إلى أهل أمريكا عامة وسياتل خصوصاً .. بخصوص الطبخ :/

اخوي راعي السميد
جبنالك اسم السميد .. Semolina

بس لا تنسى تعزمنا عالبسبووسه ^ ^

^^^^^
جزاك الله خيرا و خلي البسبوسة تظبط و ماعليك

قدر الضغط يوفر لك وقت اما القدر العادي يرفع ضغطك بدون سنع
القدر العادي ياخذ وقت اطول يعني الدجاجة ساعة ويالله يالله تستوي واللحم ممكن يوصل
الى ساعتين حسب قوة النار

صحتين وهنا مقدما

ما ادري كيف بعلمك الطبخ برد بالمنتدى
بس كميه الماء يكون اقل من كميه الرز يمكن 3 سم ويصل الى 4 سم يعتمد على ديزان القدر

: ) اوكي منتظر هههههه
سمبوسة الهنا ياخوي ان شاء الله

- - - مشاركة محدثة - - -


مشكوره اختي ما قصرتي .. وان شاء الله اجل بشوف لي قدر ضغط في اقرب فرصه
جزاكم الله خير

اول شي اختي يعطيتس العافيه على المعلومه .. ما قصرتي
ثاني شي لو انتس قاريه الموضوع زين كان ما قلتي اول سطر كتبتيه .. انا ما قلت علمووني الطبخ هذا اولاً .. قلت الأغراض حقت الطبخ من رز وغيره شسمها الي تشترونها لان فيه انواع كثيره منها .. وابي اقرب نوع للي موجود فالسعوديه .. ثاني شي لو اني طلبت طريقة الطبخ .. تراها سهله للتعلم .. وناس كثيره تعلمت الطبخ من كتب الطبخ .. فما فيه فرق بين واحد يقرا بكتب طبخ أو يقرا رد في منتدى ( ااذا كان الرد واضح وكافي )
ثالث شي .. جزاك الله خير وعافاك الله

امممم .. اول مره تطبخ وتبي تطب بالزحمه شوي .. ..
هو الكبسه سهله لكن كل واحد له طريقته فيها ...

انا اقترح عليك اقتراح ..
بما انك اول مره تطبخ .. فيه طريقه حلوه راح تساعدك ..

راح اشرح لك بالضبط وش تسوي ..

اول شي جيب لك قدر ضغط وعادة تلاقيه في اي سوبرماركت حولك .. اي قدر ضغط راح يفي بالغرض .. بس دائم دور على القدور اللي تشوف حديدها قوي ومتين .. (سواء كان قدر ضغط او عادي ) ..


نحتاج دجاج ... ورز بسمتي (تلاقيه بسامز لو حبيت) ..
الدجاج انا افضله بدون عظام .. حتى اللحم مايتشرب طعم العظام .. فانت براحتك سواء تبيه بعظام او بدون هذا يرجع لمزاجك ..


البهارات مهمه جدا بالطبخ .. لو رحت للسوبرماركت في قسم البهارات راح تلاقي البهارات انواعها كثيره ..
بس أنت كل اللي عليك بس تجيب التالي :
كمون = Cumin
قرنفل (مسمار) = Cloves
هيل = Cardamom
زنجبيل = Ginger
زعفران = Turmeric
فلفل حار = Chili
فلفل اسود = Black Pepper
قرفه = Cinnamon
ورق الغار = Bay Leaves


ايضا راح نحتاج الى الملح Salt وزيت .. ويفضل تاخذ زيت Crisco ..
هذي صورة للزيت : http://www.meijer.com/assets/product...3625_A_400.jpg


وراح نحتاج الى عصير الليمون ( او حبة ليمون ) وهذا راح يحل محل اللومي ..


راح نحتاج صلصة .. واحلى صلصه مع الكبسه هي صلصة Pace ..
هذي صورة لها :
http://dangerouslylowongrog.com/images/Pace_Salsa.jpg


ايضا لا تنسى بس تجيب معك بصل ..


الان بعد ماجبنا كل المقادير .. لازم نجهزها ..
اول شي تسويه تفتح الدجاج وتحطه في الماء لحتى يتنظف من الدم ..
اذا شفت ان الماء صار لونه احمر جدده ..


ايضا خذ لك كاس او كاس ونص رز ونقعه بالماء ..


الان بينما الدجاج و الرز منقع .. نجهز البهارات ...
جيب لك كاس بلاستك < هذا اللي انا اسويه ..
بعدها خذ الكمون وحط منه بالكاس تقريبا ثلاث ملاعق اكل كبيره ..
الان الزعفران و الفلفل الحار و الفلفل الاسود و القرفه حط من كل وحده ملعقه كبيره وحده بالكاس مع الكمون ..
الان باقي لك الزنجبيل والقرنفل .. حط من كل وحده نص ملعقه كبيره بالكاس مع باقي البهارات ..


بعدها اخلط البهارات بالملعقه لحتى تشوف البهارات انخلطت وصار لونها اشقر مايل للبني موحد ..


الان حطها على جنب .. لاننا راح نستخدم هالخلطه بالطبخ ..




خذ بصله وحده .. واقسمها نصين .. وقطع نص بصله ..
وبعدها حط القدر على النار خليه يحتمي شوي يصير دافي مو حار ..
بعدها حط زيت لا تكثر يعني تقريبا بمقدار ربع بيالة شاهي ..
الان خذ النص اللي قطعته وحطه بالقدر .. وحركه لحتى يصير البصل لونه اصفر ..
اللحين حط فوقه صلصه تقريبا ربع العلبه ... وحركها شوي لحتى تختلط الصلصه بالبصل ..
الان جيب الدجاج وحطه بالقدر وحط فوقه ملعقتين كبيره من البهارات اللي خلطتها ..


