الأعضاء الإشتراك و التسجيل

الملتقيات
ADs

معلومات ونصائح مهمة عند الوصول لأول مرة لبلاد العــم ســام >> هجولة أول 4 أيـام :d

معلومات ونصائح مهمة عند الوصول لأول مرة لبلاد العــم ســام >> هجولة أول 4 أيـام :d


NOTICE

تنبيه: هذا الموضوع قديم. تم طرحه قبل 4243 يوم مضى, قد يكون هناك ردود جديدة هي من سببت رفع الموضوع!

قائمة الأعضاء الموسومين في هذا الموضوع

  1. الصورة الرمزية الفقيرإلى الله
    الفقيرإلى الله

    مبتعث مميز Characteristical Member

    الفقيرإلى الله الولايات المتحدة الأمريكية

    الفقيرإلى الله , ذكر. مبتعث مميز Characteristical Member. من السعودية , مبتعث فى الولايات المتحدة الأمريكية , تخصصى Software Eng , بجامعة OIT
    • OIT
    • Software Eng
    • ذكر
    • Portland, Oregon
    • السعودية
    • Oct 2011
    المزيدl

    August 16th, 2012, 06:01 PM

    السلام عليكم ورحمة الله وبركاتـــه

    الحمد لله الذي بنعمته تتم الصالحات والصلاة والسلام على أشرف خلق الله - صلى الله عليه وسلم -

    أحببت أن أطرح الموضوع على شكـل معلومات أساسية بإذن الله راح تفيدكم بشكـل كبيـر خصوصـا في الأيام الأولـى سواء من ناحية الرحلة والوصول إلى السكن وفي المشتريـات ، وان شاءالله أول ماتجيني الفرصـة راح أعمل تحديث للموضـوع ، وبسم الله نبدأ :


    1- قدر المستـطاع في الأيام الأولى ادا قدرتم تحصلون شقـة أو سكن للشهـر الأول فوضعكم بإذن الله راح يكون أفضـل ، وهنا أذكر كل من يذمون شبابنا وبناتنا في بلاد الغرب بإنهم مايساعدون ومايحبون الخيـر للغير بإن كلامكم خطأ تماما !

    الحمدلله عن تجربة شخصية أحد الأخوان جزاه الله خيرات الدنيـا والآخـرة استأجرت منو الشقة لشهر واحد وان شاءالله كم يوم ورايح للسكن على أساس إني حجزت في فندق لمدة 6 أيــام .

    2- في حال إننا ماحصلنا سكن يصير أول مانوصل ننزل للسكن اللي حجزناه مسبقا سواء فندق أو غير الفندق ويفضل بإن الحجز يكون على الأقل 5 أيام قابلة للتمديد .

    3- لازم لازم لازم نستخرج بطاقة مسبقة الدفـع لأنها ياجماعة راح تفك أزمـات بشكل ماتتصوروه ! أهم شي لا تطيحون في نفس خطئي !

    عن نفسي استخرجت بطاقتين مسبقة الدفع من بنك البلاد ، البطاقة الأولى حطيت فيها مبلغ = مبلغ السكن في الموتيل لمدة 6 أيــام وطبعا للأسف راح عن بالي مبلغ الضريبـة :/ فبالتالـي لما جيت أسدد الموظفة قالتلي بإن البطاقة مافيهـا مبلغ @_@!

    المهم الحمدلله إن وقتها كان معايا رحيمي " قريبي " الله يوفقه ويرزقه كل اللي يتمناه يــارب

    الشاهد بإن الرجال وقتها سدد عني المبـلغ وأول مارجعت الغرفة دخلت على الوايرلس ولما شيكت على المبلغ الموجود قي البطاقة عن طريق موقع البنك لقيت المبلغ ماهو أكبر من مبلغ السكن مع الضريبة لأول 6 أيام وبالتالي البطاقة رفضت التسديد ،

    المهم إني وقتها حولت من حسابي الأساسي للبطاقة مبلغ 7000 آلاف ريـال على أساس تنفعني في الأيام الأولـى ،

    والبطاقة الثانية خليتها معايا في حال إنو لا سمح الله البطاقة الأولى ضاعت والا انسرقت أو تهكرت ! ،

    فهنا تذكرو بإنكم قبل السفر بيوم تحطون في البطاقة مسبقة الدفع على الأقل مبلغ 5000 آلاف ريال إلى 10000 آلاف ريـال .


