لأهل الاختصاص هل ميزانية 150 الف تكفي لدراسه سنه كامله بامريكا وماهي أرخص ولايه

بالتوقيق بالتوقيق بالتوقيق

يقال فلوريدا رخيصة من ناحية السكان و الله اعلم

اسأل الله الكريم التي لاتنفذ خزائنه ان ييسر امرك وتنضم للبعثة انت وجميع الطلاب والطالبات الذين على حسابهم الخاص

اخوي تكفي باذن الله اذا كنت رشيد في صرفك .. وكانت اختياراتك ذكيه ..

في البدايه أنا بقولك طريقه راح توفر منها فلوس .. مو بس تكفيك ..

أول شي إختر ولايه منااسبه فيما يخص أسعار السكن .. لأن السكن هو البلى وهو اللي يسحب الفلوس .. ويفضل انك تسكن عند عائله .. وغالباً يكون سعرها في الولايات المتوسطه من ناحية الغلا .. في حدود 700 دولار شامله الأكل .. يعني تخيل تدفع 2625 ريال فقط شهرياً للأكل والسكن .. شي جداً ممتاز .. وسنوياً راح تكلفك 31500 ريال .. يعني ساكن وماكل بهالمبلغ فقط .. نجي للمعهد .. من خلال اطلاعي البسيط على معهدي .. وهو معهد جامعة واشنطن ويعتبر من أفضل المعاهد في امريكا .. يكلف كل كوارتر حول 14000 ريال سعودي .. يعني قل فالسنه 56000 ريال , ومثل ما قلت لك هذا معهد حكومي وممتاز .. ومتأكد فيه معاهد أقل منه تكلفه بكثير .. بس أنا حبيت أضرب لك مثال بهالمعهد ..
الحين انت ساكن وماكل وشارب ودارس بـ 87500 ريال سعودي .. قل 2500 ريال حق الكتب واللاوزم المكتبيه للسنه كلها بمعدل 650 كل كوارتر .. + 3000 ريال تأمين طبي للسنه كلها .. ( طبعاً التأمين الطبي تاخذ من نفس الجامعه لأنه يكون أرخص .. وهو تقريبا ان لم تخني الذاكره حول الـ 3000 ريال لما تجمعها كلها من كل كوارتر ..
الحين صارت حسبتنا 87500 + 2500 + 3000= 93 الف ريال سعودي ..

قل 200 دولار نثريات لك كل شهر جوال , و أكل خفايف .. علماً أن الجوال 40 دولار عند سيمبل موبايل تعطيك شريحه وكل شي فيها مفتوح نت واتصال ورسايل + رسايل مجانيه للسعوديه .. واالميتين دولار تساوي 750 ريال شهريا .. وتساوي بالسنه 9000 ريال

الحين حسبتنا صارت 93000 + 9000 = 102000 ريال سعودي باقيلك يعني 48000 ريال سعودي
اطرح منها 20000 الف ريال للسياره .. وهالعشرين تجيب لك سياره يابانيه نظيفه وحلوه و تمشيك .. باقي منها 28000 الف ريال .. اطرح منها 150 دولار شهريا للتأمين والبنزين .. والـ 150 دولار تساوي 562 ريال .. وبالسنه تطلع 6750 ريال سعودي .. يعني المتبقي عندك 21250 ريال سعودي .. اطرح منها اختبارات اللغه الانجليزيه ايلتس ولا توفل 4 مرات بالسنه .. وتساوي تقريا 700 دولار وتساوي بالسعودي 2625 ريال
الباقي الحين 18625 ريال سعودي


طبعاً حسبتي هذي بناء على خبرتي في أمريكا .. و الأرقام كلها من خلال تجربتي بالعيش في سياتل .. ومعروفه سياتل أغلى من غيرها


في النهايه اخوي مثل ما انت شايف .. سكنك واكلك ومصاريف المعهد والدراسه .. ومصاريفك اليوميه .. والسياره والبنزين .. والتأمين الطبي و تأمين السياره .. ورسوم الاختبارات .. كلها جت أقل من المبلغ اللي انت حاطه .. ولاحظ اني اخترت معد جامعة واشنطن .. وهو معهد غالي مقارنه بغيره .. يعني لو بتختار معهد ثاني أرخص .. بتوفر أكثر وأكثر

