حوار ابتعاث أم توظيف؟

سؤالي ... هل الوظيفه بعقد إذا نعم فهل امر عدم تجديد العفد وارد ... إذا نعم ( هنا نقطه ضعف كبيره)

المشكلة ان الوظيفة تحت التجربة لمدة 3 شهور يعني بأي لحضة الطيبين ممكن يقولون لي توكل على الله

يعني كذا بطلع لا وظيفة ولا بعثة بعدين

الاخ نواف انا تركت الوظيفة وكان راتبي مقارب لراتبك وكان المفروض فترة ويصير اعلى من راتبك وانا معي ثانوي ومدير فرع باحد الشركات وكنت في البنوك

وكان عندي صديق يعمل في المؤسسة العامه للتقاعد وكان معه ماجستير وخليته يستقيل

قبل لا يستقيل ويروح يدرس قال انا سألت عن راتب الماجستير عندنا في المؤسسة لقيته ما يفرق عن البكالرويوس يعني لو اجلس بدل ما ادرس يصير مثل راتب الماجستير

قلت له هل يستوي الذين يعملون والذين لا يعملون

على الاقل لو بتجي ترقية بيفضلون الماجستير لو بتغير لوظيفة ثانية بتلقى راتب اعلى مع الوقت مثلا بعد خمس سنوات راح يكون الماجستير وضعه افضل والخ

بالاضافة للدراسة بدولة اجنبية تكتسب خبرات جديدة ولغة جديدة وحياة جديدة على الاقل تطلع من جو المملكة الكئيب

تتوسع مداركك تتعلم اشياء جديدة يعني تسوي اب ديت لعقليتك

غير ان المعروف ان السفر فيه فوائد ما بالك اذا كانت الدولة كافلة مصاريفك

انا قلتها زمان واقولها الحين ما اعتقد ان الابتعاث راح يتكرر فنصيحة لأي شخص لا يفوت هالفرصة

انا اخر وظيفة عرضت على بمستشفى الحرس الوطني ومع ذلك رافض الفكرة

الابتعاث راح يحطك في مواقف ويخليك تشوف اشياء وتتحرر من كثير قيود انت لا تعلم انك كنت راسمها لنفسك

وانت شايف عقلية اي شخص راجع من برى كيف تكون

على الاقل انت شفت دولة وشفت انظمة وشفت ديانات واعراق مختلفة وطرق تفكير واشياء كثيرة

اما بالنسبة للوظيفة صدقني راح تلقى وظيفة باذن الله

بعد هذا كله انا ما انصحك بالابتعاث انا عرضت لك المميزات

ممكن انت ونظرتك ممكن تكون لك ظروف معينه عائلية مثلا او صحية او ايا كان

او لك وجهة نظر خاصة

حملك لشهادة ( قانون ) من اقوي التخصصات وبالذات من الدول الغربية على فكرة قانون في امريكا دخوله اصعب من دخول الطب ودخله اعلى ويعتبر مرموق اكثر

مجرد حصولك على شهادة ماجستير قانون تمر من جنب ارامكو مثلا او سابك او اي شركة ما كنت تحلم انك تدخل بمجرد ما تتذكر مؤهلك تحس بالقوة

المؤهل الجديد راح يؤهلك لنوعية فرص مختلفة

اسألني انا

ويبقى لك الخيار !

- - - مشاركة محدثة - - -

بالاضافة نواف ان الارتباك من الوظائف والخوف انهم يستغنون عنك في اول ثلاث شهور راح يتلاشى

وممكن انت تجد هالخيار رحمه عشان متى ما بغيت تطلع من الشركة

اذا كان معك مؤهل ..... غيرررر

افضل نصيحة تلقيتها هي نصيحتك اخي فلاديمير

اشكرك من كل قلبي
الله يزيدك علم ورفعة ووقار

شكرا لك

اي وظيفة لابد ان يكون فيها الموظف تحت التجربة لمدة معينة. وفي القطاع الخصاص المدة هي ثلاثة اشهر وفق انظمة مكتب العمل. والقطاع الحكومي هي سنة وفقاً لنظام الخدمة المدنية.

بالتوفيق

اسمح لي الواقع مختلف. ما شاء الله شكلك عبقري وحاصل على جوائز اختراع مافي قطاع الى وعارض عليك وظايف لا وماعندك الا ثانوية وبالمقابل الخريجيين في تخصصات مهمة (غير الأدارية) يجلسون على الأقل لي سنة اشهر بدون اي وظيفة وبعدها يقبلون بوظيفة راتبها بين 4000-6000

احد الزملاء تخرج من جامعة الملك سعود بكالوريس حاسب - برمجيات كان راتبه في الاتصالات السعودية 10400 ريال تقريباً. المهم ترك الوظيفة وجا امريكا ودرس في جامعة مرتبتها في بداية ال 30 على مستوى العالم وبعد ماتخرج رجع وهو متأمل ان الأتصالات بيخذونه خصوصاً انه سبق وان عمل لديهم ولديه خبرة وفي نفس الوقت خريج ماجستير من جامعة عالمية في مجال تخصصه. لكن الصدمة جلس بدون وظيفة لا وبدون خافز لسبعة اشهر وبعدين توظف في بنك الراجحي براتب 8200 ريال. لا وبواسطة.