    4- الحاجة الثانية اللي جدا جدا جدا مهمـة لا تنسون تفعلون خدمة " التجوال الدولـي " على إني كنت حريص إلا إني نسيت أفعلها وبالتالي لما نزلنا ترانزيت في مطار فرانكفورت جيت أتصل على الأهل أطمنهم إلا الجوال مافيه أبرامج نهائيا ونفس الحالة لما وصلنا بمدينة الدراسة بورتلاند وبالتالي خليت الأهل في قلق لمدة " 27 ساعــة !!

    كل المطلوب منكم تفعلون خدمة التجوال الدولي سواء بالاتصال على موظف شركة الاتصال سواء موبابلي أو الاتصالات + لما توصلون لمقر الدراسة تدخلون في الجوال على " الضبط " وبعدها نختار "ضبط الهاتف " وبعدها نختار " اختيار المشغـل " وبعدها نختار " يدوي " وراح تشوفون الجوال يبحث عن الشبكات الموجودة في المنطقة اللي انتو فيهـا ، عن نفسي طلعت الشبكات أو بمعنى أصح الشركات المشغلة للمنطقة اللي أنا فيها هي " AT&T + T-Mobile " وطبعا بالنسبة ليا كون شريحتي مفوترة في الاتصالات كل الشركتين نفس التسعيرة مافرقت ! للإطلاع على التجوال الدولي والشركات المتاحة لخدمة التجوال من موبايلي أو الاتصالات أو زين على الروابط الجـايــة " نختار الولايات المتحدة " :

    زين
    : زين - المملكة العربية السعودية

    موبابلي :
    http://www.mobily.com.sa/portalu/wps/portal/personal/roaming-and-international/roaming-outside/roaming-prices/?resetPortlet=true

    الاتصالات :
    http://www.stc.com.sa/cws/portal/ar/individual/ind-aljawal/ind-alj-discover/ind-alj-dis-traveller/ind-alj-dis-traveller-outksa/ind-alj-dis-traveller-postromaing

    بالنسبة لعملاء زين ماعندكم إلا شركة AT&T وفي الموقع ماهم موضحين الأسعار للأسف :/ ،

    بالنسبة لعملاء موبابلي أفضل تسعيرة لكم راح تكون للمشغل T-MOBILE والسبب في إنكم راح تستقبلون المكالات مجانا : ) ،

    بالنسبة لعملاء الاتصالات أفضل تسعيرة لكم ماراح تفرق ! لأنكم راح تستقبلون المكالمات مجانا سواء كان المشغل T-MOBILE أو AT&T ^^

    طبعا كلامي هنا للأخوان والأخوات اللي شرايحهم مفوتـرة ،

    اللي شرايحهم غير مفوترة راح يستقبلون المكالمات مقابل مبلغ 0.5 بالنسبة للاتصالات للمشغل AT&T و T-MOBILE ، و مجانا بالنسبة لموبايلي في حال كان المشغل T-MOBILE و 1.3 في حال كان المشغل AT&T وزين للأسف ماعندي خلفيـة !

    * اللي شراحيهم مسبقة الدفع موبايلي راح تتفعل من حالها خدمة الـتـجوال ودا الشي اللي صار مع الأخت الكريمة ، أما اللي زي حالتي شرايحهم مفوترة من الاتصالات لازم نفعل خدمة التجوال الدولـي + نختار المشغل يدوي زي ماوضحت في السابـق .

