ماذا يجب عليك معرفته عن الخدمات المقدمه في امريكا (انترنت, تلفزيون, كهرباء)

السلام عليكم,

نظراً لأهمية الموظوع, و لكي لا يقع احدنا فريسه للخداع او التقليص من جودة الخدمه, و لعدم توفر موظوع خاص بالخدمات العامه, اريد ان اقدم نصائح عامه بهذا الخصوص. بالتأكيد قبل ان تشترك في اي خدمه من المهم ان تسأل عنها من قد يقدم لك اجابه مفيده. فالشعب الامريكي لن يقدم لك نصائح و ذلك لأنهم يرجون بأن تدفع كل قرش تمتلكه في اقتصادهم ل (تحفيز) الوضع الاقتصادي. و هذا هو السبب انهم لا يتكلمون كثيراً --للأسف.

صغار السن او الاصدقاء الاجانب غالباً ما يقدمون نصائح مفيده و ذلك لعدم اهتمامهم وادراكهم لاهمية (تحفيز) الاقتصاد-- او كما يقول الامريكان: Stimulate the economy.

نبدأ بشركة الكيبل وهم من يقدم خدمة التلفاز. من اهم شركات الكيبل في امريكا هم:
- كومكاست ( او اسمهم الجديد = اكسفينيتي)
- شركة دش.
- دايرت تي في.

من ناحية جودة الخدمه, افضل تلك الشركات هي شركة كومكاست و ذلك لاعتمادهم على الكيبل المباشر و احتكارهم له. و اسوأ تلك الشركات هي شركة دش Dish TV. شركة دش تعتمد على اطباق الاستقبال, و من عيوبها انها تتأثر بالعوامل الجويه. كما ان خدمتهم دائماً ما تتعطل. يعني تصحى الصباح تلاقي نفسك مظطر تنتظر ساعات عالتلفون و تتهاوش مع واحد ماله دخل في الموظوع :swear:

بالاضافه لذلك, سمعت ان الشركه (شركة دش) تسحب مبالغ لم يتم اخبارك عنها من حسابك تحت مظلّة: تقديم خدمه ... مثل تفعيل خدمه او تركيب او او او ...

شركة دش طلعو لهم طلعه ذاليومين يقولون ان عندنا دش جديد اسود غير الدش القديم الرمادي و تراه احسن و مدري ايش ... خراط فاظي ... :secret:

شركة دايركت تي في ما سمعت عنهم شي و لكن اسعارهم مقاربه لاسعار كومكاست. واتوقع شخصيّاً ان خدمة دايركت تي في بايخه لأنهم يدسون لك الرسوم الزائده في باقاتهم بدون ما يعلمونك بشكل مباشر, وخدمات العملاء يشرحون لك الرسوم بشكل سريع و مباغت بحيث انهم يعتمدون على ظخ معلومات بحيث ان العميل ما يركز و تروح عليه ... :jumpon:

واذا قلت لهم عالتلفون يشرحون لك بشكل مبسط و خطوه خطوه يتجاوزون الرسوم و ما يقولونها, عشانها طلعت من ذمتهم (و ذمتهم يعني في التسجيل= قانونيّاً يعني الذمه :crazyeyes: )

طيب الحين دش خدمتهم تتعطل دائماً, و دايركت تي في وظعهم مشكوك فيه ... يعني ما فيه حل الا كومكاست ... طيب الحين خلونا نشوف الحيل اللي نقدر نلعبها على كومكاست.

