ماهو اكثر شي صدمك في امريكا ؟

السلام عليكم

الكثير من المبتعثين واجهتهم مشاكل ومصاعب لكن الشاطر من يتعلم ويأخد دروس في الحياة

وحسب كلام الأخوان وتجربتهم مستحيل الواحد يلقى مكان خالي من العيون الا اذا كنا في الجنة الله يرزقنا

انا لسه لحد الحين ما رحت امريكا بس عما قريب بعد فتره بسيطه بروح وراح اتكون وجهتي سان دييغو

اتمنا من الأخوان اللي عنده أي معلومه سواء كان ايجابيات او سلبيات يفيدنا من تجربته وخبرته

وجزاكم الله خير

لولا الجو الكئيب في نظري (دائماً غائم) لبريطانيا لتوجهت اليها

للامانة ٢٥٪ من الايميلات التي ارسلتها لجامعات امريكية تم الرد عليها

احدى هذه الايميلات تم الرد عليها بطريقة جافة
**********NO we do not ********, and we also do not

بدون مقدمة او خاتمة

لكن للامانة الجامعات في ولاية كالفورنيا ردها افضل بكثير

إضافة:

الأشخاص اللي ميتين على أمريكا أنواع:

1) نوع بالفعل لقى شيء أو أشياء تميزها عن السعودية، ومن حبه لهذا الشيء صار عنده غشاوة تمنع من رؤية الأشياء الثانية.

مثلاً: البنت في السعودية أفق الحرية اللي يمكن أن تتحرك فيه أضيق من الأفق اللي هنا، فهذا طبيعي وأنا ما ألومهم بالمرة؛ لأن أمريكا حققت لهم بعض ما انحرموا منه في السعودية. النظام: أنا شخصياً أحب نظامهم وبغض النظر أي دولة فيها نظام أحب هالشيء، لكن لأن الموضوع يتحدث عن الأشياء اللي صدمتك في أمريكا أنا سردت اللي فعلاً ما حبيته هنا، لكن لو قلت لي وش الأشياء الجميلة في أمريكا، أكيد راح أسرد لك قائمة قد تكون أطول من القائمة السابقة.

2) فيه نوع آخر خصوصا من الشباب يحب أمريكا ويمجدها؛ لأنه لقى شيء هو في الأصل ممنوع عنه وين ما راح في أي أرض وتحت أي سماء، لكن ممنوع عنه في السعودية بالدين والعادات، وممارسته تحتاج إلى حذر ويكون في خفية. هذا الشيء وجده هنا مفتوح الأبواب دخولاً وخروجاً، وصار عنده تعظيم. كثير من الشباب (ما نقدر ننكر) يصاحب بنات، يدخل حانات، يشرب... وقد يصل الأمر لأكثر خصوصا في فئة الشباب الصغار طلاب البكلوريوس بالعادة. هذا النوع من الشباب حبه لأمريكا هو حب لنفسه؛ لأنه لقى مكانها المرغوب. وهذا النوع لو راح فرنسا، أسبانيا، راح يظل حبه العام للدول المنفحتة، وإنما أمريكا هي رمز بالنسبة له وليست كيان لحبه.

3) النوع الثالث هم النوع اللي تحدثت عنه سابقاً وهم النوع اللي يغالطون أنفسهم.

4) النوع الرابع هم نوع طلعوا من السعودية لمدينة دراستهم، ويعتقد أن هذا الجانب الحضاري غير موجود إلا في أمريكا.

هذي وجهة نظري، وللمحترمين تحياتي،،،

المجتمعات البشرية ذات الكثافة السكانية والمساحات الشاسعة تحتوي على كل الإيجابيات والسلبيات التي تتواجد على سطح الأرض,,
الحكم على دولة معينة يعتبر في أصله وجهة نظر ذاتية تقبع تحت تأثيرات متعددة مثل: الدين والتنشئة الأسرية والعادات والحالة النفسية والانفتاح الاجتماعي والخبرات السابقة....الخ,,
لذلك لا يمكن إعطاء صفة محددة أو تقييم صحيح حول مجتمع يحمل بين جوانبه كافة الأطياف والأعراق,,
هناك مميزات في المجتمع الأمريكي نتمنى تطبيقها في بلادنا ، وهناك سلبيات لا نود أن نذكرها فضلاً عن الدعوة إلى نشرها والتفاخر بها,,
بالإضافة إلى ما سبق: هناك أعين عوراء لا ترى إلا السواد والسلبيات داخل وطنها ، وتغض الطرف عن كل ما هو جميل ومميز ، ولذلك تجد هؤلاء قد امتلكتهم السلبية واستولى عليهم الإحباط فلم يقدموا إلا الانتقادات العلنية على صفحات النت وشبكات التواصل الاجتماعي ، وليس لهم أدنى دور إيجابي في إصلاح مجتمعهم والإسهام في ارتقائه والنهوض به ، بل أصبحوا يشككوا في كل إنجاز ، ويتساهلوا في إتهام الآخرين بالفساد والسرقة دون بينة,,
عملت العام الماضي محاضرة عن تطوير مناهج التعليم (خصوصا الرياضيات والعلوم) ، وأشرت إلى ميزانية برنامج الملك عبدالله للتطوير ، وأقسم بالله أن بعض من في القاعة بدأ يسأل عن كيفية التوظف في هذا البرنامج وهل يتم السماح لهم أو لا. وقبل انتهاء المحاضرة أشارت البروفيسورة إلى النتائج الإيجابية التي سيجنيها المجتمع بعد عشرات السنين من هذا المشروع<<<البروفيسورة مستشارة تعليمية في البيت الأبيض
تمنياتي للجميع بالتوفيق,,