    5- لا تاخدو معاكم في المطار مبلغ مـالي كبير ! خدو معاكم مبلغ للاحتياط فقـط ، يعني عن تجربة شخصية قبل السفر بيوم رحت لفرع إنجاز من بنك البلاد وحولولي مبلغ وقدره بالريـال إلى 200 دولار اعتمادا على سعر الصرف لليوم وطلعت من عندهم ومعايا 100 دولار + 100 دولار ، وبقية الفلوس في البطاقـة ، ولما وصلنا المطار كان عندنا عفش زايـد وبقوة وبالتالي دفعت 100 دولار لوزن زايد تقريبـا 19 كيلو :d هو مو وزن زايد وإنما شنطة زايدة تقدرو تقولـو :d .


    6- يفضل وبشدة بإنكم تطلعون من السعودية ومعاكم تقريبا 100 دولار غير الـ 200 دولار الأولى لكن بشرط إنهـا تكون 20 دولار + 20 دولار + 20 دولار + 20 دولار + 20 دولار ، لأنها راح تفك أزمـة لما توصلون ترانزيت زي حالتي وحالة الأخت الكريمـة ،

    أخوكم في الله راح يطلب مويـه في مطار فرانكفورت فاعتمدت على بطاقة مسبقة الدفع والصدمة كانت في بإن البطاقة مافيها مبلغ فقالتلي الموظفة بإن البطاقة ماهي شغـالة ، وقلتلها طيب 100 دولار تمشي فقعدت تضحك عليـا كونـي شايل 100 دولار مرة وحـدة !

    بمعنى آخــر هناك يعتمدون كليا على البطايق ويالتالي لما تجون تسحبون من الصرافات أو تطلعون الفلوس كونو ريصين ويفضل إن المحفظة مايكون فيها إلا مبلغ بسيط ، لأننا يالسعوديين ماشاءالله علينا في السعودية المحافظ عندنا مليانة فلوس وآخرتها كلها ريالات وعشرات وإيصالات البنك :d .


    7- اعتماداعلى الفقرة اللي راحت راح نعرف عالسريع فئات عملات الدولار الأمريكي :

    العملات الورقية اللي راح تقابلونها أو بمعنى آخر اللي يتم طباعتها إلى الآن هـي :

    $1, $2, $ 5, $ 10, $ 20, $50, $100

    وأكثر شي راح يقابلكم وخصوصا لما تسحبون الفلوس من الصرافات راح يكون " 20 $ "

    برضو فيه السنت والدايم ولنا رجعه معاها ان شاءالله وياليت لو أحد يقدر يوضحها بشكل أكبر واستخداماتهـا حتى تتوضح الصورة بشكل أكبر يكون أفضـل ^^
    لأني حتى الآن اللي أعرفه العملات الصغير سوقها ماشي عند مواقف السيارات وبرضو عند البخشيش في المطاعـم .


    8- في الطيارة تأكدو من إنهم يسلموكم نموذجين " ورقتين " لأنو الملاحظ حتى الآن بإن أغلب الرحلات الألمانية إن لم تكن جميعها بتنزل على أي مطار دولي في أمريكا وهما داخل الطيارة أعطونا نموذج واحد فقط واللي يكون مخصص للعفش واللي موجود في موضوع الأخ الكريم
    ABO ALI1 جزاه الله خيرات الدارين ، وبالتحديد النموذج التـالي :








    النموذج جدا بسيط زي ما انتو شايفين لكني راح أوضحه بشكـل أكبـر ،

    كل العلامات تعلمون على " نو " باستثناء العلامة الثانية نعلم " ييس " في حال إنو كان معانا أي نوع من أنواع الأكل !

    يعني عني وعن الأخت الكريمة جبنا معانا " نعناع مجفف " فلما نزلنا في مطار سياتل وسألونا ايش اللي معاكم قلنالهم نعناع والموضوع ماشي تمام ومافكو الشنطة ولا شي ! خصوصا إني في مطار جدة لفيت شنطتين صغيرة مع بعض بالنايلو وألين ماوصلنا بورتلاند والشنطتين بالنايلو ما انفكت !

