استفسار زبدة . افضل الخطوووط !!!!! عطنا تجربتك لاهنت

على سالفة الكحول

فالخطوط القطرية كان جنبي هندي

طلبه له Beer و قعد يشرب

مدري وش صار ما اشوف الا كبه كله علي

على طول ناظرت فيه مع ذيك النظرة المخيفة و قلت what the **** is wrong with you

و قام يهز راسه و يقول I'm really sorry و كررها الفين مرة

اخرتها قلت له don't worry just let me watch the movie in peace

اجل كاب علي بير...لو انها ريد واين ولا فودكا مشيتها له بس بير عاد لووول

ههههههههههههههه أمآااااااااا ..
هي لو لحآلكـ تهون بس أنآ أعتبر معي عآئله ومآقد شآفوآ هآلمنآظر فمآبآلكـ وآحد وسخ يكون يشرب جنبكـ !!
وآلله إني شآيل هم آلكحول بآلطيآرهـ ,,


- - - مشاركة محدثة - - -


آللهم آاااااااامين يآرب أجمعين .. تسلم على هآلدعوهـ ,,

طآلمآ إنت بآلدرجه آلسيآحيه ترى آلمقعــد مآيفرق كلهآ مثل بعض ,,
آمآ الأمريكيه وآلله مآعندي علم فيهآ ..

السلام عليكم ورحمة الله وبركاته ..


والله ياغالي مسألة الطيران تعد مسألة مزاجيه .. يعني فيه ناس يعجبهم شي وفيه ناس مايعجبهم هالشيء ..


غير كذا لو جيت تسأل .. راح تلقا الاجابات متناقضه ومختلفه .. ناس تمدح وناس تذم .. والسبب ان اساسا المسافرين نفسهم يكونون في كراسي مختلفه ودرجات مختلفه .. يعني ماتقدر تقارن اللي راكب بالبيزنيس كلاس .. بالفريست كلاس .. هذولا لهم خدماتهم وهذولا لهم خدماتهم ..!


والاغلب يشوف ان درجات الاماكن بالطياره نفس اللي بالسعوديه .. ومايدري ان الدرجات تختلف ..
مثلا الفريست كلاس بالطيران السعودي المحلي .. يعني انك في مقدمة الطائرة ..


اما الفريست كلاس بالطيران الدولي يعني انك بالدرجه الثانيه (واحيانا يسمونه ايكانومي في بعض الخطوط ) ... لان اللي بالمقدمه هم البيزنيس كلاس ..!


هذي فقط نظره سريعه حتى تكون عندك خلفيه بالامر قبل تقرر وتقارن ..


انا تعاملت مع كذا خطوط .. ولقيت الكويس ولقيت اللي مش كويس ..


كل خطوط تختلف بإختلاف اللي تبيه انت ..


اذا تبي كراسي .. فعليك بالاماراتيه .. واذا تبي خدمات فعليك بالسعودية .. واذا الرخص عليك بالامريكية ..!


المشكله اذا كنت بتدفع التذكره من جيبك .. فارخص شي راح يكون لك هي خطوط DELTA ..


وانا ماسك عليها ماخليها .. رخيصه وزينه .. وخدماتهم جيده جدا يعني مايقصرون معك .. والتلفزيونات شغاله ..
وكراسيها جيده جدا .. لاهي قاسيه ولا لينه مره ولا كبيره ولا صغيره .. متوسطه بكل شيء ..
ومريحه لمن بيكون بجهة الممر او النافذه ..


لكن ماهي اريح من السعوديه والاماراتيه ..!


الخطوط الامريكية Americans Airlines .. هم بعد حلوه .. ومقاربه لدلتا ماهنا فرق كبير ..
والسعر يختلف على حسب الوقت اللي انت حجزت فيه ..


طياراتهم الداخليه لاباس فيها .. عادي مشي حالك لاتفكر كثير فيها .. مثل طيارات السعوديه المحلية .. تكاسي مو طيارات .!
بس كراسيها كويسه ماعليك .. وتقديري لها جيدجدا لاباس فيها معقوله يعني ..


الخطوط الامريكية افضلها بعد دلتا .. لخدماتهم وكراسيهم ارحم وافضل من الباقين ..


اما الخطوط البريطانيه KLM .. فعلى غلاوتهم .. الا اني اضمن لك ماتوصل لامريكا بالسلامه الا تكمل شهر واقف ولا تنام الا على بطنك من كراسيهم ! ..
ياخي انا اول مره اشوف كرسي يابس !؟
جربت اكثر من مكان بالدرجه الاولى .. وكلها يابسه ! ..
لدرجة اني كل خمس دقايق واقف .. والمشكلة ماعرفت انام بسبب هالكراسي .. لكن بالنهايه شفت لي ثلاث كراسي بالنص ماحد فيها رحت وفكيتها وتمددت على اساس انها كرسي واحد هههههه الله لايعودها من رحله حمدت ربي اني وصلت بالسلامه ..
وتبت اني اطلع فيها مره ثانيه ..




الخطوط الخليجية < مثل اختها السعوديه اقشط واربح ! ..


سبق ورحت فيها .. جيده .. كراسيها مريحه .. ولكن الله يعينك على الناس اللي معك والله يعينك اذا كان الكرسي حقك تقدر تنزل ظهره كامل والا لا .. انت وحظك ..


وخدماتهم تسليك مثل مايقولون ..




