مساعدة من يفعل الخير لا يعدم جوازيه .. لا يذهب العرف بين الله والناس ..مساعدة بشأن اللغة ..!

السلام عليكم ورحمة الله وبركاته

إخواني وأخواتي الأعزاء

أنا طالب في مرحلة اللغة ولي ستة أشهر .. حالتي غريبة مريبة لدرجة أحس إني ماني سعودي !؟
مشكلتي مالقيتها عند أي سعودي بس لقيتها في زملاءي الصينيين ألا وهي السبيكنق ..
أنا مبدع ومتفنن في الكتابة أكتب ثلاثة أنواع من الإسيات بقدرة فائقة ولله الحمد .. قارئ متمكن مع إني ما أفهم كل شيء بالتفصيل بس أفهم الفحوى .. أفهم الجرامر بشكل رائع ..وكل هذي الأجزاء الثلاثه مستوايا فيها في المعهد في الليفل قبل الأخير ..
هذا كله ولله الحمد والمنه ..
لكن مشكلتي هي السبيكنق والليسننق .. من يوم جيت لأمريكا وأنا ساكن مع طلاب أمريكان والسعوديين ما أقابلهم غير في الجامعة حتى إنهم يقولون لي إنت متكبر علينا ولا أيش !؟
باقي لي الترم الجاي واللي بعد راح آخذ فيه ماده أو مادتين بالكثير وأخلص وأنا خايف إني ما أتقن اللغة ..
أنا دخلت محاضرات في الجامعة لغتهم جدا صعبه وتدوخ ..!
وكمان عندي مادتين إليكتف وحده منهم عن الكوميونيكيشن ما أنبس فيها ببنت شفة إلا إذا كلمتني الدكتورة ..
وأخاف إذا تخرجت من المعهد ما أفهم زين ..!
أنا أعرف جزء من مشكلتي .. أنا أستحي مره أو بالعربي أخجل جدا وأخاف من الخطأ ..
الأمريكان اللي معايا جدا طيبين بس مايلقون مني تفاعل لدرجة إنهم يقولون لي ليش ما تجلس معانا وتطلع وزي كذا ؟
بس أنا مره ما اندمجت معاهم ..
وأحيانا يجيني هم وغم وأقول أبغى أسكن لحالي بس لي صاحب الله يجزاه خير مبلشني يقول لا عشان اللغة وما أدري أيش ..
والله ما كتبت هذا الكلام إلا من الهم إللي جاني الليله .. أدور حلول .. الله يجزاكم خير ..
أنا فكرت فكره بس ما أدري تنفع ولا لا ..
دخلت على موقع الكوميونتي كوليج في مدينتي ولقيت عندهم برامج دورات ويشترطون فيها لغة متوسطة وأنا درجتي فوق المتوسط على حسب الإختبار .. فقلت بروح أدرس عندهم شي أحبه إمكن ينطلق لساني..
هذا والسلام ...