    برضو عندكم في النموذج بالنسبة لمكان السكن في أمريكا نكتب عنوان القندق أو السكن اللي راح ننزل عليه في الأيام الأولـى + ادا كنتم أخ وأخت أو زوج وزوجة وأطقال أو أب وبنت ، المهم ادا كنتم عايلة وحدة فنموذح واحد راح يكفيكم أهم شي تكتبون في عدد الأشخاص عدد الأشخاص اللي معاكم يعني مثلا عن نفسي كتبت ون واللي هي الأخت الكريمة وفي النموذج كتبت بياناتي + اسم الخطوط ورقم الرحلة تكتبوها عالشكل التالي :

    مثلا الطيران الألماني أو غير الطيران الألماني لهم اسم مختصر ، يعني مثلا رحلتنا كانت من قرانكفورت إلى سياتل وبالتالـي كتبت اسم الخطوط على الشكل التـالي " LH " اختصار لـ lufthansa ،خكل المطلوب منكم تطالعون في بوردينق الرحلة اللي من الترانزيت إلى أول مطار أمريكي وراح تشوفون اسم شركة الطيران / رقم الرحلة ، ويصير نتكبها في النموذج + اسم الدول اللي نزلنا عليها يصير نكتب اسم الدولة واسم المدينة اللي غادرنا منها مثلا : ألمانيا / فرانكفورت ، طبعا بالانجلش .

    النموذج الثاني في حال إنهم ما أعطوكم هو يصير أول ماتنزلون على أمريكا راح تحصلون النماذج موجودة في رفوف راح تكون موجودة على يساركم عادة !

    النماذج اللي تعبوها تكون باللغة الانلجيزية لازم ، لكنهم حاطين نماذج بجميع اللغات ومن ضمنها اللغة العربية تكون نماذج مترجمة على أساس للناس اللي مابتعرف انجلش فحاطين النماذج المترجمة يصير من خلالها نفهم المطلوب ونكتب بياناتنا : )


    النموذج الثاني لازم كل شخص يعبيه ، يعني زي حالتي عبيتلي نموذج وللأخت الكريمة نموذج ، واللي معاهم أطفال لكل طفل نموذج ، والنموذج أيضا مشروح من الأخ الكريم
    ABO ALI1 جزاه الله خيـر




    * بعض الفراغات ماراح تكون متساوية ! بالتالي لما تعبون النموذج حاولو تقسمون الحروف اعتمادا على حجم خطكم وعلى حجم الكلمة !

    لأني في البداية اعتمدت على الفراغات واتفاجأت بإن المساحة ماتكفي نهائيا لعنوان المعهد مثلا !

    بالتالي أخذت نموذج جديد وعبيته مرة ثانية اعتمادا على حروف الكلمة وحجم خطي وصرت أكتب وأكنو مافيه خطوط في الفراغات !


    9- الموظفين جدا متعاونين سواء المضيفين أو المضيفات في الطيارة أو موظفين الجوازات في أمريكـا وطبعا في الأخير " أصابيعكم ماهي سوا " لكن للأمانة فيه موظف شافني حايس مع الأخت في النموذج وجانا وسألنا ادا فيه أي مشكلة فوضحتله ماني عارف ايش أكتب في عنوان السكن ؟

    فطلب مني الـ I-20 وقلي اكتب عنوان المعهد في مكان السكن ووضحلي عدة أشياء أخرى ، فلا تترددو أبدا أو تستحو في طلب حق من حقوقكم !


    10- القــلم !! أهم حـاجة نسيناهـا : ( من جد أول مرة أعرف قيمة القلـم وأهميتـه ، في الطيارة طلبت قلم من المضيفة وقالتلي ثواني وصارت الثواني دقايق ونسيت الموضـوع !

    بعدها مرت مضيفة ثانية وطلبت منها قلم وأعطتني القلم وعبيت النموذح وبعدين استنيتها تاخد القلم والحمدلله مشي الموضوع سهالات ،

    برضو لما نزلنا نعبي النموذج الثاني في المطار كان فيه قلمين بس ! والناس اللي يعبون النماذج أكثر من 3 بالتالي اتشاركت مع واحد أوروبي في قلم :d

    صرت أعبي نص النموذج وأعطيه القلم وهو يعبي نص النموذح ويرجعلي القلم ألين ماغلق واستحليت على القـلـم وكملت تعبية نموذج الأخت الكريمــة .


