تقرير تجربة المبتعثين باستئجار سيارات

القوانين تختلف من ولايه الى ولايه اخرى هذي المشكله يعني مثلا في ولايتي طالب ماكمل شهر ومسكوه الشرطه ورخصته سعوديه اعطاه مخالفه 500 دولار

بتكلم عن تجربتي في مدينة اورلاندو ولاية فلوريدا
استاجرت من 3 شركات ( budget , avis , dollar )
المطلوب جواز السفر والرخصة السعودية الجديدة اللي مكتوب فيها البيانات باللغه الانجليزية وبطاقة صراف البنك ( بنك اوف امريكا )
يسلمونك السيارة فل بنزين ولازم ترجعها فل ولا ياخذون عليك فلوس زيادة

بالنسبه للرخصه مسموح لك تسوق السياره بالرخصه السعوديه المترجه لمدة شهرين. و اتوقع تختلف القوانين مثل ما قالت اختنا روسيتّا ...

العاده يأجرونك سياره بس بعظهم يطلب منك تذكرة ترانسيت او تذكرة انك توك جاي ما فهمت عليه بالظبط ... بس رحت لم هرتز و سألتهم يقبلون السعوديه قال ايه ... و كلمت صاحبي عالتلفون و قلت له يحجز لي سياره اونلاين عشان ارخص ... لقى لي سياره باربعين دولار مع التأمين و القارمن طلعت خمسين دولار ... عطاني صاحبي رقم الحجز و عطيته هذا حق هرتز للتأجير قام يتفلسف و يقول ما عندي و مادري ايش و قال لا لازم تظيف عشره دولار حق قارمن قلت له مشمول في الحجز ,,, قال لأ في الحجز يعني اذا انت تبغى او لا ... عاد لخمني هو ..

المهم كان ناوي يعطيني كامري ب 80 دولار ... شف الفرق بس ... حسيت انه استغل السالفه قلت بسلامته هو و سيارته ...

المهم انك اذا حبيت تحجز سياره احجز لك من كذا مكان من المطار اللي قريب عندك ... عشان المطارات ما تدقق عالرخصه غالباً ... و اذا حجزت اطبع حجزك عشان تحشر راعي المكتب ما يلعب عليك ولا شي ... و بالنسبه للرخصه العاده اذا مسكك شرطي يعطيك ورقة ( اصلاح ) ... يعني تصلح الغلطه ... يكون يعطيك موعد مع القاظي ... عادةً بعد شهرين ... و خلال ذالشهرين تحاول تختبر رخصه و اذا حصلت على رخصه امريكيه خلاص يكون تم اصلاح الغلطه و يقفلون القظيّه ... بس المشكله هنا ان السياره اجار ... فما ادري وش اللخبطه اللي راح تصير الحقيقه ...تجاربي ضحله في ذالمجال ..

والله اذكر شباب استاجرو في الرخصه السعوديه و قعدو يهجولون قدام الجامعه وتعرف الامريكان اول مره يشوفون كذا انهبلووووا

شوي الاخ حاضر في عمود كهرب وبعدها والله ما ياجر سعودييين ههههههههههههههههههههههه

نصيحتي:

أول ما توصل أمريكا أشتري سيارة

لازم تكون عندك رخصة دولية + رخصة سعودية جديدة ( مترجمة للإنجليزي) + ID من الولاية إلي ساكن فيها بعد ما تسجل في السوشل شكيوريتي أوفس ومعاك الجوازات وI-20.

ولازم تعرف إنه كل دولار تصرفه على الإيجار هو مصروف غير عائد لك بأي نفع.

أستأجر في البداية لمدة قصيرة جداً بناءً على الرخصة الدولية وID لولايتك.

كثير من الشباب أستأجروا سيارة لمدة شهر وشهرين ودفعوا أكثر من 1300 دولار في الشهر أو ما يعادل 10000 آلاف ريال لمدة شهرين أو أكثر, ثم أشتروا سيارة.

فأختصر الموضوع وأشتري سيارة من البداية.

نصيحة اخرى

أشتري كل مستلزماتك من الأثاث من بداية البعثة عشان تستخدمه لأطول مدة ممكنه.

بالتوفيق

من ناحيتي آنآ آخذت سيارة من شركة AVIS في سان دييغو كاليفورنيا
طلب مني جواز السفر و الرخصة السعودية و ( كريدت كارد ) فيزآ

اخذتها مدة شهر ب 1200
و تفاجئت انه فيه ناس يأجرون سيارات ب 400 دولار بالشهر ..


حاول تسال زملائك بالمعهد عشان مايصير لك مثل ما صار لي
بالتوفيق عزيزي ..

كلام اخونا ناصر صحيح 100%
ولا يهون محمد و الحاظرين ..

بس ودي اذكر معلومه عن السوشل سيكيورتي ... فهو يعتبرونه رقم زي رقم التأمينات الاجتماعيّه عندنا فالسعوديّه ... فما راح يطلعون لك واحد ونتا طالب ... بكذا تروح تطلب افاده منهم. تقدر تروح لمركزهم و تقول لهم عطوني افاده بأني ما اقدر اطلّع سوشل ... تجيب معاك اوراقك من آي تونتي و جواز ... الا كان عندك وظيفه في الجامعه ( بس في الجامعه مسموح تشتغل) بكذا راح يطلعون لك ... بس اسهل ان الشخص يطلب ورقة افاده ...

طبعاً هذي النصايح تعتمد على انّك مظطر تستأجر .. و عشان توفر فلوس و تبعد نفسك عن المشاكل حاول تشتري سياره مره وحده ...

مشكورين يا اخوان ما قصرتم