مساعدة وقفني شرطي و اعطاني موعد محاكمه عشان ماعندي رخصه قيادة! تجاربكم ونصايحكم >

أخي الفاضل ، لا تقلق من أمر المحاكمة ، فأنت لست مجرماً لتضع نفسك محل تهمة تستوجب العقوبة بالسجن ، فالكثير من أخواني الطلاب يحصلون على هذا النوع من المخالفات وتيسرت أمورهم ، فحاول أن تجتهد الان في الحصول على الرخصة الأمريكية ، وإن لم تتمكن من الحصول عليها ، قدم للقاضي اثباتات بأنك مازلت في طور التقديم والاختبار بعد جهلك بنظام المرور لآنك طالب جديد ، وستجد القاضي إن شاء الله متفهما وفي الغالب سيمنحك فرصة لذلك .

لا تجعل القلق والارتياب يسيطر عليك وقت المحاكمة ، وكن واثقاً من نفسك ولا تخشى شيئاً ، وإن شاء الله تتيسر أمورك على أفضل ما يرام.

دعواتي لك بالتوفيق ،.

أخوكم ،.
بـــن نيــــاز

مافيها سجن ولا توقيف ... اذا كثرت رح يعطيك مخالفه والله اعلم كم .. بس مو اكثر من 500 دولار

الهرجه ومافيها انك تروح للمحكمه توقف قدام القاضي ولو تبي مترجم يجيبون لك وبس بالاخير ياتروح بيتكم سليم ولا تروح بـ مخالفه

حاول تطلع رخصه باسرع وقت ولو قدرت رح يمشونها لك يعني بس تروح توقف قدام القاضي وتوريه انك مطلع رخصه وخلصنا لا مخالفه ولا شي بس الاختبار حق الرخصه لك عليه شوي يبيله شوي لغه وتقرا كتاب تعليم السواقه تقدر تاخذه مجانا من محل الرخص جدا مفيد وانا انصصحك تقراه .... انا داخل 4 اختبارات ورسبت وجلست ع الكتاب هذا ابو اسبوع فهمت عليه وخلصت ورحت والحمد لله نجحت

ان شاء الله مافيها مخالفه ولا شي .. الله يعينك

اول شي احب اطمنك موضوعك جدا بسيط - ان شاء الله - وانا باقول لك وش صار معي بالضبط .. وخلك مركز في اللي باكتبه لك

اول شي انت ما وضحت هل كان معك رخصتك السعوديه ولا ما كنت تحمل اي رخصه
ثاني شي ما وضحت انت باي ولايه ،،، لان كل ولايه لها وضع وانظمه مختلفه عن الولايات الاخرى ... قد تتشابه لكن يظل هناك بعض الفوارق ..

المهم :

انا كنت واقف عند اشاره ،،، فتحت اخضر وطلعت يسار ،، بعدها بشوي الا الفلاشات وراي،، اتاريها دوريه وقفت ونزل علي شرطيه ..طبعا قبل ينزل ركز كل الانوار علي ( اجراء روتيني وعادي جدا ) وتجمعت علي ٤ دوريات قلت يالله استر وش سويت وانا ما ادري ..

سال عن ١- رخصه ٢- استماره او التسجيل ٣- التامين

والحمد لله كل شي موجود عدا انوا الرخصه اللي معي سعوديه ...

اخذها وراح للدوريات الثاني ،،، انتظرت ابو ٥ دقايق ورجع لي باوراقي ،،، ومعهم ورقه مطبوعه زي ورقه الفاكس وش هاذي يالحبيبه .. قالت ( تيكت ) يعني مخالفه ،، وش سويت قالت انت لفيت من الاشاره يسار بدون ما تدق اشاره .... وهذا سبب توقيفي هههههههه ما شافوا اللي يلفوون ويديورون في التقاطعات بالسعوديه بدون اشاره ،،، المهم

وهذي وشي قالت مخالفه بقيمه 550 دولار .... قلت واااااو ... عشان الاشاره ،، قالت لا ،، عشان رخصتك مو معترف فيها ولا معك رخصه امريكيه ( ولايه واشنطن الغربيه ) يعني زي حالتك بالضبببط

شرحت الوضع وانا قاعد احاول احصل على رخصتك بس مشكلتي في اللغه ... قالت ما اقدر اسوي لك شي المخالفه تسجلت واشرت على خانه الاعتراض بان اكتب بياناتي واوقع واطلب مترجم باي لغه احتاج وعنوان للمحكمه ارسل المخالفه لهم واتابع معهم ...

رحت البيت و من بكره سويت هالاشياء وارسلتها للمحكمه بالبريد ووصلني الموعد بالبريد بعد ٢٠ يوم .... وانواع الوسوسه .. ليما جاء الموعد

رحت على الوقت بالظبط انتظرت عند باب القاعه .. جاني اخ عربي ،، وناداني انت فلان .. التفت وابتسمت حياك ،،، قال انا المترجم تبعك ودخلنا على طول

انا اول معامله في القاعه وقفت انا والمحامي ،،، عرف باسمه ومعلوماته ،،،،

وكان يترجم لي ... مع ان لغتي كويسه لكن كنت محتاط لهم ... وابي اتناقش معهم وااخذ راحتي بالتعبير ..

