هل انتهيت من مرحلة اللغة بنجاح ؟؟؟ اعطينا تجربتك للفائدة ..

ماشاءالله ، موضوع يحمس ويشجعع .... مشاركات جميلة ماقصرتوو

نبغى نشوف تجارب أكثر وين الأحوة والأحوات ؟

السلام عليكم ورحمة الله وبركاته ..
أولا انا اعتذر من صاحبة الموضوع لتأخري بالرد .. ولكن وقت اضافة الموضوع كان بوقت اختبارات عندنا .. فبالتالي ماشفت الموضوع ..
خصوصا ان الموضوع ذهب مع ادراج الرياح بالمواضيع القديمه نوعا ما .. وجزاه الله خير اخوي CFO اللي رفع الموضوع برده وخلاني اشوفه من جديد ..

اعتقد ان الاخوان ماقصروا بردودهم وارائهم وتجاربهم بهالخصوص ..
واعتقد اي اضافه بتكون من عندي راح تكون كتجربه لان كل الطرق سبقونا فيها الاخوان .. ومثل مايقولون ان التعلم له طرق كثيره ولكن على الشخص اختيار الطريقه اللي تناسبه ..

لكن من الممكن ان افيدكم ببعض من الاشياء اللي انا اسويها .. واللي ماشيه معي ..


طبعا من الغلط اننا نهتم بالاكسنت .. لكن ماهو غلط اننا نتعلم .. الاكسنت يجي مع الوقت تلقائي ..
كثر ما يتعلم الشخص من كلمات كمعنى ونطق وكتابه .. كثر مايرتفع مستوى اللغه عنده بشكل تلقائي ..


اذا احد مثلا تعلم كلمة من البدايه وكان ينطقها صح .. وبعد فتره من ممارسة اللغه سمع نطقها بالعاميه ورجع يحاول ينطقها مثلهم .. فهذا غلط ..
يعني مثلا كلمة Water .. الناس تجي من السعوديه غالبا ينطقونها صح .. لكن يسمعون الاكسنت ويخربطون الدنيا فيها .. ويصير نطقهم غلط ..
بالتالي لو سووا كل كلمه بهالطريقه راح يلخبطون وهذا اللي أخر اكثر الناس بتعلم اللغه بشكل سريع ..
فمن الافضل دائما انك تمشي على الكلمة اللي تعلمت نطقها الصحيح من الاول ولا تهتم باللهجه العامية لاهل البلد ..
حتى لو تعلمة كلمة بريطانيه بنطق بريطاني وجيت امريكا .. استخدمها لاتغيرها ابدا خلك ماسك على نفس الخط ..


مع الوقت راح يكون فيه ممارسات للغه مع اهل البلد وراح تتعلمون كلمات جديده منهم وراح تنطقونها مثلهم حتى لو ماتعرفون كيف تكتبونها ...
وهذا شيء عادي ..
لكن اهم شي تركزون على شغله وحده .. اهم شي اي كلمه الواحد يبي ينطقها مو لازم تكون نفس اللهجه .. اهم شي انها تكون مفهومه ..


وبعد فتره من الوقت ولما تتمكن من اللغه تلقائيا راح يصير عندك تنقيح لمعلوماتك باللغه وتنتقين الكلمات المناسبه والطرق المناسبه وما الى ذلك ..




وهذي الطريقه راح تسهل على المتحدث بانه يتحدث بطلاقه بسرعه .. لانه يطلق لسانه ومايربطه باي عقده من العقد اللي في باله ! ..




اما بالنسبه لطرق المذاكره وجدول الدراسه اليومي .. فانا افضل ان تكون المذاكره بشكل يومي ..
فيه مايسمونه بالسيلبس وهو جدول بالمنهج اللي راح تمشين عليه بالماده طيلة الفصل ..


انا امشي على السيلبس .. اشوف مثلا وش الموضوع اللي راح ندرسه بكره واروح اقراه واحظر له ..
اركز اول شي على الكلمات اللي ماعرف معناها واترجمها واحفظها .. وبعدين ارجع واقرا بمتمعن لحتى افهم الموضوع .. كتحضير فقط !
واروح ثاني يوم اكون عارف ايش راح يتكلم الدكتور فيه واكون محضر معي كم سؤال (لو فيه اسأله) ..
ولما اخلص من الجامعه ارجع اشوف الواجبات اللي علي اخلصها وارتاح لي كم ساعه واراجع اللي اخذته قبل انام بالليل ..


طبعا من اهم الاشياء بالجامعه الجدول ثم الجدول ثم الجدول ..
نصيحه لكل الاخوان لابد يكون الجدول منسق بعنايه ومرتب اوقات الكلاسات بشكل يناسب وقتك ..


افضل طريقه للجدول هي ان يكون الدوام مضغوط اما على ثلاث ايام او يمين بالاسبوع ..
يعني اما ان يكون ثلاث ايام ( اثنين و اربعاء و جمعه) ..
او يومان ( الاثنين و الاربعاء) او ( الثلاثاء والخميس ) ..


وطريقة الاختيار تعتمد على مستوى صعوبة الماده بنظرك .. وايضا على الاوقات المسموحه من الدكاتره ( لان احيانا فيه مواد يكون مالها الا مثلا وقت واحد مافيه اي دكتور ثاني يدرس غير هالوقت ) ..