    11- بعدها راح نوقف في طابور الجوازات ومن خلالهم راح ندخل أمريكا أول لأ !!

    يعني شفنا قدامنا طالب شكلو خليجي أو سعودي ، فلما وصل للموظف ما أدري ايش اللي حصل المهم إن الموظف أعطاه ورقة حمرا والطالب يضحك !! ورجع الطالب بدون مايعبر الموظفين ؟!

    فما أدري هل الفيزا اتكنسلت والا كيف ؟!!

    المهم جا دورنا ودخلت مع الأخت الكريمة مع بعض كوننا " أخ و أخت " وسألنا الموظف انتم أزواج !!

    طبعا لأ أخ وأخت ، قال باين من الشبـه اللي بينكم !!

    سألنا على حساب مين طالع ؟

    قلتله طالع على حساب الوالد وأختي حصلت على منحة ، دقني في الكلام شويتين وقال يعني أختك ذكية وانتا لأ ! ؟

    قلتله طبعا أكيـد مع ضحكـة ساخرة !

    ختم على الجواز ودبس ورقة الدخـول ويوم سعيد لكـم ، نزلنا استلمنا الشنط وسألنا موظفة عند سير الشنط عن المكان المخصص للشنط وبالتحديد للرحلة المتجهة إلى بورتلاند ووضحتلنا السير وحطينا الشنط واتفتشنا مرة ثانية والموضوع الحمدلله سهـالات ،

    * في التفتيش الداخلي طلعو اللاب أو الجوال أو الآيباد وحطوه في صندوق لحاله مع الساعة والخاتم + شنطة الظهر مع الجزمة وانتم بكرامه في صندوق لحاله .


    في حال احتجتو مويه أو عصير راح تحصلون ثلاجات تقدرون تستخدمون من خلالها بطاقة مسبقة الدقع وتطلبون الحاجة اللي تبغوها ، وطبعا أخوكم في الله حاس حوسة مع الثلاجـة : ( ألين لقينا أمريكية مع زوجها وسألتاه كيف أستخدم البطاقة :d ؟

    وساعدتنا ووضحتلنا الطريقة وبإننا لازم ننهي العملية في الأخير بالضغط على " END " .

    12- نظام الصرافات عندهم يحترم بطاقة الصراف نفسهـا !!

    يعني صرافاتنا ندخل البطاقة وماتطلع إلا بعد مانسحب المبلغ وأحيان تبلع الصرافة البطاقة : ( ،

    عندهم ندخل البطاقة وبعدها تطلع مباشرة ! وبعدها بـ 4 ثواني تقريبا راح تطلب الصرافة الرقم السري للبطاقة ، نكتب الرقم سواء عن طريق التـتـش أو عن طريق كيبورد الصرافة ، بعدها راح نلاقي مبالغ جاهزة للسحب ، نختار المبلغ اللي نبغاه ، بعدها تسألنا الصرافة ادا حابين إيصال ؟

    نجاوب نعم أو لأ وبعدها يطلع المبلغ مع الايصال ،

    في حال إننا كنا حابين نسحب مبلغ ماهو موجود في المبالغ الموضة يصير نختار أخرى ونختار " كريديت كارد " وبعدها نكتب المبلغ يدوي مثلا 800 دولار وبعدها راح يطلع المبلغ مع الايصال ،

    وقتها مو نروح وانخلي الصرافـة وانقول خلاص البطاقة طلعت والفلوس استلمناها يصير انتهينا !!

    انتبهـو !

    وقتها لازم ننهي العملية ونتأكد من إننا خرجنا من حساب البطاقة ، لأنو ممكن نروح ويجي بعدنا أي أحد ويسحب المبلغ اللي في البطاقة !.





