أي من هذي الجامعات الأنسب لي ؟ ( ساهموا في نجاحي ، من خلال مساعدتكم )

السلام عليكم ورحمة الله وبركاتة

أنا طالب ( تقنية اتصالات ) على وجهة التخرج ، وبإذن الله ناوي أكمل الدراسة في نفس التخصص ( هندسة إتصالات ) بنظام المعادلة في أحد الجامعات الأمريكية و كتحديد مبدئ في أحد جامعات أو معاهد CA كالفورنيا .

الإستفسارات :

متطلبات القبول في الجامعات القوية مثل :

Stanford University

طبعاً ستانفورد ترتيبها في التخصص حقي 2 على الجامعات الأمريكية وترتيبها العالمي 15 .

University of California, Berkeley

وبيركلي المركز 3 في التخصص في الولايات المتحدة ، و ترتيبها العالمي 22 .

Georgia Institute of Technology

وجورجيا المركز 4 في التخصص في الولايات المتحدة ، و ترتيبها العالمي 88 .

- California Institute of Technology - Caltech

كاليفورنيا للتكنلوجيا Caltech المركز 7 في التخصص في الولايات المتحدة ، و ترتيبها العالمي 10 .

Cornell University

ترتيبها في التخصص في الولايات المتحدة المركز 8 ، و ترتيبها العالمي 14 .

University of California, Los Angeles

ترتيبها في التخصص في الولايات المتحدة المركز 13 ، وترتيبها العالمي 31 .



أنا طالب عادي ( دراسياً ) اتوقع التخرج بمعدل 4 من 5
هذا الأسبوع ان شاء الله بختبر ( كامبردج للحاسب ) وبعد اسبوعين بختبر ( Cisco ccna ) .
هدفي ألتحق في نفس معهد الجامعة الي ناوي أكمل دراستي فيها عشان يسهل علي القبول .

السؤال :

هل لي فرصة قبول في هذي الجامعات والمعاهد ، أم أبحث عن جامعات ترتيبها اقل ، وياليت تعطوني اسماء الجامعات المناسبة لمستواي من القائمة الي فوق بالترتيب ، او حسب سهولة القبول فيها .

واذا فيه احد من الشباب يدرس في أحد منهم يا ليت يعطيني فكرة أوسع :)

وشكراً لكم ، ، أتمنى التوفيق للجميع

أنا متأكد أن كل من شاهد الموضوع ولم يساعدني فهوا ليس لدية المعلومات الكافية . . ولكن لكم كل الشكر للإهتمام .

انتظر . . والله يفرجها :)

UP

Help me please

السلام عليكم ورحمة الله وبركاته أخي الكريم

أول شيء انت ما ذكرت المرحلة الدراسية ، هل انت بتدرس دبلوم في الوقت الحالي وناوي تكمل بكالوريوس؟؟؟ أو على وشك التخرج من البكالوريوس ورايح تكمل ماجستير؟؟؟

وبالنسبة لسؤالك أنا اشوف من الخطأ إنك تحصر الجامعات وانت بعد ما قدمت عليها ،،، الجامعات اللي حطيتها كلها قوية وخصوصا ستانفورد ،،، لكن ممكن تقدم عليها كلها وما يجيك قبول ولا وحده منها ،،، لا سمح الله

اتخرج ان شاء الله بتقدير عالي ، وقدم على كل الجامعات اللي تخطر في بالك ، بعدين لو جاك قبول من كذا جامعة وقتها قرررر ،،،

والشيء الثاني اللي حابب اذكره انه إذا كانت شهادتك دبلوم فليس بكل الجامعات الأمريكية تقبل بالدبلوم من السعودية ،،، فممكن الخيارات عندك تنقص ،،،

وصدقني ما فيه احد يعرف عن كل الجامعات في أمريكا ، كل واحد يتكلم بحكم خبرته ، لأنه اغلبنا درس في جامعة وحدة أو اثنين فبالتالي ما راح يعرف عن بقية الجامعات ،،،

اتمنى ان تكون وصلت الفكرة ،،،

تحياتي ،،،

وش بتدرس؟ بتكمل بكلريوس؟ ولا عندك بكلريوس و بتاخذ ماستر؟

اذا بتكمل بكلريوس ما اعتقد ولا وحدة من ذا الجامعات بتعادلك شي...لكن انت جرب معهم

شكراً يعطيكم العافية Twisted - First Officer

طبعاً انا دبلوم وبكم بكلوريوس بإذن الله .. وان شاء الله زي ما قالو الشباب براسل الجامعات واستفسر ..