طبعاً هم ياخذون فلوس من الدعايات اللي ما تخلص, و ياخذون فلوس من صاحب البرنامج اللي يبغى يحجز مكان, و ياخذون فلوس من القناة و من العميل يعني ما تكفيهم الفلوس ... ما لقو لها مكان .. بس هم اذكى من حسين اللي في درب الزلق... ما قالو بسنا فلووس يا حسيين :wha::wha:

طيب وشلون نحصل على خدمه منهم بارخص طريقه؟

هم عندهم عرض انترنت ب 30$ شهرياً ... يكون الواحد يشترك فيه .. طبعاً العرض هذا لمدة ست شهور بعدين يرتفع ل 70 اتوقع. اذا انت تقدر تقعد بدون تلفزيون ذالمده فهذا العرض كويس لك. ليش؟ عشانهم راح يجونك يطرونك تاخذ معهم عرض تلفزيون بعد كذا باجور رخيصه. غير ما اذا انت جيت من اول تقول لهم يرحم امكم ابي خدمة تلفزيون مع نت بسعر رخيص.

الحين, سواءً انت ناوي تاخذ عرض النت او تبغا تاخذ عرض مقدمينه هم وش النقاط اللي لازم تنتبه لها...

اول شي رسوم التأسيس ... او فتح الخدمه: ارفض اي عرض فيه رسوم تأسيس. بكل بساطه قول لهم ما ابغى رسوم التأسيس ... طبعاً ونت تكلمهم كلمهم كأنهم هم اللي يبون منك شي مو انت اللي تبي منهم ... كانك بتسوي والله انا الشخص الحبيب راحت عليك يابني ...

ثاني شي: اسألهم هل يوجد رسوم للفني اللي يركب الخدمه ... غالباً ما يعلمونك عن الشي هذا و يحاولون يجرون اهتمامك لأشياء اخرى مثل القنوات المتوفره و مدري ايش بس شغلهم الشاغل انك ما تسأل عن الرسوم هذي ... طبعاً زي اللي قبل: اي رسوم للتركيب ما راح ادفعها ...

ثالث شي: كم عدد الرسيفرات اللي تبيها و هل هي اتش دي ولا لا... غالباً يعطونك واحد اتش دي و الثاني رسيفر عادي. ( بس موب الرسيفر الصغير اللي كأنه بيجر!! انتبه)

الحين عند التركيب: جاك اللي يركب واحد بنطلونه متعلق و حالته حاله و يقعد يشتكي لك من هم العملا و كيف انهم وقحين ... والوقاحه كلها فيه ... انا هذا اللي حصل لي بالظبط بس من غبائي راحت علي:clap:

اول شي, تأكد ان عنده رسيفرين كبار ,,, زي رسيفراتنا في السعوديه ... و كل واحد معه ريموت. ثاني شي تأكد ان التركيب مجاني و انك ما راح تدفع شي ... ثالث شي خله يطوّل لك السلك ... يمكن بعدين تغير مكان التلفزيون من يدري .. ولا تبي تطلع التلفزيون للبلكونه ولا ولا المهم خله يسوي الاشياء ذولا كلهم ... اذا واحد من هذولا الشروط ما توافق بكل بساطه قل له انقلع ولا خله ينلطع عندك و تدق على خدمة العملا اللي راح يشرشحونه و يقولون له : اسمع الكلام يابني ...:bigwhack:

و نسيت ما اقول لكم قولو له يشيل حذيانه قبل ما يدخل, طبعاً هو عنده اكياس يصرفونها له شركته بس موب فاظي لك فعشان كذا ما يستعملها الا اذا طلب منه :greedy:

طبعاً قبل ما تشترك في التلفزيون اعرف ان ما فيه الا الدجه ... اهم قناة فيه هي ال True tv و كم قناة بايخات, و ممكن للي عنده عيال يهتم بقنوات الكرتون مثل cartoon network و ما شابهها ... فأهم شي انك تتأكد ان القنوات هذول موجودات.. و اذا قالو اسفين هذي لازم باقه و ما باقه قلهم ان قل عو (انقلعو .. )

ممكن بعضكم ما يدرك ليش الاسلوب الناشف اللي انا متبعه و اناشدكم باتباعه اسمعوا ذالقصه .