أنآ عن نفسي كَنت أتمَنى الدرآسه بأوروبآ لَكِن قدر الله ومَ شآء فعل :")

أمريكَآ بلَد مُمتآزه للدرآسه . . لكِن حتى نكُون وَآقعيين أفضل الأمكنه المُمكَنه في أمريكَآ صعب أن الطآلَب يختآرهَآ للدرآسه دُون مَصدر دخل ثآني ! عشآن كِذآ الطآلَب بنحد علَى مُدن مَتوَسّطه وينصدم بالأخير أنهَآ مُو توب في كَل شيء وأن ثقآفتهُم مَتوَآضعه ، وخآصةً للي رآحُوآ أوروبآ وجتهُم صدمَه بعد جآؤوآ لإحدى المُدن الصغيره بأمريكَآ ، نآهِيك عن الأشخآص اللي أختآرُوآ ولآيآت سيئه وتوهقُوآ :\

أنآ الحين كشخص مُقدم علَى الثآمنه مُتخبط جداً ومُتيقن أني مَ أستطيع إني أدرس في مَدينه مُتكَآملَه ولآبُد أمشي حآلِي بمَدينه صغيره طوَآل فترة درآستي إن شآء الله

لكِن كَكلمَة حق أقُولهَآ " لَن تجد مَكَآن مَثل أمريكَآ يتيح لَك خيآرآت أكَآديمِيّه وَآسعه مَثل اللي تقدمهَآ أمريكَآ ، يعني بكَل شبر تحصّل جآمعه وألآ مَعهَد وألآ كليّه وألآ مُختبرآت ومَرآكز بحُوث ومُستشفيآت . . الخ !

أمّآ بالنسبه للشعب فهُم مَنجد فريندلي لكنه غير رآقي بأكمَلَه ، فيهُم شوَيّه هَمجيّه ، علَى عكس شعُوب أوروبآ اللي أشُوفهَآ أكثر رقي ولكنهُم مُتعصبين نوعاً مَآ

هَذي وَجهَة نظري وَأتمَنى تكُون مَقبُوله ةة ، والإختلَآف في الرأي لآ يُفسد للوَد قضيّه ةة

(f)

ياليت كل المبتعثين مثلك!

طبعًا للأسف حتى طلاب امريكا كثيرين منهم جاهلين بها ..

بعضهم يمتدحها واخر يقلل من شأنها ..

صدقوني يا اخواني الأعزاء امريكا كل شيء فيها .. فيها اماكن افضل من بريطانيا في كل شيء .. واماكن اخرى اسوء من افريقيا في كل شيء ..

واماكن كالسعودية واماكن اخرى عديدة ..


لا يصح لاي شخص ان يقول انه صدمني في امريكا كذا .. بل المفترض ان يقول صدمني في ولايتي كذا .. لان كل ولاية حتى لها قوانينها .. وطبيعتها ونوعية السكان وطبيعة تجارتها المختلفة كليًا عن غيرها ..

،

شعب ودود طيب مايحمل اي ضغينه حقد مثلنا ي السعوديين شعب يتبع الانظمه ويساعد الحكومه في تنفيذها مب مثل شعبنا متخلفيين والواحد يحب يتخلف عشان يلتفتوا له الناس والي يلتفتون ويضحكون متخلفيين لنهم اعطوه اهميية والفساد اقل من هنا بكثيير اذا كان الشرطي عننا مايربط حزام الامان ههههه والله قمة المصخره ولا يجيك من طرف الاشاره ويدخل فيك يعني هو براسة يخالف ههههههه الله يعين بس

أنت رايح تدرس !!

اختار أفضل جامعة بتخصصك

أدرس صح !! وخل همك الدراسة !!

مثل دينك وبلدك وأفكارك بطريقة صح !


.... والباقي ان كان حسناً ,, فهو ميزة !
وإن كان سيئاً فهو عقبة مؤقتة !