بحكم اني متخرج من نفس كليتك ونفس تخصصك من قبل سنتين ..
لاتفكر في المعادله لان اكثر الجامعات ماتعادل الدبلوم وخاصه دبلوم الاتصالات ..

اذا تبغي تعادل، انصحك تكمل بنظام تجسير في السعوديه او تروح كليه الباحه الاهليه اغلب الشباب راحو هناك وعادلولهم سنتين ..
في حاله انك تدور ع المعادله ، لو تبغى تبدا من اول وجديد تعال هناك لانك ماراح تلقى جامعه تعادل .. مو تحطيم بس لازم تعرف الواقع قبل ماتجي..

وعلى فكره الجامعات القويه مستحيل تعادلك ماده وحده :)
خاصه جورجيا تيك :D

صعبة تعرف الا انت جربت بنفسك. فلذلك ضبط لك ايميل حلو و ارسل لهم اذا هم ممكن يعطونك قبول مشروط و انتطر ردهم. لان ممكن يقول لك شخص هنا انهم ردوه ثم تجرب حظك انت و تمشي معك يعني حرام توقف طموحك بسبب حالات بعض الطلاب. و الايميل ان ما نفع ما ضر :)

الجامعات اللي حطيتها قوية ، و لو لقيت قبول منها حتى لو بتضطر إنك تبدا البكالوريوس من البداية أفضل لك من أنك تدخل جامعة تعبانة أو ما لها أي تصنيف واضح داخل أمريكا حتى لو كانت موصى بها من الوزارة
لكن حط في بالك أن الجامعات القوية هذي يبي لها شغل و اهتمام و عقلية ، إذا انت قدها أنا أنصحك بيها حتى لو بديت البكالوريوس من البداية .
< دائما و أبدا الإنسان أعرف بظروفه و قدراته ، و احنا اللي نعطي نصايح أو بالأصح اقتراحات نقدمها بناء على تفكيرنا لكن قد يكون ما يناسبك رأينا ، فإذن أنت المسؤول عن قرارك و لذلك فكر في كل النصائح و الاقتراحات و فصّل قرارك كما يناسبك >

بالنسبة للمعادلة ، و الله ما عندي فكرة ، إن شاء الله الإخوان أصحاب التجربة يفيدونك . استفد من خاصية البحث في المنتدى و بإذن الله تبي تلقى الكثير من المواضيع المفيدة .

وفقك الله

كلام Me صحيح .. شهادة الدبلوم ماتعادل في الجامعات الامريكية .. لو جيت بدبلوم تدرس من اول وجديد للبكالريوس (اربع سنوات) ..
لكن اذا كنت ناوي تكمل برى فعندك حلين ... اما انك تكمل بكالريوس بالسعوديه وبعدها تكمل ماستر برى ..
او انك تسافر بشهادة الدبلوم وتقدم عليهم وهم بياخذونها على اساس اربع سنوات بكالريوس ..
وتكمل المواد العامه .. وتشوف الادفايزر حق التخصص حقك اللي بيحطونه عليك .. تقدر تكلمه وتوريه الدبلوم وتوريه المواد اللي اخذتها ..
وراح يحذف لك بعض من المواد المقرره عليك (يعملها Wave ) .. وهذا راح يساعد على تقليص مدة الدراسه ...
واحيانا بعض المواد اللي تدرسها عندهم اذا جبت فيها درجة عاليه .. احيانا تحذف باقي المواد المرتبطه فيها (لو كانت نفس الشيء) ..
وهذا اللي حصل معي .. بعض المواد حذفتها الادفايزر بسبب درجاتي في مواد ثانيه .. وبعضها سبق وحذفتها بسبب أني اثبت لها بمعرفتي بما يدرس ببعض المواد الاخرى .. (كل ماده اثباتها على نوعها .. )...
وايضا على حسب معرفتي ان الحذف ماراح يكون اكثر من 30 ساعه ..


فالمسأله تحتاج الى تفكير مسبق .. وماهي معقده بشكل كبير .. فانت عندك هذا الخياريين (الخيار الثاني انت وحظك بالادفايزر اللي يكون عليك بعضهم متساعدين بشكل كبير وبعضهم نص ونص )..

هذا والله اعلم ..,