لا تنخدع بالكلام الرنان والأحلام الوردية. العلم سلاح لايفرط فيه ولكن الوظيفة المناسبة في بلدنا ليست سهلة المنال هذه الأيام.

اتمنى لك التوفيق

بس تصحيح للغالي فلاديمير

الترقيات يا أستاذ يهتمون بالخبرة وليس بالشهادة
بالذات في الوظايف الحكومية

عمرك شفت مدير توه شاب ؟
لو معك دكتوراه من هارفارد
اذا جت الترقيات بيشوفون من الأقدم

أسمع نصيحة أخوك
وأي واحد يقولك الشهادة ومدري ايش
كلامه تظري ولا يمت للواقع بأي صلة

واللي يقول مؤهل القانون مرموق
هذا في اوروبا وامريكا
لكن بالسعودية اللي دارس علوم ادارية بيكون مفضل أكثر منك

اول شيء انت جالس تتكلم عن واحد من الشباب وانا جالس اتكلم عن نفسي

بعدين فيه شيء اسمه قيمة لخبرة البني ادم حسب تصنيف سوق العمل يعني فلان من الناس صار اداري حسب مهامه الوظيفية يقيم

يعني العملية زي السلم اللي الواحد يطلعه وهالطلعه تكون بالوظائف الادارية والاشرافية

وانا ما اخذت جائزة اختراع ( تقصد حصلت على براءة اختراع انا متأكد

ولكن انا اشتغلت بالتسويق والائتمان والعمليات والتحصيل

وانا متخرج من عشر سنوات

وخويك اللي بالواسطة اكيد بيعطونه 8000 آلاف زين ما عطوة اقل لانه شخص رااح يدور واسطات على شان يتوظف ما بحث بالأماكن اللي تحتاجه وعرض عليهم السي في

او حط السيفي حقه في موقع بيت كوم مثلا او اي من مواقع التوظيف او مواقع الشركات والبنوك واعتقد التوظيف صار الكتروني

بالاضافة الى انه فيه مهارات وفيه وسي في احترافي الواحد يكتب فيه مهاراته ويعرف يرسله عشان يُنظر فيه ماهو يجلس يدور واسطات عشان يتوظف اذا كان صاحب مؤهل

الشيء الآخر الوظائف الادارية والتخصصات المطلوبة والقوية مثل ماجستير قانون غير

سوق العمل فيه 8 مليون اجنبي والخطة المتوقعه خلال السنوات القادمة استحداث وظائف كثيرة في سوق العمل << والقضاء على مشكلة السكن

والقطاع الخاص ابرك من الحكومة وفيه تطوير وفيه رواتب كويسة

===========

اضافة ذات صلة بالموضوع : مشكلة ان مخرجات التعليم المحلي والبيئة المنغلقة جالسه تخرج فرد يتم تجنبه كثير ولايحبذ توظيفة يفتقد للكثير من المهارات وهذا من اسباب الابتعاث عملية تجديد عقول وافكار

يا صاحب الموضوع ماجستير القانون يعني تتكلم عن درجة قوية جدا وتخصص يفرض نفسه وانت بالاول والاخير القرار يعود لك

اولا انا مدير فرع شركة سيارات وعمري 27 وشويات واستقلت والشركة ( ايجار منتهي بالتمليك ) يعني ناخذ معاملة العميل ونعمل لها دراسة ائتمانية ونشيك ونعمل عقود وو الخ

ثاني انا معي ثانوي ولو كان معي جامعه داومت في الادارة بدل ما صرت في شبكة الفروع اللي تعتبر في وجه الناس وتكون اقل درجة من الادارة

انا بالنسبة لي أثر علي المؤهل بشكل كبير جدا وفيه ناس صغيرة في ادارات الشركات والبنوك يدخلون مواقع حساسة وياخذون درجات وظيفية كويسة تعادل في شبكة الفروع مدير

يعني مثلا سوبر فايزر في ادارة المخاطر الائتمانية او في الشؤون القانونية يعني لو يتصل على مدير فرع المدير بيختبص فهمت قصدي

يا عزيزي المؤهل يؤهلك لدخول عالم آخر وطبقات وظيفية أعلى

اما الوظائف الحكومية انا بالنسبة لي ما اهتم لها نهائي لأني اتخيل الوظائف الحكومية عباره عن موكيت مقطع ومكيف صحراوي وقدم معروض وجيب ملف اخضر الا يمكن القطاع الصحي

والقطاع الصحي نادر من يفكر في المنصب لأنه قطاع مريح ودخله جيد جدا واعتماده الاساسي على المؤهل وكل واحد يشتغل بتخصصه يعني النطاق يكون فيه اضيق شوي وادق

الله يجزاك خير والله همي الاول انك تتضح لك الرؤية اكثر من اي شيء آخر

وانا ما الومك على هاللخبطة اللي انت فيها فعلا المجتمع اللي احنا فيه بالذات الشباب مو فاهم ايش اللي صاير حوله ولا وش اللي له ولا اللي عليه

الابتعاث على مشارف الانتهاء وانت تتكلم عن ماجستير قانون

الله يوفقك ويلهمك القرار الصواب اللي فيه خير لك

انا حسيت من كلامك انك متردد والرؤية مشوشة عندك حبيت اوضح لك

ولا تنسى تصلي الاستخارة قبل كل شيء

ولله الامر من قبل ومن بعد ..