم السلاح و يعلمونك كيف تستخدمه و اجراءات السلامه و اذا خلصت ترجعه لهم و انت مبسوط ولا مسؤليات .
سبب امتلاكي للاسلاح اخوي الي اكبر مني طلب مني اشتريه عشان اذا جا يستخدمه و هو امريكي ولكن اخذتها باسمي حتى اقدر اتصرف فيها وقت ما ابغى ابيعها او انقل الملكيه .
انصح اي طالب بشراء سلاح ؟ لا طبعا و مسبب لي ثقل في السكن كل ما غبت عن البيت فتره اشيل همه اكثر من اي شيء في السكن .
عندي ملاحظات بسيطه جانبيه :
1- اشكر كل من نصح صاحب الموضوع برفق و حاول ثنيه عن الفكره.
2- اعتب على كل شخص قلل من قيمه طلبه او استهزء بهوايته او رغبته. المفروض اننا نتعلم من المكان الي احنا فيه احترام اراء و رغبات الاخرين . لو كانت هوايته جمع الملصقات او علب الببسي الى اي مستوى بيوصل العتب عليه ؟ مع اني شفت الهوايه هذي قدام عنيني في بيت موجود قريب مني و طالع البيت تحفه و اهل الحي كل ما حصلوا على علبه غريبه او يتوقعون انها ماهي موجوده عنده يتعنون و يطقون بابه و يسلمونها له . احد الامثله : ابدا برشاش مويه .
3- كلنا نعلم ان هذا وقت اجازه ووقت حريه نسبيه , اذا كنت مضغوط و عليك التزامات مو معناه ان الاخرين لازم يكونون معاك تحت الضغط , و وقوعك تحت الضغط ما يعني انك تضغط على غيرك او تسخط منه لانه مرتاح وانت تجتهد و تحاول تحل التزاماتك . احد الامثله : الاخ عبدالله بين فصلين دراسيين و انصحه بالتركيز على التوفل ؟
هذه تجربتي و رأيي الشخصي
و اذا كنت يا اخ عبدالله قريب من هيوستن عطني خبر و نطلع نرمي الين يطيح كتفك من الرمي