اما عن مسألة الخمور بالطياره .. فانا لا اهتم فيها سواء قدموا خمور او ماقدموا .. انا ماراح اشرب علشان تكون اولى اهتماماتي ..
واللي يشرب جنبي اخليه كيفه .. اتلحف بهالشرشف اللي عندي وغطي عيوني ونام وفي داهيه هم وخرابيطهم هههه


بس غالبا اول ما اركب الطياره اسال اللي يجلس بجنبي اذا يشرب او لا .. اذا قال ايه .. احاول اكلم الموظفه تستبدلني مع واحد ثاني مايشرب ..


وبكل الاحوال اغطي عيوني وانام طول الرحله ..




الخطوط عموما تعتمد على اللي يهتم فيه المسافر ..
انا اهتم فقط بالكراسي والتلفزيون مابي شي ثاني لا اكل ولا بطيخ عادي اقعد يومين ما اكل ماعندي مشكله اهم شي المويه عندي والتلفزيون قدامي والكرسي مريح .. خلاص يكفيني ..


واما عن الترانزيست .. فهذا يعتمد على اختيارك انت .. فيه رحلات يكون فيها ترانزيست ساعه وساعتين ..
وفيه رحلات اربع ساعات .. وفيه رحلات توصل الى يوم ...


لكن دائما انا افضل الرحلات اللي يكون الترانزيست حقها لا يزيد عن اربع ساعات ولا يقل عن ساعتين .!


والسبب اني ماحب انتظر كثير ولا احب استعجل بالامور .. لاني احسب حساب التشك ان والتفاتيش وبعد البوابات وما الى ذلك من امور ..


ونصيحة اخ .. اي مطار دولي اول مره تجيه .. لازم يكون الترانزيست فيه لايقل عن اربع ساعات .. خصوصا لو كانت اللغه عندك تعبانه ..


















هذي تقريبا نظرتي وتجربتي الخاصه ..

ما عليك...ان شاء الله امورك بالسليم

و لازم تتعود على الكحول...لانك بتشوفها فالطيارة و كل مطعم تروحه

يعني ولد خالتي كل ما شاف كحول او شخص سكران تنسد نفسه و يصير نفسية و يخرب ام الجو

فـ ما ينفع كذا

أنا رحلاتي الدولية جربت الخطوط السعوديه والبريطانية

طبعا البريطانيه كانت تجربتي فيه سيئة لأبعد حد
الخدمات خايسه تطلب مويه تجلس ساعتين ماوصلت
الكرسي ضيق الا في حاله كانت عندك موهبه تقدر تنام وانت جالس فتضبط معك

لكن لا انصح فيها أبدا أبدا أبدا أبدا


الخطوط السعوديه ممتازة

خدمات دلع
اكل سنع
كرسي مريح
يوفرون لك بطانيه ومخده
يغدونك وبعدين يطفون الأنوار يعني يالله نااااااموووووووووووووووو وهدوء
حتى القهوه العربيه يوفرونها لك

وعندي لك نصيحه أن كأنك راعي نوم بالطياره ( مثلي)
انا أحجز لي مقعد أون لاين قبل الرحله واحرص انه يكون جنب الشباك عشان اتكي راسي واسدح الكرسي و احلااام ورديه

فانصحك لو اخترت خطوط أحجز المقعد أون لاين ومقعدك بيبين عندهم لما تروح تقص بوردنق

وبس

بالنسبه لدلتا
فعلا مثل ماذكر الأخ

تعتبر جيده وفيها شاشات مشتركه طبعا مب انت الي تتحكم فيها هو من نفسه يعرض الي يعرض
ويوزعون مشروبات مجانا وشويه نقنقة اما الباقي تدفع فلوس

والكرسي كويس نفس حق السعوديه تقريبا اللهم الكرسي الي قدامك قريب منك أكثر
بشكل عام خطوط دلتا جميله بالنسبه للرحلات الداخلية

والاهم من ذا كله

عفشك لا ينسرق
الغالي حمله معك جوا الطيارة


واتمنالك رحله سعيده أن شاء الله

الف مليون شكر لكل من ساهم ورد على الموضوع

ومثواكم الجنة جميع

اييييييييه كذا الحين نعرف اللي لنا واللي علينا

شكلي بحجز على السعودية

بسسسس عندكم طراز طيارة معين من البوينج مثلا ؟؟ ولا اي طيارة وخلصنا ؟؟

حسستني انك بتشتري طياره ههههههههه


ياغالي هذي مافيها خيار .. الرحلات الدولية تكون على البوينج .. اما الداخليه تكون ع الجيت ..


فانت وحظك بالطياره اللي بتركبها ..

هههههههههههههه لا يمديك تشوف رحلة فيها نفس الطيارة اللي في راسك

عرفت ؟! بسس مو انت تختار الطيارة لا تختار الرررحلة الي بتطير على الطيار ذي <<اللي انت تبيها

ايه فديتك لكن مثل ماقلت لك الدعوه ماهي على الكيف .. يعني ممكن تلاقي الرحله في تاريخ ماتبيه .. وممكن تلاقي نفس الرحله لكن مغيرين الطياره صيانه ..
يعني شغلات مثل كذا .. فانت لاتعتمد اعتماد كلي على مثل هالامور ..
لان غالبية الطيارات في خطوط الطيران تكون موحده ..

يعني مثلا طيارات امريكانز اون لاين البوينج حقتها كلها مثل بعض الفرق ارقام الرحلات ..
اللي يختلف بالطيارات شي واحد .. وهو المعدات اللي داخلها (المستهلكه) ..
مثل الاسيات ممكن تكون ماتقدر تنزلها بسبب كثرة الاستخدام ..
او تلاقي كم شاشه ماتشتغل .. او سماعات ماتشتغل ..
يعني مثل هالامور ..

الله يعين بسس

شاكر لك جهودك الجبارة ولاهنت ومثوااك الفردوس وموفق انت والاخوان