    13- أول يومين راح تجيكم كآبة وإرهاق غير طبيعي ، يعني عن نفسي في الرحلة الثانية اللي من ألمانيا إلى سياتل لما دخلنا الطيارة أخلاقي قفلت كليـا لعدة أسباب !!


    * حسيت نفسي غريـب والناس يطالعون فينا أكننا كائنات فضائيـة !!
    * الرحلة الثانية جدا متعبة كمسافـة .
    * اختلاف أشكال المجتمع راح يأثر بشكل كبيـر جـدا .
    * كل شي يهون إلا لما دخلت الحمام وانتم بكرامة حسيت أو بمعنى آخر تأكدت من إن الغرب قذرين بشكل عجيب خصـوصا في موضوع الشطاف ! ومع ذلك وجدت حماماتهم نظيقة بشكـل عجيب على عكسنا تماما !!

    * فعلا مايقدر أوضاع المبتعثين والمبتعاث وغربتهم إلا اللي يجربون ! صحيح إني سابقا كنت أقول بإن موضوع الغربة بسيط خصوصا إننا في عصر يقرب البعيد لكن يوم كلمنا الأهل في الاسكايبي الواحد قلبه مايطاوعه والدمعة تبغا تنزل لكن يمسكها بقوله في نفسه " يــارب فرجها وسهلها ويسرها " .

    * وانتم رايحين المطـار لازم الدمعة تخونكم وتنزل لا إراديا فنصيحة ودعو أهاليكم في البيت وروحو المطار مع تاكسي أو مع شخص قريب " صاحب ، ولد خالـ / ـة ، ولد عمـ / ــة " ولا يروح معاكم أحـد عشان ماتقلبون المطار فلم حزين ! .

    14- توضيحات سريعة :

    1- الملابس هنا زي السلام عليكم ويابلاش وأحلى منها مافي وماركات كمان ! .

    2- الأكــل : أول مرة في حياتي أعرف إن البصل 5 أشكـال !! طول عمري أرف بصلنا اللي ادا قطعناه خلانا نبكي :d ، وجميع أنواع الفواكة راح تحصلونها وأصحابنا نادك والمراعي وندى لاعبين علينا أثاريهم وبقوة :d أول مرة أشرب عصير جزر معلب " طازة " !

    يعني أشرب منه أكني أشرب من عصير جزر دوبني عصرتـه ! ، لحم البقر هنا جدا ممتاز ونظيف لكن لازم قبل مانشتريه نشوف نسبة الدهون اللي فيه والتاريخ ؟؟


    * بطاقة مسبقة الدفع ماراح تشتغل في بعض الأماكن ! والسبب عائد في إن بعض الأماكن يقبلون البطاقات الأمريكية فقط بغض النظر عن إنها فيزا أو ماستر كارد !!!

    فلازم أول ماندخل المحل نسألهم " هل الفيزا مقبولة هنـا حتى لو كانت من بطاقة خارجية ؟؟ "

    تقريبا من 90 % إلى 95 % راح تشتغل معاكم البطاقـة باستثناء عدة أماكن بسيطة .


    * تجنبو تنزلون على واشنطن أو نيويورك ! والسبب ببساطة الزحمة فيهم جدا عجيبة ، يعني احنا نزلنا على مطار سياتـل وزحمـة أجل كيف واشنطن ونيويورك ؟!!


    15- ادا الفلوس غلقت أو قربت تغلق اتصلو على الأهل وخليهم يعملون لكم ايداع على حسابكم السعودي الأساسي ويصير انتو تحولون المبلغ لبطاقة ميبقة الدفع وتسحبوه أهم شي قسمو الفلوس زي الناس ولا تضيعوها في الأكل والخرجات والجيات وان شاءالله راح تكفيكم .


    16- الناس هنـا بشكل عـام جدا محترمين والابتسامة شغالة عندهم زي السلام عليكم ، فطول ما انتو ماشيين راح تشوفون البنت والولد والمتزوج والمتزوجة والكبير والصغير يبتسمون لكـم وبالتالي نبادرهم الابتسامة وصباح الخير أو مساء الخير أو كيف الحال ؟

    النظام هنـا كل واحد في حالـه وراح تشوفو دا الشي ، فلا تشيلون هم واتخافون !