انا اشتركت و ادفع لهم مية دولار لباقه فيها نت و تلفزيون و تلفون (بعقد) ... يوم سولفت مع اصحابي في الجامعه قالت لي وحده انها دائماً تكلمهم بطرف خشمها و يعطونها اللي تبي لا و فالاخير تقول قلت لهم لا مابي شي ...:sneaky2:

و واحد ثاني يقول لي انه قايض التلفون بقنوات عشانه ما يحتاج التلفون ... و عطوه قنوات و فصلو التلفون ... انا لأ, عقد يا حبيبي تروح وين ... مع اني اقدر اسحب على مندوبهم و لكن ما فيه بديل للاسف :(

نسيت ما اذكر لكم شيئين بعد ... راح يطلبون من الشخص انه يضع مبلغ تأمين (اتوقع للعقد فقط) ولكن طلبو مني 100$ و قالو لي بنرجعها لك بعد ست اشهر من الدفع المنتظم ... و فقعت عيونهم بالدفع المنتظم ولا رجعوا لي التأمين :pinch:

دقيت عليهم قلت ليش؟ قالو لا يبغى لك تنتظر سنه مو ست شهور ... قعد اتهاوش معهم :swear: بس للأسف ما عندي بديل :(

الشي الثاني باقات الشوتايم وما شابهها ... يقولون لك تراها مجانيه لمدة 3 شهور ... غالباً بعد ال 3 شهور راح ياخذون عليك رسوم بسبتها ... وهي حالها حال باقي قنواتهم البايخه ... القناة الاولى احسن منها ...

و تذكرت لكم حيله بعد عشان تاخذون العلم من الامريكان, لا تسألهم وش احسن خدمه ولا شي ... لا :naughty: ... قل لهم (وياليت بشكل متعجرف) انك حصلت على خدمة كذا كذا (و قل الخدمه اللي تبغاها :)) راح يقولون لك على طول وش احسن شي و كيف انهم حصلو على شي احسن بسعر ارخص ... شعب عجيب والله :lol:

المهم تعبت من شركة التلفزيون ... والنت ... اللي عنده سوعال يجدعه تحت ...


======= شركة الكهرب:

غالباً يوجد اكثر من شركه لتقديم خدمة الكهرب لكل ولايه. انت عاد هنا اسأل صاحب المجمع و راح يعلمونك. تقدر تغير لشرات ثانيه في المستقبل اذا لقيت خطه تناسبك. في الخطه العاديه و في خطة اوقات الذروه و غير الذروه و من ذالقبيل ,, بس ما تسوا وجع راسها يمكن تقدر توفر 10 دلر يعني ... اهم شي تشوف ارخص سعر للواط ..

و من المهم ان الشخص يراقب صرفه و القيمه اللي تجيه لأنهم (( داااائماً)) يغلطون في حسابك مع حساب شخص آخر ... انا الشي هذا صار لي ولكن الظروف ما سمحت لي اني اتأكد, بس بكل دلاخه ما كلمتهم و قلت لهم تعالو تأكدو من عدادكم ... الا رحت اتروش بمويه بارده, و البس جكياتا في درجة حراره 8 تحت الصفر ونت ماشي , وما عاد قمت اغسل ملابسي الا في الشهر حسنه, و جبت لي دافور اطبخ عليه بدل الفرن الكهرب, و اشياء واجد :hitler: ... و مع كل ذا والفاتوره قاعده تطلع فووووووووق !! :g:

يوم جتني رساله منهم قبل اسبوع يقولون معليش حنا غلطنا في فاتورتك خلال السبع شهور اللي راحت و القيمه اللي دفعتها راح نرجعها لك ... قلت تمام ... و قلت وشذالدلاخه اللي خلتني ما اكلمهم من اول ... بس يلله خيره ...

باقي التأمين حقهم, ياخذون 200$ تأمين و تختلف الشركات بس العاده ياخذون ميه على طول و الميه الثانيه تقسيط ... خمسين خمسين ...


المهم عاد الغاز ما عندي عنه خلفيه بس اعرف انه رخيص مره ...