المهم القاضي بدا يقول

احنا جهه حياديه لا نقف بجانب احد ... نحاول موازنه الامور الطبيعيه والوقائع الي امامنا كلام حلو ومقنع ويجيب الطمانينه

وطلبت ارفع يدي اليمنى واقسم ،،، هي تقول القسم وانت توكد بكلمه نعم اقسم على ذالك ... شعب محترم ،،، وعندنا يقولون ،، اذا قالوا للحرامي احلف ،، قالوا جاك الفرج

المهم اقسمت وبدت بسرد القضيه ،،، وانا استمع لها وتسالني بشكل عام هل هذي قضيتك واقل لها نعم ... وتسال هل انت معترض على كلام الضابط واجاوب بنعم

فتخبرني بالاجراء بانها ستبدآ بالدخول لنظام المرور وقراءة التقرير الذي كتبه الضابط بعد المخالفه ... لان اي ضابط يحرر مخالفه لازم يكتب تقرير فيها تحسبا لو رفع السائق قضيه ضده ،، كما حصل في حالتي ،،،

دورت في النظام ،، وما لقت تقرير وبكل بساطه استقطت المخالفه عني ،،، لعدم وجود افاده من الضابط محرر المخالفه ...وبعدها وقعت على ورقه وخرجت من المحكمه

اتمنى يصير لك زي ما صار لي ،،، وينسى يكتب تقريره ....
=========

في حالتك ابي اسالك عن عدة امور واعطيك بعض النصايح ...

هل اعطاك مخالفه بمبلغ معين ،،، ولا احالك على المحكمه مباشره ؟

هل انت راسلت المحكمه واعترضت ولا العسكري بنفسه سوا كل هالامور

هل احتجزوا سيارتك ولا بس بلغك باللي حاصل وكل واحد راح بطريقه

وانصحك تاخذ فكره عن انظمتهم وتجهز نفسك و

١- لازم تدخل DOL في ولايتك وتقرا عن النظام وتطبع لو احتجت لبعض المعلومات Department of Licensing
٢- اذا عندك رخصه سعوديه لازم تاخذها معك لانها بتساعدك كثير
٣- اذا سبق وحاولت تاخذ رخصه امريكيه حاول تتذكر التاريخ وتقوله للقاضي

وخلك مروق جدا جدا ،، ترى الموضوع مافيه لا سجن ولا قص ارقاب ،،،

راجع هالرابط :

State of Delaware Division of Motor Vehicles - General Requirements

وكم صار بهالولايه ..

المسموح لك شهرين تطلع خلالها الرخصه حقتهم

والله ردك يريح البال شويتين وفعلاً انواع الوسوسه حتى قلت ارجع للسعوديه وبلاش محاكمه ودراسه >.<

انا بولاية ديلاوير مدينة نيوارك

delaware, newark

بجاوب على اسئلتك


هل اعطاك مخالفه بمبلغ معين ،،، ولا احالك على المحكمه مباشره ؟

ما اعطاني مبلغ معين بس ورقه مكتوب فيها اسم المخالفه و موقع وموعد المحاكمه لكن اليوم قريتها مره ثانيه وطلع محاسبني على اللي راكبين معاي ورا انهم مو رابطين حزام الامان ما ادري هل فعلا انا المسؤول عن هالشي او الشخص نفسه !

هل انت راسلت المحكمه واعترضت ولا العسكري بنفسه سوا كل هالامور

لا هو من نفسه جاب لي الورقه وماطلبت منه اي شي

هل احتجزوا سيارتك ولا بس بلغك باللي حاصل وكل واحد راح بطريقه

ماحجزها لكن طلب مني اتصل على واحد اعرفه ويكون معاه رخصه امريكيه ولزم علي اني اجيب واحد معاه رخصه امريكيه والحمدلله اعرف واحد واتصلت عليه وجا تفاهم معاهم وقالوا له انت سوق سيارته وعطوني ورقة المحاكمه ومشوا

وانصحك تاخذ فكره عن انظمتهم وتجهز نفسك

انا ان شاء الله بكرا رايح بحاول اختبر وسوا نجحت او رسبت بحاول اجيب معاي اي شي يبين اني جالس احاول اطلع رخصه امريكيه.

لكن انا محتار هل فعلا لازم اجيب محامي و اكلم السفاره و اسوي الزحمه هذي كلها او مايحتاج انا اروح بنفسي يكفي ؟

احييك على الرد بن نياز

الله يشهد ان بردودكم هذي احس بالراحه واتطمن

ليت ابو رد احمق يجي يتعلم منكم و يعرف كيف يرد على الناس

الله يوفقنا وياك

اسعدني تواجدك !


ليتها على مخالفه بس انا راضي بس برضوا 500 دولار كثير لكن ان شاء بحاول اني اجيب معاي اشياء تخفف علي المخالفه

الله يعين الجميع

الرخصه الحصول عليها سهل بأمريكا أنا خلصت اجراءاتها بيومين ، اليوم الأول اختبرت نظري واليوم الثاني road test وبعدها بعشرة أيام في بريدي واصله الرخصه، لكن رايح تحصل على تصريح مؤقت بمجرد اجتيازك الامتحانين.