ولا بد ان يكون هنالك توزيع بين المواد بالجدول يكون يختلف .. يعني لو كان عندك اثنين وثلاثاء يومين ورى بعض ..
فحاول ان تكون مختلفتين بالمستوى والموضوع .. يعني مثلا الاثنين عندك رياضيات .. الثلاثاء لابد يكون عندك ماده خفيفه غير مواد العلوم مثلا بالتخصص حقك او مادة من المواد العامه تعبير مثلا او شي من هالقبيل .. بحيث يكون تركيزك الاعلى دائما على الماده الاصعب وبالتالي يكون الضغط عليك اخف ..




بهذه الطريقه يقدر الواحد يوزع وقت المذاكره ويوزع حتى عقله بين الكتب بشكل ممتاز وبدون اي جهد يذكر .. بالعكس يلاقي الوقت الكافي انه يذاكر ويركز بدون اي مجهود ..


لان بشكل عام احنا كطلاب نحتاج اننا نبذل ضعف مجهود الطلاب الاخرين .. والسبب هو اللغه !




هذي الطريقه تعلمتها من واحد من اصحابي القداما الله يذكره بالخير ..
كان يسويها .. وكان من الناس اللي مايمر يوم الا وهو مصمغ وجهه بالكتاب .. ماشاء الله عليه ..
اكثر شخص شفته في حياتي يذاكر باجتهاد .. يذاكر مايقارب فوق السبع ساعات باليوم وما عنده اي مشكله لو يكون مصحصح وماتعب ..
لكن الشهاده لله .. الرجال من الاوائل .. الا الأول على دفعته بتخصصه ! .. ومن الناس اللي رشحوا الى الماستر قبل ان ينتهي من البكالريوس ..
(الله يوفقه ولا يضره ويستر عليه ويرزقه من حيث لايحتسب) ..


صحيح ممكن نقول انه ماشاء الله عليه مجتهد وحنا مانسوي ولا ربع اللي يسويه ..
لكن صدقوني انا والله حتى عشر دقايق باليوم ماكملها على كتاب .. فلما سألته كان يقولي حدد وقت للمذاكره والتزم فيه مهما يكون السبب ...
الوقت اللي احدده بالمذاكره مثلا ساعه او ساعتين .. ادرس فيها واذا تعبت او طفشت شفت كم وقت اخذت بالمذاكره وكم بقا على الوقت اللي انا حددته ..
ورحت وريحت وغيرت جو شوي طلعت برى الشقه او رحت السوبرماركت .. وبعدها رجعت وكملت واحسب من الوقت اللي اخذته اكمله .. لحتى اكمل الوقت اللي حددته !. .


وعلمني على نظام الجدول وكيف انسقه حتى اقدر اوزع نفسي بين المواد بدون ما اضغط على نفسي بشكل كبير ..


والحمد لله اموري تمام ..


وبالنسبه للكتب اللي ممكن تفيد .. فانا انصح المبتدئين باللغة واشد بقوه على كتب الاطفاااااال .. قرائتها ممتعه وبنفس الوقت تقوي اللغه بشكل كبير ..
واما اللي قرائتهم فوق المتوسط .. فانصحهم بقرائة مايجذبهم من مواضيع .. والاكثار من قرائة الجرائد والمجلات ...






اما نصيحتي للطلاب الجدد .. أنهم ياخذون بنصيحة الاخوان اللي سبقوني ... ويحاولون انهم بقدر المستطاع يركزون على اللغه بشكل مكثف (لمن هم بالمعهد) .. لان فترة المعهد اذا الواحد ماكثف تركيزه على اللغه .. صدقوني راح يجيب العيد على قولهم .. هذا لو ماتحمل الضغط اللي بيجيه ..
او ممكن يسوي مثل ماسويت .. يتعلم لغه ويركز على اللغه وبنفس الوقت يذاكر المواد اللي بالجامعه .. وراح يبقى على هالحال مايقارب سنه على الاقل حتى يتعود على اللغه ويركز على مواد الجامعه ..


علشان كذا انا اقول فترة اللغه لا احد يضيعها بالوناسه والطلعات والجيات بدون مايخلي تركيزه الاول والاخير اكتساب اللغه بشكل مكثف .. بمزاولة اللغه مع اهل البلد والقرائه والاستماع المستمره .. والكتاااااااابه اهم شي .. بشكل دائم ومستمر وغير منقطع ابدا ..


لان اغلب الطلاب اللي يتخرجون من المعاهد ويدخلون الجامعات وينقلون من جامعه لاخرى ويشتكون من صعوبة المنهاج .. هذا بسبب لغتهم ماتكون بالمستوى المطلوب او اللي يهيئهم لفهم الماده بالشكل المطلوب ...


علشان كذا لابد ان الواحد يفكر بمسألة اللغه بأهمية قصوى .. ! هذا للي فعلا مهتم لدراسته وبعثته ! ..




اانا اعتذر اني اطلت بالكلام ..


الله يوفقكم جميع وييسر لكم اموركم ويردكم لاهلكم سالمين غانمين يارب العالمين .. .




اخوكم محمد ..