    إلا بالعكس لما يعرفون بإننا طلبة وفوقها كمان جايين من خارج أمريكا راح يساعدونا في أشياء جدا جدا كثيرة ، وعامة ماراح تحتاجون لغة انجليزية مثالية عشان تمشون أموركم في الأيام الأولـى ،

    يعني لغة الإشارة هنا ماشية تـمام ، برضو الانجلش المكسر ماشي تمام هنـا ،

    وبالمقابل راح تشوفون عينة من بعض الناس يطالعون فينا بشكل عـام باستحقار !! فلا يهموكم وكملو طريقكم أكنه ماصـار شـي ،

    طبعـا هنـا المشاة لهم احترام عجيب !

    لدرجة إنهم يقطعون الشـارع دايركت لا يطالعون يمين ولا يسار اللهم انهم يدقون زر المشاه وانطلق !

    غير كدا في الشوارع الفرعيـة اللي مافيها زر المشاه السيارات لما بيشوفون واحد أو وحدة حابين يقطعون الشارع دايركت بيوقفون ،

    عندنا طبعا لازم نأشر باليد ونسمع أنواع الفرامل في الشارع :d

    17- راح يجيكم شعور بالإحباط وبالتعب وإنكم خلاص تبغون أي طيارة ترجعكم للسعودية لكن صدقوني مع الوقت راح يروح الشعور نهائيا ، أهم شي إنكم تنزلون برامج مهمة للأجهزة الذكية منها خريطة المدينة اللي انتو فيهـا + برنامج المؤذن مدري الأذان المهم إن البرنامج يجيب مواقيت الأذان والصلاة والأيام المهمة لنا كمسلمين اعتمادا على المكان اللي احنا فيه والمدينة اللي احنا فيها حتى لو كانت مدينة صغيرة لأن البرنامج يحدد مكاننا بالجي بي اس ويعطينا المواقيت + اتجاه القبلة للمكان اللي احنا فيــه .

    * ولا تنسون تطمون الأهل أو ماتوصلون وحبة حبة مع الأيام حاولو تقللو المكالمات على أساس لا تعودوهم على المكالمات اليومية وبعدين يشيلون هم لو ما اتصلتم عليهم ، يعني بعد أول أسبوع نخفف التواصل والأسبوع الثاني أقل وعلى الأقل خلي التواصل بينكم كل 3 أيـام ومع الوقت راح يصير الموضوع بسيط ان شاءالله .



    * البحث عن أقرب مسجد والصلاة في وقتها ولا تنسون الدعاء بإن الله يسهل أموركم وأمور المسلمين والمسلمات يـــارب




    حتى الآن دي المعلومات اللي تحضرني حاليا وأي جديد راح أضيفه ان شاءالله ، واعذروني على كون الموضوع غير منسق أو مدعم بالصور لضيق الوقت والانشغـال ^^ً


    لا تنسوني من صالـح الدعوات لـي ولأختي ولوالدي وللمسلمين والمسلمات

    في أمان الله ورعايتــه
  2. حمد لله على السلامة اخوي

    انا عكسك في قصة القلم اول ما افكر في الطيارة اتذكر سالفة I-94 ثم بعدها تجي صورة القلم في راسي
    ما اعرف ليش، لكن اتوقع اني مريت بتجربه قاسية مع نسيان القلم لكن ما ادري متى

    على العموم

    بالتوفيق
    7 "
  3. السلام عليكم ورحمة الله وبركاتة


    الله يعطيك العافيه الله يجزاك خير ويوفقك في امروك كلها يارب


    اختي HaReeR {{ لا احسلك على طول الولاية ان شاء الله لان كل شي عبر النت اوراقك وامورك كلها في النت (البوابة الالكتورنية) }} موفقه
    7 "
ADs

قم بتسجيل دخولك للمنتدي او

الانضمام لمبتعث

Search Engine Optimization by vBSEO ©2011, Crawlability, Inc.