بعدين عب القدر ماء لحتى الماء يغطي الدجاج ...
بعدها حط ملح تقريبا ملعقتين كبيره ملح ... ( افضل طريقه لوزن الملح كل ماتحط ملح تحرك الماء وتذوقه) ..
وجيب الليمون واعصر حبه كامله داخل القدر او حط اقل من ربع كاس عصير ليمون ..


الان سكر عليه بقدر الضغط وخله على نار عاليه ..
اول ماتسمع القدر يطشطش احسب له بالضبط عشرين دقيقه ..


بعد العشرين دقيقه .. روح ونسم على القدر لحتى يطلع كل الهواء الحار من داخله .. بعدها افتح القدر وشيك على الدجاج خذلك قطعه صغيره من الدجاج تأكد من انها استوت ..
اذا الدجاج استوى .. طلع الدجاج حطه على صينيه ..
تقدر تاخذ من المرقه وتذوقها .. انا احب اخذ لي بمقدار نص كاس اشرب منها :$ ..


اذا كان عندك وعاء تقدر تحط فيه مرقة الدجاج اللي طبختها .. يكون افضل .. هذا بيسهل علينا طريقة وزن الماء للرز ..


الان نرجع للرز .. راح تلاقي الرز تقريبا تشرب الماء ..
حط الرز بالقدر .. ووزع الرز بالقدر لحتى يكون متساوي ..وصب فوقه المرقه .. لحتى تشوف المرقه غطت الرز .. تقريبا لازم المرقه تكون فوق الرز بمقدار ربع اصبع ..


الان سكر على القدر بقصدير وحطه على نار متوسطه .. وخله يطبخ شوي .. وشيك عليه وحركه كل خمس دقايق ..
لمدة ربع ساعه بالكثير ... لحتى تشوف الماء نشف وصار الرز متشرب كل الماء ...


اما بالنسبه للدجاج بإمكانك تحطه بالفرن وتخليه على الورم warm طول ما انت تزهب الرز .. او تحطه بالقدر مع الرز وتخليه يطبخ مع الرز ..


وانا افضل انك تطبخ الرز لوحده حتى تقدر تتحكم فيه وتقلبه على راحتك ...






الان كل اللي عليك انك تجيب صحن وتحط الاكل بالصحن وتسمي بالله وبالهنا والشفا ...!




هذي اسرع طريقه واسهلها .. صدق ان الشرح طويل .. وباين ان السالفه عويصه .. لكن بالتطبيق سهل مره ..

تقدر بعدين تضيف على الكبسه كل شي تحبه ..




تقدر تشوف مقاطع اليوتيوب عن الطبخ ... فيه اخوانا مو مقصرين هناك بالمقاطع ..




هذا والله اعلم ..,

ما شاء الله تبارك الرحمن .. شقردي ما شاء الله عليك :/
كفيت ووفيت والله

والملعومات في البدايه جداً مفيده
والشرح منظم ومبسط جزاك الله خير

بس سؤال اخير .. ليه يوم حطيت الرز في القدر غطيته بقصدير
يعني لو عندي غطاه ما يغني عن القصدير ؟

و يعطيك الف عافيه عزيزي

و بالنسبه لمقاطع الفديو يا كثر ما شفت .. لأني احب هالشي .. لدرجه ان فيه طبخه كوريه مشهوره اسمها كيمتشي .. وبحكم اني في سياتل يا كثر الكوريين الي أزعجونا بهالكمتشي
عاد قلت لازم اشوف طريقتها .. وفيه منها عدة انواع واشكال عاليوتيوب

لانك اذا سكرت على قدر الضغط بالغطا الخاص فيه راح يكتم على الرز وبالتالي راح تتعذب بشغلة التشييك .. لان الرز مايطول يعني حده بالكثير ربع ساعه ويكون جاهز .. واحيانا يبيله تقليب كل وقت ووقت .. حتى مايحترق وفي نفس الوقت يستوي بشكل كامل ..
وغير هذا .. ببداية طبخ الرز تحتاج انك تسكره .. وفي اخر خمس دقايق للرز .. يبيلك تخليه على نار هاديه وتقلبه شوي وتخليه شبهه مكشوف .. حتى ينشف الرز بشكل كامل .. ومايصير الرز مندي (بشد الياء = ندى) ..

او بإمكانك تكتم عليه وتخليه على نار هاديه مره وتحسب له تقريبا عشر دقايق بعدها تفتح القدر وبتلاقيه زاهب ..

وانا قلت لك بالقصدير .. لأنك اول مره تطبخ فيبيلك تتأكد من الرز .. وتعرف الرز اللي انت تستخدمه .. متى يستوي وكمية الماء وهالشغلات هذي ..
لان كل رز يختلف عن الثاني .. فيه نوعيات رز اللي تجيك حبتها طويله .. هذي احسب لها بس ثمان دقايق بالضبط وتلاقيها زاهبه ! ..

ايضا نسيت اقولك .. لما تجي تطبخ الرز .. تقدر تحط ثلاث حبات ورق غار .. < نسى يحط ورق الغار بالسالفه :$ ..

اما البهارات اللي بقت بالكاس .. حطها بعلبه واحكم اغلاقها بشكل تام او حطها باكياس الـ Zipper .. حتى تقدر تستخدمها مره ثانيه وتبقى محتفظه بالنكهه ..