أكبر خطأ هو اختيار المدينة أولا

أول شي اختار تخصصك
اختار جامعتك ومعهدك


وآخر شي ألقي نظرة على مدينتك ,, وحاول التعايش معها



أنا لا أفقه شي بأمريكا لكن الي أعرفه ,, اني رايحة أخذ حسناتهم وأرجع أطبقها هنا لعل وعسى ان ترجع للأمة مجدها

صلوا على النبي يا جماعة الخير

فيه اشخاص بدأوا يكذبوا بعض الاعضاء و يتهكموا على بعض الردود
وفي المقابل بدأ الاعضاء يردوا عليهم و بدأنا نصنف بعض

اولا : اخوي واعذرني ناسية ايش المعرف بـ الضبط ابن هليلة اذا مو غلطانة
اللي يقول عنك كذاب و خراط و عايش في السنغال ومش عارفة ايش ممكن هذي تجربته في الحياة
عاش في ولاية حلوة وما عنده خبرات ثانية فـ التمس لهم العذر
ثانيا : انا اختلف معاك في مقارنة امريكا بـ بريطانيا مو عشان شيء بس لانه كـ مسلمة امريكا افضل لي من بريطانيا بـ مراحل وبما انك رحت هناك
اكيد الا ما تكون شفت ولو موقف بسيط من عنصرية البريطانيين انا اعرف كذا شخص في بريطانيا والكل متفق على هـ الشيء
غير انه البريطانيين مهما ارتفع مستوى ثقافتهم الا انه العنجهية والغرور ترتفع معاها ,, والشيء هذا تلمسه حتى في امريكا لما يتكلموا عن البريطانيين من انهم
اشخاص جدا مغرورين ويعتقدون دائما انه الطريقة البريطانية هي الافضل و الـ صح دائما
من ناحية القيادة ومشاكل السيارات بـ النسبة لي اشوف النظام الامريكي فيه نقطة ايجابية و سلبية بـ نفس الوقت وممكن هيه اللي سببت لك اللبس في انك تحس انهم غير
منضبطين في القيادة اللي هي تفهم الشرطة
بـ معنى في بريطانيا زيد ربع ميل عن السرعة المحددة تلاقي الحكومة كلها فوق راسك بعكس امريكا اللي ممكن تتوقف فيها وانت مسرع وما تحاسب
تجربة شخصية لي : انا كنت راجعة لـ المدينة اللي ساكنة فيها و الدنيا تمطر ,, زوجي من شدة المطر ما قدر يقرى اللوح تبع السرعة وماشين 75 ميل في منطقة السرعة القصوى
فيها 30 ميل !!!!!!!!!! وقفنا الشرطي وقال له زوجي انا ما قريت اللوحة بسبب المطر رجع لنا الرجال الاوراق وقال الجو ممطر فـ انتبهوا وانتوا تسوقوا واذا شكيتوا في السرعة
امشوا على اقل سرعة ممكنة ,,
فيه ناس اتكلموا عن رشاوى لازم تندفع عشان تمشي الاوراق ومش عارفة ايش
انا زرت اكثر من ولاية في امريكا من ولايات راقية الى ولايات مشي حالك و بـ صراحة عمره ما صادفني هـ الموقف !!! بس صدقني المبتعث اللي يسوي هـ الشيء هوه اللي جابه
لـ نفسه
يعني انا من حقي احصل على افضل الخدمات لاني ادفع فلوس !! يقولوا لي ملحقيتك تدفع ! طيب الملحقية هذي لخدمتي انا وما اخلي احد يستغل الملحقية ويستخدمني كـ جسر لـ هالشيء
>>>> هوه لو حصل لي اني العب على الملحقية ما رح اقصر بس انا بنت البلد هع هع هع
لو اي شخص يطيح في موقف زي كذا يكلم المسؤل عن هـ الموظف ما كان شفنا استغلال السعوديين الشنيع
يجي السعودي كحيان منتف وتلاقيه كل يومين ثلاثة مجمع اخوياه الامريكان و عازمهم !! احنا نشوفها كرم واللي يسوي كذا شخص اجودي ورجال كفو بس هم يشوفوه غباء
المشكلة انه نجي بـ ثقافتنا ونعيش في ثقافتهم لا هم اكتسبوا ثقافتنا واحنا ناخذ اشين ما عندهم !!!!!!!!!!!!!!


اوروبا جميلة كـ زيارة كـ تقضية اجازة كـ جلسة يومين تغير جو اما كـ سكن !!! معليش
اي مكان في الدنيا ان شاء الله الـ هند رح يكون عندي افضل
لانه اوروبا غالية ,, سكانها الى حد ما فيهم العدوانية ,, مخرجاتهم التعليمية مو ذاك الزود ,, والاهم انه افشل واحد في امريكا يتوظف اسرع من اشطر واحد في بريطانيا !!!

امريكا فيها عيوب واجدة والاخوان اللي يقولوا امريكا ما فيها هـ العيوب ممكن يكون حظهم الحلو لعب دور كبير في هـ النظرة
لكن ما تعتبر الافضل و برضوه ما تعتبر الاسوأ
يعتمد على المكان اللي انت فيه ,, الولاية اللي مختارها ,, الاماكن اللي تروحها ,, وقبل كل شيء طريقة تعاملك
*** افتكرت شغلة ملاحظتها في كل اخواننا السعوديين دائما عندنا كلمة ابغى بـ معنى تروح تطلب من ستار بكس تقول ابغى دبل اسبريسو بينما الامريكان عندهم من الذوق
انك تقول من فضلك ,, احنا ما ندقق كثير على هـ التفاصيل لانه في ثقافتنا الكلمة تعتبر جدا عادية بس عندهم يعتبروها فضاضة !!!! فـ احسنوا انتقاء الكلمات تلاقوا معاملة ولا احسن