يا اخي و يا عزيزي الي تقول المكافأه تكفي و زياده و توفر , الحمدلله على النعمه الي انعم ربي عليك فيها في موقفك ووقتك الي سمح لك توفر .
جرب يكون معاك مرافق وشوف تكفيكم او لا و قابلني تقولي كلمه روم ميت او سكن الجامعه , فما بالك بالي معاه طفل و يحتاج حضانه . بتقولي يخلي زوجته و ابنه في البلد , طيب ما اختلفنا في البلد ياكلون تراب ؟؟ من وين يعيشون حتى في البلد. برضو بينط لي واحد يقولي اذا كان عنده اطفال ليه يطلع يدرس و بقوله يا عزيزي طالب ماستر و طالب دكتوراه و بعض طلاب البكلوريوس مثل الطب و بعض خصصات الهندسه تتوقع ان عمره اقل من 25 هذا اذا قلنا انه ماشي في دراسته متواصل ما توظف و رجع يدرس مره ثانيه او معيد كم سنه وبيدرس الدكتوراه او طالب الطب الي بيدرس في امريكا اقل شي 10 سنوات .
والله كل واحد يقولي انها تكفي ما يذكرني الا بماجد المهندس و اغنيته ابشرك احنا بخير وسلامه و ثلاث ارباع الشعب الي ما توظف والي ما قدر يتزوج والي وراه ديون و الي مبتعث يحاول يجمع جهد سنين عشان يلقى شي ان شاء الله في المستقبل يسره و الي مسكين ما حصل ولا شي منها و عايش على الطل .
ان شاء الله لو كتب ربي لنا عمر و شفنا زياده او دبل راتب اتمنى انكم تكونون بنفس الذمه و الشفافيه و ترفع السماعه على الموظف المالي و تقوله شكرا عندي الي يكفيني لا تزيدون مكافأتي .
البيت يبغى مصاريف و السياره و الجامعه .
البيت والله اني ساكن في ارخص سكن في هيوستن ممكن الانسان يقبل المعيشه فيه غرفتين ب 900 و الماء و الكهرب عليك و المجاري وانتم بكرامه و بعض الاخوان يعرفونه و انحدوا عليه بعد مثلي لما شافوا الارقام الفلكيه للسكن . و الي يقولي غير الولايه او المدينه وش حادك عليها اقوله سم و ابشر هذي اوراقي ووالله فوقها 3000 دولار بس عطني قبول جامعه في اي مدينه امريكا او قريه بناء على اوراقي و شهاداتي و تقبل فيها الملحقيه وانا موافق. الجامعه الي انا فيها معطيني خطه دراسيه 54 ساعه للماستر و تقول لو تفتح فمك طلعناك برا الجامعه و الملحقيه تقول مالك الا سنتين و قبلنا الجامعه هذي موهب معناها اننا ملزمين بدراستك اكثر من سنتين.
و السياره كل شهر 200 بنزين و 100 تامين , بيطلع لي احد يقولي ليه سياره بقولك تعال هيوستن او اسأل اخونا نظم معلومات في موضوعه هذا
http://www.mbt3th.us/vb/forum41/thread371173.html
قبل يجي من السعوديه كان متحمس جدا لامريكا و الستايل حقها في المعيشه ولما جا بعد فتره بس يكفيك عنوان الموضوع .
و الجامعه مصاريفها في الكتب و الملابس و احيانا في الاكل اذا ما كان الوقت مناسب للوجبات و موقف السياره .
والله انكم اخواننا المسلمين و عيال ديرتنا ما ودنا يكون الدعاء لكم الا يارب انك تيسر امورهم و نشوفهم خريجين ويلقون اعلى المناصب , ما ودنا تكون يا رب يذوقون الي حنا نذوقه اليوم قبل بكره من قهر فينا بسبب رد له ما حسب حساب اخوانه كيف عايشين ,اهم شي نفسي و ان شاء الله محدش حوش على قوله اخواننا المصاريه .
انا اطالب وزير الصحه انه يسكر المستشفيات في السعوديه كلها , المرضى نسبه قليله من المجتمع و انا و لله الحمد كل يوم اهرول ساعه ولا شفت الي يشوفونه المرضى , استغرب من احد يجي يقول فيني ربو او ما اقدر امشي فيني كساح هذا ما عرف كيف يعيش , و المريض الي ما اعجبته السعوديه يروح بريطانيا.
اسف على الاطاله و قله الادب و تعدي حدودي لكن شي في الخاطر يطلع كل ما انطرح هذا الموضوع و شفت الردود الي تهد حيل الضعوف . وحنا في خير و نعمه و من يبغى يشوف المعاناه الفعليه يروح يشوف المعيدين المغصوبين على الابتعاث و في الاغلب معهم اطفال و طالع غصب عنه اما البعثه او تفصل من الوظيفه و تتركها لغيرك يقبل انه يبتعث .