وطبعاً لو بتسكن سكن خاص فيك .. راح يكلفك المتوسط .. 650-800 للأستديو النظيف .. وايضاً لو تحسبها راح توفر .. وتكلفة المصاريف الشخصيه تقريباً 400 دولار شهرياً شامله الأكل والجوال للإنسان الي يبي يوفر


أتمنتى أفدتك أخوي .. وافدت اي واحد يبحث عن معلومات عن الدراسه على حسابه

اشكرك من أعماق قلبي وعقبال ما نفرح بتخرجك

بس ولا عليك امر السكن الخاص ذكرتم التكلفة من 650 الى 800 هل هي ريال او دولار

بس ولا عليك امر السكن الخاص ذكرتم التكلفة من 650 الى 800 هل هي ريال او دولار وهل مستقبلا لو تم قبولي بالبعثه وانا في امريكا اقدم لزوجتي واولادي الثلاثة على معهد ومدارس للأطفال 7 سنوات و 6 سنوات ونصف واربع سنوات ام انا احتاج انزل للسعوديه وماهي الاوراق المطلوبة مستقبلا في حالة توفقت بالالتحاقوشكرا

آسف علي اللقافة

شف ياخوك بالنسبة لو انضميت بإذن الله يبي لك تكون موكل شخص تثق فيه وكالة شرعية يسنع امور زوجتك واولادك في الوزارة وكل ماعليك هو ان ترسل له خطاب الحاقك وكرت العائلة وجوازات زوجتك وعيالك هذا بالاضافة تكون رحت للجوازات وسويت لعائلتك تصريح سفر عشان يسمحون لهم بالسفر بدون تواجدك معهم وكوجهة نظر شخصية افضل انك بعد تطلع لهم الفيزا الامريكية قبل ماتروح عشان يجونك بأسرع وقت ممكن اذا تحب.

بالتوفيق واي استفسار حاضرين

- - - مشاركة محدثة - - -

دولار طبعا

الريال انساه في السعودية ياحبيب اخوك كل حساباتك حولها للدولار طال عمرك.

اخواني اتوقع انكم نسيتم اهم شي وهو التآمين الطبي ، اكثر الجامعات تجبرك يا تدفع التامين الطبي يا تطلع لك واحد

من خلال موقع البوابه لقيت ان الملحقيه تدفع ٥٠٠ دولار باالشهر تامين طبي للمبتعث ، بس سمعت انه الجامعه تعطيك واحد ارخص تقريبا ٥٠٠ بالترم

لا تنسون هالنقطه لانها ممكن ترفع الميزانيه حبتين


ولا تنسون اخواني الديبوست او التامين الي لازم تدفعه سوا للشقه او شركه الكهرب و الغاز ايضا صح انه مسترجع بس انه لازم ينحسب

والتاكس حق السياره ولاحظ انك لو شريت سياره رخيصه لازم تغير الكفرات لان عادتا تكون معدومه وهذي تكلف تقريبا ٥٠٠ الى ٩٠٠

لذلك انصحك تنتظر ماتشتري سياره لين تلتحق لان يبيلها شغلات


ارخص الولايات من نظري اركنسا وكنتاكي وتعتبر امنه وعائليه (مو ترفيهيه ابدا)

السكن يبدا من ٥٠٠ دولار للشخص الواحد بدون الكهرب بس يعتبر رخيص نوعا ما من ٣٠ الى ٧٠ دولار

التلفزيون انصحك اشترك في نيت فليكس ب٨ دولار بالشهر وتفرج على افلام لين تدوخ

النت احسن شي سدن لنك وخذ اقل شي ب ٣٠ دولار

ادري اني اسهبت بالتفاصيل بس كان قصدي انفعك من واقع تجربه

الله يوفقك ،

أشكرك من كل قلبي و والله هذا لا يدل إلا على معدنك الأصيل و حسن الخلق
جزاك الله خير و الله يوفقك