الجوال ارخص شي شركة سمبل موبل, بس النت عندهم خراط فاظي ... اللي بيشترك معهم اما ياخذ باقة البلاك بيري ب 50 دلر ولا الباقه المفتوحه ام 40 دلر ... يقولون لك ادفع 50 و تاخذ ثري جي اصلاً ما عندهم ثري جي خلقه وافهم يا فهيم ...

و كل خدمه و انتم بخير ...

موضوع بطل و يفيد اللي مبتعثين من جديد
ربي يجعله في ميزان حسناتك

الله يعطيك العافية على المعلومات

أنا أكثر شئ اعجبني يف الموضوع هو كلمة (دلر) هههههههه


عندك شركة Cox كويسة في النت والتلفزيون

تشكر على طرحك لخلاصة تجربتك تحية لك ,, أعجبني فيك سالفة عاملهم على أنهم هم اللي يبونك مو أنت اللي تحتفي فيهم وكأنهم مسوين لك معروف كعادة أبو عراب,, لا شك أن المعاملة الحسنة حاجة مطلوبة لكن مو على حساب مكافأتي اللي تكفيني وزود,,

كنت احتاج معلومات عن شركه كوم كاست ....شكراً اعطتني خلفيه عنها

يعطيك الف عاااااااافيه

تــم آلحفظ في آلمفضلــــه ..

ألف شكر لكـ ,, إلى آلآن صفحــه كآمله من آلموآضيع من وجهــة نظري مآفيهآ أي موضوع مفيــد إلآ موضوعكـ ..
تستحق آلشكر ..
ربي يوفقكـ ويتمم لكـ على خيـــر .. وربي ييسر أمركـ وأمرنآ ..

الله يجزاكم خير على مروركم و ردودكم و اضافاتكم, وانا سعيد بان الموضوع افادكم و فخور ان البعض اضاف الموضوع للمفضله. والحمد لله اني استعطت اوصل الهدف الاساسي للموضوع الا وهو انك تستفيد الفائده الكامله من كل (دلر:) ) تصرفه لاي خدمه بدل ما يقعد الواحد ينقهر بعدين ويقول ليت ما ليت. فالباقات اللي يحطونها ليست نهائيه بل هدفها الاساسي هو جذب انتباه العميل, عاد العميل اذا شاف قابلية الشركه للمرونه و ذلك بطرح عروض وما شابه يكون يحاول العميل يصيغ (باقته الخاصه), يعني يضيف اشياء و يتشرط في اشياء اخرى و يحذف اشياء و كل شيء يكون متأكد منه قبل يدفع او يوقّع على اي شي.

وبالطبع الاشياء هذي اشياء ثانويه تساعد على ترفيه الشخص اكثر من انها شيء رئيسي و لكن الترفيه مطلوب لتحقيق الفائده القصوى من الدراسه. اسأل الله ان يوفقنا اجمعين لما يحب و يرضى.

السلام عليكم
انا في اوستن تكساس
طبعا بالنسبة للكهرب ماعندهم الا شركة وحده اسمها اوستن اينيرجي
والتلفزيون والنت في اكثر من شركة وانا مشترك في تايم وارنر وصراحه النت مو كويس نوعا ما

الحين بنقل لمدينه دالاس
فيها اكثر من شركة للكهرب
السكن نصحني ب شركة Rates & Plans | Ambit Energy
ياليت الي عنده خبره يدخل الموقع ويشوف ايش افضل باقي مناسبه لي لانه لغتي مو داك الزود

وكمان شركة التلفزيون والنت
ياليت الي يعرف شي بدالاس يفيدني
وجزاكم الله خير

موضوعك دليل على إنك إنسان ماشي على مبدأ
" حب لأخيك المسلم ماتحب لنفسك "
بس اللي عجبني اكثر ردك على كل من ابدى إعجابه بموضوعك
فعلا رسمت لك في بالي صورة راقية


أتمنى لك التوفيق . .

الصراحة الموضوع شنب, وفيه حركات فلة.

يلا الله يستر نسوي زيك و نلعن جدف موظف كومكاست.