ابغى رد على سوالي لاهنتم بالنسبة للتحويل من بنك سعودي الى بنك امريكي

السلام عليكم ورحمة الله وبركاته ,,,,,



مساكم الله بالخير ,, انا ابغى احول فلوس من بنك سعودي الى بنك اوف امريكا وش المتطلبات غير رقم الحساب اللي يطلبها البنك السعودي وكم مدة وصول الفلوس من حسابي السعودي الى الامريكي ,,,,,,


وجزاكم الله خير واتمنى يكون سوالي واضح ؟؟؟

والله يا اخوي لو تسمع الشور احسن شيء تخلي احد من اهلك ياخذ المبلغ ويحوله لك عن طريق
الـ ويسترن يونيون ارخص لك و الفلوس توصلك بـ نفس اليوم
البنك تقريبا التحويل ياخذ من 3-7 ايام (تختلف حسب البنك و برضوه اذا وافق التحويل ايام الاجازة )
و تقريبا ياخذوا بحدود 35 دولار عشان التحويل

بالنسبه للتحويل من بنك سعودي الى امريكي .. فاللي تحتاجه من معلومات هو :
- Routing Number
- Account Number
- Swift Code

طبعا بالاضافة الى عنوان فرع البنك الامريكي .. ومعلوماتك الخاصه ( اسمك الكامل + عنوانك ) ولابد تكون مطابقه للمعلومات اللي مسجله بالبنك الامريكي ..

طبعا طريقة الاضافة بسيطه .. من خدمة الانترنت البنكي .. تقدر تروح الى قسم الحوالات الدوليه .. وتسجل معلومات البنك الجديد الخاص فيك ..
وبعدها تنتظر الين تجيك الموافقه منهم .. عاد كل بنك له وقته الخاص .. فيه بنوك خلال 24 ساعه .. وفيه بنوك تاخذ بالايام .. لكن ماتتعدى 3 ايام عمل ..

عمولة التحويل للعملية الواحد لا تقل عن 50 ريال .. والبنوك تختلف بعمولتها .. لكن كلها متقاربه مابين الـ 50 الى 80 ريال للعملية الواحدة ..

المدة المستغرقه لوصول الحواله الى البنك الامريكي .. تستغرق مابين الـ 3 الى 5 ايام عمل .. واحيانا اذا وافق وقت التحويل بداية دوامات السعودية بالصباح .. يدخل بحسابك المبلغ في ظرف يومين ..
( يعني افرض انك حولت المبلغ يوم السبت الصباح بتوقيت السعودية .. تستلم المبلغ يوم الاثنين الصباح بتوقيت امريكا .. ! ) هذي كانت تصير معي كثير ..


اما اذا كنت تريد حوالات سريعه بنفس الوقت .. فالويسترن يونين موجود .. ولكن مايعيبه ارتفاع عمولته للحوالات ..
فالويسترن ياخذ بالنسبه .. كل مازاد مبلغ التحويل كل مازادت عمولتهم .. واحيانا تكون عملتهم عاليه لدرجة أنك تحس اخذوا مبلغ كبير من الحواله .. !

فالافضل انك تستخدمه فقط في حالات الطوارئ وللمبالغ المستعجله وتكون تحت الـ 1000 دولار ..


ايضا عندك مايسمى السبيدي كاش .. هذا نفس طريقة الويسترن .. لكن التحويل يكون فوري على الحساب البنكي ..
وعملتهم اقل من الويسترن بكثير .. يعني معقوله نوعا ما ..
طريقتها انك تسجل معلومات حسابك البنكي عندهم ( نفس المعلومات اللي فوق)) ويعطونك بطاقة عضويه .. ويصير كل ماتجيهم تعطيهم البطاقه ويحولون لك على الحساب المسجل ..
حد التحويل للحواله الوحده على ما اذكر 7000 الاف دولار .. ويكون المبلغ بحسابك دايركت ثاني يوم الصباح ..
( هذي لابد يكون واحد على اتصال معك دائم لان البطاقه بتكون باسمه وهو اللي بيحول لك كل مره ) ..


فيه عندك اخر طريقة تحويل اعرفها وهي الـ MoneyGram ..
نفس نظام الويسترن بالضبط .. لكن الفرق انه اقل عمله من الويسترن .. نظام رسومهم تقديريه ..
يعني كل مبلغ معين له مبلغ رمزي .. واعلى مبلغ رمزي لرسومهم على ماذكر كان 300 ريال اذا ماكنت غلطان .. هذا على 10 الاف دولار !
الحد الاقصى للعملية الوحده هي 10 الاف دولار ..
سرعة استلام الحواله ( فورية - عشر دقائق ) ..

هالخدمه موجوده بالسعوديه فقط عند البنك الاهلي .. ويسمونها الـ QuickPay ...

تقدر تستلم مبالغ التحويل من الموني قرام .. من اي فرع يقدم خدمة الموني قرام بامريكا .. وعادة تكون مكاتب الـ Express Cash .. اللي تختص بشحن بطاقات الفيزا والماستر كارد مسبقة الدفع و الموني اوردر والشيكات وماخالفها ..


هذي طرق التحويل اللي اعرفها بحسب تجربتي ..

هذا والله اعلم ..,

جزاكم الله خير وماقصرتوا يعطيكم العافيه ,,,,,,